ᐃᒻᖏᐅᑎᒃᑯᑦ, ᐅᖃᖃᑎᒌᖕᓂᒃᑯᑦ ᐊᒻᒪᓗ ᑐᒃᓯᐊᕐᓂᒃᑯᑦ, ᒪᒥᓴᕐᓂᕐᒧᑦ ᐱᓕᕆᔪᑦ ᑲᖏᖅᖠᓂᕐᒥ ᐊᑐᐃᓐᓇᕈᖅᑎᑦᑎᓯᒪᔪᑦ ᐊᑦᑕᓇᖅᑐᖃᙱᑦᑐᒥᒃ ᐊᖑᑎᓄᑦ ᐃᓅᓯᕐᒥᓂᒃ ᑲᒪᕙᓪᓕᐊᔪᒪᑉᓗᑎᒃ ᐱᓕᕆᖃᑎᒌᖕᓂᒃᑯᑦ.
“ᑲᒪᒋᓇᓱᓗᐊᖅᑕᖅᐳᑦ ᑲᑎᖃᑦᑕᕐᓂᖅ ᐊᖑᑕᐅᑉᓗᑕ ᐅᖃᖃᑎᒌᒍᒪᓂᖅ,” ᑕᐃᒪᓐᓇ ᐅᖃᖅᖢᓂ ᔨᐅᕆᑦ ᐊᔅᐳᐊᓐ, ᑲᑎᑎᑦᑎᒋᐊᖃᑦᑕᓕᓚᐅᖅᑐᖅ ᔫᓐᒥ ᑕᒡᕙᓂ ᐅᑭᐅᒥ.
ᐊᖑᑎᑦ ᑲᑎᖃᑦᑕᖅᑐᑦ ᓯᑕᒻᒥᐅᓕᕌᖓᑦ ᐅᓐᓄᒃᑯᑦ ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᖓᓂ, ᐃᒻᒪᖄ ᖁᓕᑦ ᑲᑎᓲᑦ ᐱᓇᓱᐊᕈᓯᑕᒫᑦ.
ᑲᑎᑐᐃᓐᓇᓲᑦ ᐊᒻᒪᓗ ᐃᒪᓐᓇᐃᑦᑕᕆᐊᖃᖅᑐᑏᓚᓯᒪᔪᓐᓇᙱᑦᑐᑦ: ᑕᒪᕐᒥᒃ ᐊᖑᑎᑦ ᑐᙵᓱᒃᑎᑕᐅᓲᑦ, ᐅᖃᓪᓚᒍᒪᒍᑎᒃ ᐅᖃᓪᓚᒃᑎᑕᐅᕙᒃᖢᑎᒃ ᐅᕝᕙᓘᓐᓃᑦ ᐃᒻᖏᖅᑐᓂᒃ ᑐᓵᔭᖅᑐᑐᐃᓐᓇᕐᓗᑎᒃ ᐊᒻᒪᓗ ᐅᒃᐱᕆᔪᓐᓇᖅᑕᒥᓂᒃ ᐅᖃᖃᑎᖃᖃᑦᑕᕐᓗᑎᒃ.
“ᑕᒪᓐᓇ ᑕᒡᕙ ᑐᕌᒐᕆᔭᖅᐳᑦ,” ᑕᐃᒪᓐᓇ ᐅᖃᖅᖢᓂ ᐊᔅᐳᐊᓐ. “ᐅᖃᖃᑦᑕᖅᑐᒍᑦ ᑕᒪᕐᒥᒃ ᑐᙵᓱᒃᑎᑕᐅᓂᖏᓐᓄᑦ ᐅᖃᓪᓚᒍᒪᒃᐸᑕ, ᑭᓯᐊᓂ ᐅᖃᓪᓚᒍᒪᙱᑦᑐᑦ ᐅᖃᓪᓚᖏᑐᐃᓐᓇᕈᓐᓇᖅᑐᑦ. ᖃᐃᓗᑎᒃ ᑐᓵᔭᖅᑐᑐᐃᓐᓇᕈᒪᒃᐸᑕ ᐊᒻᒪᓗ ᓂᑉᓕᐅᑎᒃᓴᖃᖅᑑᔭᙱᒃᑯᑎᒃ ᐅᕝᕙᓘᓐᓃᑦ ᐅᖃᓪᓚᒋᐊᒃᓴᖅ ᒫᓐᓇᐅᔪᒥ ᐊᔪᖅᑑᔭᕈᑎᒃ, ᓈᒻᒪᒃᑐᖅ.”
ᑲᑎᒪᑎᑦᑎᒋᐊᖃᑦᑕᓕᓚᐅᖅᑐᖅ ᐊᒥᓲᖕᒪᑕ ᐱᔭᕆᐊᑐᔪᑦ ᑲᖏᖅᖠᓂᕐᒥ ᓴᖅᑭᓯᒪᓕᖅᑐᑦ ᐅᑭᐅᖅ ᐊᒻᒪᓗ ᐃᓄᐃᑦ ᐊᑦᑕᓇᖅᑐᒦᙱᓐᓂᕐᒧᑦ ᖃᐅᔨᒪᔭᕆᐊᖃᕐᒪᑕ, ᐅᖃᓪᓚᒍᓐᓇᕐᓂᕐᒧᓪᓗ ᑕᒪᐅᙵᒥᐊᖅ ᐅᖃᐅᓯᐅᔾᔮᙱᑦᑐᓂᒃ ᐊᒻᒪᓗ ᐃᑲᔪᖅᑑᑎᖃᑦᑕᕈᓐᓇᖁᑉᓗᒋᑦ. ᐊᖑᑎᑦ ᑲᑎᑦᑕᕌᖓᑕ ᖃᓄᐃᓕᐅᖅᑎᑦᑎᖃᑦᑕᕈᒪᑉᓗᑎᒃ ᐃᓱᒪᓯᒪᔪᑦ, ᓲᕐᓗ ᐊᖑᓇᓱᒡᓗᑎᒃ ᐅᕝᕙᓘᓐᓃᑦ ᐅᒥᐊᖅᑐᕐᓗᑎᒃ, ᓯᕗᓂᒃᓴᒥ.
“ᐊᒥᓱᓂᒃ ᐃᓄᖕᓂᒃ ᑐᓴᖃᑦᑕᖅᑐᖓ ᑕᒪᓐᓇᒎᖅ ᐃᑲᔫᑕᐅᓲᖅ ᐊᖑᑎᑦ ᐅᖃᓪᓚᒍᓐᓇᖅᓯᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ ᐊᔅᐳᐊᓐ. “ᐅᖃᓪᓚᒃᑐᖃᖅᑎᓪᓗᒍ ᑐᓵᑦᑎᐊᕋᓱᖃᑦᑕᖅᑐᒍᑦ ᐊᒻᒪᓗ ᐃᑲᔪᖅᑑᑎᖃᑦᑕᖅᑐᒍᑦ. “ᐃᑲᔫᑕᐅᓲᖅ ᐃᓗᒥᐅᑕᕆᑐᐃᓐᓇᕈᒪᓇᒋᑦ ᐃᖢᐊᖏᓕᐅᕈᑎᒋᕙᒃᑕᖅᐳᑦ,” ᑕᐃᒪᓐᓇ ᐅᖃᖅᖢᓂ ᐊᔅᐳᐊᓐ. ᐃᑲᔫᑕᐅᓲᖅ ᐃᓗᒥᐅᑕᕆᑐᐃᓐᓇᖁᓇᒋᑦ ᐃᖢᐊᖏᓕᐅᕈᑎᒋᔭᑦ ᐊᒻᒪᓗ ᑐᓵᔭᐅᔪᓐᓇᕈᒪᓂᕐᒧᑦ ᐃᓄᑑᔫᔭᕐᓇᙱᓐᓂᖅᓴᐅᖃᑦᑕᕐᒪᑦ.”
ᖃᐃᔪᑦ ᓱᓇᑐᐃᓐᓇᕐᓂᒃ ᐅᖃᐅᓯᖃᕈᒪᒍᑎᒃ ᑐᙵᓱᒃᑎᑕᐅᓲᑦ, ᐅᖁᒪᐃᑦᑐᓂᒃ ᐅᕝᕙᓘᓐᓃᑦ ᐅᖁᒪᐃᙱᑦᑐᓂᒃ. ᐊᔅᐳᐊᓐ ᐅᖃᖅᖢᓂ ᐃᓛᓐᓂᒃᑯᒎᖅ ᐅᖃᐅᓯᐅᔪᑦ ᐊᒃᓱᕈᕐᓇᓲᑦ, ᐊᒻᒪᓗ ᐃᓚᖓᒍᑦ ᐅᖃᖃᑎᒌᖃᑦᑕᖅᑐᒍᑦ ᖃᓄᖅ ᐅᐃᒋᔭᐅᑉᓗᓂ ᐱᑦᑎᐊᕐᓂᖅᓴᐅᔪᓐᓇᕐᒪᖔᑉᑕ ᐊᑖᑕᐅᑉᓗᓂᓗ ᖃᓄᖅ ᐊᑖᑕᑦᑎᐊᕙᐅᓂᖅᓴᐅᓇᔭᕐᓂᕐᒧᑦ.
ᐊᖑᑎᑦ ᖃᓄᖅ ᐅᑭᐅᖃᕋᓗᐊᕈᑎᒃ ᖃᐃᔪᓐᓇᖃᑦᑕᖅᑐᑦ ᖃᐅᔨᒋᐊᕐᓗᑎᒡᓘᓐᓃᑦ ᐃᖕᒥᓄᑦ ᐃᑲᔫᑕᐅᓇᔭᕐᒪᖔᑦ ᑕᒪᓐᓇ. ᑲᑎᖃᑦᑕᖅᑐᑦ 7:00-ᒥ ᐅᓐᓄᒃᑯᑦ ᓯᑕᒻᒥᕐᒥ ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᖓᓂ.
“ᐊᖑᑕᐅᑉᓗᑕ ᐱᐅᓱᒋᔪᐊᓘᙱᑦᑐᒍᑦ. ᐃᓄᑐᐃᓐᓇᐅᔪᒍᑦ ᐃᑲᔪᖅᑑᑎᓇᓱᑐᐃᓐᓇᖅᑐᒍᑦ ᐊᒻᒪᓗ ᐃᑲᔪᖅᑑᑎᓇᓱᑐᐃᓐᓇᖅᑐᒍᑦ ᒪᒥᓴᕐᓂᒃᑯᑦ,” ᑕᐃᒪᓐᓇ ᐅᖃᖅᖢᓂ ᐊᔅᐳᐊᓐ.