ᐃᓚᖏᑦ ᐱᐅᓯᕆᔭᐅᕙᓚᐅᖅᑐᑦ ᐊᒥᓱᕈᒃᑲᓐᓂᖅᓯᒪᔪᑦ ᐃᓚᖏᓪᓗ ᐊᓯᐅᓪᓗᑎᒃ ᐊᕐᕕᐊᓂ, ᐊᖏᕐᕋᒧᑦ ᓴᓇᕐᕈᑎᖏᑦ ᖁᕕᐊᓲᑎᖃᕋᑖᓚᐅᕐᒪᑕ ᒪᑐᐃᖅᑕᐅᑎᓪᓗᒍ ᓄᓇᓕᓐᓂ ᑯᐊᐸᒃᑯᑦ ᓂᐅᕕᐊᖑᑎᓪᓗᒋᑦ.
“ᐅᓪᓛᖅ ᖁᕕᐊᓇᖅᑐᒻᒪᕆᐅᖅᑲᐅᕗᖅ,” ᐅᖃᖅᑐᖅ ᒫᒃ ᑳᓕ, ᐊᖓᔪᖅᑳᖅ ᐊᒻᒪ ᑮᓇᐅᔭᓕᕆᔨᒻᒪᕆᒃ Eskimo Point Lumber Supply (EPLS), ᐊᐅᓚᑦᑎᔪᖅ ᐊᖏᕐᕋᒥᑦ ᐱᓕᕆᔾᔪᑎᓂᑦ.
ᐃᓚᐅᖃᑕᐅᕋᑖᓚᐅᖅᑐᖅ ᕿᔪᓐᓂᒃ ᕿᔫᔪᓂᒃ ᖁᕕᐊᓲᑎᖃᑦᑎᓪᓗᒋᑦ ᒪᑐᐃᖅᓯᓪᓚᕆᑦᑎᓪᓗᒍ ᐊᕐᕕᐊᓂ ᓄᑖᒥᒃ ᐊᖏᕐᕋᒧᑦ ᓴᓇᕐᕈᑎᖃᐅᑎᒥᒃ ᐊᒃᑑᕝᕙ 21-ᒥ, ᑭᓯᐊᓂᓕ ᓇᒻᒥᓂᖃᕐᓂᖅ ᒪᑐᐃᖓᓕᕋᓗᐊᖅᑎᓪᓗᒍ ᑕᖅᑮᓐᓄᑦ ᒪᕐᕉᓐᓄᑦ.
100-ᐸᓗᐃᑦ ᐃᓄᐃᑦ ᐅᐸᓚᐅᖅᑐᑦ, ᑖᒃᑯᐊ EPLS-ᑯᑦ ᓯᕗᓕᖅᑎᖏᑦ ᐊᒻᒪᓗ ᒐᕙᒪᒃᑯᑦ ᐊᖓᔪᖅᑲᐅᑎᖏᑦ ᖁᕕᐊᓱᒍᑎᒥᓂᒃ ᐊᑭᓖᓪᓗᑎᒃ.
ᐃᓚᐅᖃᑕᐅᓚᐅᕐᒥᔪᖅ ᑖᓐ ᓴᐃᓐᑦ ᔮᓐ, ᐱᒋᐊᖅᑎᑦᑎᓚᐅᖅᑐᖅ EPLS-ᒥᑦ. ᑕᐃᓐᓇ ᐊᕐᕕᐊᓂ ᓴᓇᔭᐅᓚᐅᖅᓯᒪᔪᖅ 1970-ᖏᓐᓂ. ᑖᓐᓇ ᓱᕋᒃᐸᓪᓕᐊᓕᓚᐅᖅᑐᖅ, ᓄᑖᕐᓗ ᐊᖏᕐᕋᒥᑦ ᓴᓇᕐᕈᑎᑦ ᐊᓯᔾᔨᖅᑕᐅᓪᓗᑎᒃ ᒪᕐᕈᐃᓪᓗᐊᖅᖢᓂ ᐊᖏᓂᓕᒃ − 11,000 ᑭᑉᐹᕆᒃᑐᑦ ᐃᓯᒐᑦ, 13 ᐃᒡᓗᕈᓯᓖᑦ ᖁᓛᓂᑦ.
ᒪᑐᐃᖅᑕᐅᑎᓪᓗᒍ ᐅᓪᓗᖓ, ᓂᐅᕕᕐᕕᒃ ᖃᔅᓯᒐᓚᖕᓂᑦ ᓂᐅᕕᐊᒃᓴᖃᖃᑦᑕᓚᐅᖅᐳᖅ, ᑳᓕ ᖃᓄᑎᒋᓗ ᓇᓚᐅᑦᑖᕋᔭᙱᖦᖢᓂ.
“ᐅᖃᖃᑎᖃᓚᐅᖅᑐᖓ ᖃᔅᓯᐊᕐᔪᖕᓄᑦ ᐃᓄᖕᓄᑦ ᓂᐅᕕᕐᕕᖕᒥᑦ ᖁᕕᐊᓱᑦᑎᐊᓚᐅᖅᑐᑦ ᓂᐅᕕᕐᕕᒃ ᓴᓇᔭᐅᓚᐅᖕᒪᑦ ᓄᑖᖑᖅᑰᔨᓪᓗᓂᓗ ᐊᖏᔪᐊᓘᓪᓗᓂᓗ,” ᐅᖃᖅᖢᓂ. “ᐅᖃᐅᔾᔭᐅᓚᐅᖅᓯᒪᙱᑦᑐᖓ ᐅᖃᐅᔾᔭᐅᔪᒪᓪᓗᖓ ᑭᓯᐊᓂ ᐱᐅᔪᓂᒃ ᑐᓴᖅᑎᑕᐅᓚᐅᙱᓐᓇᒪ.”
ᓂᐅᕕᕐᕕᐅᑉ ᐃᓂᖓ ᐃᓚᖃᕐᒥᔪᖅ ᐱᕙᒌᔭᖅᓯᒪᔪᒥᒃ ᓂᕿᓕᕆᕝᕕᖕᒥᒃ, ᓄᑖᖅ ᓇᖕᒥᓂᕆᔭᐅᔪᖅ ᑲᒻᐸᓂᐅᑉ ᐆᒃᑐᕋᖅᑕᖓ.
ᒪᑐᐃᖅᓯᓂᖃᑦᑎᓪᓗᒋᑦ, ᐊᖏᕐᕋᒧᑦ ᓴᓇᔾᔪᑎᓕᕆᓂᕐᒧᑦ ᑭᒡᒐᖅᑐᐃᔨ ᑐᓂᓯᓚᐅᖅᑐᖅ ᓴᐃᓐᑦ ᔮᓐ ᐊᒻᒪᓗ ᐃᓚᖏᑦ ᒎᓗᒥᒃ ᑕᑯᓚᐅᖅᑐᑦ ᐃᓕᑕᖅᓯᓪᓗᑎᒃ ᐱᐊᓂᒃᓯᓂᕐᒥᒃ.
ᑯᐊᐸᒃᑯᑦ ᒪᑐᓗᑎᒃ
ᐅᓪᓗᕆᓚᐅᕐᒪᒍ ᓂᐅᕐᕈᑕᐅᑎᓪᓗᒋᑦ ᐊᖏᕐᕋᒥ ᓴᓇᕐᕈᑎᖏᑦ, ᑭᓯᐊᓂ ᐊᑕᐅᓯᖅ ᓂᐅᕕᕐᕕᒃ ᐊᕐᕕᐊᓂ ᐊᑲᐅᙱᓕᐅᕈᑎᖃᖅᑰᔨᓚᐅᖅᑐᖅ ᓂᐅᕐᕈᑎᖃᕆᐊᒃᓴᖅ ᐹᑦᓕ ᑯᐊᐸᒃᑯᑦ ᓂᐅᕕᕐᕕᖓ, ᒪᑐᔭᐅᓚᐅᖅᑐᖅ ᐅᑐᐱᕆᐅᑉ ᕿᑎᐊᓂ ᑲᑎᒪᔩᑦ ᓂᕈᐊᖅᑕᐅᓚᐅᖅᑎᓪᓗᒋᑦ ᐱᔪᒪᓪᓗᑎᒃ ᒪᓂᒪᑎᑕᐅᔪᒥᒃ ᐃᒡᓗᕐᔪᐊᒧᑦ.
ᑐᕙᐃᓐ ᕕᐅᓪᓴᓐ, ᐊᖓᔪᖅᑳᑉ ᑐᒡᓕᐊ ᓇᖕᒥᓂᖃᖃᑕᐅᔪᓄᑦ ᐱᓕᕆᖃᑎᖃᖅᐸᖕᓂᕐᒧᑦ ᐅᑭᐅᖅᑕᖅᑐᒥ ᑯᐊᐸᓂᒃ, ᐅᖃᖅᖢᓂ ᓂᐅᕕᕐᕕᒃ 50−ᓂᒃ ᐊᕐᕌᒍᖃᓚᐅᖅᐳᖅ ᑭᓯᐊᓂ “ᖁᕝᕙᕆᐊᖅᓯᒪᓂᖅᓴᐅᓪᓗᓂ” ᐊᕐᕌᒎᓵᖅᑐᓂ.
“ᐊᓐᓈᓗᖕᒥᐅᒐᓗᐊᖅ ᐊᔾᔨᑦᑎᐊᖓᓂᒃ ᐃᑲᔪᖅᑐᐃᓂᖃᓚᐅᙱᒻᒪᑦ ᓂᐅᕕᐊᒃᓴᓄᑦ ᑕᑯᔭᐅᔪᓄᑦ ᐊᓯᖏᓐᓂ ᓄᓇᓕᖕᓂ,” ᐅᖃᖅᑐᖅ.
ᐅᑭᐅᖅᑕᖅᑐᖅ ᑮᓇᐅᔭᑎᒍᑦ ᐊᒃᓱᕈᕐᓇᖅᑑᖕᒪᑦ ᐊᐅᓚᑦᑕᕆᐊᒃᓴᖅ, ᓇᓗᓇᐃᖅᑕᖓ.
“ᐊᔪᕐᓇᙱᑦᑐᑯᓘᕗᖅ ᕿᓂᕆᐊᒃᓴᖅ ᑮᓇᐅᔭᑎᒍᑦ ᐊᖕᒪᓗᖅᑐᒥᒃ ᑕᐃᒪᐃᔾᔪᑎᖃᑐᐃᓐᓇᖅᖢᓂ ᖁᑦᑎᒃᑐᒦᑦᑐᒥᒃ ᐊᕙᑎᖃᕐᓂᕐᒥᒃ, ᑭᓯᐊᓂᓗ ᐊᔪᕐᓇᕐᓂᖅᓴᐅᓪᓗᓂ ᐊᓂᔭᕆᐊᒃᓴᖅ,” ᑕᐃᒪᓐᓇ ᕕᐅᓪᓴᓐ ᐅᖃᖅᖢᓂ.
ᐅᖃᐅᓯᖃᕋᔭᙱᑦᑐᖅ ᑭᓇ ᓂᐅᕕᕐᓂᕐᒪᖔᖅ ᓂᐅᕕᕐᕕᒻᒥᑦ ᐅᕝᕙᓘᓐᓃᑦ ᐊᑭᖏᑎᒍᑦ, ᐅᖃᑐᐃᓐᓇᖅᑐᓂ ᐹᑦᓕ ᑯᐊᐸᒃᑯᑦ ᐃᓱᒪᓕᐅᓚᐅᕐᒪᑕ ᐊᓯᖏᓐᓂᑦ ᓇᒻᒥᓂᖁᑎᖏᓐᓂᑦ ᓄᓇᓕᓐᓂᑦ, ᐃᓚᓕᐅᑎᓪᓗᒋᑦ ᑐᔪᕐᒥᕖᑦ, ᓂᖀᑦ ᐊᒻᒪ ᑕᓚᕖᓴᒃᑰᖅᑐᑦ.
ᐊᕐᕕᐊᓂ ᑯᐊᐸᒃᑯᑦ ᑲᔪᓯᑦᑎᐊᕐᓂᖃᓚᐅᖅᑐᑦ ᑭᖑᓂᑦᑎᓐᓂ, ᑕᐃᑯᖓ ᑎᑭᖦᖢᒍ ᑲᒻᐸᓂᐅᔪᖅ ᓄᑖᒥᒃ ᐃᒡᓗᕐᔪᐊᓕᐅᓚᐅᖅᑐᖅ, “ᐊᑭᖃᕐᔪᐊᖅᑐᖅ,” ᐅᖃᖅᑐᖅ ᕕᐅᓪᓴᓐ, ᐅᖃᖅᖢᓂ ᓇᓗᓇᙱᖦᖢᓂ ᒪᑐᔭᐅᓂᖓ ᐊᔪᕐᓇᖖᒋᖦᖢᓂ ᐋᖅᑭᒃᑕᐅᓚᐅᖅᑐᖅ ᑲᑎᒪᔨᓄᑦ.
ᐅᓂᒃᑳᓚᐅᖅᑐᖅ ᑯᐊᐸᐃᑦ ᐅᑭᐅᖅᑕᖅᑐᒥ ᑕᑎᖃᕐᒪᑕ ᐊᑕᐅᓯᕐᒥᒃ, ᒪᕐᕉᓐᓂᒃ, ᐱᖓᓱᓂᒃ ᓯᑕᒪᓂᓪᓘᓐᓃᑦ ᐃᓄᓐᓂᒃ ᓯᕗᓕᖅᑎᓪᓗᐊᑕᐅᔪᓂᒃ.
“ᖃᓄᖅ ᐊᐅᓚᓂᖅ ᑕᑎᖃᕐᔪᐊᕐᒪᖔᑦ ᐃᓄᓪᓗᐊᑕᕐᒥᒃ,” ᐅᖃᖅᑐᖅ ᕕᐅᓪᓴᓐ, ᐅᖃᐅᓯᖃᖅᑐᖅ ᑭᓱᑦ ᑐᕌᕐᒪᖔᑕ ᓂᐅᕕᕐᕕᐅᑉ ᐅᓄᕈᓐᓃᖅᐸᓪᓕᐊᓂᖓᓄᑦ. “ᐱᕕᒃᓴᖃᕈᕕᑦ ᐃᒻᒪᖄ ᐃᓅᖃᑎᖃᕈᓐᓇᙱᒃᑯᕕᑦ ᓄᓇᓕᖕᓂ ᐅᕝᕙᓘᓐᓃᑦ ᑲᒪᒋᔭᐅᑦᑎᐊᖅᑐᒥᒃ ᐃᓚᒋᔭᐅᔪᒥᒃ… ᓇᖕᒥᓂᖃᕐᓂᖅ ᐊᒃᓱᕈᓕᖃᑦᑕᕐᒪᑦ, ᓲᖃᐃᒻᒪᓕ ᖁᕝᕙᓯᒃᑐᒻᒪᕆᐊᓗᖕᒥᒃ ᐃᖅᑲᓇᐃᔮᒃᓴᖃᓲᖑᖕᒪᑦ.”
