ᓂᕆᐅᖕᓂᐅᔪᑦ ᓴᖅᑭᑎᑦᑎᓂᕐᒥ ᓂᕿᓪᓚᑦᑖᓂ ᐱᓕᕆᐊᖑᔪᒥ ᑕᓗᕐᔪᐊᓂ ᖃᓂᒡᓕᕙᓪᓕᐊᕗᖅ ᐱᓪᓚᕆᙳᕐᓂᖓᓂ ᐸᕐᓇᐅᑎᑦ ᐱᓕᕆᕝᕕᐅᓂᐊᖅᑐᒥ ᐋᖅᑭᒃᐸᓪᓕᐊᑎᓪᓗᒍ.
ᐃᓚᒋᔭᐅᔪᑦ ᑕᓗᕐᔪᐊᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓂ ᐋᖅᑭᒃᓱᐃᕗᑦ ᓴᓇᓯᒪᕙᒌᖅᑐᒥ ᐋᖅᑭᒃᓱᑐᐃᓐᓇᕆᐊᓕᖕᒥ ᐃᒡᓗᕐᔪᐊᒥ ᐅᓯᔭᐅᓂᐊᖅᑐᒥ ᒪᓐᑐᕆᐊᑉ ᐃᓂᖓᓂ ᐅᒥᐊᕐᔪᐊᒃᑯᑦ ᑕᒪᑐᒪᓂ ᐊᐅᔭᐅᔪᒥ, ᐅᖃᐅᓯᐅᓪᓗᓂ ᔨᒥ ᐅᓕᑲᑕᓕᖕᒧᑦ, ᐊᐅᓚᑦᑎᔨᐅᔪᖅ ᑲᑐᔾᔨᖃᑎᒌᖑᔪᓄᑦ.
“ᑭᒃᑯᓕᒫᑦ ᖁᕕᐊᕐᔪᐊᖅᐳᑦ ᐊᒻᒪ ᓂᕆᐅᖕᓂᖃᑦᑎᐊᖅᐳᑦ ᐱᓪᓚᕆᐅᔪᒥ ᐱᓚᒃᑐᐃᓂᕐᒥ−ᐊᒻᒪ−ᐴᖅᑲᐃᕕᖕᒥ (ᐃᒡᓗᕐᔪᐊᒥ) ᐊᒻᒪ ᓂᕿᓪᓚᑦᑖᓄᑦ,” ᐅᖃᓚᐅᖅᐳᖅ.
ᑲᑎᙵᓂᐅᔪᑦ ᐱᓯᒪᒋᕗᑦ ᓄᓇᒃᓴᖓᓂ ᐅᕘᓇ ᕼᐋᒻᓚᒃᑯᑦ ᑕᓗᕐᔪᐊᓂ ᐱᓕᕆᕝᕕᒃ ᐃᓂᖃᕐᓂᐊᕐᓂᖓᓂ.
ᓂᕿᕼᐊᖁᑦ ᐱᓕᕆᐊᒃᓴᖅ, ᑐᑭᖃᖅᑐᒥ ᐃᓄᐃᑦ ᐅᖃᐅᓯᖓᓐᓂ “ᓂᕿᑦᑎᓐᓂ,” ᐱᓚᐅᖅᐳᑦ $451,000−ᓂ ᐅᕘᓇ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᖃᐅᓯᐊᒥ 2020−ᒥ. ᑕᒪᓐᓇ ᑮᓇᐅᔭᖃᖅᑎᑕᐅᓂᐅᔪᖅ ᐱᓚᒃᑐᐃᓂᕐᒥ−ᐊᒻᒪ−ᐴᖅᑲᐃᕕᖕᒥ ᐃᒡᓗᕐᔪᐊᕐᒥ ᐊᔪᕐᓇᙱᑎᑦᑎᕗᖅ, ᐅᖃᓚᐅᖅᐳᖅ ᐅᓕᑲᑕᓕᒃ. ᐱᓕᕆᐊᒃᓴᖅ ᐊᖏᒡᓕᒋᐊᒃᑲᓐᓂᓕᕈᓂ, ᐃᑲᔪᖅᓱᐃᓂᒃᑲᓐᓂᕐᒥ ᐱᔭᕆᐊᖃᕋᔭᖅᐳᑦ ᒐᕙᒪᒃᑯᓐᓂ, ᐃᓚᒋᐊᖅᓯᓚᐅᖅᐳᖅ.
“ᐃᒡᓗᕐᔪᐊᖅ ᒥᑭᓐᓂᖅᓴᐅᓂᐊᖅᐳᖅ ᐱᔪᒪᓚᐅᖅᑕᑦᑎᓐᓂ, ᑭᓯᐊᓂ ᓂᕆᐅᒃᐳᒍᑦ ᑕᑯᒃᓴᐅᑎᑦᑎᔪᓐᓇᓕᕈᑦᑕ ᐱᓕᕆᓂᑦᑎᓐᓂ ᐱᓕᕆᔪᒪᔭᑦᑎᓐᓂ, ᐊᐱᕆᔪᓐᓇᓛᖅᐳᒍᑦ ᑮᓇᐅᔭᖃᖅᑎᑕᐅᓂᕐᒥ ᐊᖏᓂᖅᓴᒧᑦ ᐃᒡᓗᕐᔪᐊᒥ,” ᐅᖃᓚᐅᖅᐳᖅ.
ᓂᕆᐅᒃᐳᖅ ᐱᓕᕆᐊᖑᔪᖅ ᐃᖅᑲᓇᐃᔭᖅᑎᑦᑎᓂᐊᕐᓂᖓᓂ ᑎᑭᐅᒪᔪᒧᑦ 20−ᓄᑦ ᐃᓄᖕᓂ, ᐊᖑᓇᓱᒃᑏᓐᓇᒐᓚᖕᓂ ᒥᑭᒋᐊᕐᓂᐊᖅᑎᓂᓪᓗ. ᑐᓂᓯᖃᑦᑕᕐᓂᐊᖅᐳᑦ ᐃᖃᓗᖕᓂ, ᑲᕕᓯᓕᒃ, ᐃᖣᕋᖅ, ᐆᒐᖅ, ᐅᒥᖕᒪᒃ, ᑐᒃᑐ, ᐊᕐᕕᖅ, ᓇᓄᖅ, ᒥᑎᑦ ᐊᒻᒪ ᑲᖑᐃᑦ.
“ᖃᓄᐃᑦᑐᑐᐃᓐᓇᕐᓂ ᐆᒪᔪᓂ ᓂᕆᕙᒃᑕᑦᑎᓐᓂ,” ᐅᓕᑲᑕᓕᒃ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑐᕌᒐᒃᓴᖓ ᐃᑲᔪᕐᓂᕐᒧᑦ ᓄᓇᓕᖕᓂ ᖃᓂᒋᔭᖓᓂ 1,000−ᓂ ᐃᓄᖕᓂ ᑭᐅᓂᖏᓐᓂ ᓂᕆᐅᓯᖏᓐᓂ ᐱᔭᕆᐊᖃᖅᑕᖏᓐᓂ, ᑭᓯᐊᓂ ᐊᕕᒃᑐᖅᓯᒪᓂᒧᐊᙱᓪᓗᓂ ᓄᓇᕗᒻᒧᓪᓘᓐᓃᑦ ᐊᖏᓂᖓᓂ. “ᐊᖑᓇᓱᓗᐊᕈᒪᙱᓚᒍᑦ ᐆᒪᔪᖁᑎᑦᑎᓐᓂ ᐅᕙᓂ. ᓄᓇᓕᖕᓄᓪᓗᐊᑕᐅᓂᐊᖅᐳᖅ. ᑮᓇᐅᔭᓕᐊᕗᑦ, ᐊᑐᕈᒪᕙᕗᑦ ᓄᓇᓕᐊᖃᑎᖃᕐᓂᕐᒧᑦ ᒪᒃᑯᒃᑐᓂ ᐊᒻᒪ ᑐᙵᕕᒋᔭᖏᓐᓄᑦ ᐅᑎᕐᓂᕐᒧᑦ.”
ᐅᓕᑲᑕᓕᒃ ᓂᕆᐅᒃᐳᖅ ᐊᑐᐃᓐᓇᐅᓂᖓᓂ ᓂᕿᓪᓚᑦᑖᓂ ᐅᕘᓇ ᐱᓕᕆᐊᖑᔪᒥ ᐱᒋᐊᕐᓂᐊᖅᐳᖅ ᕿᓚᒻᒥᐅᑎᒋᔪᒥ ᑕᒪᑐᒪᓂ ᐅᑭᐊᒃᓵᖑᔪᒥ. ᒫᓐᓇᐅᔪᒥ, ᓄᓇᓕᒃ ᐊᑐᖅᓯᒪᕗᑦ ᓄᓇᕗᒻᒥ ᒐᕙᒪᒃᑯᓐᓂ ᓂᕿᓪᓚᑦᑖᓄᑦ ᑐᓐᓂᖅᓴᐃᓂᐅᔪᒥ ᐱᓕᕆᐊᖑᔪᒥ.
ᓴᐳᔾᔭᐅᓯᒪᔪᖅ ᐃᓂᐅᔪᖅ
ᐃᓚᒋᔭᐅᔪᒥ 90,000-ᑭᑉᐹᕆᒃᑐᓂ-ᑭᓛᒥᑐᒥ ᓴᐳᔾᔭᐅᓯᒪᔪᓄᑦ ᐊᒻᒪ ᐊᑐᓗᐊᖅᑕᐃᓕᓂᕐᒧᑦ ᐃᓂᐅᔪᒥ ᐊᕐᕕᖅᑑᕐᒥ, ᐊᖏᖅᑕᐅᒃᐸᑦ, ᓴᐳᔾᔨᓯᒪᓂᐊᖅᐳᖅ ᑕᕆᐅᕐᒥ ᐊᒻᒪ ᓄᓇᒥ ᐆᒪᔪᓂ ᓴᓇᔭᐅᓯᒪᔪᓄᑦ ᐱᕙᓪᓕᐊᑎᑕᐅᓂᖓᓄᑦ, ᓲᕐᓗ ᐅᔭᕋᖕᓂᐊᕐᓂᕐᒥ ᐊᒻᒪ ᐅᖅᓱᐊᓗᖕᒧᑦ ᐊᒻᒪ ᐅᖅᓱᒧᑦ, ᑭᓯᐊᓂ ᐆᒪᔪᐃᑦ ᐊᑐᐃᓐᓇᐅᓂᐊᖅᐳᑦ ᐊᖑᓇᓱᒃᑎᓄᑦ, ᐅᖃᐅᓯᐅᓪᓗᓂ ᐅᓕᑲᑕᓕᖕᒧᑦ.
“ᐊᐅᓚᑕᐅᓂᐊᖅᐳᖅ ᑭᓯᐊᓂ,” ᐅᖃᓚᐅᖅᐳᖅ ᐊᖏᔪᒻᒪᕆᐊᓗᖕᒥ ᓄᓇᐅᔪᒥ, ᖃᐅᔨᒪᔭᐅᔪᒥ ᐊᑯᖅᑑᕐᒥ.
ᐳᕌᓐᑎᓐ ᓚᕗᐊᕆᔅᑦ, ᐱᓕᕆᔨᒻᒪᕆᐅᔪᖅ ᐅᑭᐅᖅᑕᖅᑐᒥ ᐆᒪᔪᐃᑦ ᐊᔾᔨᒌᙱᓐᓂᖏᓐᓂ ᐊᒻᒪ ᐆᒪᔪᐃᑦ ᓄᖅᑭᐅᕐᕕᖓ ᓄᓇᕐᔪᐊᒥ ᐆᒪᔪᓄᑦ ᑮᓇᐅᔭᖃᖅᑎᑕᐅᓂᐅᔪᒥ (WWF) ᑲᓇᑕᒥ, ᐅᖃᓚᐅᖅᐳᖅ ᐊᑐᓗᐊᖅᑕᐃᓕᓂᕐᒧᑦ ᑲᑐᔾᔨᖃᑎᒌᖑᔪᖅ ᐊᑐᖅᑐᐊᖅᑎᑦᑎᓚᐅᖅᐳᖅ ᐃᑲᔪᕈᑎᒃᓴᖏᓐᓂ ᓂᕿᕼᐊᖁᑦ ᐱᓕᕆᐊᒃᓴᐅᔪᒥ ᖃᓂᒋᔭᖓᓂ ᐊᕐᕌᒍᑲᓴᖕᓂ ᑎᓴᒪᓄᑦ ᑕᓗᕐᔪᐊᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓂ ᐃᑲᔪᖅᑕᐅᔪᒪᓂᕐᒧᑦ ᑐᒃᓯᕋᓚᐅᖅᑎᓪᓗᒋᑦ ᓄᓇᕐᔪᐊᒥ ᐆᒪᔪᓄᑦ ᑮᓇᐅᔭᖃᖅᑎᑕᐅᓂᐅᔪᒥ ᐅᖓᕙᕆᐊᖅᑎᑦᑎᓂᕐᒧᑦ ᐱᒋᐊᕈᑕᐅᔪᒥ.
“ᐆᒃᑑᑎᓪᓚᕆᐅᖅᑰᖅᐳᖅ ᖃᓄᖅ ᐱᓕᕆᔪᒪᓂᑦᑎᓐᓂ ᓄᓇᕐᔪᐊᒥ ᐆᒪᔪᓄᑦ ᑮᓇᐅᔭᖃᖅᑎᑕᐅᓂᐅᔪᒥ ᐱᔾᔪᑎᖃᖅᑐᒥ ᐃᑲᔪᖅᓱᐃᓂᕐᒥ ᓄᓇᖃᖅᑳᖅᓯᒪᔪᓄᑦ−ᐊᐅᓚᑕᐅᔪᓄᑦ ᐊᑐᓗᐊᖅᑕᐃᓕᓂᕐᒧᑦ,” ᐅᖃᓚᐅᖅᐳᖅ ᓚᕗᐊᕆᔅᑦ. “ᑕᐃᑲᙵᑦ ᐱᒋᐊᓚᐅᖅᐳᖅ ᐱᔾᔪᑎᖃᖅᑐᒥ ᐊᑐᓗᐊᖅᑕᐃᓕᓂᕐᒧᑦ ᐃᓂᐅᔪᒥ ᖁᕝᕙᖅᓴᐃᔪᒥ ᓂᕿᓄᑦ ᓇᖕᒥᓂᖅ ᐊᐅᓚᑦᑎᓂᕐᒧᑦ ᐊᒻᒪ ᐃᖅᑲᓇᐃᔮᒃᓴᓄᑦ. ᑐᑭᓕᐊᕐᓂᖃᑦᑎᐊᖅᐳᖅ ᖃᓄᖅ ᐱᔪᒪᓂᕆᔭᑦᑎᓐᓂ ᐊᒻᒪ ᐱᓕᕆᓂᕐᒧᑦ ᓄᓇᕗᒻᒥ.”
ᓄᓇᕐᔪᐊᒥ ᐆᒪᔪᓄᑦ ᑮᓇᐅᔭᖃᖅᑎᑕᐅᓂᐅᔪᒥ ᑲᓇᑕᒥ ᐃᑲᔪᖅᓱᐃᓯᒪᒐᓗᐊᖅᑎᓪᓗᒋᑦ ᐊᒥᓱᓂ ᓴᐳᔾᔭᐅᓯᒪᔪᓂ ᐊᒻᒪ ᐊᑐᓗᐊᖅᑕᐃᓕᓂᕐᒧᑦ ᐃᓂᐅᔪᓂ ᑲᓇᑕᓕᒫᒥ, ᓯᕗᓪᓕᖅᐸᐅᕗᖅ ᓄᓇᕗᒻᒥ ᐊᐅᓚᑕᐅᔪᒥ ᐃᓄᖕᓂ ᑲᑎᙵᓂᐅᔪᓂ, ᓚᕗᐊᕆᔅᑦ ᐅᔾᔨᕆᓚᐅᖅᐳᖅ. ᐊᑯᓂᐅᓂᐊᕐᓂᖓᓂ ᐅᖓᕙᕆᐊᖅᓯᓂᕐᒧᑦ ᓂᕈᐊᖅᑕᐅᓯᒪᔪᒥ ᐃᓂᐅᔪᒥ ᓴᐳᔾᔭᐅᓯᒪᓂᕆᓂᐊᖅᑕᖓᓂ ᓱᓕ ᓇᓗᓇᕐᓂᖓᓂ, ᓚᕗᐊᕆᔅᑦ ᑎᒃᑯᐊᕆᓚᐅᖅᐳᖅ ᒐᕙᒪᑐᖃᒃᑯᓐᓂ ᐊᖏᖅᓯᒪᓂᖓᓂ ᓴᐳᔾᔨᓯᒪᓂᕐᒥ 25 ᐳᓴᓐᑎᖓᓂ ᑲᓇᑕᒥ ᓄᓇᖏᓐᓂ ᐊᒻᒪ ᑕᕆᐅᕐᒥ 2025−ᒧᑦ ᐊᒻᒪᓗ 30 ᐳᓴᓐᑎᒧᑦ 2030−ᒧᑦ.
ᓴᖅᑭᑎᑦᑎᓂᖓᓂ ᑐᒃᓯᕋᖅᑕᐅᔪᒥ ᐊᑐᓗᐊᖅᑕᐃᓕᓂᕐᒧᑦ ᐃᓂᐅᔪᒥ ᒪᓕᒋᐊᖃᖅᐳᖅ ᐋᔩᖃᑎᖃᑦᑎᐊᕐᓂᐅᔪᒥ ᐃᓄᖕᓄᑦ ᐊᒃᑐᖅᑕᐅᓯᒪᔪᓄᑦ ᐊᒻᒪ ᐱᕚᓪᓕᕈᑕᐅᔪᒥ ᐊᖏᕈᑕᐅᔪᒥ, ᓚᕗᐊᕆᔅᑦ ᐅᖃᓚᐅᖅᐳᖅ.
“ᐅᓇ ᓴᐳᔾᔨᓯᒪᓂᑐᐃᓐᓇᐅᙱᓚᖅ ᐃᓂᐅᔪᒥ ᓴᐳᔾᔨᓯᒪᑐᐃᓐᓇᕐᓂᕐᒧᑦ. ᐅᓇ ᓴᖅᑭᑎᑦᑎᕗᖅ ᑮᓇᐅᔾᔭᒃᓴᓂᕐᒧᑦ ᐱᕕᒃᓴᖃᓂᐅᔪᒥ ᐊᑐᓗᐊᖅᑕᐃᓕᓂᕐᒧᑦ ᑐᑭᓕᐊᕐᓂᖃᖅᑐᒥ ᓄᓇᓕᖕᓂ ᐱᓐᓇᕆᔭᐅᔪᓂ ᐊᒻᒪ ᐃᑲᔪᖅᓱᐃᕗᖅ ᓄᓇᓕᖕᓂ ᖃᓄᐃᙱᑦᑎᐊᕐᓂᐅᔪᒥ,” ᐅᖃᓚᐅᖅᐳᖅ.
ᐃᓚᒋᔭᖏᓐᓂ ᐅᖃᖃᑎᖃᕐᓂᐅᔪᓂ ᑭᖑᕙᕆᐊᖅᓯᒪᕗᑦ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᕐᒧᑦ, ᐅᓕᑲᑕᓕᒃ ᐊᒻᒪ ᓚᕗᐊᕆᔅᑦ ᓇᓗᓇᐃᖅᓯᓚᐅᖅᐳᑦ.
“ᐊᑯᓂᐅᔪᒥ ᐱᓕᕆᓂᐅᕗᖅ. ᓴᐳᔾᔨᓯᒪᓂᖅ ᐅᓐᓄᐊᖏᓐᓇᒥ ᓴᖅᑭᑐᐃᓐᓇᓲᖑᙱᓚᖅ,” ᐅᖃᓚᐅᖅᐳᖅ ᓚᕗᐊᕆᔅᑦ.