Skip to content

ᐸᑲᓪᓚᖕᓂᐊᖅᑐᑦ ᐃᓗᐃᑦᑐᕈᖅᓯᒪᔪᒃᑯᑦ ᐊᓕᐊᓇᐃᑦᑐᐊᓘᓗᓂ

ᑲᖏᖅᖠᓂᕐᒥ ᐊᓕᐊᓇᐃᒋᔭᐅᓪᓚᑦᑖᓲᖅ ᐅᐱᕐᖔᒃᑯᑦ ᐸᑲᓪᓚᖕᓂᖅ ᐃᓗᐃᑦᑐᒃᑯᑦ ᐅᑎᕐᓂᐊᓕᖅᑐᖅ, ᐊᓯᖏᑦ ᓄᓇᓕᖕᓂᙶᖅᑐᑦ ᖃᐃᖁᔭᐅᓯᒪᑉᓗᑎᒃ, ᓯᑭᑑᒃᑯᑦ ᓱᒃᑲᓴᐅᔾᔪᐊᕐᓂᐊᖅᑐᑦ, ᒧᒥᖃᑦᑕᕐᓂᐊᖅᑐᑦ, ᕿᑎᒃᑎᑕᐅᓂᐊᖅᑐᑦ ᐊᒻᒪᓗ, ᓄᕙᒡᔪᐊᕐᓂᒃᑯᑦ ᒪᓕᒃᑕᒃᓴᖃᙱᓪᓗᓂ.
28827373_web1_220420-KIV-pakallakINUK-file_1
Laughs abound as Rhona Irkootee, Emelda Kadlak-Tatty, Larissa Kadlak, Jada Tulugak and Leora Ikakhik, from left, compete in the sack hop on Williamson Lake during the 2016 edition of Pakallak Tyme in Rankin Inlet. NNSL file photo ᐃᒡᓚᒪᔭᒃᑐᑦ ᕈᓇ ᐃᖅᑯᒃᑎ, ᓴᐅᒥᖅᖠᕐᒦᑦᑐᖅ, ᐃᒥᐅᓪᑕ ᑲᓪᓚᒃ−ᑕᑎ, ᓚᕆᓴ ᑲᓪᓚᒃ, ᔭᑕ ᑐᓗᒐᖅ ᐊᒻᒪᓗ ᓕᐅᐊᕋ ᐃᒃᑲᕐᕆᖅ ᕿᑎᒃᖢᑎᒃ ᐴᖃᑦᑕᒃᑯᑦ ᓈᙱᔭᖅᑐᑦ ᑕᓯᑦᓈᕐᒥ 2016-ᒥ ᐸᑲᓪᓚᒃᑎᓪᓗᒋᑦ ᑲᖏᖅᖠᓂᕐᒥ. ᕿᑎᖕᓂᐊᓕᕐᒥᔪᑦ ᒪᕐᕉᒃ ᐅᑭᐅᒃ ᐱᐊᓂᒃᓯᒪᓕᖅᑎᓪᓗᒋᑦ ᓄᕙᒡᔪᐊᕐᓂᒃᑯᑦ ᕿᑎᒍᓐᓇᐃᓪᓕᓚᐅᖅᑎᓪᓗᒋᑦ.

ᑲᖏᖅᖠᓂᕐᒥ ᐊᓕᐊᓇᐃᒋᔭᐅᓪᓚᑦᑖᓲᖅ ᐅᐱᕐᖔᒃᑯᑦ ᐸᑲᓪᓚᖕᓂᖅ ᐃᓗᐃᑦᑐᒃᑯᑦ ᐅᑎᕐᓂᐊᓕᖅᑐᖅ, ᐊᓯᖏᑦ ᓄᓇᓕᖕᓂᙶᖅᑐᑦ ᖃᐃᖁᔭᐅᓯᒪᑉᓗᑎᒃ, ᓯᑭᑑᒃᑯᑦ ᓱᒃᑲᓴᐅᔾᔪᐊᕐᓂᐊᖅᑐᑦ, ᒧᒥᖃᑦᑕᕐᓂᐊᖅᑐᑦ, ᕿᑎᒃᑎᑕᐅᓂᐊᖅᑐᑦ ᐊᒻᒪᓗ, ᓄᕙᒡᔪᐊᕐᓂᒃᑯᑦ ᒪᓕᒃᑕᒃᓴᖃᙱᓪᓗᓂ.

“ᐅᑭᐅᕆᔭᖅᐳᑦ ᐊᑯᓂᐊᓘᖃᑦᑕᕐᒪᑦ, ᑭᓯᐊᓂ ᒪᕐᕉᖕᓂᒃ ᐅᑭᐅᓂᒃ ᐅᐱᕐᖔᒃᑯᑦ ᖃᓄᐃᓕᐅᖅᑎᑕᐅᙱᑎᓪᓗᒋᑦ ᐊᑯᓂᐅᓂᖅᓴᐅᔫᔭᖅᓯᒪᔪᖅ,” ᑕᐃᒪᓐᓇ ᐅᖃᖅᖢᓂ ᒪᐃᔭᐅᑉ ᑐᖏᓕᖓ ᒫᑕ Hᐃᒃᔅ.

“ᐅᑕᖅᑭᓕᕋᑉᑕ ᒪᕐᕉᖕᓂᒃ ᐅᑭᐅᓂᒃ ᐊᑯᓂᐊᓗᒃ. ᖁᕕᐊᓱᒃᑐᒍᑦ ᖁᕕᐊᓱᖃᑎᒌᖕᓂᐊᓕᕐᒥᒐᑉᑕ.”

ᐸᑲᓪᓚᒋᐊᕈᒫᖅᑐᑦ ᓴᓇᑦᑕᐃᓕᐅᕌᓂᒃᐸᑦ, ᐊᐃᕆᓕ 25-ᒥ, ᐊᒻᒪᓗ ᑲᔪᓯᓂᐊᖅᖢᓂ ᓴᓇᑦᑕᐃᓕᒧᑦ, ᒪᐃ 1-ᒧᑦ, ᐱᒋᐊᕈᑕᐅᓂᐊᖅᑐᖅ ᓄᓇᖅᑲᑎᒌᑦ ᓂᕆᕕᒡᔪᐊᕐᓗᑎᒃ ᐱᙳᐊᕐᕕᖕᒥ, ᑕᐃᑲᙵᓪᓗ ‘fear factor’–ᖁᕕᐊᓲᑕᐅᓂᐊᖅᖢᓂ ᐊᒻᒪᓗ ᒧᒥᓕᕐᓗᑎᒃ.

ᑐᒡᓕᐊᓂ, ᐊᐃᕆᓕ 26-ᒥ, ᐃᓐᓇᑐᖃᐃᑦ ᐅᑉᓛᕈᒥᑕᖅᑎᑕᐅᔪᒫᖅᑐᑦ ᐊᒻᒪᓗ ᐃᓄᐃᑦ ᕿᑎᒃᑎᑕᐅᓕᕐᓗᑎᒃ, bingo-ᖅᑎᑕᐅᓗᑎᒃ ᐅᑉᓗᒃᑯᑦ, ᓯᑭᑑᕋᓛᓖᓪᓗ ᓱᒃᑲᓴᐅᔾᔪᐊᖅᑎᑕᐅᓗᑎᒃ ᑕᓯᓐᓈᕐᒥ, ᖁᑭᖅᓴᒡᒎᓐᓂᐊᖅᑐᑦ ᐊᒻᒪᓗ ᒪᒃᑯᒃᑐᑦ ᒧᒥᖅᑎᑕᐅᓗᑎᒃ ᐅᓐᓄᖓᓂ.

ᐃᓄᐃᑦ ᕿᓂᖅᑎᑕᐅᓂᐊᕐᒥᔪᑦ ᑎᑎᕋᖅᓯᒪᔪᓂᒃ ᒪᓕᒡᓗᑎᒃ, Scrabble-ᒎᓐᓂᐊᕐᒥᔪᑦ, ᐃᓄᒃᑎᑐᓪᓗ ᒧᒥᒃᑲᓐᓂᕐᓗᑎᒃ, ᓄᓇᖅᑲᑎᒌᑦ ᕿᑎᒃᑎᑕᐅᓗᑎᒃ ᐊᒻᒪᓗ ᓄᑕᖅᑲᑦ ᕿᑎᒃᑎᑕᐅᓗᑎᒡᓗ ᑕᐃᑲᙵᓪᓗ ᓱᒃᑲᓴᐅᔾᔪᐊᕆᐊᓕᕐᓗᑎᒃ ᓯᑭᑑᒃᑯᑦ ᑭᕙᓪᓕᕐᒥᐅᑦ ᓱᒃᑲᓴᐅᔾᔪᐊᕈᑎᒋᔭᒃᑕᖓᒍᑦ, ᐱᒋᐊᕋᔭᖅᑐᖅ ᑕᓪᓕᒻᒥᕐᒥ, ᐊᐃᕆᓕ 29-ᒥ.

“ᓄᓇᖅᑲᑎᒌᑦ ᑕᒪᕐᒥᓗᒃᑖᖅᑲᔭᑦ ᓯᑯᒧᙵᐅᓲᑦ ᓱᒃᑲᓴᐅᔾᔪᐊᖅᑐᓂᒃ ᑕᐅᑐᒋᐊᖅᑐᖅᖢᑎᒃ,” ᑕᐃᒪᓐᓇ ᐅᖃᖅᖢᓂ Hᐃᒃᔅ. “ᑕᒪᓐᓇ ᑕᒡᕙ ᖁᕕᐊᓇᕐᓂᖅᐹᖅ.”

ᐸᐱ ᒥᓯᕌᓛᖅ, ᐊᖓᔪᖅᑳᕆᔭᐅᔪᖅ ᓱᒃᑲᓴᐅᔾᔪᐊᖅᑎᒃᑯᑦ ᑲᑎᒪᔨᖏᓐᓂᒃ, ᐅᖃᖅᖢᓂ ᖁᕕᐊᓱᒃᑐᕉᖅ ᑕᐅᑐᒍᓐᓇᕐᓂᐊᕋᒥ ᓱᒃᑲᓴᐅᔾᔪᐊᖅᑎᓂᒃ ᖁᕕᐊᓱᒃᑐᓂᒃ. ᑕᓪᓕᒪᐅᔫᖕᒪᑕ ᐊᕕᒃᑐᖅᓯᒪᔪᒃᑯᑦ ᓱᒃᑲᓴᐅᔾᔪᐊᖃᑎᒌᖕᓂᐊᖅᑐᑦ ᑕᒡᕙᓂ ᐅᑭᐅᒥ: ᐊᕐᓇᐃᑦ, ᒪᒃᑯᒃᑐᑦ 18-ᓂᒃ ᐅᑭᐅᓖᑦ ᑐᖔᓂᓗ, ᐃᓐᓇᐃᑦ 19-ᓂᒃ ᐅᑭᐅᓖᑦ ᐅᖓᑖᓂᓗ, ᐃᓐᓇᐅᓂᖅᓴᓪᓗ 35-ᓂᒃ ᐅᑭᐅᓖᑦ ᑐᖔᓂᓗ ᐊᒻᒪᓗ ᐃᓐᓇᑐᖃᐃᑦ 50-ᓂᒃ ᐅᑭᐅᓖᑦ ᐊᒻᒪᓗ ᑐᖔᓂ, ᐊᒻᒪᓗ ᓄᑕᖅᑲᑦ ᓱᒃᑲᓴᐅᔾᔪᐊᕐᓗᑎᒃ ᑕᓯᓐᓈᕐᒥ.

“ᖃᐅᔨᒪᔪᒍᑦ ᐱᒡᒍᓴᐅᔾᔪᐊᕐᓂᐊᕐᒪᑕ ᓯᕗᓪᓕᖅᐹᒃᑯᑦ ᐱᒋᐊᑲᐅᑎᒋᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᒥᓯᕌᓛᖅ. “ᐱᒻᒪᕆᐊᓘᓂᐊᕐᒥᔪᖅ ᑕᒪᐃᓐᓄᑦ ᓱᒃᑲᓴᐅᔾᔪᐊᖅᑐᓄᑦ. ᖃᓄᐃᑦᑐᖃᕈᓐᓇᕐᒪᑦ – ᓯᖁᒥᔾᔨᓲᑦ ᐊᒻᒪᓗ ᐱᕐᕈᓗᐊᕿᓲᑦ ᑕᐃᒪᐅᖃᑦᑕᕐᒪᑕ.”

ᑐᐊᕕᕐᓇᖅᑐᓕᕆᔨᒃᑯᑦ ᑕᐃᒪᐅᖏᓐᓇᓲᑦ ᐊᒻᒪᓗ ᑲᑎᒪᔨᕋᓛᑦ ᓱᒃᑲᓴᐅᔾᔪᐊᕐᕕᐅᓂᐊᖅᑐᒥᒃ ᐋᖅᑭᒃᓯᑦᑎᐊᖅᓯᒪᓇᓱᓲᑦ ᐊᑦᑕᓇᖅᑐᖅᑕᖁᓇᒍ, ᑕᐃᒪᓐᓇ ᐅᖃᖅᖢᓂ.

“ᓯᕗᓂᒃᓴᖃᑦᑎᐊᖁᕙᒃᑲ ᑕᒪᕐᒥᒃ ᓱᒃᑲᓴᐅᔾᔪᐊᕐᓂᐊᖅᑐᑦ ᐅᑭᐅᖅ,” ᑕᐃᒪᓐᓇ ᐅᖃᖅᖢᓂ ᒥᓯᕌᓛᖅ.

ᐅᖃᒃᑲᓐᓂᖅᐳᖓᓗ, ᑕᒪᕐᒥᒃ ᓄᓇᓖᑦ ᑲᖏᖅᖠᓂᐅᑉ ᓯᓚᑖᓂᕐᒥᐅᑕᑦ ᑐᙵᓱᒃᑎᑕᐅᓂᐊᖅᑐᑦ ᖃᐃᖁᔭᐅᔪᓪᓗ.

“ᑕᑯᔪᓐᓇᕐᓂᐊᓕᕐᒥᔭᖅᐳᑦ ᐃᓚᓐᓈᖅᐳᑦ, ᐃᓚᕗᓪᓗ ᑕᑯᓗᒋᑦ ᑭᕙᓪᓕᕐᒥᐅᑕᑦ, ᐊᒻᒪᓗ ᐃᓅᖃᑎᒌᑦᑎᐊᕈᓐᓇᕐᓗᑕ ᐅᖓᓯᒌᒃᑑᑎᐊᓗᙱᓪᓗᑕᓗ,” ᑕᐃᒪᓐᓇ ᐅᖃᖅᖢᓂ ᑎᐅᕆᓐ ᕕᓕᓐ, Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓ.

ᐅᑭᐅᖑᔪᖅ ᐃᓄᐃᑦ ᖁᕕᐊᓱᑦᑎᐊᕐᓂᐊᖅᑰᖅᑐᑦ ᐃᓅᓯᕆᓚᐅᖅᑕᑉᑎᓐᓄᑦ ᐅᑎᖅᐸᓪᓕᐊᓕᕋᑉᑕ.

“ᖃᐅᔨᒪᔪᒍᑦ ᓄᕙᒡᔪᐊᕐᓂᖅᑕᖃᕐᒪᑦ ᓱᓕ, ᑭᓯᐊᓂ ᐃᓕᑦᑎᕙᓪᓕᐊᔪᒍᑦ ᖃᓄᖅ ᐃᓅᓂᐊᕐᒪᖔᑉᑕ ᐱᑕᖃᕋᓗᐊᖅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ ᕕᓕᓐ. “ᑕᒪᓐᓇ ᐊᓕᐊᓇᐃᑦᑐᐊᓘᓂᐊᖅᑐᖅ ᑕᒪᐃᓐᓄᑦ ᐃᓄᖕᓄᑦ. ᐊᕐᕌᓂᐅᓚᐅᖅᑐᒥ ᐊᔾᔨᖃᔾᔮᙱᑦᑐᖅ ᒪᕐᕉᖕᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ. ᐃᓄᐃᑦ ᐊᓕᐊᓇᐃᒍᓱᒃᑐᑦ ᑕᐃᒪᐃᓕᐅᕐᓂᐊᕐᓂᑉᑎᓐᓄᑦ.”