Skip to content

ᑭᕙᓪᓕᕐᒥ ᐃᓅᓚᐅᖅᓯᒪᔪᖅ ᑕᑯᑎᑖᕆᔪᖅ ᑐᕌᓐᑐᒥ ᐊᓐᓄᕌᓂᒃ ᑕᑯᑎᑖᕆᑎᓪᓗᒋᑦ

ᑮᓇᓐ ᓯᒥᒃ ᑯᒪᒃᓯᐅᑎᒃᓴᖅ ᑲᑉᐱᐊᒋᔭᖃᙱᑦᑐᖅ ᑕᑯᑎᑖᕆᔭᕆᐊᒃᓴᖅ.
29725825_web1_220713-KIV-modelINUK_2

ᑮᓇᓐ ᓯᒥᒃ ᑯᒪᒃᓯᐅᑎᒃᓴᖅ ᑲᑉᐱᐊᒋᔭᖃᙱᑦᑐᖅ ᑕᑯᑎᑖᕆᔭᕆᐊᒃᓴᖅ.

ᑲᖏᖅᖠᓂᕐᒥ ᐃᓅᓚᐅᖅᓯᒪᔪᖅ ᒧᒥᖅᑎᓪᓚᕆᒃ, ᒪᓐᑐᕆᔮᒥᐅᑕᐅᓕᖅᑐᖅ, ᑕᐃᒪᐃᑦᑐᓕᕆᔨᐅᔭᕆᐊᖃᕐᓂᖓᓄᑦ ᓇᓗᓇᐃᖅᓯᓯᒪᔪᖅ.

“ᖁᒃᓴᓱᒍᓐᓇᙱᑦᑐᖓ,” ᑕᐃᒪᓐᓇ ᐅᖃᖅᖢᓂ ᑯᒪᒃᓯᐅᑎᒃᓴᖅ ᑕᑯᑎᑖᕆᖅᑳᖅᖢᓂ ᐊᓐᓄᕌᓂᒃ ᓄᓇᖃᖅᑳᖅᓯᒪᔪᑦ ᓴᓇᔭᕕᓂᖏᓐᓂᒃ ᑐᕌᓐᑐᒥ ᑕᖅᑭᐅᓚᐅᖅᑐᒥ. “ᐅᖃᕈᓐᓇᖅᑐᖓᓕ ᐊᓕᐊᓇᐃᑦᑐᐊᓘᓂᖓᓄᑦ.”

ᑯᒪᒃᓯᐅᑎᒃᓴᖅ ᐃᓅᓚᐅᖅᓯᒪᔪᖅ ᑲᖏᖅᖠᓂᕐᒥ ᑭᓯᐊᓂ ᓅᓚᐅᖅᑐᖅ ᐊᑐᕚᒧᑦ ᐅᑭᐅᖃᓕᖅᖢᓂ ᐱᖓᓱᓂᒃ. ᑕᑯᑎᑖᕆᔪᓐᓇᑦᑎᐊᖅᑐᖅ ᒧᒥᖃᑦᑕᖅᓯᒪᓕᖅᑐᖅ ᑕᐃᒪᙵᓂ ᐅᑭᐅᖃᓕᖅᖢᓂ ᐊᕐᕕᓂᓕᖕᓂᒃ ᐊᒻᒪᓗ ᐱᒻᒪᕆᐅᑎᙳᖅᖢᓂᐅᒃ ᒪᒃᑯᒃᑐᕐᔪᐊᖑᓕᖅᑎᓪᓗᒍ.

“ᑕᑯᕋᓐᓈᖅᑎᑦᑎᖃᑦᑕᖅᓯᒪᓕᖅᑐᖓ ᐃᒻᒪᖄ ᐊᕙᑎᖅᑲᔭᕐᓂᒃ ᐅᑭᐅᓂᒃ,” ᑕᐃᒪᓐᓇ ᐅᖃᖅᖢᓂ ᑯᒪᒃᓯᐅᑎᒃᓴᖅ, ᐅᖃᖅᖢᓂᓗ ᑲᙳᓱᒍᓐᓇᐃᓪᓕᖕᒪᒡᒎᖅ. “ᑕᑯᕋᓐᓂᖅᑐᐊᓘᓚᐅᖅᑐᑦ ᓄᔭᖏᑦ ᑮᓇᖏᓪᓗ ᐱᐅᓴᖅᑕᐅᓯᒪᑎᓪᓗᒋᑦ. ᖁᒃᓴᓱᖕᓂᕐᒥᒡᓘᓐᓃᑦ ᐃᓱᒪᔪᓐᓇᓚᐅᖅᑑᔭᙱᑦᑐᑦ − ᑕᒪᕐᒥᒃ ᖁᕕᐊᓱᑐᐃᓐᓇᓚᐅᖅᑐᑦ ᑕᑯᑎᑦᑎᓂᕐᒧᑦ ᖃᓄᖅ ᐱᐅᓯᑎᑕᐅᓯᒪᖕᒪᖔᕐᒥᒃ.”

ᓵᓚᒃᓴᖅᑳᖅᖢᓂ ᐊᐅᔭᒃᑯᑦ ᐊᑐᕚᒥ ᐱᒡᒍᓴᐅᔾᔪᐊᖅᑐᓂᒃ 2015-ᒥ, ᑯᒪᒃᓯᐅᑎᒃᓴᖅ ᐊᑐᕈᓐᓇᖅᓯᓚᐅᖅᑐᖅ ᓵᓚᒃᓴᕈᓯᐊᒥᓂᒃ ᐃᓕᓐᓂᐊᕈᓐᓇᕐᓂᕐᒧᑦ ᑕᑯᕋᓐᓈᖅᑎᑦᑎᖃᑦᑕᕈᓐᓇᕐᓂᐊᕐᓂᕐᒧᑦ ᐊᒻᒪᓗ ᒧᒥᕆᐅᖅᓴᓗᓂ. ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᕌᓂᒃᑲᒥ, ᑕᑯᕋᓐᓈᖅᑎᑦᑎᔨᓂᒃ ᐃᓚᐅᖃᑕᐅᖃᑦᑕᓕᓚᐅᖅᑐᖅ ᐅᒥᐊᕐᔪᐊᒃᑯᑦ ᐊᒻᒪᓗ ᐊᐅᓪᓚᖅᑕᖃᑦᑕᖅᖢᓂ ᓄᓇᕐᔪᐊᕐᒥ ᑕᑯᕋᓐᓈᖅᑎᑦᑎᓂᒃᑯᑦ.

ᐅᑎᖅᓯᒪᓕᖅᖢᓂ ᑲᓇᑕᒧᑦ, ᑯᒪᒃᓯᐅᑎᒃᓴᖅ ᐊᓯᖏᓐᓂᒃ ᐱᓕᕆᖃᑎᖃᖃᑦᑕᖅᓯᒪᓕᖅᑐᖅ ᐃᓅᖃᑎᖃᖃᑦᑕᓕᖅᑐᖅ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᑦ ᒧᒥᖅᑎᖏᓐᓂᒃ, ᐃᓕᓐᓂᐊᕐᕕᒋᕙᒃᖢᓂᒋᓪᓗ ᑕᒪᑐᒥᙵ ᓴᕆᒪᓱᑦᑎᐊᖅᑐᖅ, ᐃᓕᓐᓂᐊᖅᑎᑦᑎᔨᒋᓂᖏᓐᓄᑦ ᓴᕆᒪᓱᒃᑐᖅ. ᓴᓇᐃᓐᓇᓲᖅ ᒪᓐᑐᕆᔮᒥ ᒧᒥᖅᑎᒋᔭᐅᑉᓗᓂ ᑕᑯᕋᓐᓈᖅᑎᑦᑎᔨᐅᓂᒃᑯᓪᓗ.

ᓄᓇᖃᖅᑳᖅᓯᒪᔪᓂᒃ ᐊᓐᓄᕌᓂᒃ ᑕᑯᕋᓐᓈᖅᑎᑦᑎᓲᑦ ᓯᑕᒪᓂᒃ ᐅᑉᓗᓂᒃ ᑕᑯᕋᓐᓈᖅᑎᑦᑎᓚᐅᖅᑐᑦ ᐊᒻᒪᓗ ᑯᒪᒃᓯᐅᑎᒃᓴᖅ ᑕᑯᕋᓐᓈᖅᑎᑦᑎᓚᐅᖅᑐᖅ ᐊᔾᔨᒌᙱᑦᑑᑕᐅᔪᓂᒃ ᐊᓐᓄᕌᕆᐅᖅᑎᑦ ᓴᓇᖃᑦᑕᖅᓯᒪᔭᖏᓐᓂᒃ ᓄᓇᖃᖅᑳᖅᓯᒪᔪᒃᑯᑦ.

“ᑕᑯᖃᑦᑕᖅᓯᒪᔪᖓ ᐊᒥᓱᓂᒃ ᐱᒻᒪᕆᐊᓗᖕᓂᒃ ᓄᓇᖃᖅᑳᖅᓯᒪᔪᓂᒃ, ᐅᕙᒻᓂᒃ ᐊᔭᐅᖅᑐᐃᓯᒪᓪᓚᕆᒃᑐᑦ ᐊᔭᐅᖅᑐᐃᓯᒪᔪᓪᓗ ᐃᓅᖃᑎᖃᕈᓐᓇᖅᓯᖁᑉᓗᖓ ᑕᒪᒃᑯᓂᙵ,” ᑕᐃᒪᓐᓇ ᐅᖃᖅᖢᓂ.

“ᐃᓅᖃᑎᖃᕈᓐᓇᖅᓯᓯᒪᔪᖓ ᐃᓄᖕᓂᒃ ᑕᑯᓯᒪᔭᒃᑲᓂᒃ ᓄᓇᖃᖅᑳᖅᓯᒪᔪᑦ ᐊᓐᓄᕌᓂᒃ ᑕᑯᕋᓐᓈᖅᑎᑦᑎᑎᓪᓗᒋᑦ ᐊᒻᒪᓗ ᖁᔭᓕᑦᑎᐊᖅᑐᖓ ᐃᖅᑲᐅᒪᔪᓐᓇᖅᑕᒃᑲᓂᒃ ᓴᖅᑭᑦᑐᖃᖅᓯᒪᖕᒪᑦ. ᖁᕕᐊᓱᒃᑐᖓ ᐊᕐᕌᒍ ᑕᐃᒪᐃᓕᐅᒃᑲᓐᓂᕈᒫᕐᓂᖏᓐᓄᑦ ᐊᒻᒪᓗ ᑕᐃᒪᑐᖅ ᑕᑯᔪᓐᓇᕈᒫᖅᐳᖓ ᐊᒥᓱᒃᑲᓐᓂᕐᓂᒃ ᐃᓄᖕᓂᒃ ᐆᒃᑐᖅᑐᓂᒃ ᐊᕐᕌᒎᔪᒫᖅᑐᒥ.”

ᑯᒪᒃᓯᐅᑎᒃᓴᖅ ᑕᑯᕋᓐᓈᖅᑎᑦᑎᓚᐅᖅᑐᖅ ᐊᔾᔨᒌᙱᑦᑑᑕᐅᔪᓂᒃ ᐊᓐᓄᕌᓂᒃ ᑕᑯᕋᓐᓈᖅᑎᑦᑎᑎᓪᓗᒋᑦ.

“ᐊᓕᐊᓇᐃᑦᑐᐊᓘᓚᐅᖅᑐᖅ ᑕᐃᒪᓐᓇ ᐱᓕᕆᔪᓐᓇᖅᑎᓪᓗᖓ,” ᑕᐃᒪᓐᓇ ᐅᖃᖅᖢᓂ. “ᑕᑯᑎᑦᑎᔪᓐᓇᖅᑐᖓ ᐃᒃᐱᖕᓂᒃᑯᑦ ᐃᓅᔪᓐᓇᕐᓂᒻᓄᑦ ᐃᓅᑉᓗᖓ, ᑕᐃᒪᐃᖦᖢᓂ ᐃᒃᐱᖕᓂᒃᑯᑦ ᒪᓕᓕᕈᓐᓇᕐᓇᕐᒪᑦ ᓴᙲᓐᓂᒃᑯᑦ ᓴᙱᓂᒃᑯᓪᓗ ᐱᓕᕆᑎᓪᓗᖓ ᑕᑯᕋᓐᓈᖅᑎᑦᑎᓂᒃᑯᑦ ᐃᓗᐃᑦᑐᕈᓚᐅᖅᑐᖅ ᐅᕙᒻᓄᑦ ᐃᒃᐱᒍᓱᒍᓐᓇᕐᓂᕐᒧᓪᓗ ᑭᓇᐅᓪᓚᑦᑖᕐᓂᕋᓄᑦ.”

ᑮᓇᐅᔭᑦ ᐊᑐᐃᓐᓇᕈᖅᓯᔪᓐᓇᕐᓂᖅᐸᑕ, ᑯᒪᒃᓯᐅᑎᒃᓴᖅ ᐅᑎᕈᒪᓂᐊᖅᑐᖅ ᑲᖏᖅᖠᓂᕐᒧᑦ ᐃᓕᓐᓂᐊᖅᑎᑦᑎᔭᖅᑐᕐᓗᓂ ᒪᒃᑯᒃᑐᓂᒃ ᑲᖏᖅᖠᓂᕐᒥ ᒧᒥᕐᓂᒃᑯᑦ.

29725825_web1_220713-KIV-modelINUK_3