ᖃᒪᓂᑦᑐᐊᖅ ᐃᓚᐅᖃᑕᐅᓕᖅᐳᑦ ᐊᕐᕕᐊᓂ ᐊᒻᒪ ᑲᖏᖅᖠᓂᕐᒥ ᐊᑐᓕᖅᑎᑦᑎᓂᕐᒧᑦ ᕼᐋᒻᓚᐅᔪᒥ ᐋᓐᓂᐊᓕᕇᒃᑯᑎᒧᑦ ᐃᓯᕈᓐᓇᐅᑎᖓᓂ.

“ᑲᑎᒪᔩᑦ ᐃᒃᐱᒍᓱᓚᐅᖅᐳᑦ ᐱᒻᒪᕆᐅᓂᖓᓂ ᐃᓕᓯᓂᕐᒥ ᐋᓐᓂᐊᓕᕇᒃᑯᓯᖅᓯᒪᔪᑐᐊᓂ ᐃᓄᖕᓂ ᐃᓯᕈᓐᓇᕐᓂᖏᓐᓂ ᐃᓄᓕᒫᓄᑦ ᕼᐋᒻᓚᐅᔪᓂ ᐃᓂᐅᔪᓂ ᓲᕐᓗ ᐊᓐᓂᑭᑕᕐᕕᖕᒥ ᐊᒻᒪ ᐱᙳᐊᕐᕕᖕᓄᑦ,” ᐅᖃᓚᐅᖅᐳᖅ ᓯᐅᓪᑎᓐ ᑐᐊᕆ, ᓄᓇᓕᖕᓂ ᐊᐅᓚᑦᑎᔨᐅᔪᖅ ᕼᐋᒻᓚᒃᑯᓐᓂ.

ᐊᓂᒍᖅᑕᐅᑐᐊᕐᒪᑦ, ᒪᓕᒐᕋᓛᖅ ᐃᕐᙲᓐᓇᑲᐅᑎᒋ ᐊᑐᓕᓚᐅᖅᐳᖅ ᔭᓄᐊᕆ 20–ᒥ, ᐊᒻᒪ ᓂᕕᙵᖅᑕᐅᓚᐅᖅᐳᖅ ᕼᐋᒻᓚᒃᑯᑦ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᖓᓄᑦ ᔭᓄᐊᕆ 27–ᒥ.

ᐅᖃᖅᓯᒪᕗᖅ ᑭᒃᑯᓕᒫᑦ 5-ᓂ ᐊᒻᒪ ᐅᖓᑖᓄᑦ ᑕᑯᑎᑦᑎᔭᕆᐊᖃᕐᓂᖏᓐᓂ ᓇᓕᖅᑲᖓᓂ ᐋᓐᓂᐊᓕᕇᒃᑯᓯᖅᓯᒪᓂᕐᒥ – ᑐᑭᖃᖅᑐᒥ ᒪᕐᕉᖕᓂ ᑲᐱᔭᐅᓯᒪᓂᖓᓂ ᓄᕙᒡᔪᐊᕐᓇᖅ-19–ᒧᑦ ᐋᓐᓂᐊᓕᕇᒃᑯᑎᒥᑦ – ᐃᓯᕈᓐᓇᕐᓂᕐᒧᑦ ᐃᓄᓕᒫᓄᑦ ᐊᑐᐃᓐᓇᐅᔪᓄᑦ ᕼᐋᒻᓚᒃᑯᑦ ᐃᒡᓗᖁᑎᖏᓐᓄᑦ, ᐃᓚᖃᖅᑐᒥ ᑕᒪᒃᑭᓂ ᖃᓄᐃᓐᓂᐅᔪᓂ ᐃᓗᐊᓃᑦᑐᓂ, ᐱᙴᓂ ᐱᙳᐊᕐᓂᕐᓄᑦ, ᓂᕆᕕᒡᔪᐊᖅᑎᑦᑎᓂᐅᔪᓂ, ᐱᙳᐊᕐᓂᕐᓂ ᐊᒻᒪ ᐃᓄᓕᒫᓄᑦ ᑲᑎᒪᑎᑕᐅᓂᐅᔪᓂ.

ᐋᓐᓂᐊᓕᕇᒃᑯᓯᖅᓯᒪᙱᑦᑐᓂ ᐃᓄᖕᓂ ᐃᓯᕈᓐᓇᖅᑎᑕᐅᔾᔮᙱᓚᑦ ᕼᐋᒻᓚᒃᑯᑦ ᑎᑎᕋᕐᕕᖓᓄᑦ ᐊᑭᓖᔭᖅᑐᖅᑐᓂ, ᑐᒃᓯᕋᕐᓂᕐᒧᑦ ᐱᔪᓐᓇᐅᒻᒥ ᐅᕝᕙᓘᓐᓃᑦ ᐱᓇᓱᐊᕐᓂᕐᒥ ᐊᓯᐊᓂ ᐱᓕᕆᐊᖑᔪᒥ ᐅᕝᕙᓘᓐᓃᑦ ᐱᔨᑦᑎᕋᕐᓂᐅᔪᒥ. ᓵᙵᔭᐅᔾᔪᑎᓂ ᐃᓚᖃᖅᐳᖅ ᒥᑭᓛᖓᓂ $250–ᒥ ᓯᕗᓪᓕᖅᐹᖑᔪᒥ ᓱᕋᐃᓂᐅᔪᒥ, ᑎᑭᐅᒪᔪᒧᑦ $750–ᒥ ᒪᕐᕈᖓᓄᑦ ᐊᒻᒪ ᑎᑭᐅᒪᔪᒧᑦ $2,250–ᒥ ᐊᑐᓂ ᒪᓕᒃᑐᓄᑦ ᓱᕋᐃᓂᐅᔪᓂ.

ᒪᓕᒐᕋᓛᖅ ᐊᑐᕐᓂᐊᖅᐳᖅ ᑭᓯᐊᓂ ᖁᔭᓈᖅᑕᐅᒍᓂ ᐅᕝᕙᓘᓐᓃᑦ ᓄᓇᕗᒻᒥ ᒐᕙᒪᒃᑯᑦ ᐃᓱᓕᑎᒍᓂ ᓄᕙᒡᔪᐊᕐᓇᖅ–19–ᒥ ᑐᐊᕕᕐᓇᕐᓂᖓᓂ ᑕᐃᓯᓯᒪᓂᖓᓂ.

ᑐᐊᕆ ᐅᖃᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᖃᓱᑎᑦᑎᓯᒪᒐᓗᐊᖅᑎᓪᓗᒋᑦ ᐃᓚᖏᓐᓂ ᑭᒡᓕᖃᖅᑎᑕᐅᓂᐅᔪᓂ, ᕼᐋᒻᓚᒃᑯᑦ ᓱᓕ ᑲᒪᒋᔭᖃᖅᐳᖅ ᐊᐃᑦᑐᐃᓂᐅᔪᓂ ᐊᒻᒪᓗ ᒪᑐᐃᖅᓯᓯᒪᙱᓚᑦ ᓱᓕ ᐱᙳᐊᖅᑐᓕᕆᓂᐅᔪᓂ ᐃᒡᓗᖁᑎᖏᓐᓂ. ᐅᖃᓚᐅᖅᐳᖅ ᐃᖅᑲᓇᐃᔭᖅᑎᑦ ᐱᓕᕆᕙᓪᓕᐊᓕᖅᐳᑦ ᖃᓄᖅ ᒪᑐᐃᖅᓯᒃᑲᓐᓂᕐᓂᐅᔪᒥ ᐊᑦᑕᓇᙱᑦᑐᒥ, ᒪᓕᒡᓗᑎᒃ ᐃᓐᓄᒍᓐᓇᕐᓂᖓᓂ ᑭᒡᓕᐅᔪᓄᑦ ᐊᒻᒪ ᐊᑐᖅᑎᑦᑎᓗᑎᒃ ᐋᓐᓂᐊᓕᕇᒃᑯᓯᖅᓯᒪᓂᕐᒥ ᐱᔭᕆᐊᖃᕐᓂᐅᔪᓂᑦ.

ᐊᐱᕆᔭᐅᒐᒥ ᖃᓄᐃᒻᒪᑦ ᕼᐋᒻᓚᒃᑯᑦ ᐊᑐᓕᖅᑎᑦᑎᓚᐅᕐᓂᖏᓐᓂ ᐆᒥᖓ ᒪᓕᒐᕋᓛᒥ, ᑐᐊᕆ ᑭᐅᓚᐅᖅᐳᖅ, “ᖃᐅᑕᒫᑦ ᑐᓴᖅᐸᒃᐳᒍᑦ ᑐᓴᒐᒃᓴᓕᐊᓂ ᐊᒻᒪ ᑕᑯᓲᖑᕗᒍᑦ ᑎᑎᕋᖅᓯᒪᓂᐅᔪᓂ ᓄᓇᕗᒻᒥ ᒐᕙᒪᒃᑯᑦ ᖁᕝᕙᖅᓴᐃᓂᖏᓐᓂ ᐋᓐᓂᐊᓕᕇᒃᑯᓯᖅᓯᒪᓂᕐᓂ. ᑕᐃᒫᒃ ᐅᓇ ᑲᑎᒪᔨᐅᔪᓄᑦ ᖃᒪᓂᑦᑐᐊᕐᒥ ᐃᓱᒪᓕᐊᕆᔭᖓ ᐊᖏᒡᓕᒋᐊᖅᑎᑦᑎᓂᖓᓂ ᓄᓇᕗᒻᒥ ᒐᕙᒪᒃᑯᑦ ᐅᖃᖅᑕᖓᓂ.”

ᐅᖃᓚᐅᖅᐳᖅ ᐱᓕᕆᓇᓱᐊᖅᐳᑦ ᐊᖏᒡᓕᒋᐊᖅᓯᓂᕐᒥ ᐋᓐᓂᐊᓕᕇᒃᑯᑎᒧᑦ ᐱᓕᕆᓂᐅᔪᒥ ᐊᒻᒪ ᓄᖅᑲᖅᑎᑦᑎᓂᕐᒥ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ.

ᑭᒃᑯᓕᒫᑦ ᑲᐱᔭᐅᕙᒌᓚᐅᕈᑎᒃ ᐱᒋᐊᖅᑎᓪᓗᒍ, ᐅᖃᐅᓯᐅᓪᓗᓂ ᐅᖃᐅᓯᕆᔭᒥᓂᑦ, ᐊᐃᑦᑐᐃᓂᖃᕋᔭᓚᐅᙱᓚᖅ,” ᐅᖃᓚᐅᖅᐳᖅ ᑐᐊᕆ, ᐅᖃᖅᖢᓂᓗ ᓘᒃᑖᖑᙱᓐᓂᖓᓂ.

ᐃᓚᒋᐊᖅᓯᓚᐅᖅᐳᖅ ᑲᑎᒪᔨᒃᑯᑦ ᖃᓄᐃᓕᐅᖅᑎᑦᑎᓇᓱᐊᖅᐳᑦ ᐊᒻᒪ ᐱᓕᕆᓗᑎᒃ ᐃᓚᒋᔭᐅᔪᑦ ᐃᒃᐱᒋᔭᖏᓐᓂ ᓈᒻᒪᖕᓂᖓᓂ, ᐊᒻᒪᓗ ᑐᑭᓕᐊᕐᓂᖃᖅᐳᖅ ᐊᓯᖏᓐᓂ ᓇᓕᖅᑲᖓᓂ-ᐋᓐᓂᐊᓕᕇᒃᑯᓯᖅᓯᒪᓂᕐᒥ ᐱᔭᕆᐊᖃᕐᓂᐅᔪᓂ ᑲᓇᑕᒥ, ᓲᕐᓗ ᑕᐃᒃᑯᓄᖓ ᐃᑭᔪᓐᓇᕐᓂᕐᒧᑦ ᖃᖓᑕᓲᒥᒃ.

“ᐱᐅᓂᖅᓴᐅᕗᖅ ᐆᒃᑐᕐᓂᕐᒥ ᑭᓱᑐᐃᓐᓇᒥᒃ ᐊᒑᖕᓄᑦ ᐃᒃᓯᕚᑐᐃᓐᓇᕐᓂᐅᔪᒥ ᐊᒻᒪ ᖃᓄᐃᓕᐅᙱᓪᓗᓂ,” ᐅᖃᓚᐅᖅᐳᖅ ᑐᐊᕆ.

ᑐᒃᓯᕋᕐᓂᐅᔪᑦ ᐃᓅᓕᓴᖅᑕᐅᓂᕐᒧᑦ ᐅᕝᕙᓘᓐᓃᑦ ᐃᓄᖕᓄᑦ ᐱᔪᓐᓇᕐᓂᕆᔭᖏᓐᓂ ᐱᙱᑎᑕᐅᓂᐅᔪᓂ ᐱᔭᕆᐊᖃᕐᓂᐅᔪᒧᑦ ᐱᓕᕆᐊᖑᔭᕆᐊᖃᖅᐳᖅ ᑎᑎᕋᕐᓂᒃᑯᑦ ᓄᓇᓕᖕᓂ ᐊᐅᓚᑦᑎᔨᐅᔪᒧᑦ.

ᒪᐃᔭ ᕆᑦᓱᑦ ᐊᒃᓵᓂᒧᑦ ᑭᐅᓚᐅᙱᓚᖅ ᐊᐱᖅᓱᖅᑕᐅᓂᐅᔪᓂ ᑐᒃᓯᕋᕐᓂᐅᔪᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓂ.

Leave a comment

Your email address will not be published. Required fields are marked *