ᐃᖅᑲᐅᒪᓂᐅᔪᒥ ᖄᖏᖅᓯᒫᓂᕐᔪᐊᖅᑐᒥ ᐊᑐᖅᑕᐅᓂᑯᓂ ᐅᑎᕐᔪᐊᖅᓯᒪᕗᑦ ᐊᒥᓱᓄᑦ ᒥᑦᑎᒪᑕᓕᖕᒥᐅᑕᓄᑦ ᐊᑐᖅᑕᐅᓪᓚᕆᒃᓯᒪᔪᒥᒃ ᑕᕐᕆᔭᓕᐅᖅᑎᓂ Thunder Bay−ᒥ ᐳᓚᕋᖅᑎᓪᓗᒋᑦ ᓄᓇᓕᖕᒥ ᓇᒃᓴᖅᖢᑎᒃ ᑎᑎᕋᐅᔭᖅᑕᐅᓂᑯᓂ ᓄᓇᓕᖕᓂ ᕿᑎᐊᓂ 1970 ᐊᒻᒪ 71−ᒥ ᓲᓴᓐ ᕌᔅᒧᑦ, ᑎᑎᕋᐅᔭᖅᑎ Thunder Bay, ᐋᓐᑎᐊᕆᐅᒥ ᐃᓅᔪᓐᓃᓚᐅᖅᑐᒥ 2006−ᒥ.
ᕌᔅ ᐱᖃᓐᓇᕆᔭᖃᕕᒡᔪᐊᓚᐅᖅᐳᖅ ᓰᓚ ᐴᓐᕗᑦᒥ, ᑎᑎᕋᓚᐅᖅᑐᒥ ᑲᒪᓇᖅᑐᐊᓗᖕᒥ ᐊᐅᓪᓛᕐᓂᐅᔪᒥ, 1963−ᒥ Disney−ᒥ ᑕᕐᕆᔭᓕᐊᖑᔪᖅ Homeward Bound ᑐᙵᕕᖃᕐᓂᖓᓂ ᐊᐅᓪᓛᖃᑎᒌᒃᐸᒃᖢᑎᒃ ᐅᑭᐅᖅᑕᖅᑐᒥ, ᐴᓐᕗᑦ ᑎᑎᕋᓚᐅᖅᐳᖅ ᐊᑕᐅᓯᐅᑉ ᐊᕐᓇᐅᑉ ᐅᑭᐅᖅᑕᖅᑐᖓᓂ ᑐᙵᕕᖃᖅᑐᒥ ᐊᑐᕐᓂᑯᖏᓐᓂ ᓄᓇᕗᒻᒥ. ᑕᕐᕆᔭᓕᐅᖅᑎᐅᔪᑦ ᓇᒃᓴᓚᐅᖅᑕᖏᓐᓂ ᓇᒃᓴᓚᐅᖅᐳᑦ ᑕᕐᕆᔭᓕᐊᕆᔭᒥᓂᒃ ᐴᓐᕗᑦ ᐊᔾᔨᓕᐅᕆᓚᐅᖅᑕᖏᓐᓂ ᑕᐃᑲᓃᑎᓪᓗᒍ.
ᐊᕐᕌᒍᑦ ᖁᓕᑦ ᐊᐅᓪᓛᕐᓂᐅᔪᒥ ᐊᔾᔨᒌᙱᑦᑐᓄᑦ ᐊᓪᓚᓄᑦ ᓄᓇᓕᐅᔪᓂ ᐅᐊᖕᓇᒥ ᐋᓐᑎᐊᕆᐅᒥ ᐊᒻᒪ ᒫᓂᑑᐸᒥ, ᒪᕐᕉᔫᒃ ᐱᕕᒃᓴᖃᓕᓚᐅᖅᐳᑦ 1970−ᒥ ᐊᐅᓪᓛᕐᓂᕐᒧᑦ ᒥᑦᑎᒪᑕᓕᖕᒧᑦ.
“ᑕᒪᕐᒥᒐᓚᖕᓂ (ᓲᓴᓐ) ᓄᓇᓕᓕᐊᕌᖓᒥ ᑎᑎᕋᐅᔭᓯᑐᐃᓐᓇᖅᐸᓚᐅᖅᐳᖅ - ᑕᐅᓴᓐ−ᒐᓛᓗᖕᓂ ᑎᑎᕋᐅᔭᕐᓂᖃᓚᐅᖅᐳᖅ. ᐊᖏᕐᕋᐅᕙᓚᐅᖅᐳᖅ ᐅᑭᐅᒃᑯᑦ ᖄᖏᐅᑎᔪᓂ ᐊᕐᕌᒍᓂ ᐊᒻᒪ ᐱᒋᐊᖅᐸᓚᐅᖅᐳᖅ ᐊᔾᔨᙳᐊᓕᐅᕐᓂᕐᒥ,” ᐅᖃᓚᐅᖅᐳᖅ ᑲᓕ ᓵᒃᔅᐴᒡ, ᐊᑕᐅᓯᐅᔪᒥ ᑕᕐᕆᔭᓕᐅᖅᑎᐅᔪᓂ.
ᐅᓂᒃᑳᓕᐊᖅ ᒪᕐᕉᖕᓂ ᖃᓪᓗᓈᓂ, ᑕᕐᕆᔭᓕᐊᖑᔪᖅ ᐱᓕᕆᔭᖓᓂ, ᕿᒥᕐᕈᕗᖅ ᒪᕐᕉᖕᓂ ᐊᕐᓇᓂ ᐊᒻᒪ ᐊᐅᓪᓛᕐᓂᖏᓐᓂ ᓄᓇᕗᒻᒥ ᐊᒻᒪᓗᑦᑕᐅᖅ ᕿᒻᒪᑯᖏᓐᓂ ᓄᓇᓕᖕᓂ ᐳᓚᕋᓚᐅᖅᑕᖏᓐᓂ. ᓴᓇᔭᐅᕗᑦ ᐅᕘᓇ ShebaFilms, ᓵᒃᔅᐴᒡ ᐊᐅᓚᑉᐸᒃᑕᖓᓂ ᓴᓂᓕᖃᖅᖢᓂ ᐅᐃᖓᓂ ᕌᓐ ᕼᐋᐱᐅᓪᒥ.
ᓵᒃᔅᐴᒡ ᐹᖅᓯᓂᖃᓚᐅᖅᐳᖅ ᓱᓇᒃᑯᑖᓂ ᓰᓚ ᐴᓐᕗᑦ ᐸᓂᖓ ᐅᐸᒃᓯᒐᒥ ᐊᕐᕌᒍᒐᓴᓂ ᐃᓅᔪᓐᓃᓚᐅᖅᑎᓪᓗᒍ ᐊᓈᓇᖓᑕ ᐊᔾᔨᓕᐅᒐᖏᓐᓂ, ᑎᑎᕋᕐᓂᑯᖏᓐᓂ ᐊᒻᒪ ᐊᓯᖏᓐᓂ ᐱᓕᕆᓂᐅᔪᓂ. ᑭᖑᓂᑦᑎᐊᖓᒍᑦ, ᕌᔅ ᐃᓚᖏᑦ ᖃᐅᔨᒋᐊᓚᐅᖅᐳᑦ ᓵᒃᔅᐴᒡᒥ ᐊᒻᒪ ᑐᓂᓯᓚᐅᖅᐳᑦ ᑕᒪᒃᑭᓂ ᕌᔅ ᑎᑎᕋᐅᔭᕐᓂᑯᖏᓐᓂ.
ᕌᔅ ᑎᑎᕋᐅᔭᖃᑦᑕᓕᓚᐅᖅᐳᖅ ᐹᖅᓯᓚᐅᖅᑎᓪᓗᒍ ᐊᓂᔅᓈᐱᒥ ᓴᓇᐅᒐᓕᕆᔨᒥ ᓄᐊᕕᐅᓪ ᒧᐊᕆᓲᒥ ᐊᔭᐅᕆᓚᐅᖅᑐᒥ ᐊᐅᓪᓛᕐᓂᕐᒧᑦ ᐊᓪᓚᓄᑦ ᓄᓇᓕᐅᔪᓄᑦ ᐊᒻᒪ ᑲᑎᖃᑎᖃᕐᓂᕐᒥ.
ᓱᒃᑲᐃᑦᑐᒥ ᐊᔾᔨᓕᐅᕆᓯᒪᕗᑦ ᕌᔅ ᐱᓕᕆᓂᑯᖏᓐᓂ ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐊᕐᕌᒎᔪᓂ, ᕼᐋᐱᐅᓪ ᐅᖃᓚᐅᖅᐳᖅ.
ᔮᓐᑯᐃᓪ ᑯᕕᓗ, ᓰᓚᐅᑉ ᐸᓂᖓ, ᐊᐅᓪᓛᕈᒪᓚᐅᕆᕗᖅ ᑭᓯᐊᓂ ᐊᐅᓪᓛᖃᑕᐅᔪᓐᓇᓚᐅᙱᓚᖅ ᐱᔾᔪᑎᖃᖅᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓱᒫᓘᑕᐅᔪᓄᑦ.
ᐊᔭᐅᕆᓂᑕᖃᓚᐅᖅᐳᖅ ᑕᑯᑎᑦᑎᓂᕐᒥ ᐅᑯᓂᖓ ᐱᓕᕆᐊᖑᔪᓂ ᓄᓇᓕᖕᓂ ᐳᓚᕋᓚᐅᖅᑕᒥᓂ, ᑕᕐᕆᔭᓕᐅᖅᑏᑦ ᖃᕋᓴᐅᔭᑎᒍᑦ ᐊᔾᔨᓕᐅᕆᓂᖃᓚᐅᕆᕗᑦ ᓇᒃᓴᓚᐅᖅᑕᒥᓂᑦ ᒥᑦᑎᒪᑕᓕᖕᒧᑦ.
“ᐱᒻᒪᕆᕐᔪᐊᖑᕗᖅ ᑕᑯᑎᑦᑎᓂᕐᒥ ᑕᒪᒃᑭᓂ ᐱᓕᕆᓂᖏᓐᓂ ᓄᓇᓕᖕᓂ,” ᐅᖃᓚᐅᖅᐳᖅ ᓵᒃᔅᐴᒡ, ᐃᓚᒋᐊᖅᓯᓚᐅᖅᑐᒥ ᐊᑐᐃᓐᓇᐅᓂᖏᓐᓂᑦᑕᐅᖅ Thunder Bay ᑕᑯᓐᓇᒐᖃᕐᕕᖓᓂ ᖃᕋᓴᐅᔭᑎᒍᑦ ᑐᖅᑯᖅᑕᐅᓯᒪᔪᓂ.
ᐃᓕᓴᕐᓇᖅᑐᑦ ᑮᓇᐃᑦ
“ᐃᓕᓴᕐᓇᖅᑐᐃᑦ! ᑕᐃᒪᓐᓇᑎᒋ ᐊᔪᙱᓚᖅ. ᐃᓕᓴᕆᔪᓐᓇᖅᑕᑎᑦ ᐃᓄᑐᖃᐃᑦ, ᐊᕐᓇᐃᑦ ᐃᓕᓴᕐᓇᖅᑐᑦ,” ᐅᖃᓚᐅᖅᐳᖅ ᓇᕙᓕᒃ ᑐᓗᒐᓐᓇᖅ, ᐃᓄᒃ ᒥᐊᓂᕆᔨ ᐊᐅᓪᓛᕐᓂᐅᔪᒥ ᐃᖃᓗᒃᑑᑦᑎᐊᕐᒥ, ᐃᓕᓴᖅᓯᔪᓐᓇᓚᐅᖅᑐᒥ ᐃᓄᖕᓂ ᐊᐅᓪᓛᖅᓯᒪᙱᓐᓂᖓᓂ ᓄᓇᓕᖕᒧᑦ ᐊᑯᓂᐊᓗᒃ.
ᑕᐃᒪᐃᓚᐅᕆᕗᖅ ᒥᑦᑎᒪᑕᓕᖕᒥᑕᐅᓄᑦ, ᐃᓕᓴᖅᓯᓚᐅᕐᒥᔪᒥ ᑲᖏᖅᖢᒑᐱᖕᒥᐅᑕᓂ, ᑐᕌᖅᑎᑦᑎᔪᒥ ᐅᔾᔨᕈᓱᖕᓂᐅᔪᒥ ᒪᕐᕉᒃ ᐊᐅᓪᓛᓚᐅᕐᓂᖏᓐᓂ ᐊᑕᐅᓯᑐᐊᖑᙱᑦᑐᒥ ᓄᓇᓕᐅᔪᒧᑦ, ᒪᕐᕉᒃ ᕿᓚᒻᒥᐅᔪᒥ ᐳᓚᕋᓚᐅᖅᐳᑦ ᐃᒡᓗᓕᖕᒧᑦ, ᐅᖃᓚᐅᖅᐳᖅ ᓵᒃᔅᐴᒡ.
“ᓂᕆᐅᖕᓂᖃᓗᐊᕌᓗᓚᐅᙱᓚᑦ ᐊᒻᒪ ᐃᓚᖏᑦ ᐅᑎᒃᑲᓐᓂᓚᐅᖅᐳᑦ, ᐃᒡᓗᕈᓯᖅᑖᓚᐅᖅᐳᒍᑦ ᑐᔪᕐᒥᕕᖕᒥ ᐊᒻᒪ ᖃᔅᓯᐊᕐᔪᐃᑦ ᕿᒥᕐᕈᐊᓚᐅᖅᐳᑦ ᑕᒪᒃᑭᑦᑎᐊᓂ ᑎᑎᕋᐅᔭᒐᕐᓂ, ᐅᕙᑦᑎᓐᓂ ᓄᖅᑲᖅᑎᑦᑎᕙᒃᖢᑎᒃ ᑕᕐᕆᔭᓕᐊᖑᔪᒥ ᐊᒻᒪ ᑐᓂᓯᕙᒃᖢᑎᒃ ᐊᑎᖏᓐᓂ ᑭᒃᑯᓕᒫᓂ ᐃᓕᓴᕆᓚᐅᖅᑕᖏᓐᓂ. ᑕᒪᓐᓇ ᑲᒪᓇᕐᔪᐊᓚᐅᖅᐳᖅ,” ᐃᓚᒋᐊᖅᓯᓚᐅᖅᐳᖅ ᓵᒃᔅᐴᒡ.
“ᐊᒥᓱᑦ ᐃᓅᔪᓐᓃᖅᓯᒪᓕᖅᐳᑦ, ᑭᓯᐊᓂ ᓱᓕ ᐃᓚᖏᓐᓂ ᐆᒪᔪᖃᐅᖅᐳᖅ. ᖃᐅᔨᓚᐅᖅᐳᒍᑦ ᐅᓄᕐᓂᖅᓴᓂ ᐃᓄᖕᓂ ᐆᒪᓂᖏᓐᓂ (ᐊᐅᓪᓚᓚᐅᙱᑎᓪᓗᑕ),” ᐅᖃᓚᐅᖅᐳᖅ ᑐᓗᒐᓐᓇᖅ. ᐃᓚᖃᓚᐅᖅᐳᖅ ᓴᓇᔨᐅᔪᓂ ᑐᔪᕐᒥᕕᒋᓚᐅᖅᑕᑦᑎᓐᓂ.
ᓵᒃᔅᐴᒡ ᐅᐸᒍᒪᓚᐅᖅᐸᖓ ᐆᒥᖓ ᐃᓕᖅᑯᓯᑎᒍᑦ ᐅᖃᐅᔾᔨᓯᒪᓂᐅᔪᒥ ᐊᒻᒪ ᐊᒃᑐᖅᑕᐅᓴᕋᐃᑦᑐᒥ ᐃᓂᐅᔪᒥ, ᐱᓪᓚᕆᐅᔪᒥ ᐆᒧᖓ ᑐᓗᒐᓐᓇᐅᑉ ᐃᓚᐅᖃᑕᐅᓂᖓᓂ, ᐃᑲᔪᕐᔪᐊᕐᓂᖃᓚᐅᖅᐳᖅ ᐊᐅᓪᓛᕐᓂᖏᓐᓂ.
ᑕᕐᕆᔭᓕᐅᖅᑏᑦ ᕿᒪᐃᓚᐅᖅᐳᑦ ᑎᑎᕋᐅᔭᖅᓯᒪᔪᓂ ᐊᒻᒪ ᖃᕋᓴᐅᔭᑎᒍᑦ ᐊᔾᔨᓕᐅᖅᑕᐅᓯᒪᔪᓂ ᒥᑦᑎᒪᑕᓕᖕᒥ ᕼᐋᒻᓚᒃᑯᑦ ᑎᑎᕋᕐᕕᖓᓂ, ᓄᓇᖃᖅᑎᐅᔪᑦ ᐊᑐᐃᓐᓇᖃᑲᐅᑎᒋᔪᓐᓇᕐᓂᐊᕐᒪᑕ ᐅᑯᓂᖓ ᓱᓇᒃᑯᑖᖑᔪᓂ. ᓱᓇᒃᑯᑖᑦ ᕌᔅᒥ ᐊᒻᒪ ᐴᓐᕗᑦᒥ ᕿᒪᒃᑕᐅᓚᐅᕆᕗᑦ ᐃᖃᓗᖕᓂ ᓄᓇᕗᒻᒥ ᖃᐅᔨᓴᕐᕕᖓᓂ.
ᑕᒪᓐᓇ ᑐᓂᓯᒋᕗᖅ ᐱᕕᒃᓴᖃᑦᑎᐊᕐᓂᕐᔪᐊᖑᔪᒥ ᓄᓇᓕᖕᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᐅᔪᓄᑦ, ᑐᓗᒐᓐᓇᖅ ᐅᖃᕆᐊᓪᓚᒃᐳᖅ.
“ᑕᑯᔪᒪᓇᔭᖅᑕᓐᓂ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓂ ᐱᓕᕆᓗᑎᒃ ᐱᓕᕆᐊᒃᓴᐅᔪᒥ ᐊᒻᒪ ᑲᑎᖃᑎᖃᕐᓂᕐᒥ ᓇᖕᒥᓂᖅ ᐊᖓᔪᖅᑳᒥᓂᑦ ᐊᒻᒪ ᓄᓇᓕᖏᓐᓂ, ᑕᑯᓂᕐᒥ ᑭᒃᑯᓐᓂ ᐃᓚᖃᕐᒪᖔᑕ ᐊᒻᒪ ᖃᓄᐃᓚᐅᕐᓂᖓᓂ ᒥᑦᑎᒪᑕᓕᒃ. ᐃᓚᒋᔭᐅᕗᖅ ᑭᓇᐅᓂᖏᓐᓂ ᐊᒻᒪ ᑲᑎᖃᑎᖃᕈᓐᓇᖅᐳᑦ ᐃᓕᓐᓂᐊᕐᕕᖕᒥ ᐱᓕᕆᐊᒃᓴᐅᓗᓂ ᐃᓕᓴᐃᔨᖏᓐᓄᑦ.”
ᐅᓇ ᐱᓗᐊᖅᑐᒥ ᐱᒻᒪᕆᕐᔪᐊᖑᕗᖅ “ᐊᒥᓱᑦ ᓯᕗᓕᖅᐳᑦ ᐱᑕᖃᕈᓐᓃᕐᒪᑕ,” ᐃᓚᒋᐊᖅᓯᓚᐅᖅᐳᖅ.
ᒪᕐᕉᒃ ᐱᖃᓐᓇᕇᕐᔪᐊᖅᑐᑦ
“ᓲᓴᓐ ᐊᒻᒪ ᓰᓚ ᐱᖃᓐᓇᕇᕐᔪᐊᓚᐅᖅᐳᑦ, ᐊᓕᐊᓇᐃᒋᔭᖃᓚᐅᖅᐳᑦ ᐊᖑᓇᓱᖕᓂᕐᒥ ᐊᒻᒪ ᐃᖃᓗᒐᓱᖕᓂᕐᒥ ᐊᒻᒪ ᐊᖑᓇᓱᒡᕕᖕᒧᑦ ᑕᖕᒫᕆᐊᖅᐸᓚᐅᖅᐳᑦ White Fish ᑕᓯᖓᓂ,” ᐅᖃᓚᐅᖅᐳᖅ ᓵᒃᔅᐴᒡ, ᑕᒪᓐᓇ ᐊᕐᕌᒍᑕᒫᒥ ᐃᖏᕐᕋᓂᐅᕙᓚᐅᖅᐳᖅ 100 ᑭᓛᒥᑐᐸᓗᖕᒥ Thunder Bay ᐅᐊᖕᓇᖓᓄᑦ.
ᐴᓐᕗᑦ ᓅᓚᐅᖅᓯᒪᕗᖅ ᑲᓇᑕᒧᑦ ᓯᓚᕐᔪᐊᕐᒥᐅᓕᒫᓂ 1948−ᒥ ᐊᒻᒪ ᑕᑯᔭᕆᐅᖅᖢᓂ ᕌᔅᒥ Thunder Bay−ᒥ, ᐊᑯᓂᐅᔪᒥ ᐱᖃᓐᓇᕇᓕᓚᐅᖅᐳᑦ.
“ᐊᓕᐊᓇᐃᒋᔭᖃᑦᑎᐊᓚᐅᖅᐳᑦ ᓄᓇᒦᓐᓂᕐᒥ ᐊᒻᒪ ᓯᓚᒦᓐᓂᕐᒥ, (ᐴᓐᕗᑦ) ᓯᑳᑎᔅ−ᖑᓚᐅᖅᐳᖅ ᐊᒻᒪ ᐅᖃᓚᐅᖅᐳᖅ ᐊᓃᙱᒃᑯᕕᑦ ᐊᒻᒪᓗ ᖃᐅᑕᒫᒥ ᐱᓱᕋᔭᙱᒃᑯᕕᑦ ᖃᓄᐃᓐᓂᖃᖅᐳᑎᑦ, ᓄᓇᒦᑦᑕᕆᐊᖃᖅᐳᑎᑦ.”
ᒪᕐᕉᒃ ᐊᓕᐊᓇᐃᒋᔭᖃᓚᐅᖅᐳᑦ ᑲᑎᖃᑎᖃᕐᓂᕐᒥ ᐃᓄᖕᓂ ᐊᒻᒪ ᐊᓪᓚᓂ ᓄᓇᓕᐅᔪᓂ ᑲᓇᑕᓕᒫᒥ, ᑭᖑᓂᐊᒍᑦ ᒥᑦᑎᒪᑕᓕᖕᒥ ᐊᒻᒪ ᑲᖏᖅᖢᒑᐱᖕᒥ, ᐴᓐᕗᑦ ᑭᖑᓂᐊᒍᑦ ᐅᑎᓚᐅᖅᐳᖅ ᓯᓚᕐᔪᐊᓕᒫᒧᑦ, ᑭᓯᐊᓂ ᕌᔅ ᐳᓚᕋᕆᐊᖅᑐᓚᐅᖅᐳᖅ ᖁᕐᓗᖅᑑᒧᑦ, ᑭᙵᐃᑦ ᐊᒻᒪ ᐸᖕᓂᖅᑑᒧᑦ, ᑎᑎᕋᐅᔭᖅᐸᒃᖢᓂ ᐃᓄᖕᓂ ᑕᐃᑲᓂ ᓄᓇᓕᐅᔪᓂ. 2002−ᒥ ᕌᔅ ᑐᓂᔭᐅᓚᐅᖅᐳᖅ ᑲᓇᑕᒥ ᐃᑲᔪᕐᓂᕐᒧᑦ ᐃᓕᓴᕆᔭᐅᓂᕐᒥ ᑕᑯᒃᓴᐅᓂᐅᔪᓄᑦ ᓴᓇᐅᒐᓕᕆᓂᕐᒥ ᐱᓕᕆᓂᖓᓄᑦ ᑎᑎᕋᖅᐸᓪᓕᐊᓂᖓᓂ ᐃᓅᓯᐅᔪᒥ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ.
“ᐅᑭᐅᖅᑕᖅᑐᓕᐊᓚᐅᙱᓚᑦ ᐊᔪᕆᖅᓱᐃᔨᐅᓂᕐᒧᑦ, ᐃᓕᓴᐃᓂᕐᒧᑦ ᐅᕝᕙᓘᓐᓃᑦ ᐊᖓᔪᖅᑳᖑᓂᕐᒧᑦ,” ᐅᖃᓚᐅᖅᐳᖅ ᓵᒃᔅᐴᒡ, “ᐅᐸᓚᐅᖅᐳᑦ ᓴᓇᐅᒐᓕᕆᔨᐅᓪᓗᑎᒃ ᐅᐸᒃᓯᒪᔭᖅᑐᑐᐃᓐᓇᖅᖢᑎᒃ, ᑎᑎᕋᐅᔭᕐᓂᕐᒧᑦ ᐃᓄᖕᓂ, ᐊᖑᓇᓱᒋᐊᕐᓂᕐᒧᑦ ᐅᕝᕙᓘᓐᓃᑦ ᐃᓕᑦᑎᓂᕐᒧᑦ ᐃᓄᒃᑎᑐᑦ ᐊᒻᒪ ᐅᖃᓪᓚᖃᑎᖃᕐᓂᕐᒧᑦ ᐃᓄᖕᓂ.”
“ᐅᑯᐊ ᐊᕐᓇᐃᑦ ᐱᓕᕆᓚᐅᕐᓂᖏᓐᓂ, ᐅᑭᐅᖅᑕᖅᑐᓕᐊᖅᖢᑎᒃ ᒥᑦᑎᒪᑕᓕᖕᒧᑦ ᐊᒻᒪ ᐃᒃᓯᕚᑐᐃᓐᓇᖅᖢᑎᒃ ᐊᒻᒪ ᐃᓄᖕᓃᖦᖢᑎᒃ, ᑕᕐᕆᔭᓕᐅᕐᓂᕐᒧᑦ ᐊᒻᒪ ᑎᑎᕋᐅᔭᕐᓂᕐᒧᑦ, ᐅᐊᑲᓪᓚᖔ,” ᐅᖃᓚᐅᖅᐳᖅ ᑐᓗᒐᓐᓇᖅ.
ᐅᓂᒃᑳᓕᐊᖅ ᒪᕐᕉᖕᓂ ᖃᓪᓗᓈᓂ ᒫᓐᓇ ᐋᖅᑭᒋᐊᖅᑕᐅᓂᖓᓂ ᐱᓕᕆᓂᕐᒦᓕᖅᐳᖅ.
ᓵᒃᔅᐴᒡᒧᑦ, ᑐᕌᖅᑎᑦᑎᓲᖑᔪᒥ ᐱᓕᕆᓂᖓᓂ ᓄᓇᓕᖕᓂ ᑎᕆᖅᑯᐊᓂ, ᑲᒪᓇᓚᐅᖅᐳᖅ ᐊᐅᓪᓛᖃᑎᖃᕐᓂᕐᒥ ᐊᒻᒪ ᑐᓂᓯᓂᕐᒥ ᐆᒥᖓ ᑲᑎᙵᓂᐅᔪᒥ ᐅᑯᓄᖓ ᐋᓐᑎᐊᕆᐅ ᐅᐊᖕᓇᖓᓂ ᐊᖏᕐᕋᖓᓂ ᐊᒻᒪ ᒥᑦᑎᒪᑕᓕᖕᒥ.
“ᑲᒪᓇᖅᑐᖃᖅᐳᖅ ᑎᑎᕋᐅᔭᒐᕐᓂ, ᑕᑯᓂᕐᒥ ᐃᓄᖕᓂ ᑎᑎᕋᐅᔭᖅᑕᐅᔪᓂ ᑎᑎᕋᐅᔭᖅᑎᒧᑦ, ᑕᑯᓂᕐᒥ ᑕᐃᒃᑯᓂᖓ ᑮᓇᐅᔪᓂ, ᑭᓇᐅᓂᖓᓂ ᓇᓗᓇᖅᑑᙱᓚᑦ, ᐅᓇ ᖃᐅᔨᓴᕐᓂᐅᙱᓚᖅ ᖃᓄᖅ ᐃᓅᓂᖏᓐᓂ ᖃᐅᔨᓴᖅᑐᒥ ᑭᓱᑐᐃᓐᓇᒥᒃ. ᐅᑯᐊ ᒪᕐᕉᒃ ᐃᓄᐃᑦ ᐅᑯᐊ ᐊᕐᓇᐃᑦ ᑲᑎᖃᑎᖃᓚᐅᕐᓂᖏᓐᓂ ᐅᓂᒃᑳᖅᑐᐊᖅᑎᐅᓚᐅᖅᐳᑦ ᐊᔾᔨᐅᙱᓐᓂᐅᔪᒥ, ᐊᑕᐅᓯᖅ ᐅᖃᐅᓯᒃᑯᑦ ᐊᒻᒪ ᐊᑕᐅᓯᖅ ᓴᓇᐅᒐᓕᕆᓂᒃᑯᑦ. ᐊᔾᔨᐅᙱᓚᖅ, ᐊᓯᖏᓐᓂ ᓴᓇᐅᒐᓕᕆᔨᓂ ᑕᐃᒪᐃᓯᒪᔪᒥ ᐊᖏᔪᒻᒪᕆᐊᓗᖕᒥ ᑎᑎᕋᐅᔭᕐᓂᐅᔪᓂ ᐊᒻᒪ ᑲᑎᖃᑎᖃᖅᓯᒪᔪᓂ ᓱᕈᓯᕐᓂ ᐊᒻᒪ ᐃᓄᑐᖃᕐᓂ.”
