Skip to content

ᑲᖏᖅᖠᓂᐅᑉ ᓇᓚᐅᑎᖃᕐᕕᖓ ᓄᑖᙳᖅᑎᖅᑕᐅᓯᒪᔪᖅ ᐊᐅᓪᓛᓕᖅᖢᓂᓗ

ᑲᖏᖅᖠᓂᐅᑉ ᓈᓚᐅᑎᐊᓛᖓ ᐊᐅᓪᓛᓕᕐᒥᔪᖅ ᐊᒻᒪᓗ ᑐᓴᕐᓂᕐᓂᖅᓴᐅᓕᖅᖢᓂ ᓄᑖᓂᒃ ᐱᖁᑎᖃᓕᕐᒪᑦ.
25942370_web1_210728-kiv-radio-rankin_2
Radio announcer Molly Ugjuk takes a selflie with Vital Aksabjuak at Rankin Inlet’s newly upgraded radio station. Photo courtesy of Molly Ugjuk ᓈᓚᐅᑎᒃᑰᖅᑎᑦᑎᔨ ᒪᓕ ᐅᒡᔪᒃ ᐃᖕᒥᓂᒃ ᕕᑖ ᐊᒃᓴᒡᔪᐊᕐᒥᓗ ᐊᔾᔨᓕᐅᖅᓯᔪᖅ ᑲᖏᖅᖠᓂᐅᑉ ᓈᓚᐅᑎᖃᕐᕕᖓᓂᒃ ᓄᑖᙳᖅᑎᖅᑕᐅᓯᒪᔪᒥᒃ.

ᑲᖏᖅᖠᓂᐅᑉ ᓈᓚᐅᑎᐊᓛᖓ ᐊᐅᓪᓛᓕᕐᒥᔪᖅ ᐊᒻᒪᓗ ᑐᓴᕐᓂᕐᓂᖅᓴᐅᓕᖅᖢᓂ ᓄᑖᓂᒃ ᐱᖁᑎᖃᓕᕐᒪᑦ.

“ᑐᓴᕐᓂᕐᓂᖅᓴᒻᒪᕆᐊᓘᓕᖅᑐᖅ,” ᑕᐃᒪᓐᓇ ᐅᖃᖅᖢᓂ Hᐊᕆ ᑕᐅᑐᙱ ᑲᖏᖅᖠᓂᐅᑉ ᒪᐃᔭᖓ.

ᓄᓇᓕᐅᑉ ᓈᓚᐅᑎᐊᓛᖓ 97.9 FM-ᒦᓲᖅ, ᐊᐅᓪᓛᕈᓐᓃᕆᐊᖃᓚᐅᕐᒪᑦ ᐱᓇᓱᐊᕈᓯᖅᑲᔭᒧᑦ ᑎᑭᖦᖢᒍ ᓄᑖᑦ ᐱᖁᑎᑖᖑᔪᑦ ᐃᓕᐅᖅᑲᖅᑕᐅᔪᓐᓇᖁᑉᓗᒋᑦ. ᓄᑖᙳᖅᑎᖅᑕᐅᓚᐅᖅᑐᑦ ᖃᕆᑕᐅᔭᖏᑦ, ᐅᖃᓪᓚᒡᕕᖏᑦ ᐊᒻᒪᓗ ᓇᐸᔪᖓ, ᐊᓯᖏᓪᓗ. ᐃᖢᐊᖏᓕᐅᕈᑎᖃᓚᐅᖅᑐᑦ ᓇᐸᔪᖓ ᐃᓕᐅᖅᑲᖅᑕᐅᑎᓪᓗᒍ. ᑕᐃᒪᐃᒻᒪᑦ ᐱᐊᓂᒃᑕᐅᓂᐊᕐᓂᖓ ᐅᖓᓯᒃᓯᒋᐊᖅᑕᐅᓚᐅᖅᑐᖅ.

ᐊᑕᐅᓯᕐᒥᒃ ᐅᑉᓗᕐᒥᒃ bingo-ᕈᓐᓇᓚᐅᙱᒃᑲᓗᐊᖅᑎᓪᓗᒋᑦ, ᑕᐅᑐᙱ ᐅᖃᖅᖢᓂ ᓄᓇᖅᑲᑎᒌᑦ ᑐᑭᓯᐅᒪᓚᐅᕐᓂᖏᓐᓄᑦ.

“ᓈᓚᒡᕕᐊᓛᖅ ᕿᓚᒻᒥᐅᔪᒃᑯᑦ ᐊᐅᓪᓛᓚᐅᙱᑦᑐᖅ ᐊᑕᐅᓯᖅ ᐱᓇᓱᐊᕈᓯᐅᑉ ᐅᖓᑎᑦᑎᐊᖓᓄᑦ. ᐃᓄᐃᑦ ᕿᓄᐃᓵᑦᑎᐊᓚᐅᖅᑐᑦ. ᐅᐱᒍᓱᓚᐅᖅᑐᒍᑦ ᐃᓄᐃᑦ ᐅᖃᐱᓗᑲᑕᓚᐅᙱᓐᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ.

ᒪᓕ ᐅᒡᔪᒃ, ᓈᓚᒡᕕᐊᓛᕐᒥ ᐅᖃᓪᓚᒃᑎᐅᖃᑕᐅᔪᖅ, ᐅᖃᖅᖢᓂ ᓄᑖᙳᖅᑎᕆᑕᐃᓐᓇᖅᑐᐊᓗᐃᒡᒎᖅ.

“ᐃᓛᓐᓂᒃᑯᑦ ᓯᕌᖅᑐᓂᒃ ᑐᓵᓐᓇᖃᑦᑕᓚᐅᕐᒪᑦ ᐊᒻᒪᓗ ᐃᓄᐃᑦ ᑐᓵᔪᓐᓃᖃᑦᑕᖅᖢᑎᒃ ᐅᖃᓪᓚᒃᑎᓂᒃ ᑕᐃᒪᐃᒻᒪᑦ ᓄᑖᓂᒃ ᐱᖁᑎᑖᕆᐊᖃᓪᓚᕆᓕᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ. “ᐱᐅᓂᖅᓵᓘᓕᖅᑐᑦ. ᓈᓚᒡᕕᐊᓛᖅ ᐃᑎᖅᖢᒍ ᐱᓕᕆᕝᕕᓪᓚᑦᑖᖑᔫᔭᓕᖅᑐᖅ.”

ᑭᐅᒍᕆᒥ ᓴᕕᒐᐅᔭᓕᕆᔨᒥᒃ ᑎᑭᑦᑐᖃᓚᐅᖅᑐᖅ ᐃᓕᐅᖅᑲᐃᔭᖅᑐᖅᑐᒥᒃ. ᐃᓕᓐᓂᐊᖅᑎᑦᑎᓚᐅᕐᒥᔪᖅ ᓈᓚᒡᕕᓕᕆᔨᓂᒃ ᖃᓄᖅ ᓄᑖᑦ ᐊᑐᖅᑕᐅᔭᕆᐊᖃᕐᒪᖔᑕ.

“ᐅᖃᐅᑎᔭᐅᓚᐅᖅᑐᒍᑦ ᓱᓇᓂᒃ ᓈᓚᐅᑎᒃᑰᖅᑎᑦᑎᔪᓐᓇᕐᒪᖔᑉᑕ ᓈᓚᐅᑎᒃᑰᖅᑎᑦᑎᔪᓐᓇᙱᒻᒪᖔᑉᑕᓘᓐᓃᑦ. ᓈᒻᒪᒃᑐᖅ ᖃᐅᔨᒪᑉᓗᓂ ᖃᓄᐃᓕᐅᕆᐊᖃᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᐅᒡᔪᒃ. “ᐊᔪᕐᓇᕈᔪᓚᐅᖅᑐᖅ ᓯᕗᓪᓕᖅᐹᒃᑯᑦ ᑭᓯᐊᓂ ᓱᖏᐅᑎᔪᒍᑦ ᐊᒻᒪᓗ ᒫᓐᓇᐅᔪᕐᓕ ᕕᑖᓗ ᖃᐅᔨᒪᓕᖅᑐᒍᑦ ᖃᓄᐃᓕᐅᕆᐊᖃᕐᒪᖔᑉᑕ.”

ᑕᐅᑐᙱ ᐅᖃᖅᖢᓂ ᓄᓇᖅᑲᑎᒌᑦ ᑐᙵᑎᖃᕋᔪᖕᒪᑕ ᓈᓚᒡᕕᐊᓛᕐᒥᒃ ᑐᓴᖅᑎᑦᑎᔪᒪᓕᕌᖓᑕ, ᐱᓗᐊᖅᑐᒥ ᐃᓐᓇᑐᖃᐃᑦ ᐊᒻᒪᓗ ᐃᓄᐃᑦ ᖃᕆᑕᐅᔭᓕᕆᓱᐃᑦᑐᑦ.

“ᐱᒻᒪᕆᐊᓗᒃ ᓄᓇᓕᖕᒥ. ᐃᓄᐃᑦ ᑐᓴᐅᒪᑎᑕᐅᖃᑦᑕᕐᒪᑕ ᓈᓚᐅᑎᐊᓛᒃᑯᑦ ᓄᓇᒥ. ᐊᓕᐊᓇᐃᑦᑐᖅ ᑕᑯᑉᓗᓂ ᓄᑖᙳᖅᑎᖅᑕᐅᓯᒪᓕᕐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ ᒪᐃᔭᒋᔭᐅᔪᖅ.

ᑕᐃᒪᐅᑎᓪᓗᒋᑦ ᓄᑖᑦ ᐱᖁᑎᑖᖑᔪᑦ, ᑕᐃᒪᑦᑕᐅᖅ ᓄᑖᖅ ᖃᕆᑕᐅᔭᖅ ᑐᓴᕐᓈᒐᒃᓴᓕᒃ 7,000-ᓂᒃ, ᑭᓯᐊᓂ ᖃᑉᓗᓈᑎᑑᖅᑐᐃᓐᓇᐃᑦ. ᐅᒡᔪᒃ ᐅᖃᖅᖢᓂ ᒋᐳᕆᐅᓪ ᖃᕐᓕᒃ ᖃᐃᑦᑎᓕᓚᐅᕐᒪᑦ ᑐᓴᕐᓈᒐᒃᓴᓂᒃ ᐃᓄᒃᑎᑐᑦ ᐱᑕᖃᖅᑐᓂᒃ ᐃᓕᐅᖅᑲᖅᑕᐅᔪᓐᓇᖅᑐᓂᒃ ᓄᑖᒧᑦ ᖃᕆᑕᐅᔭᕐᒧᑦ, ᑕᐃᒪᐃᒻᒪᑦ ᓈᓚᒡᕕᐊᓛᒃᑯᑦ ᐃᓄᒃᑎᑑᖅᑐᓂᒃ ᖃᐃᓗᓈᑎᑑᖅᑐᓂᒡᓗ ᑐᓴᕐᓈᕈᓐᓇᖅᓯᔪᖅ. ᑕᒪᕐᒥᒃ ᐊᓯᖏᑦ ᓈᓚᐅᑎᒃᑰᕈᑕᐅᓲᑦ ᐅᑎᖅᓯᒪᓕᕐᒥᔪᑦ, bingo-ᖃᑦᑕᕐᓂᖅ ᐃᓚᐅᖃᑕᐅᑉᓗᒍ.

“ᐊᔾᔨᐅᙱᑦᑑᓕᖅᑐᖅ bingo-ᕈᑎᒃᓴᖃᕐᒪᑦ. ᓇᕿᑕᐅᓯᒪᖃᑦᑕᕆᐊᓕᒃ ᓇᕿᑦᑕᐅᑎ bingo-ᓕᕌᖓᑕ.”

ᐅᒡᔪᒃ, ᓈᓚᒡᕕᓕᕆᔨᐅᓕᖅᑐᖅ ᓯᑕᒪᓂᒃ ᐅᑭᐅᓂᒃ, ᐅᖃᖅᖢᓂ ᖁᔭᓕᔪᕉᖅ ᖁᕕᐊᒋᔭᒥᓂᒃ ᐱᓕᕆᐊᖃᒃᑲᓐᓂᕈᓐᓇᖅᓯᒐᒥ.

“ᐊᓕᐊᓇᐃᒋᔭᕋ ᐱᓕᕆᔾᔪᔾᔨᑉᓗᓂ ᓄᓇᓕᖕᒥᒃ,” ᑕᐃᒪᓐᓇ ᐅᖃᖅᖢᓂ. “ᐊᓕᐊᓇᐃᒋᔭᕋ ᑐᓵᖃᑦᑕᖅᖢᓂ ᐃᓄᖕᓂᒃ, ᐊᓕᐊᓇᐃᒋᓪᓚᕆᒃᑕᕋ ᓴᓇᕝᕕᒐ.”