ᓯᑏᕙᓐ ᑳᕈᑕᓐ ᐱᓕᕆᓇᓱᐊᖅᑕᖓᓂ ᐃᓅᓯᕐᒥ ᐃᑲᔪᕐᓂᕐᒧᑦ ᐃᓄᖕᓂ ᓇᓂᓯᓂᖏᓐᓂ ᓂᕆᐅᖕᓂᕐᒥ ᑖᓛᖑᔪᒥ ᐃᓅᓯᕆᔭᖏᓐᓂ.
ᖃᐅᔨᒪᑦᑎᐊᖅᐳᖅ ᐊᒃᓱᕈᕐᓂᐅᔪᒥ, ᖁᓄᔪᓐᓂᐊᖅᑕᐅᓯᒪᓪᓗᓂ ᐃᓅᓱᒃᑑᑎᓪᓗᒍ ᑐᒃᓯᐊᕐᕕᖕᒥ ᐃᓚᒋᔭᐅᔪᒥ ᐃᓚᖏᑦᑕ ᐅᐸᒃᐸᓚᐅᖅᑕᖓᓂ.
ᐊᑕᐅᓯᐅᕗᖅ ᐅᓂᒃᑳᖑᔪᓂ ᐅᖃᐅᔾᔨᕙᒃᑕᖓᓂ ᓂᕆᐅᖕᓂᕐᒧᑦ ᑲᑎᙵᓂᐅᔪᒥ ᑲᑎᒪᓂᐅᔪᓂ, ᑭᖑᓪᓕᖅᐹᖑᔪᖅ ᐱᓕᕆᐊᖑᓚᐅᖅᑐᒥ ᖃᒪᓂᑦᑐᐊᕐᒥ ᓄᕕᐱᕆ 16–ᒥ.
“ᐅᖃᓪᓚᓚᐅᖅᐳᖓ ᖃᓄᖅ ᓇᓂᓯᔪᓐᓇᓚᐅᕐᓂᓐᓂ ᑕᐃᑯᓅᓇ,” ᐅᖃᓚᐅᖅᐳᖅ ᑳᕈᑕᓐ. “ᐅᖃᓪᓚᓚᐅᖅᐳᖓ ᖃᓄᖅ ᐃᒥᖅᐸᓚᐅᕐᓂᓐᓂ, ᐊᒻᒪ ᓂᙵᐅᒪᕐᔪᐊᓚᕐᓂᓐᓂ ᐊᒻᒪ ᓇᓗᓕᖅᓯᒪᓪᓗᖓ. ᖃᐅᔨᒪᓚᐅᙱᓚᖓ ᖃᓄᐃᓕᐅᕐᓂᕐᒥ ᐃᓅᓯᓐᓂ.”
ᑐᒃᓯᐊᕐᓂᖅ, ᐃᓅᓯᓕᕆᔨᒥ ᓇᓂᓯᓂᕐᒥ ᐊᒻᒪ ᑲᑎᖃᑎᖃᒃᑲᓐᓂᕐᓂᕐᒥ ᐃᓄᐃᑦ ᐱᖅᑯᓯᖏᓐᓂ ᐃᓅᓯᐅᔪᒥ ᓴᖑᔪᓐᓇᓚᐅᕐᓂᖓᓂ ᑎᕆᖅᑯᐊᓂ ᐊᒻᒪ ᓇᓂᓯᓪᓗᓂ ᓂᕆᐅᖕᓂᕐᒥ.
ᑳᕈᑕᓐ ᐱᓕᕆᐊᖃᓚᐅᕆᕗᖅ ᐊᔾᔨᐸᓗᐊᓂ ᑲᑎᒪᓂᐅᔪᒥ ᑲᖏᖅᖠᓂᕐᒥ ᓯᑎᐱᕆᒥ. ᐅᓄᕐᓂᖅᓴᐅᔪᓂ 100–ᓂ ᐃᓄᖕᓂ ᐃᓚᐅᖃᑕᐅᓚᐅᖅᐳᑦ ᑲᑎᒪᓂᐅᔪᒥ, ᐊᒻᒪ 50–ᐸᓗᖕᓂ ᐅᐸᓚᐅᖅᐳᑦ ᖃᒪᓂᑦᑐᐊᕐᒥ ᖃᓄᐃᓕᐅᕐᓂᐅᔪᒧᑦ, ᑳᕈᑕᓐ ᖁᕕᐊᒋᕐᔪᐊᓚᐅᖅᑕᖓ ᐅᓄᕐᓂᐅᔪᓂ ᒪᒃᑯᒃᑐᓂ ᐊᖑᑎᓂᑦ ᐃᓚᐅᔪᓂᑦ.
“ᐅᓂᒃᑳᕈᓐᓇᕈᑦᑕ ᐊᓯᖏᓐᓂ ᐃᓄᖕᓂ, ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐊᖑᑎᓂᑦ ᐊᒻᒪ ᐊᕐᓇᓂᑦ ᐊᑐᖅᓯᒪᔪᓂ ᐊᔾᔨᐸᓗᖏᓐᓂ ᐃᓚᖏᓐᓂ ᐃᓄᖕᓂ ᑲᑎᒪᓂᕆᔭᑦᑎᓐᓂ, ᐊᒻᒪ ᖃᓄᖅ ᖄᖏᐅᑎᔪᓐᓇᖅᓯᒪᓂᑦᑎᓐᓂ ᐊᒻᒪ ᓇᓂᓯᓗᑎᒃ ᐊᓂᒍᐃᓂᐅᔪᒥ, ᑕᐃᒫᒃ ᑕᒪᓐᓇ ᐱᕐᔪᐊᖑᕗᖅ,” ᐅᖃᓚᐅᖅᐳᖅ ᑳᕈᑕᓐ.
ᑲᑎᒪᓂᐅᑉ ᕿᑎᐊᓃᑉᐳᖅ ᐅᓂᒃᑳᖅᑐᐊᕐᓂᕐᒥ, ᐅᖃᐅᓯᖃᕐᓂᕐᒥ ᐱᓪᓚᕆᐅᔪᒥ ᐊᑐᖅᑕᐅᓂᑯᓂ ᐃᓄᖕᓂ ᐆᒪᔪᓐᓇᖅᓯᒪᔪᓂ ᐋᓐᓂᖅᓯᕆᓂᐅᔪᒥ, ᐅᐃᕆᓯᒪᓂᐅᔪᒥ ᐊᒻᒪ ᐱᓂᕐᓗᕐᔪᐊᖅᑕᐅᓯᒪᓂᐅᔪᒥᑦ.
“ᐅᓂᒃᑳᓲᖑᕗᒍᑦ ᓂᕆᐅᖕᓂᕐᒥ, ᐊᔪᕐᓇᙱᓐᓂᖓᓂ ᖄᖏᐅᑎᓂᕐᒥ ᐅᑯᓇᓂ ᖃᓄᐃᓐᓂᐅᔪᓂ,” ᐅᖃᓚᐅᖅᐳᖅ ᑳᕈᑕᓐ. “ᐊᒻᒪᓗ ᐳᕙᖕᓂ ᐊᓂᕐᓂᖃᕐᓂᓕᒫᖕᓂᑦ, ᐱᕕᒃᓴᖃᕐᔪᐊᖅᐳᖅ ᐃᓅᓯᑦᑎᓐᓂ ᐱᐅᓯᒋᐊᕈᓐᓇᕐᓂᖓᓂ.”
ᖃᐅᔨᒪᑦᑎᐊᖅᐳᖅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒃᓱᕈᕐᓂᐅᔪᓂ ᓄᓇᕗᒻᒥ.
“ᐃᒥᐊᓗᒃ ᐱᐅᒋᙱᕐᔪᐊᖅᐸᕋ ᖃᓄᐃᓕᐅᖅᓯᓂᖓᓂ ᐃᓄᖁᑎᑦᑎᓐᓂ,” ᐅᖃᓚᐅᖅᐳᖅ ᑳᕈᑕᓐ. “ᐱᐅᒋᙱᕐᔪᐊᖅᐸᕋ ᐃᓄᐃᑦ ᐊᑐᖅᓯᒪᓂᖏᓐᓂ ᑭᓱᑐᐃᓐᓇᓂ ᐊᑐᖅᓯᒪᔭᖏᓐᓂ.”
ᐊᓈᓇᖓ ᐃᓅᓚᐅᖅᓯᒪᕗᖅ ᓄᓇᓕᕋᓛᒥ ᐸᖕᓂᖅᑑᑉ ᓯᓚᑖᓂ 1959–ᒥ. ᐃᓅᓚᐅᖅᐳᖅ ᐃᖏᕐᕋᐃᓐᓇᐅᔭᖅᑐᒥ ᐃᓅᓯᐅᔪᒥ ᓱᕈᓯᐅᑎᓪᓗᒍ, ᐃᓄᐃᑦ ᐱᖅᑯᓯᖓᓐᓂ ᐃᓅᓯᐅᔪᒥ – ᑭᓯᐊᓂ ᑲᓇᑕᒥ ᐸᓖᓯᒃᑯᑦ ᑎᑭᒻᒪᑕ, ᖁᑭᖅᓯᓪᓗᑎᒃ ᕿᒻᒥᓕᒫᓂᑦ, ᓅᑎᕆᓪᓗᑎᒃ ᐃᓄᖕᓂ ᐊᒻᒪ ᓱᕋᑦᑎᕆᓪᓗᑎᒃ ᐊᐅᔭᒃᑯᑦ ᖃᕐᒪᖏᓐᓂ.
“ᒪᓕᒐᓕᕆᓂᑦᑎᐊᕙᐅᙱᕐᔪᐊᖅᐳᖅ,” ᐅᖃᓚᐅᖅᐳᖅ ᑳᕈᑕᓐ, ᓇᒡᓕᒍᓱᖕᓂᖓᓂ ᓂᐱᖓᓂ ᐅᔾᔨᕐᓇᕐᔪᐊᖅᖢᓂ.
ᐃᑲᔪᖅᓱᐃᓲᖑᕗᖅ ᐋᓐᓂᖅᓯᖅᑕᐅᖃᑦᑕᖕᓂᑯᓂ ᐆᒪᔪᓐᓇᖅᓯᒪᔪᓄᑦ ᐊᒻᒪᓗ ᑕᐃᒃᑯᓄᖓ ᐊᑐᖅᑐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒃᓱᕈᕈᑕᐅᔪᓂ ᒪᑐᐃᖅᐸᒃᑐᓂ ᐃᓄᖕᓄᑦ ᐅᒃᐱᕆᔭᖏᓐᓄᑦ.
“ᓯᕗᓪᓕᖅᐹᖑᔪᖅ ᑐᑭᓯᔭᕆᐊᖃᖅᑕᕗᑦ ᐱᑎᑦᑎᓚᐅᙱᑦᑐᑎᑦ ᑕᐃᒪᐃᓚᐅᕐᓂᖓᓂ,” ᐅᖃᓚᐅᖅᐳᖅ ᑳᕈᑕᓐ. “ᐊᒻᒪ ᒪᕐᕈᖓᓂ, ᐱᒻᒪᕆᕐᔪᐊᖑᕗᖅ ᓴᐅᓯᑐᐃᓐᓇᙱᓐᓂᑦᑎᓐᓂ ᐅᑯᓂᖓ ᐃᓅᓯᑦᑎᓐᓂ. ᐅᖃᓪᓚᒍᑎᕆᔭᕆᐊᖃᖅᐸᕗᑦ. ᓱᖏᐅᓐᓇᖅᓯᑎᑦᑎᔭᕆᐊᖃᖅᐳᒍᑦ ᐅᖃᓪᓚᖕᓂᐅᔪᓂ ᑕᐃᒃᑯᓄᖓ ᐊᒃᓱᕈᕈᑎᒋᔭᑦᑎᓐᓂ.”
ᐊᓯᔾᔨᕐᓂᐅᔪᖅ ᐃᓅᓯᖓᓐᓂ ᐱᒋᐊᑕᐃᓐᓇᓚᐅᖅᐳᖅ ᒪᑐᐃᕋᒥ ᐱᖃᓐᓇᕆᓛᕆᔭᒥᓄᑦ ᐊᒻᒪ ᐊᖓᔪᖅᑳᖏᓐᓄᑦ.
“ᐅᖃᓪᓚᖃᑎᖃᕐᓗᑎᑦ ᐊᑕᐅᓯᕐᒧᓪᓘᓐᓃᑦ ᐃᓄᖕᒧᑦ,” ᐅᖃᓚᐅᖅᐳᖅ ᑳᕈᑕᓐ. “ᐅᖃᐅᑎᓗᒋᑦ ᐃᓚᖏᓐᓂ ᐊᒃᓱᕈᕈᑎᒋᓯᒪᔭᕐᓂᑦ ᐊᒻᒪ ᑲᒪᒋᔭᖃᕐᓂᕐᓂ. ᐃᓅᓯᖅ ᓇᐃᓗᐊᕐᒪᑦ ᓴᐅᓯᓂᕐᒥ ᑖᒃᑯᓂᖓᓕᒫᖅ ᐆᒻᒪᑎᑦᑎᓐᓃᑦᑐᓂ.”
ᑕᐃᒃᑯᓄᖓ ᑲᒪᒋᔭᖃᙱᑦᑐᓂ ᐋᓐᓂᖅᓯᕆᓂᐅᔪᒥ ᐅᕝᕙᓘᓐᓃᑦ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᑭᓯᐊᓂ ᐃᑲᔪᕈᒪᔪᓄᑦ, ᑳᕈᑕᓐ ᐅᖃᓚᐅᖅᐳᖅ ᐱᖃᓐᓇᕆᔭᐅᓗᑎᑦ ᐊᓯᖏᓐᓄᑦ ᐅᖃᓪᓚᒡᕕᐅᔪᓐᓇᖅᑐᒥ.
ᖁᕝᕙᖅᓴᐃᔪᒪᕗᖅ ᐊᕙᑎᐅᔪᒥ ᐃᒻᒥᓃᕐᓂᖃᙱᑦᑐᒥ, ᐊᒻᒪ ᐃᓄᐃᑦ ᐃᓅᓯᖏᑦ ᑕᑖᕐᓂᖏᓐᓂ ᓂᕆᐅᖕᓂᖃᖅᑐᒥ.
ᑳᕈᑕᓐ ᖁᔭᓕᓚᐅᖅᐳᖅ ᓄᓇᓕᖕᓂ ᑯᐊᐸᒃᑯᓐᓂ ᐃᑲᔪᖅᓱᐃᓂᖏᓐᓂ ᖃᓄᐃᓕᐅᕐᓂᕆᔭᖏᓐᓂ.
ᑲᑐᔾᔨᖃᑎᒋᔭᖓ, ᐅᑭᐅᖅᑕᖅᑐᒥ ᓂᕆᐅᖕᓂᕐᒧᑦ ᐱᓕᕆᐊᒃᓴᐅᔪᖅ, ᓇᓂᔭᐅᓚᐅᖅᐳᖅ 2014–ᒥ ᐃᓄᖕᓄᑦ ᒪᒃᑯᒃᑐᓄᑦ ᓯᕗᓕᐅᖅᑎᐅᓂᕐᒥ ᐱᕙᓪᓕᐊᑎᑦᑎᓂᐅᔪᒥ ᐊᒻᒪ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐱᓕᕆᐊᖑᔪᒥ.