ᐱᓕᕆᕙᓪᓕᐊᓯᔪᑦ ᐅᓇᑕᖅᑐᒃᓴᕋᓛᑦ ᐱᓕᕆᕙᓪᓕᐊᔪᓐᓇᖅᓯᖁᑉᓗᒋᑦ ᖃᒪᓂ’ᑐᐊᕐᒥ.
“ᑕᑯᓯᒪᔭᒃᑯᑦ, ᐊᒥᒐᙱᑦᑐᑦ ᒪᒃᑯᒃᑐᑦ ᐱᔫᒥᒍᓱᒃᑐᑦ ᐅᓇᑕᖅᑐᒃᓴᕋᓛᓃᖃᑕᐅᓇᔭᕐᓂᕐᒧᑦ,” ᐅᐊHᐄᑦ ᔮᓐᓴᓐ ᐅᖃᖅᖢᓂ ᔭᓗᓇᐃᒥᐅᑕᖅ ᐅᓇᑕᖅᑐᒃᓴᕋᓛᓕᕆᔨᒃᑯᓐᓂᒃ ᑕᐃᒪᓐᓇ ᐅᖃᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. ᓄᕕᐱᕆ 12-ᒥ, ᔮᓐᓴᓐ ᑲᑎᒪᑎᑦᑎᓚᐅᖅᑐᖅ ᖃᒪᓂ’ᑐᐊᑉ ᐱᙳᐊᕐᕕᖓᓂᒃ ᑐᓴᕈᒪᑉᓗᓂ ᐱᔫᒥᒍᓱᒐᔭᖅᑐᓂᒃ ᑐᓴᖅᑎᑦᑎᔭᖅᑐᖅᖢᓂᓗ ᑐᓴᖅᑕᐅᔭᕆᐊᓕᖕᓂᒃ. ᐃᒻᒪᖄ 40 ᐅᐸᒍᑎᓚᐅᖅᑐᑦ, ᐃᓚᐅᖃᑕᐅᑉᓗᑎᒃ 7 ᐅᓇᑕᖅᑐᒃᓴᙳᐊᕋᓛᑦ.
“ᑕᐃᒪᐅᔪᑦ 70-ᓘᓐᓃᑦ ᐱᔫᒥᒍᓱᒃᑐᑦ ᒪᒃᑯᒃᑐᑦ ᐅᑭᐅᕆᔭᐅᔭᕆᐊᓕᖕᓂᒃ ᒪᓕᒃᑐᑦ ᑕᐃᒪᐅᑎᓪᓗᒋᑦ ᐃᒻᒪᖄ 250 ᒪᒃᑯᒃᑐᑦ ᓄᓇᓕᖕᒥ,” ᑕᐃᒪᓐᓇ ᐅᖃᖅᖢᓂ ᔮᓐᓴᓐ. “ᑕᐃᒪᐃᒻᒪᑦ, ᑕᐃᒪᐃᑦᑐᖃᕈᓐᓇᑦᑎᐊᖅᑐᖅ ᓄᓇᓕᖕᒥ. ᑕᐃᒪᐅᔪᑦ ᓄᓇᓕᖕᒥ ᐊᑭᓕᖅᑐᖅᑕᐅᓇᑎᒃ ᐱᓕᕆᔪᓐᓇᖅᑐᑦ ᐃᓐᓇᐃᑦ ᑲᑎᒪᔨᕋᓛᒃᓴᑦ, ᐊᒻᒪᓗ ᑕᐃᒪᐅᔪᑦ ᑲᓇᑕᒥ ᐅᓇᑕᖅᑐᒃᓴᕋᓛᒃᓴᑦ ᑎᑭᓐᓇᔭᖅᑐᑦ ᓯᕗᓕᖅᑎᐅᔭᖅᑐᕐᓗᑎᒃ.”
ᑲᑎᒪᖃᑎᒋᔭᕆᐊᖃᓕᕋᔭᖅᑕᖅᐳᑦ ᒪᐃᔭᐅᔪᖅ ᐊᒻᒪᓗ Hᐊᒻᓚᒃᑯᓐᓂᒃ ᑐᑭᒧᐊᒃᑎᑦᑎᔨ ᐊᒻᒪᓗ ᐋᖅᑭᒃᓯᓗᑕ ᓄᓇᓕᖕᒥ ᐃᑲᔫᑎᒃᓴᒥᒃ ᐱᖁᔨᕗᖔᕈᑎᒥᒃ ᐅᖃᖅᓯᒪᓗᓂ ᐃᑲᔪᖅᑐᖅᑕᐅᓂᖓᓄᑦ ᑕᒪᓐᓇ, ᔮᓐᓴᓐ ᑕᐃᒪᓐᓇ ᐅᖃᖅᖢᓂ. “ᐊᒻᒪᓗ ᐃᓕᓐᓂᐊᕐᕕᒋᓂᐊᖅᑕᖓᓂᒃ ᐱᑕᖃᕈᓐᓇᖁᑉᓗᒍ.”
ᑲᑎᒪᑎᓪᓗᒋᑦ, ᔮᓐᓴᓐ ᐅᖃᓪᓚᓚᐅᖅᑐᖅ ᖃᓄᐃᑦᑑᓂᐊᕐᒪᖔᑦ ᐃᓕᓐᓂᐊᕈᑎ, ᓱᓇᓂᒡᓗ ᒪᒃᑯᒃᑐᑦ ᐱᕕᒃᓴᖃᕋᔭᕐᒪᖔᑕ ᐊᒻᒪᓗ ᐱᓕᕆᖃᑎᒋᔭᐅᔪᓐᓇᖅᑐᑦ ᓄᓇᓕᖕᒥ ᐊᒻᒪᓗ ᑲᓇᑕᒥ ᐅᓇᑕᖅᑐᒃᓴᕋᓛᑦ, ᖃᒪᓂ’ᑐᐊᕐᒥ ᐅᓇᑕᖅᑐᒃᓴᕋᓛᖃᕐᒪᑦ.
“ᐅᖃᐅᓯᖃᓚᐅᕐᒥᔪᖓ ᑲᑎᒪᑎᓪᓗᑕ ᖃᓄᖅ ᐱᒻᒪᕆᐅᑎᒋᖕᒪᖔᑦ ᑕᒪᓐᓇ ᐅᓇᑕᖅᑐᒃᓵᓛᖑᓇᔭᖅᑐᑦ ᑲᓇᑕᒥ ᐱᑕᖃᓕᖅᐸᑦ, ᐃᓗᐃᑦᑐᒃᑯᑦ ᐃᓐᓇᐃᑦ ᑲᑎᒪᔨᕋᓛᖃᕐᒪᑕ,” ᑕᐃᒪᓐᓇ ᐅᖃᖅᖢᓂ. “ᐃᓱᒪᓕᐅᖅᑎᐅᓲᑦ ᖃᓄᐃᑦᑐᓂᒃ ᐃᓕᖅᑯᓯᑐᖃᑎᒍᑦ ᐃᓅᓯᒃᑯᓪᓗ ᑲᔪᓯᑎᑦᑎᔪᒪᖕᒪᖔᑕ ᓯᕗᓂᒃᓴᒥᓄᑦ ᑕᒡᕘᓇ ᐱᓕᕆᐊᖑᔪᒃᑯᑦ.”
ᒪᒃᑯᒃᑐᑦ ᐅᓇᑕᖅᑐᒃᓴᕋᓛᖑᔪᓐᓇᕐᓂᖏᑦ ᐱᒋᐊᕈᑕᐅᓯᒪᔪᖅ ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᓐᓄᑦ, ᐋᖅᑭᒃᓱᐃᓲᑦ, ᓴᓇᔨᖃᓲᑦ ᐊᒻᒪᓗ ᐊᓐᓄᕌᖅᑖᖅᑎᑦᑎᓲᑦ.
ᒪᒃᑯᒃᑐᑦ ᐅᓇᑕᖅᑐᒃᓴᕋᓛᑦ ᐃᓚᒋᔭᐅᖃᑕᐅᙱᑎᓪᓗᒋᑦ ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᖏᓐᓄᑦ, ᐅᓇᑕᖅᑐᒃᓴᐃᑦ ᐃᓕᓐᓂᐊᖅᑎᑦᑎᓲᑦ ᑮᓇᐅᔭᖅᑖᖅᑎᑦᑎᓲᓪᓗ, ᐃᓱᒪᓕᐅᖅᑏᓪᓗ ᓴᖅᑭᑎᑦᑎᓇᔭᕐᒪᖔᑕ ᓴᖅᑭᑎᑦᑎᓇᔭᙱᒻᒪᖔᑕᓘᓐᓃᑦ ᒪᒃᑯᒃᑐᑦ ᐅᓇᑕᖅᑐᒃᓴᕋᓛᖏᓐᓂᒃ ᑕᒪᒃᑯᐊ ᑲᒪᒋᔭᐅᓇᔭᖅᑐᑦ ᑲᒪᔨᓄᑦ, ᑕᐃᒪᓐᓇ ᐅᖃᖅᖢᓂ ᔮᓐᓴᓐ.
“ᑕᒪᓐᓇ ᐱᓕᕆᐊᖑᓇᔭᖅᑐᖅ ᐊᕐᕕᓂᓕᖕᓂᒃ ᑕᖅᑭᓂᒃ ᐅᕝᕙᓘᓐᓃᑦ ᐊᑕᐅᓯᕐᒥᒃ ᐅᑭᐅᒥᒃ,” ᑕᐃᒪᓐᓇ ᐅᖃᖅᖢᓂ. “ᒫᓐᓇᑲᐅᑎᒋᐊᓗᒃ ᓴᖅᑭᔾᔮᙱᑦᑐᖅ ᐊᖏᖅᑕᐅᓯᒪᓕᖅᐸᑦ.”
ᔮᓐᓴᓐ ᐅᖃᖅᖢᓂ ᒪᒃᑯᒃᑐᑦ ᐅᓇᑕᖅᑐᒃᓴᕋᓛᑦ ᐃᑲᔪᓲᑦ “ᐃᓱᒪᒃᑯᑦ ᑎᒥᒃᑯᓪᓗ ᖃᓄᐃᙱᑦᑐᓐᓇᖁᑉᓗᒋᑦ ᒪᒃᑯᒃᑐᑦ, ᓴᙱᔫᔪᓐᓇᖁᑉᓗᒋᑦ ᐃᓕᖅᑯᓯᑐᖃᑎᒍᑦ ᐊᒻᒪᓗ ᓄᓇᓕᕆᓂᒃᑯᑦ.”
ᖁᕕᐊᒋᓂᖅᐹᕆᔭᖓ ᑕᒡᕘᓇ ᐃᑲᔫᑎᒃᑯᑦ ᐊᐅᔭᐅᓕᕌᖓᑦ ᒪᒃᑯᒃᑐᑦ ᑕᒪᐃᓐᓂᒃ ᓄᓇᓕᖕᓂ ᐅᓇᑕᖅᑐᒃᓴᕋᓛᖃᖅᑐᓂᒃ ᑲᑎᑉᐸᖕᒪᑕ ᖁᑦᑎᖕᓂᖅᓴᒃᑯᑦ ᐃᓕᓐᓂᐊᖅᑎᑕᐅᑉᓗᑎᒃ, “ᐱᓕᕆᖃᑎᒌᒃᑐᓂᒃ ᑕᑯᑉᓗᓂ, ᑕᑯᖃᑦᑕᖅᖢᓂ ᐃᓚᓐᓈᖅᑖᖅᑐᖅᑐᓂᒃ ᐊᒻᒪᓗ ᐱᓕᕆᖃᑎᒌᒃᑐᓂᒃ ᐱᐊᓂᒃᓯᔪᓐᓇᖁᑉᓗᒋᑦ ᐱᔭᕆᐊᑐᔪᓂᒃ ᐊᑦᑕᓇᖅᑐᖃᙱᑦᑐᒃᑯᑦ ᐊᒻᒪᓗ ᐊᓕᐊᓇᐃᑦᑐᒃᑯᑦ. ᑕᑯᑉᓗᓂ ᖁᖓᔮᖅᑐᓂᒃ ᐊᒻᒪᓗ ᑕᐅᑐᒃᖢᒋᑦ ᐱᕈᖅᐸᓪᓕᐊᔪᑦ ᑲᙳᑦᑕᐅᓚᐅᖅᑐᑦ ᐃᓄᓕᕆᓂᖅᓴᐅᖃᑦᑕᓕᖅᑎᓪᓗᒋᑦ. ᐃᖕᒥᓂᒃ ᐅᒃᐱᕈᓱᒍᓐᓇᖅᓯᔪᑦ ᑕᑯᑉᓗᒋᑦ ᐊᒻᒪᓗ ᐱᐊᓂᒃᓯᔪᓐᓇᕐᓂᕐᒥᓂᒃ ᑕᑯᖃᑦᑕᖅᑎᓪᓗᒋᑦ ᐱᐊᓂᒃᑳᖓᑕ ᐃᓗᒃᑯᑦ ᐃᖢᐊᖅᓯᓐᓇᖅᑐᖅ.”