ᑲᖏᖅᖠᓂᖅ ᐊᖏᓂᖅᐹᒃᑯᑦ ᐃᖕᒥᒃᑯᑦ ᖃᐅᒻᒪᖅᑯᑎᓕᐅᕈᑎᑖᖅᓯᒪᓕᖅᑐᖅ ᓄᓇᕗᒥ ᖁᔭᓐᓇᒦᖅᖢᒋᑦ ᐃᓕᐅᖅᑲᐃᓚᐅᖅᑐᑦ ᖃᐅᒻᒪᖅᑯᑎᓕᕆᔾᔪᑎᓂᒃ ᓄᑖᒥ ᓯᐊᕐᕆᔮᕐᕕᒃᑖᓵᖑᔪᒥ.
Hᐊᒻᓚᒃᑯᑦ ᐸᕐᓇᐃᓯᒪᓚᐅᖅᑐᑦ ᐱᕙᓪᓕᐊᑎᑦᑎᔪᒪᑉᓗᑎᒃ ᑕᒪᒃᑯᓂᙵ ᐃᓚᐅᖃᑕᐅᑉᓗᒍ ᖁᓪᓕᒃᑯᑦ ᖃᐅᒻᒪᖅᑯᑎᓕᕆᔨᒃᑯᑦ ᖃᐅᒻᒪᖅᑯᑎᓕᕆᓂᒃᑯᑦ ᐃᑲᔫᑎᖓᒍᑦ, ᐋᖅᑭᒃᓱᖅᑕᐅᓯᒪᔪᖅ ᓂᐅᕕᕐᕕᐅᖃᑦᑕᖅᑐᑦ ᐱᓕᕆᕝᕕᓪᓗ ᖃᐅᒻᒪᖅᑯᑎᒃᑯᑦ ᐱᕙᓪᓕᐊᔪᓐᓇᖁᑉᓗᒋᑦ ᐊᑐᕐᓗᑎᒃ ᓄᑖᓂᒃ ᐊᑐᖅᑕᐅᕙᓕᖅᑐᓂᒃ ᐊᒻᒪᓗ ᓂᐅᕕᐊᒃᓴᕆᓗᒍ ᑯᐊᐳᕇᓴᒃᑯᓐᓄᑦ.
“ᑲᖏᖅᖠᓂᖅ ᓴᕆᒪᓱᒍᓐᓇᖅᑐᖅ ᓯᕗᓪᓕᖅᐸᐅᑉᓗᓂ ᐃᓚᐅᖃᑕᐅᖕᒪᑦ ᖃᐅᒻᒪᖅᑯᑎᑖᕈᑎᒃᑯᑦ ᑭᓯᐊᓂ ᐊᖏᓂᖅᐹᖑᑉᓗᓂᓗ ᖃᐅᒻᒪᖅᑯᑎᑖᕈᑎᒃᑯᑦ ᓄᓇᕗᒥ,” ᑕᐃᒪᓐᓇ ᐅᖃᖅᖢᓂ ᑲᓛᔅ ᑐᕆᖕ ᐊᖓᔪᖅᑳᖅ Green Sun Rising Inc.-ᑯᓐᓄᑦ ᐃᓕᐅᖅᑲᐃᓚᐅᖅᑐᑦ ᖃᐅᒻᒪᖅᑯᑎᓕᕆᔾᔪᑎᓂᒃ.
ᐋᓪᓚᑦᑎᐊᓕᖅᐸᑕ ᖃᐅᒻᒪᖅᑯᑎᓕᕆᔾᔪᑏᑦ ᑲᑎᖦᖢᒍ 110 kilowatt-ᓂᒃ ᓴᙱᓂᓕᖕᓂᒃ ᐱᕙᓪᓕᐊᑎᑦᑎᓂᐊᖅᑐᖅ. ᖁᕐᓗᖅᑐᖅ, ᐸᕐᓇᐃᓯᒪᔪᖅ ᓴᓇᔪᒪᕐᓂᒧᑦ 500 kilowatt-ᓂᒃ ᐊᑐᖅᑐᒃᓴᒥᒃ ᒫᓐᓇᐅᔪᖅ ᐊᖏᓂᖅᐹᖑᔪᖅ ᖃᐅᒻᒪᖅᑯᑎᓕᐅᕐᓂᕐᒧᑦ 60 kilowatt-ᓂᒃ ᓴᙱᓂᓕᖕᒥᒃ ᖃᐅᒻᒪᖅᑯᑎᓕᐅᕐᓂᖃᖅᖢᓂ ᓯᐊᕐᕆᔮᕐᕕᖓᓂᒃ.
“ᑲᖏᖅᖠᓂᖅ ᖁᑦᑎᖕᓂᖅᓴᐅᔪᒦᓕᖅᑐᖅ ᓄᑖᒥᒃ ᐊᑐᓕᖅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᑐᕆᖕ.
ᓄᑖᖅ ᖃᐅᒻᒪᖅᑯᑎᓕᐅᕈᑎ ᐱᓕᕆᐊᖑᓕᓚᐅᖅᑐᖅ ᑲᑎᒪᖅᑳᖅᖢᑎᒃ ᕕᓕᓐ, ᐊᖓᔪᖅᑳᕐᓗ ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᓐᓄᑦ ᐊᒻᒪᓗ ᑐᕆᖕ ᑭᕙᓪᓕᕐᒥ ᖃᐅᒻᒪᖅᑯᑎᓕᕆᓂᕐᒧᑦ ᑐᕌᖓᔪᓂᒃ ᓴᖅᑭᔮᖅᑎᑦᑎᑎᓪᓗᒋᑦ 2019-ᒥ.
ᐃᓕᐅᖅᑲᖅᑕᐅᔭᕆᐊᖃᓚᐅᖅᑐᖅ ᐊᐅᔭᒃᑯᑦ ᐊᕐᕌᓂ ᑭᓯᐊᓂ ᓄᕙᒡᔪᐊᕐᓂᖅ-19 ᐅᖓᓯᒃᓯᒋᐊᕈᑕᐅᓚᐅᖅᑐᖅ ᐱᖁᑎᑦ ᑎᑭᑎᑕᐅᓂᐊᓚᐅᕐᓂᖏᓐᓄᑦ.
ᒪᓕᒃᖢᒍ ᑲᖏᖅᖠᓂᐅᑉ Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓᑕ ᑎᐅᕆᓐ ᕕᓕᓐ ᐅᖃᐅᓯᕆᓯᒪᔭᖓ, ᖃᐅᒻᒪᖅᑯᑎᓕᐊᖑᔪᑦ ᓴᖅᑭᑉᐸᓪᓕᐊᔪᑦ ᐃᓕᐅᖅᑲᖅᑕᐅᓯᒪᔪᒃᑯᑦ ᓂᐅᕕᐊᒃᓴᐅᖃᑦᑕᕐᓂᐊᖅᑐᑦ ᖁᓪᓕᖅ ᖃᐅᒻᒪᖅᑯᑎᓕᕆᔨᒃᑯᓐᓄᑦ.
“ᑕᒪᕐᒥᒃ ᖃᐅᒻᒪᖅᑯᑏᑦ ᐃᑎᖅᐸᓪᓕᐊᔪᑦ ᓯᐊᕐᕆᔮᕐᕕᒃᑖᓵᖑᔪᒧᑦ ᖃᐅᒻᒪᖅᑯᑕᐅᓯᕝᕕᖕᒧᑦ ᐃᓕᕙᓪᓕᐊᖃᑦᑕᕐᒪᑕ ᐊᒻᒪᓗ ᑐᕌᖅᖢᑎᒃ 600-ᓂᒃ ᓴᙱᓂᓕᖕᒧᑦ ᓅᑦᑎᒋᐊᕈᑎᒧᑦ ᑲᑉᐳᑎᔪᓐᓇᖅᑐᖅ ᖃᐅᒻᒪᖅᑯᑎᓕᕆᔾᔪᑎᒧᑦ,” ᑕᐃᒪᓐᓇ ᐅᖃᖅᖢᓂ ᕕᓕᓐ.
ᐃᓄᓕᕆᔨᑐᖃᒃᑯᑦ ᒐᕙᒪᑐᖃᒃᑯᓐᓂᒃ ᐊᑭᓖᓚᐅᖅᑐᑦ ᑕᒪᐃᓐᓂᖅᑲᔭᖅ $500,000-ᑐᖅᑐᒥᒃ ᖃᐅᒻᒪᖅᑯᑎᓕᐅᕈᑎᒧᑦ ᑐᓂᕐᕈᓯᐊᒃᑯᑦ, Hᐊᒻᓚᒃᑯᑦ ᒥᑭᓐᓂᖅᓴᒥᒃ ᐊᒥᐊᒃᑯᖓᓂᒃ ᐊᑭᓖᑉᓗᑎᒃ, ᑕᐃᒪᓐᓇ ᐅᖃᖅᖢᓂ ᕕᓕᓐ.
ᕕᓕᓐ ᐅᖃᖅᖢᓂ ᖃᐅᒻᒪᖅᑯᑎᑖᕈᑎᒧᑦ ᐊᑭᒋᔭᐅᔪᖅ ᐊᕐᕌᒍᑕᒫᒃᑯᑦ ᓄᑖᒥ ᓯᐊᕐᕆᔮᕐᕕᒃᑖᓵᖑᔪᒥᒃ $400,000-ᒦᖃᑦᑕᕐᒪᑦ. Hᐊᒻᓚᒃᑯᑦ ᓇᓚᐅᑦᑖᖅᓯᒪᔪᒃᑯᑦ ᓂᐅᕕᐊᒃᓴᖃᖃᑦᑕᕈᓐᓇᕋᓱᒋᓂᐊᖅᑐᑦ $40,000-ᒥᒃ ᖃᐅᒻᒪᖅᑯᑎᓕᐊᖑᓯᒪᔪᓂᒃ ᖁᓪᓕᒃᑯᓐᓄᑦ, ᐊᕐᕌᒍᑕᒫᒃᑯᑦ.
ᖃᐅᒻᒪᖅᑯᑎᓂᒃ ᐊᑐᙱᓐᓂᖅᓴᐅᔪᓐᓇᕈᒪᓂᕐᒧᑦ ᑕᒪᓐᓇ ᐋᖅᑭᒃᓱᖅᑕᐅᓯᒪᔪᖅ ᐊᐅᓪᓛᕈᓐᓃᕈᓐᓇᖁᑉᓗᒍ ᐊᐅᓪᓛᓕᕌᖓᑦ 10% ᑐᖔᓂ ᐊᑐᖅᑕᐅᔭᕆᐊᓕᒃᑯᑦ.
ᕕᓕᓐ ᐅᖃᖅᖢᓂ 24-ᓂᒎᖅ ᐃᑲᕐᕋᓂᒃ ᓯᕿᓂᖃᓕᖃᑦᑕᖅᑎᓪᓗᑕ ᐊᐅᔭᒃᑯᑦ ᑕᖅᑭᕆᔭᐅᔪᓂᒃ ᐊᒻᒪᓗ ᐅᑭᐅᒃᑯᑦ ᑖᖏᓐᓇᕐᓚᓕᖃᑦᑕᕐᓂᖓ ᐃᓱᒪᒋᑉᓗᒍ ᓇᓕᒧᒌᓕᕈᓐᓇᕐᓂᐊᖅᑐᑦ ᐅᑭᐅᑉ ᐃᓗᐊᓂ.
“ᐅᑭᐅᒃᑯᑦ ᐊᕐᕕᓂᓕᖕᓂᖃᐃ ᐱᓇᓱᐊᕈᓯᕐᓂᒃ ᐊᑐᙱᓐᓂᖅᓴᐅᓕᕋᔭᖅᑐᖅ ᓄᖅᑲᖓᓕᕐᓗᓂ,” ᑕᐃᒪᓐᓇ ᐅᖃᖅᖢᓂ ᕕᓕᓐ. “ᐊᐅᔭᒃᑯᑦ ᑕᖅᑭᕆᔭᐅᔪᓂᒃ… – ᖃᓂᓐᓂᖅᓴᐅᓕᕋᔭᖅᑐᖅ 100%–ᒧᑦ.”
ᓄᓇᓕᐅᔪᖅ ᐅᑕᖅᑭᔪᖅ ᓱᓕ ᓴᕕᒐᐅᔭᑦ ᖃᐅᔨᓴᖅᑕᐅᔭᕆᐊᖃᕐᓂᖏᓐᓄᑦ ᖁᓪᓕᒃᑯᓐᓄᑦ ᐊᑐᓪᓚᑦᑖᓕᖅᑳᖅᑎᓐᓇᒍ. ᖃᐅᔨᓴᖅᑕᐅᓂᐊᕋᓱᒋᔭᐅᔪᑦ ᐱᓇᓱᐊᕈᓯᕐᓂᒃ ᖃᐃᔪᓂᒃ.