ᐃᖃᓗᐃᑦ ᐊᑭᑭᑦᑐᒃᑯᕕᒃ ᓂᐅᕕᕐᕕᖃᙱᑐᐃᓐᓇᕆᐊᖃᖅᐳᖅ ᑕᖅᑭᓂ ᒪᕐᕉᖕᓂ ᖃᔪᖅᑐᕐᕕᒃ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᒃ ᐃᓂᖓᓂ ᓇᖕᒥᓂᖃᖅᑎᐅᔪᖅ ᐃᒡᓗᕐᔪᐊᒥ 655–ᒥ, ᑐᓂᓯᓯᒪᕗᖅ ᐱᕕᓃᑦ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥ ᑕᖅᑭᓂᒃ ᒪᕐᕉᖕᓂ ᐊᓂᔭᕆᐊᖃᕐᓂᖏᓐᓂ.
ᓂᕆᐅᒋᔭᐅᓚᐅᙱᑉᐳᖅ ᐃᓚᒋᔭᐅᔪᓂ ᐱᕕᓃᑦ ᑲᑐᔾᔨᖃᑎᒌᖑᔪᓄᑦ, ᐊᐅᓚᑦᑎᓯᒪᔪᓂ ᐱᕕᓃᑦ ᐊᑭᑭᑦᑐᒃᑯᕕᒃ ᓂᐅᕕᕐᕕᖓᓂ ᑕᐃᒪᙵᓂ 2009–ᒥ.
“ᑕᖅᑭᓂ ᒪᕐᕉᖕᓂ ᐅᖃᐅᔾᔨᓂᐅᕗᖅ ᐃᒡᓗᕐᔪᐊᒦᓯᒪᑎᓪᓗᑕ ᐊᕐᕌᒍᓄᑦ 12–ᓄᑦ, ᑕᒪᓐᓇ ᐅᕙᑦᑎᓐᓄᑦ ᐊᐃᑦᑖᕈᓱᒡᔪᐊᕐᓇᖅᐳᖅ,” ᐅᖃᓚᐅᖅᐳᖅ ᓕᓐᑕ ᕼᐋᒻ, ᑮᓇᐅᔭᓕᕆᔨ ᐱᕕᓃᑦ ᑲᑐᔾᔨᖃᑎᒌᕐᑯᓐᓄᑦ, ᐃᓚᐅᖃᑕᐅᓯᒪᔪᖅ ᓂᐅᕕᕐᕕᖕᒥ ᑕᐃᒪᙵᓂ ᒪᑐᐃᓚᐅᖅᑎᓪᓗᒍ.
ᕿᓚᒻᒥᐅᓗᐊᒻᒪᕆᒃᐳᖅ ᓇᓂᓯᓇᓱᐊᕐᓂᕐᒥ ᐊᓯᐊᓂ ᐃᓂᒃᓴᐅᔪᒥ ᓄᓇᓕᐸᐅᔭᒥ ᐊᒥᒐᕐᓂᖃᖅᑐᒥ ᓄᓇᒥ ᐊᑐᖅᑐᐊᒐᒃᓴᓂ, ᐅᖃᓚᐅᖅᐳᖅ ᑭᒡᒐᖅᑐᐃᔨᐅᔪᑦ ᐱᕕᓃᒃᑯᓐᓂ, ᐃᓚᒋᐊᖅᓯᓪᓗᓂ ᐊᕐᕌᒍᐸᓗᓪᓗᐊᒥ ᐱᔭᕆᐊᖃᕋᔭᖅᐳᑦ ᓇᓂᓯᒃᑲᓐᓂᕐᓂᕐᒥ ᐊᓯᐊᓂ ᐃᓂᒃᓴᐅᔪᒥ.
ᐃᓂᒃᓴᖃᙱᓗᐊᕐᓂᖓᓂ, ᐱᓗᐊᖅᑐᒥ ᑕᐅᓇᓂ ᓄᓇᓕᖕᓂ ᕿᑎᐊᓂ, ᐱᔾᔪᑎᒋᔭᐅᒋᕗᖅ ᓂᕿᑖᕐᕕᒃ ᐊᓂᑎᑕᐅᓇᓱᐊᖅᐳᑦ, ᒫᓐᓇᓕᓴᐅᔪᒥ ᐱᓚᐅᕐᓂᖏᓐᓂ ᑐᓂᕐᕈᑎᑖᖅᓯᒪᓪᓗᑎᒃ ᐊᖏᒡᓕᒋᐊᖅᑎᑦᑎᓂᕐᒧᑦ ᐱᓕᕆᐊᕆᔭᖏᓐᓂ ᑕᖅᑭᐅᔪᓄᑦ ᑎᑭᓐᓂᐊᖅᑐᓄᑦ.
“ᐅᖃᐅᓯᒃᓴᓕᐅᓛᖅᐳᒍᑦ ᐃᓚᖏᓐᓂ ᐱᓕᕆᐊᖑᓂᐊᖅᑐᓄᑦ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᓂᐊᖅᑐᓂ. ᒫᓐᓇᐅᔪᒥ, ᐅᖃᒃᑲᓐᓂᕈᓐᓇᙱᓚᖓ ᑖᔅᓱᒪ ᐅᖓᑖᓄᑦ,” ᐅᖃᓚᐅᖅᐳᖅ ᕋᐃᑦᓱᓪ ᐸᓚᐃᔅ, ᐃᓱᒻᒥᖅᑐᐃᔨ ᖃᔪᖅᑐᕐᕕᒃ ᓄᓇᓕᖕᓂ ᐊᔪᖅᓴᖅᑐᓄᑦ ᓂᕿᑖᕐᕕᖓᓂ. “ᐱᕕᒃᓴᖃᓚᐅᙱᓚᒍᑦ ᐱᒋᐊᖅᑎᑦᑎᓂᕐᒥ ᐱᓕᕆᐊᕆᓂᐊᖅᑕᑦᑎᓐᓂ ᕿᓚᒻᒥᐅᓛᖑᔪᒥ.”
ᐸᓚᐃᔅ ᐅᖃᓚᐅᖅᐳᖅ ᑲᑐᔾᔨᖃᑎᒌᖑᔪᑦ ᑐᓂᓯᑐᐃᓐᓇᕆᐊᖃᖅᐳᑦ ᑕᖅᑭᒥ ᓯᕗᓂᐊᓂ ᐅᖃᐅᔾᔨᓂᐅᔪᒥ, ᓂᕈᐊᓚᐅᖅᐳᑦ ᑐᓂᓯᒃᑲᓐᓂᕐᓂᖏᓐᓂ ᑕᖅᑭᒃᑲᓐᓂᕐᒥ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥ ᐱᕕᒃᓴᖃᒃᑲᓐᓂᖁᓪᓗᒋᑦ ᓇᓂᓯᓂᕐᒥ ᓄᑖᒥᒃ ᐃᓂᒃᓴᐅᔪᒥ.
ᕼᐋᒻ ᐊᒻᒪ ᐊᓃᑲ ᐸᐃᓴᒃ, ᑲᑎᒪᔨᐅᖃᑕᐅᔪᖅ/ᐊᑭᓕᖅᓱᖅᑕᐅᓇᓂ ᐃᑲᔪᖅᐸᒃᑐᖅ ᑲᒪᔨᐅᔪᖅ ᐱᕕᓃᑦ ᑲᑐᔾᔨᖃᑎᒌᖏᓐᓄᑦ, ᐅᖃᓚᐅᖅᐳᖅ ᐊᓂᔭᕆᐊᖃᕐᓂᕐᒧᑦ ᐅᖃᐅᔾᔨᓂᐅᔪᖅ ᐃᓕᓯᕗᖅ ᐱᕕᓃᒃᑯᓐᓂ ᓴᐱᕐᓇᕐᓂᐅᔪᒥ.
“ᐊᑭᓖᔪᓐᓇᙱᓚᒍᑦ $12,000 ᑕᖅᑭᑕᒫᒥ ᓂᐅᕕᕐᕕᒃᓴᐅᔪᒧᑦ ᐃᒡᓗᒧᖅ ᐊᑐᖅᑐᐊᕐᓂᐅᔪᒥ,” ᐅᖃᓚᐅᖅᐳᖅ ᕼᐋᒻ, ᐃᓚᒋᐊᖅᓯᓪᓗᓂ ᒫᓐᓇᐅᔪᒥ ᐱᕕᓃᑦ ᐊᑭᓖᓲᖑᕗᑦ $2,600–ᐸᓗᖕᓂ ᑕᖅᑭᑕᒫᒥ ᐊᑐᖅᑐᐊᕐᓂᕐᒧᑦ ᐃᒡᓗᕐᔪᐊᖅ 655–ᒥ.
ᐸᓚᐃᔅ ᐅᖃᓪᓚᖕᓂᖃᓚᐅᖅᐳᖅ ᐱᓕᕆᓂᕐᒥ “ᓱᖏᐅᔾᔨᓂᐅᔪᒥ ᐋᖅᑭᒍᑎᒃᓴᒥ” ᑲᑐᔾᔨᓗᑎᒃ ᐱᔪᓐᓇᖅᑎᑦᑎᓂᕐᒧᑦ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥᒐᓚᒃ ᐱᔨᑦᑎᕋᕐᓂᐅᔪᒥ ᐃᖏᕐᕋᐃᓐᓇᕐᓂᖓᓂ ᐃᓱᒪᒋᓇᒍ ᐊᓯᔾᔨᕐᓂᐅᓂᐊᖅᑐᓄᑦ ᓯᕗᓂᒃᓴᒧᑦ.
“ᑲᑐᔾᔨᓗᑕ ᐱᓕᕆᖃᑎᖃᕈᒪᑦᑎᐊᖅᐳᒍᑦ ᐊᒻᒪᓗ ᐱᓕᕆᖃᑎᖃᕐᓗᑕ ᐱᕕᓃᑦ ᑲᑐᔾᔨᖃᑎᒌᖏᓐᓄᑦ ᐋᖅᑭᒍᑎᒃᓴᒥ ᐱᓕᕆᑦᑎᐊᕈᓐᓇᕋᔭᖅᑐᒥ ᑕᒪᒃᑭᓄᑦ ᑲᑐᔾᔨᖃᑎᒌᖑᔪᓄᑦ,” ᐅᖃᓚᐅᖅᐳᖅ.
ᐱᕕᓃᑕᖃᕈᓂ ᐋᒃᑲᓘᓐᓃᑦ, ᐊᔪᖅᓴᖅᑐᓄᑦ ᓂᕿᑖᕐᕕᒃ ᐊᑐᐃᓐᓇᖃᖅᑎᑦᑎᓂᐊᖅᐳᖅ ᐃᓚᖓᒍᑦ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥ ᐱᔨᑦᑎᕋᕐᓂᐅᔪᒥ, ᐅᖃᐅᓯᐅᓪᓗᓂ ᐸᓚᐃᔅᒧᑦ.
“ᐱᕕᓃᑦ ᐅᕙᑦᑎᓐᓂ ᑲᑐᔾᔨᖃᑎᒌᒍᒪᙱᑉᐸᑕ, ᐸᕐᓇᒃᓯᒪᕗᒍᑦ ᓯᕗᒻᒧᑦ ᐃᖏᕐᕋᓂᕐᒧᑦ ᐊᒻᒪ ᐊᑐᐃᓐᓇᖃᖅᑎᑦᑎᓗᑕ ᓱᖏᐅᔾᔨᓯᒪᓂᕐᒥ ᐱᔨᑦᑎᕋᕐᓂᐅᔪᒥ ᓄᓇᓕᖕᔪᓄᑦ ᐃᓚᐅᖏᓪᓗᑎᒃ,” ᐅᖃᓚᐅᖅᐳᖅ ᐸᓚᐃᔅ.
ᐱᕕᓃᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑏᑦ ᐱᒋᐊᖅᑎᑦᑎᓯᒪᕗᑦ ᑐᒃᓯᕋᐅᑎᒥ ᑎᑎᖅᑲᒥ ᐊᑎᓕᐅᖅᑕᐅᓯᒪᔪᒥ ᑕᒪᒃᑭᓄᑦ ᖃᕋᓴᐅᔭᑎᒍᑦ ᐊᒻᒪᓗ ᓄᓇᓕᖕᓂ ᑲᑐᔾᔨᖃᑎᒌᒃᑯᑦ ᒫᓐᓇᐅᔪᒥ ᐃᓂᒋᔭᖓᓂ ᐊᑯᓂᐅᓂᖅᓴᒥ, ᐊᕐᕌᒍᓪᓗᐊᐸᓗᖕᒥ.
“ᑲᓱᕐᕕᒃᑕᖃᖅᐳᖅ ᕙᐃᔅᐳᒃᑯᑦ ᒪᒃᐱᖅᑐᒐᑦᑎᓐᓂ ᒫᓐᓇᐅᔪᒥ ᐃᓄᐃᑦ ᐊᑎᓕᐅᕆᔪᓐᓇᕐᓂᖓᓂ ᖃᕋᓴᐅᔭᑎᒍᑦ ᐃᑲᔪᖅᓱᐃᓂᕐᒥ ᐱᓕᕆᐊᕆᓇᓱᒃᑕᑦᑎᓐᓂ,” ᐅᖃᓚᐅᖅᐳᖅ ᐸᐃᓴᒃ.
ᑐᒃᓯᕋᐅᑎᒥ ᑎᑎᖅᑲᒥ ᐊᑎᓕᐅᖅᑕᐅᓯᒪᔪᒥ ᐊᒃᑐᐃᓂᖃᔾᔮᙱᓚᖅ ᓂᕿᑖᕐᕕᐅᑉ ᐃᓱᒪᓕᐊᖓᓐᓂ, ᑭᓯᐊᓂ, ᐸᓚᐃᔅ ᐅᖃᓚᐅᖅᐳᖅ.
“ᐋᒃᑲ, ᐊᐃᑦᑖᖑᒐᓗᐊᖅ, ᐃᓂᒃᓴᖃᒃᑲᓐᓂᕆᐊᖃᖅᐳᒍᑦ ᐱᓕᕆᐊᕆᓂᐊᖅᑕᑦᑎᓐᓄᑦ,” ᐅᖃᓚᐅᖅᐳᖅ.
ᖁᑦᑎᒃᑐᒥ–ᐊᑭᖓᓐᓂ ᐆᒪᓇᓱᐊᕐᓂᕐᒥ ᐅᑭᐅᖅᑕᖅᑐᒥ ᐱᕕᓂᒃᑯᓐᓂ ᐃᓱᒫᓗᒃᑎᑦᑎᕗᖅ ᐊᒥᓱᐃᑦ ᐊᑭᑐᓗᐊᙱᑦᑐᓂ ᐊᓐᓄᕌᖅᑖᕐᕕᖃᔾᔮᕈᓐᓃᕐᓂᖏᓐᓂ ᑕᐃᒪᐃᒐᔪᖕᓂᐅᔪᒥ.
“ᑕᒪᕐᒥᒐᓚᐃᑦ ᓂᐅᕕᕆᐊᖅᐸᒃᑐᓂ ᐃᓅᕗᑦ. ᐊᒥᓱᐃᑦ, ᐊᒥᓱᐃᑦ ᐃᓚᒌᑦ ᖃᐃᕙᒃᐳᑦ … ᐊᓐᓄᕌᖅᑖᖅᑎᑦᑎᔪᓐᓇᖅᐳᑎᑦ ᐃᓚᓕᒫᖕᓂᑦ $30–ᒧᑦ – ᐊᑕᐅᓯᑐᐊᖅ ᐊᓐᓄᕌᖅ ᓂᐅᕕᖅᑎᒃᑯᓐᓂ ᐊᑭᖃᕈᓐᓇᖅᐳᖅ $30–ᒥ. ᐃᓄᖕᓄᑦ ᓂᐅᕕᕈᓐᓇᖅᑎᑦᑎᓲᖑᕗᖅ ᐊᑭᑐᓗᐊᙱᑦᑐᒥ,” ᐅᖃᓚᐅᖅᐳᖅ ᕼᐋᒻ. “ᐱᐅᙱᓛᖑᔪᒥ ᖃᓄᐃᓕᖓᓂᐅᔪᓐᓇᖅᑐᒥ, ᐊᓂᑕᐅᓪᓚᕆᒃᑯᑦᑕ ᑕᖅᑭᓂ ᒪᕐᕉᖕᓂ, ᐊᑐᖅᑐᐊᕐᓂᐊᖅᐳᒍᑦ ᖃᔅᓯᐊᕐᔪᖕᓂ ᐅᒥᐊᕐᔪᐊᒃᑰᕈᑕᐅᓲᓂ ᐴᕆᔭᐅᓲᓂᒃ (ᑐᖅᑯᐃᓂᕐᒧᑦ) ᐊᒻᒪ ᐃᒻᒪᖄ ᒪᑐᓗᑕ ᑭᓯᐊᓂ ᐊᓯᐊᓂ ᓇᓂᓯᒍᑦᑕ ᐃᓂᒃᓴᐅᔪᒥ.”
ᓄᓇᓕᖕᓂ ᐃᑲᔪᖅᓱᐃᓂᐅᔪᖅ ᐱᕕᓃᒃᑯᓐᓄᑦ ᒫᓐᓇᒧᑦ ᑎᑭᖦᖢᒍ ᑲᑐᔾᔨᖃᑎᒌᒃᑯᓐᓂ ᓂᕆᐅᖕᓂᖃᖅᑎᑦᑎᕗᖅ ᐊᓂᔭᕆᐊᖃᕐᓂᐅᔪᒥᐲᖅᑕᐅᓂᖓᓂ.
“ᑭᒃᑯᓕᒫᑦ ᐅᖃᐅᑎᓯᒪᔭᒃᑲ ᐅᓪᓗᒥ ᒪᒥᐊᓐᓂᖃᕐᔪᐊᖅᐳᑦ ᐊᒻᒪ ᐃᑲᔪᖅᓱᐃᕗᑦ,” ᐅᖃᓚᐅᖅᐳᖅ ᐸᐃᓴᒃ, ᐅᖃᕆᐊᖅᖢᓂ ᐊᒥᓱᓂ ᐊᑎᓕᐅᕆᓂᕐᓂ ᑲᑎᖅᓱᐃᓚᐅᖅᐳᑦ ᑐᒃᓯᕋᐅᑎᒥ ᑎᑎᖅᑲᒥ ᐊᑎᓕᐅᖅᑕᐅᓯᒪᔪᒥ ᓯᕙᑖᕐᕕᒥᑐᐊᖅ.
ᐊᓯᐊᒎᖅᑐᒥ ᐊᑭᓖᓂᕐᒥ ᐃᒡᓗᒧᑦ ᐊᑐᖅᑐᐊᕐᓂᕐᒧᑦ ᐊᒻᒪ ᓱᓇᒃᑯᑖᓄᑦ, ᑕᒪᒃᑭᑦ ᑮᓇᐅᔭᓕᐊᑦ ᐱᕕᓂᒃᑯᑎᒍᑦ ᐊᓯᖏᓐᓄᑦ ᑐᓂᔭᐅᓲᖑᕗᑦ, ᐅᖃᓚᐅᖅᐳᖅ ᕼᐋᒻ. ᐱᕕᓃᑦ ᒫᓐᓇᓕᓴᐅᔪᒥ ᐋᖅᑭᒃᓯᒋᐊᓪᓚᓚᐅᖅᐳᑦ ᐱᓕᕆᐊᖏᓐᓂ ᑐᓂᓯᓂᕐᒧᑦ ᐊᒥᐊᒃᑯᕐᔪᐊᖅᑐᓂ ᐊᓐᓄᕌᓂ ᓄᓇᓕᐅᔪᓄᑦ ᐃᖃᓗᐃᑦ ᓯᓚᑖᓄᑦ.
“ᐃᖃᓗᖕᓂᑐᐊᖑᙱᓚᖅ ᐊᒃᑐᖅᑕᐅᓂᖃᖅᑐᖅ, ᓄᓇᕗᓕᒫᖑᕗᖅ ᒪᑐᔭᕆᐊᖃᕈᑦᑕ,” ᐅᖃᓚᐅᖅᐳᖅ ᐸᐃᓴᒃ.
“ᑕᐃᒪᐃᓚᐅᖅᑳᕋᓂ, (ᐃᓄᐃᑦ) ᐅᕙᑦᑎᓐᓂ ᖁᔭᓕᕙᓚᐅᖅᐳᑦ ᐊᑭᓕᖅᓱᖅᑕᐅᓇᑕ ᐃᑲᔪᖅᐸᖕᓂᑦᑎᓐᓂ,” ᕼᐋᒻ ᐅᖃᓚᐅᖅᐳᖅ. “ᑐᙵᓇᓂᖃᕐᔪᐊᖅᐳᖅ ᐃᑲᔪᕈᒪᔪᓂ ᓄᓇᓕᖕᓂ.”
READ MORE: Iqaluit thrift store faces eviction, has nowhere to go