Skip to content

ᐊᐅᓱᐃᑦᑐᕐᒥ ᐃᓱᓕᑦᑎᔪᒥ ᑕᐅᑐᙳᐊᖅᐳᖅ ‘ᑎᑎᕋᕐᕕᖃᕐᓂᖓᓂ ᓄᓇᕐᔪᐊᑉ ᕿᓚᖓᓂ’

ᑕᐃᕕᑦ ᓄᑲᖅᖠᖅ (D.J.) ᐅᐊᑦᔅᑯ ᐱᓯᒪᕗᖅ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᓕᑦᑎᔾᔪᑎᖓᓂ. ᖃᖓᒃᑲᓐᓂᑭᐊᖅ, ᐃᓴᕈᖏᓐᓂ ᐱᓛᕈᒪᕗᖅ.
25622853_web1_210628-NUN-DJWatsko-INUK_1

ᑕᐃᕕᑦ ᓄᑲᖅᖠᖅ (D.J.) ᐅᐊᑦᔅᑯ ᐱᓯᒪᕗᖅ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᓕᑦᑎᔾᔪᑎᖓᓂ. ᖃᖓᒃᑲᓐᓂᑭᐊᖅ, ᐃᓴᕈᖏᓐᓂ ᐱᓛᕈᒪᕗᖅ.

ᐃᓄᑐᐊᖑᓪᓗᓂ ᐃᓱᓕᑦᑎᔪᒥ ᐊᐅᓱᐃᑦᑑᑉ ᐅᒥᖕᒪᒃ ᐃᓕᓐᓂᐊᕐᕕᖓᓂ ᑕᒪᑐᒪᓂ ᐊᕐᕌᒎᔪᒥ, ᐅᐊᑦᔅᑯ ᐃᓱᒪᕐᔪᐊᕐᓂᖃᖅᐳᖅ ᖃᖓᑕᓲᖅᑎᙳᕐᓂᖓᓂ.

“ᐃᓱᒪᒋᓯᒪᕙᕋ ᐊᑯᓂᐸᓗᖕᒥ. ᑲᔾᔮᕆᕙᕋ ᓇᒧᑐᐃᓐᓇᖅ ᖃᖓᑕᓲᖅ ᐅᕙᓐᓂ ᓇᒧᙵᐅᔾᔨᓂᖓᓂ ᕿᒪᓕᕌᖓᒃᑯ ᐅᓇ ᓄᓇᓕᐅᔪᖅ,” ᐅᖃᓚᐅᖅᐳᖅ. “ᕿᓄᐃᓵᕐᓂᖃᕐᔪᐊᖅᑰᖅᐳᖓ ᑎᑎᕋᕐᕕᖃᕐᓂᕐᒥ ᓄᓇᕐᔪᐊᑉ ᕿᓚᖓᓂ. ᐊᓕᐊᓇᐃᒋᕐᔪᐊᖅᐸᕋ ᐊᐅᓪᓛᕐᓂᕐᒥ. ᖁᕕᐊᒋᑦᑎᐊᖅᑕᕋ. ᐃᑭᒪᕝᕕᐅᓲᒥᒃ ᖃᖓᑕᓲᖅᑎᐅᔪᒪᓇᔭᖅᑰᖅᑐᖓ, ᐃᒻᒪᖄ Canadian North, ᐅᕝᕙᓘᓐᓃᑦ Air Canada.”

ᖃᖓᑕᒋᐅᖅᓴᓂᕐᒥ ᐃᓕᓐᓂᐊᕐᕕᖕᒥ ᐋᓐᑎᐊᕆᐅᒥ ᐃᓱᒪᒋᔭᖃᖅᐳᖅ ᓯᕗᓂᒃᓴᒥ ᐃᓕᓐᓂᐊᕐᓂᕆᓛᕈᒪᔭᖓᓂ, ᑭᓯᐊᓂ ᒪᓕᒃᑐᒥ ᓄᖅᑲᕐᓂᖓ ᓄᓇᕗᒻᒥ ᓯᓚᑦᑐᖅᓴᕐᕕᖕᒥᐅᑐᐃᓐᓇᕆᐊᖃᖅᐳᖅ ᐊᕙᑎᓕᕆᓂᕐᒥ ᓄᑖᙳᖅᐸᓪᓕᐊᔪᓄᑦ ᐱᓕᕆᐊᖑᔪᒧᑦ, ᓇᒃᓯᐅᔾᔨᓚᐅᕐᒪᑦ ᑕᐃᑯᖓ ᑐᒃᓯᕋᕐᓂᐅᔪᒥ. ᐅᖃᓚᐅᖅᐳᖅ ᐃᓕᑦᑎᒃᑲᓐᓂᕈᒪᓂᖓᓂ ᐊᕙᑎᐅᔪᒥ ᖃᖓᑕᕝᕕᒋᖃᑦᑕᕋᔭᖅᑕᒥᓂ, ᐃᓕᑦᑎᒃᑲᓐᓂᕈᒪᒋᕗᖅ ᓴᓇᔭᐅᓯᒪᓂᐊᖅᑐᓂᒃ ᐋᖅᑭᒃᓱᐃᔨᐅᓂᕐᒥ ᑎᑎᕋᐅᔭᕐᓂᖓᓂ ᐊᒻᒪ ᖃᐅᔨᓴᕐᓂᖓᓂ ᖃᖓᑕᓲᓂ ᐊᒻᒪ ᖃᖓᑕᓂᕐᒥ.

ᐃᓱᓕᑦᑎᔪᑎᑑᙱᑦᑐᖅ ᐊᒥᓱᓂ ᐊᓯᖏᓐᓂ ᓄᓇᕗᒻᒥ ᓄᓇᓕᐅᔪᓂ, ᐅᐊᑦᔅᑯ ᖁᙱᐊᕐᕕᓕᐊᓚᐅᖅᐳᖅ ᐃᓄᑑᑦᑎᐊᖅᖢᓂ.

“ᑭᐱᙳᓇᒐᓚᓚᐅᖅᐳᖅ ᐃᓱᓕᑦᑎᔪᑐᐊᖑᓪᓗᓂ,” ᐅᖃᓚᐅᖅᐳᖅ.

ᑕᐃᒪᐃᒃᑲᓗᐊᖅᑎᓪᓗᒍ, ᔫᓂ 4–ᒥ ᖁᕕᐊᓱᒍᑕᐅᔪᖅ ᐊᓕᐊᓇᐃᓚᐅᖅᐳᖅ, ᑭᓯᐊᓂ ᑕᐅᑐᒃᑕᐅᖑᔪᒻᒪᐅᙱᓚᖅ.

“ᑭᓯᐊᓂ ᐊᓕᐊᓇᐃᓚᐅᖅᐳᖅ. ᑐᓄᐊᓃᓐᓂᖅᓴᐅᔪᒪᓲᖑᕗᖓ ᑭᓯᐊᓂ ᑕᐅᑐᒃᑕᐅᓂᖅ ᐊᓕᐊᓇᐃᓚᐅᕆᕗᖅ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂᓗ ᖃᓂᒋᔭᖓᓂ 30–ᓂ ᐃᓄᖕᓂ ᐅᐸᒃᓯᒪᓚᐅᖅᐳᑦ. ᖁᕕᐊᓱᕐᔪᐊᓚᐅᖅᐳᖓ ᐊᖓᔪᖅᑳᒃᑲ ᐊᓈᓇᑦᑎᐊᒃᑲ ᐊᑖᑕᑦᑎᐊᒃᑲ ᑕᑯᓂᕐᒧᑦ ᐅᕙᓐᓂ ᖁᙱᐊᖅᑐᓂ ᐱᔭᕇᕐᓂᓐᓂ ᑭᖑᓪᓕᖅᐹᖑᔪᒥ ᐊᕐᕌᒍᕆᔭᓐᓂ ᐃᓕᓐᓂᐊᕐᕕᖕᒥ.

“ᑎᑎᕋᓚᐅᙱᓚᖓ ᐅᖃᓪᓚᐅᓯᕆᓂᐊᖅᑕᓐᓂ ᖁᕕᐊᓱᒍᑕᐅᔪᒥ ᓯᕗᓂᐊᓂ ᓂᕆᐅᓚᐅᙱᓐᓇᒥ ᑕᐃᒪᓐᓇᑎᒋ ᐅᓄᖅᑎᒋᔪᓂ ᐃᓄᖕᓂ ᑭᓯᐊᓂ ᐱᓕᕆᑲᐅᖅᑐᓚᐅᖅᐳᖓ ᐃᕐᙲᓐᓇᑲᐅᑎᒋ, ᖁᔭᓕᓂᖃᖅᖢᖓ ᐃᓕᓴᐃᔨᓕᒫᓄᑦ ᐊᒻᒪ ᐱᖃᓐᓇᕆᔭᒃᑲ ᐊᒻᒪ ᐃᓚᓐᓄᑦ.”

ᖁᑦᑎᒃᑐᕐᒥ ᒪᓕᒐᓕᐅᖅᑎ ᑕᐃᕕᑦ ᐊᕿᐊᕈᖅ ᐅᖃᐅᓯᒃᓴᓕᐅᓚᐅᖅᐳᖅ ᒪᓕᒐᓕᐅᕐᕕᖕᒥ ᔫᓂ 7–ᒥ ᐃᓕᓴᖅᓯᓪᓗᓂ ᐅᐊᑦᔅᑯᒥ ᑎᑭᐅᑎᔪᓐᓇᕐᓂᖓᓂ.

“ᐊᐅᓱᐃᑦᑐᕐᒥ ᓄᓇᓕᖕᓂ ᐅᒃᐱᕈᓱᖕᓂᖃᖅᐳᒍᑦ ᐃᓄᑭᓐᓂᖅᓴᐅᔪᒥ ᓄᓇᓕᖕᒥ, ᑲᒪᒋᔭᖃᖅᑐᐃᓐᓇᐅᕗᒍᑦ ᐱᕈᖅᓴᐃᓂᕐᒥ ᕿᑐᕐᙵᑦᑎᓐᓂ, ᐊᒻᒪ ᕿᑐᕐᙵᕗᑦ ᐃᓱᓕᑦᑎᔭᕌᖓᑕ, ᐊᖏᔪᐊᓘᓪᓗᓂ ᓄᓇᓕᖕᓂ ᑲᑎᙵᓂᙳᓲᖑᕗᖅ,” ᐅᖃᓚᐅᖅᐳᖅ ᐊᕿᐊᕈᖅ. “ᕿᑐᕐᙵᕗᑦ ᖁᕕᐊᓱᒍᑕᐅᓪᓗᐊᖅᐳᑦ ᓲᕐᓗ ᐃᓱᓕᑦᑎᓂᐅᔪᒥ. ᐹᖑᔪᑦ ᐱᕕᒃᓴᖃᕐᓂᐅᔪᓂ ᒪᑐᐃᖅᐸᓪᓕᐊᕗᑦ ᓇᒥᑐᐃᓐᓇᖅ ᑭᒡᓕᐅᔪᓄᑦ. ᐅᐱᒋᕙᕋ ᐃᓱᓕᑦᑎᔪᖅ ᐊᒻᒪᓗ ᐃᓚᖏᑦ.”

ᐅᐊᑦᔅᑯ ᐃᓕᓐᓂᐊᕐᓂᖓᓂ ᐊᑐᕐᓂᑯᖏᓐᓂ ᐊᔪᕐᓇᙱᑦᑐᑯᓘᖏᓐᓇᓚᐅᙱᓚᖅ. ᐅᖃᓚᐅᖅᐳᖅ ᖃᓪᓗᓈᑎᑐᑦ, ᓇᐃᓴᐅᓯᕆᓂᖅ ᐊᒻᒪ ᖃᐅᔨᓴᕐᓂᖅ “ᐊᒃᓱᕈᕐᓇᕐᔪᐊᓚᐅᕐᓂᖓᓂ,” ᑭᓯᐊᓂ ᐅᖃᓚᐅᖅᐳᖅ ᐃᓕᑦᑎᓚᐅᖅᐳᖅ ᐊᒥᓱᓂ ᐱᐅᕐᔪᐊᖅᑐᓂ ᑕᐃᒃᑯᓇᓂ ᐃᓕᓐᓂᐊᕐᕕᐊᕈᓯᐅᔪᓂ.

“ᐃᓱᒫᓗᓗᐊᓚᐅᙱᓚᖓ ᐃᓱᓕᑦᑎᓂᕐᒥ. ᐅᓇᑐᐊᖅ ᑲᑉᐱᐊᒋᕐᔪᐊᓚᐅᖅᑕᕋ ᐃᓱᐊᓂ ᖃᐅᔨᓴᖅᑕᐅᓂᐅᔪᒥ. ᐃᓕᓐᓂᐊᕐᓂᕆᔭᕋ ᐱᐅᔪᐃᓐᓇᐅᓚᐅᖅᐳᑦ, ᓇᓗᓇᐃᒃᑯᓯᖅᑕᐅᓂᒃᑲ ᐱᐅᓚᐅᖅᐳᑦ. ᑭᖑᓪᓕᖅᐹᕆᓪᓗᒍ ᐊᕐᕌᒍᕆᓚᐅᖅᐸᕋ ᐊᒻᒪ ᐃᓕᑦᑎᕐᔪᐊᕐᓂᕆᓚᐅᖅᐸᕋ. ᖄᖏᐅᔾᔨᓚᐅᖅᐳᖓ ᐊᒥᓱᓂ ᐃᓕᓐᓂᐊᕐᓂᕐᒧᑦ ᐊᒃᓱᕈᕈᑎᒋᔭᓐᓂ, ᐊᒻᒪ ᐅᕙᓃᓕᖅᐳᖓ,” ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᐊᐅᔭᐅᔪᒥ ᐃᖅᑲᓇᐃᔭᕐᓂᐊᖅᐳᖅ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᓴᓇᔨᐅᓗᓂ, ᓅᑎᕆᓂᕐᓂ ᐱᖁᑎᓂᑦ, ᓴᓗᒻᒪᖅᓴᐃᓂᕐᒥ ᑭᓱᑐᐃᓐᓇᓂ.

ᐃᓚᖓᒍᑦ ᐱᕕᒃᓴᖃᖅᑎᑦᑎᓂᐊᖅᐳᖅ ᐊᖑᓇᓱᖕᓂᕐᒥ ᐊᒻᒪᓗ ᐃᖅᑲᐅᒪᓂᓕᐅᒃᑲᓐᓂᕐᓗᓂ ᐱᖃᓐᓇᕆᔭᒥᓂᑦ.