ᒪᒃᑯᖕᓂᖅᓴᑦ ᐊᕐᓇᐃᑦ ᐊᔪᕈᓐᓃᖅᓴᕆᐊᖃᕐᒪᑕ, ᑲᖏᖅᖠᓂᕐᒥᐅᑦ ᐃᑲᔪᖁᔭᐅᔪᑦ. ᐱᙳᐊᖅᑎᓂᒃ ᒥᐊᓂᖅᓯᔩᒃ ᕋᐳᑦ ᖃᕝᕕᑦᑐᖅ ᐊᒻᒪᓗ Hᐊᓕ ᒧᕐᓱᕐ volleyball-ᖃᑕᐅᖁᔨᔫᒃ ᐊᖑᑎᓂᒃ ᐊᕐᓇᓂᒡᓗ ᐱᒡᒍᓴᐅᔾᔪᐊᕐᓂᐊᕐᒪᑕ volleyball-ᑐᐃᓐᓇᕐᓗᑎᒃ ᓄᕕᐱᕆ 22-ᒥ 28-ᒧᑦ, ᐃᑲᔪᖁᑉᓗᒋᑦ ᒪᒃᑯᖕᓂᖅᓴᓂᒃ ᐊᕐᓇᕐᓂᒃ ᐊᔪᕈᓐᓃᖅᓴᕆᐊᖃᕐᒪᑕ.
“ᑕᒪᓐᓇ ᐱᓕᕆᐊᖑᔪᒪᓗᐊᖅᑐᖅ ᐊᔪᕈᓐᓃᖅᓴᖁᔨᓂᕐᒧᑦ ᓄᑕᖅᑲᓂᒃ ᐊᒻᒪᓗ ᑕᑯᔪᓐᓇᖁᑉᓗᒋᑦ ᖃᓄᖅ ᐱᒡᒍᓴᐅᔾᔪᐊᖅᖢᓂ ᐃᒃᐱᖕᓇᕐᒪᖔᑦ,” ᑕᐃᒪᓐᓇ ᐅᖃᖅᖢᓂ ᖃᕝᕕᑦᑐᖅ. “ ᑕᒪᒃᑯᐊ ᓄᑕᖅᑲᑦ ᐊᖅᓴᕐᓂᒃᑯᑦ ᐱᒡᒍᓴᐅᔾᔪᐊᓲᑦ, Hᐊᑭᓲᑦ, ᑭᓯᐊᓂ volleyball-ᖃᑕᐅᓗᐊᓚᐅᖅᓯᒪᙱᑦᑐᑦ. ᐱᒡᒍᓴᐅᔾᔪᐊᕌᓂᒃᐸᑕ, ᑕᑯᔪᓐᓇᕐᓂᐊᖅᑐᒍᑦ ᐊᕐᓇᑯᓗᐃᑦ ᖃᓄᐃᓕᐅᕆᐊᖃᓕᕐᓂᐊᕐᒪᖔᑕ.”
ᐅᖃᖅᖢᓂ ᐊᕐᓇᐃᑦ ᐊᔪᕈᓐᓃᖅᓴᕐᓂᐊᕐᒪᑕ volleyball-ᖅᖢᑎᒃ ᖃᓄᖅ ᐊᖅᓴᓕᕆᖃᑦᑕᕆᐊᖃᕐᓂᖏᓐᓄᑦ, ᑐᓗᕈᑎᖃᑦᑕᕆᐊᖃᕐᓂᖏᓐᓄᑦ, ᐅᖃᖃᑎᒌᖃᑦᑕᕆᐊᖃᕐᓂᖏᓐᓄᑦ ᐊᒻᒪᓗ ᐊᖅᓴᕐᒥᒃ ᐱᒋᐊᖅᑎᑦᑎᖃᑦᑕᕆᐊᖃᕐᓂᖏᓐᓄᑦ, ᐊᒻᒪᓗ ᐱᓕᕆᖃᑎᒌᖃᑦᑕᕆᐊᖃᕐᓂᖏᓐᓄᑦ.
ᖃᕝᕕᑦᑐᖅ ᒧᕐᓱᕐᓗ ᒥᐊᓂᖅᓯᔨᐅᖃᑦᑕᖅᓯᒪᓕᖅᑐᑦ ᐊᒥᓱᓂᒃ ᐅᑭᐅᓂᒃ, ᓄᖅᑲᖓᓚᐅᐱᓪᓚᓚᐅᖅᑐᑦ ᓄᑕᕋᒥᓃᓐᓂᖅᓴᐅᔪᒪᑉᓗᑎᒃ ᐃᓚᒥᓃᓐᓂᖅᓴᐅᔪᒪᑉᓗᑎᒃ. ᖃᕝᕕᑦᑐᖅ ᓴᕆᒪᒋᔭᓕᒃ volleyball-ᖃᑦᑕᓚᐅᖅᓯᒪᓂᕐᒥᓂᒃ ᐅᑭᐅᖅᑕᖅᑐᒥ ᐱᙳᐊᕕᒡᔪᐊᖅᑐᓄᙵᐅᖃᑕᐅᓚᐅᖅᓯᒪᒐᒥ ᐊᒻᒪᓗ ᑲᓇᑕᒥ ᐊᐅᔭᒃᑯᑦ ᐱᙳᐊᕕᒡᔪᐊᖅᑐᓄᑦ.
“ᑕᒡᕙ ᑐᕌᒐᕆᔭᖅᐳᑦ,” ᑕᐃᒪᓐᓇ ᐅᖃᖅᖢᓂ ᖃᕝᕕᑦᑐᖅ. “ᑕᑯᔪᒪᔪᒍᑦ volleyball-ᖅᑎᓂᒃ ᑭᒡᒐᖅᑐᐃᔪᓂᒃ ᑲᖏᖅᖠᓂᕐᒥ ᐊᒻᒪᓗ ᖁᕕᐊᓱᖁᑉᓗᒋᑦ.”
ᖃᕝᕕᑦᑐᖅ ᖃᐅᔨᓚᐅᖅᑐᖅ ᖁᕕᐊᒋᔭᖃᕐᓂᕐᒥᓄᑦ volleyball-ᒥ ᐃᑲᔪᖅᑎᒋᑉᓗᒍ volleyball-ᕐᓂᒃᑯᑦ ᒥᐊᓂᖅᓯᔨᒋᓚᐅᖅᓯᒪᔭᖓ ᒪᒃᑯᒃᖢᓂ ᐃᓕᓐᓂᐊᕐᕕᒡᔪᐊᕐᒥ.
“ᐅᕙᑉᑎᓐᓃᖏᓐᓇᖃᑦᑕᓚᐅᕐᒪᑦ ᐊᒻᒪᓗ ᐃᓕᓐᓂᐊᖅᑎᑦᑎᕙᒃᖢᓂ ᖃᓄᖅ ᐱᙳᐊᖃᑦᑕᕆᐊᖃᕐᓂᑉᑎᓐᓄᑦ,” ᑕᐃᒪᓐᓇ ᐅᖃᖅᖢᓂ. “ᐅᕙᑉᑎᓐᓄᑦ ᓱᓕᔪᒃᑯᑦ ᐱᓕᕆᑎᑦᑏᓐᓇᖃᑦᑕᓚᐅᕐᒪᑦ ᑕᐃᒪᐃᑦᑑᔪᒪᔪᖓᑦᑕᐅᖅ – ᐃᑲᔪᕈᒪᔪᖓ ᓄᑕᖅᑲᓂᒃ. ᐱᙳᐊᖅᑐᓂᒃ ᒥᐊᓂᖅᓯᔨᐅᑉᓗᓂ ᖁᕕᐊᒋᑦᑎᐊᖅᑕᕋ.”
ᖁᔭᓐᓇᒦᖅᑐᖅ ᐃᓐᓇᐅᓂᖅᓴᐅᔪᓂᒃ ᐊᖑᑎᓂᒃ ᐊᕐᓇᕐᓂᒡᓗ volleyball-ᖅᑎᓂᒃ ᐊᕐᓇᑯᓗᑉᑎᓐᓂᒃ volleyball-ᖅᑎᑦᑎᔪᓐᓇᕐᒪᑕ ᐃᑲᕐᕋᕆᔭᖏᓐᓂᒃ.
Volleyball-ᒍᒫᖅᑐᑦ ᓴᓇᑦᑕᐃᓕᐅᕌᓂᒃᐸᑦ ᓄᕕᐱᕆ 22-ᒥ, ᕿᑎᐊᓂ, ᓄᕕᐱᕆ 24-ᒥ ᐊᒻᒪᓗ ᓴᓇᑦᑕᐃᓕᒥ, ᓄᕕᐱᕆ 28-ᒥ ᐅᓐᓄᒃᑯᑦ.
ᐊᑎᓕᐅᖃᑕᐅᔪᒪᔪᑦ, ᖃᐅᔨᒋᐊᕈᓐᓇᖅᑐᑦ ᖃᕝᕕᑦᑐᕐᒧᑦ ᒧᕐᓱᕐᒧᓪᓘᓐᓃᑦ Facebook-ᑯᑦ ᐅᕝᕙᓘᓐᓃᑦ ᐊᑎᓕᐅᕐᕕᖕᒥ ᓇᓂᓯᓗᑎᒃ ᐃᖃᐃᓕᓴᕐᕕᖕᒥ. ᐱᙳᐊᖅᑏᑦ ᐃᓚᐅᖃᑕᐅᖁᔭᐅᓪᓚᕆᒃᑐᑦ ᓇᓕᐊᖕᓂᑐᐃᓐᓇᖅ ᐅᓐᓅᔪᒥ ᐱᒡᒍᓴᐅᔾᔪᐊᖅᑎᓪᓗᒋᑦ, ᐃᓂᖃᑐᐊᖅᐸᑕ.