ᒪᒃᑯᒃᑐᑦ ᑲᖏᖅᖠᓂᕐᒥ ᒪᒪᖅᑐᓂᒃ ᐃᒐᒋᐅᖅᓴᖃᑦᑕᖅᑐᑦ ᓂᕆᑎᑦᑎᖃᑦᑕᕈᒪᑉᓗᑎᒃ ᐃᓐᓇᑐᖃᕐᓂᒃ ᓄᓇᓕᖕᒥ ᑕᖅᑭᓂᒃ ᖄᖏᖅᓯᒪᔪᓂᒃ.
ᐃᓂᑕᖅᓯᓂᒃᑯᑦ ᑮᓇᐅᔭᖅᑖᓚᐅᕐᒪᑕ ᒐᕙᒪᑐᖃᒃᑯᓐᓂᒃ ᑕᒪᓐᓇ ᑲᔪᓯᑎᑕᐅᔪᓐᓇᖁᑉᓗᒍ, ᐃᑲᔪᖅᑑᑕᐅᔪᖅ ᒪᒃᑯᒃᑐᓂᒃ ᐊᒻᒪᓗ ᒪᒃᑯᒃᑐᙳᖅᐸᓪᓕᐊᔪᓂᒃ ᐃᑲᔪᖃᑦᑕᕈᓐᓇᖁᑉᓗᒋᑦ ᓄᓇᖅᑲᑎᒥᓂᒃ.
“ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᑎᓪᓗᒋᑦ ᑲᖏᖅᖠᓂᕐᒥ ᐊᒻᒪᓗ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ ᐃᓕᓐᓂᐊᕆᐊᖃᑦᑕᖅᑎᓪᓗᒋᑦ ᒪᕐᕈᐃᖅᑕᑐᐃᓐᓇᖅᖢᑎᒃ ᐱᓇᓱᐊᕈᓯᐅᑉ ᐃᓗᐊᓂ, ᐃᓱᒪᒃᓴᖅᓯᐅᓚᐅᕋᑉᑕ ᖃᓄᖅ ᐱᓕᕆᑎᓐᓇᔭᕐᒪᖔᑉᑎᒍᑦ… ᐃᒃᐱᒍᓱᒍᓐᓇᖁᑉᓗᒋᑦ ᐃᑲᔪᕈᓐᓇᕐᓂᕐᒥᓂᒃ ᓄᓇᖅᑲᑎᒥᓂᒃ. ᑕᐃᑲᓂ ᐅᖃᖃᑎᒌᓕᓚᐅᖅᑐᒍᑦ ᒪᒪᖅᑐᓂᒃ ᐃᒐᑎᑦᑎᖃᑦᑕᕈᒪᑉᓗᑕ,” ᑕᐃᒪᓐᓇ ᐅᖃᖅᖢᓂ ᐃᓕᑕᖅᓯᓂᒃᑯᓐᓂᒃ ᐊᖓᔪᖅᑳᕆᔭᐅᔪᖅ ᑭᓕ ᑲᓛᒃ–ᓕᓐᑎᐅᓪ.
ᒫᓐᓇᐅᔪᖅ ᖁᓕᐅᔪᑦ ᒪᒃᑯᒃᑐᑦ ᐅᑭᐅᓖᑦ 12-ᓂᒃ 18-ᒧᑦ ᐃᓕᓐᓂᐊᖅᑐᑦ. ᒪᕐᕉᖕᓂᒃ ᑕᖅᑮᖕᓂᒃ ᓇᑉᐸᖓᓂᓗ, ᑲᑎᖃᑦᑕᖅᑐᑦ ᖃᑉᓰᑲᓪᓚᒃᖢᑎᒃ ᐱᓇᓱᐊᕈᓯᐅᑉ ᐃᓗᐊᓂ ᐃᒐᔭᖅᑐᖅᖢᑎᒃ 15-ᓂᒃ 20-ᓄᑦ ᐋᓪᓕᕋᒃᑯᑦ ᑐᓂᕐᕈᑎᒃᓴᓂᒃ ᐅᑉᓗᑕᒫᒃᑯᑦ. ᐊᑐᐃᓐᓇᐅᓕᕌᖓᑕ, ᒪᒃᑯᒃᑐᑦ ᐃᓄᖕᓄᙵᐅᓕᖃᑦᑕᖅᑐᑦ ᐃᓐᓇᑐᖃᕐᓄᑦ ᑐᓂᐅᖅᑲᐃᔭᖅᑐᖅᖢᑎᒃ ᐃᒐᓯᒪᔪᓂᒃ ᒪᒪᖅᑐᓂᒃ.
“ᑕᒪᓐᓇ ᐱᐅᔪᐊᓗᒃ ᓄᑕᖅᑲᑦ ᑐᓂᐅᖅᑲᐃᖃᑦᑕᕐᓂᖏᑦ. ᐃᓐᓇᑐᖃᐃᑦ ᑐᓂᖃᑦᑕᖅᓯᒪᔭᖅᐳᑦ ᖁᔭᓕᑦᑎᐊᓲᑦ,” ᑕᐃᒪᓐᓇ ᐅᖃᖅᖢᓂ ᑲᓛᒃ–ᓕᓐᑎᐅᓪ.
12-ᓂᒃ ᐅᑭᐅᓕᒃ ᒪᑭᓚ ᖃᓗᔾᔭᖅ, ᐃᓕᓐᓂᐊᖃᑕᐅᔪᖅ, ᐅᖃᖅᖢᓂ ᐊᑎᓕᐅᖅᑕᐅᖃᑕᐅᓚᐅᕋᒥ ᐃᒐᒍᒪᒃᑲᐅᓂᕐᒧᑦ.
ᐅᖃᖅᖢᓂ ᐃᓕᑦᑎᓯᒪᓕᖅᑐᕉᖅ ᓄᑖᓂᒃ ᐃᒐᔭᒃᓴᓂᒃ, ᓲᕐᓗ ᓯᓂᒥᓐ ᐸᓐᔅᓂᒃ ᐊᕿᕐᕈᔪᐊᓂᒃ ᐊᒻᒪᓗ ᐱᓇᑦ ᐸᓚᓴᒻ ᑯᑮᓂᒃ. ᖁᕕᐊᓱᑦᑎᐊᖅᑐᕐᓗ ᑕᑯᖃᑦᑕᕋᒥ ᐃᓐᓇᑐᖃᕐᓂᒃ ᓄᓇᖅᑲᑎᒥᓂᒃ.
“ᐊᓕᐊᓇᐃᑦᑐᒻᒪᕆᐊᓗᒃ ᒪᒪᖅᑐᓂᒃ ᐃᒐᓯᒪᔪᓂᒃ ᐊᔾᔭᖅᓯᖃᑦᑕᖅᖢᓂ ᐃᓐᓇᑐᖃᕐᓄᑦ. ᖁᕕᐊᓱᑦᑎᐊᓲᑦ ᐊᔾᔭᖅᓯᕝᕕᒋᔭᕌᖓᑉᑎᒍᑦ,” ᑕᐃᒪᓐᓇ ᐅᖃᖅᖢᓂ.
ᒫᓐᓇᐅᔪᖅ ᒪᒪᖅᑐᓂᒃ ᐃᒐᒋᐅᖅᓴᕐᓂᕐᒧᑦ ᐃᓕᓐᓂᐊᕈᑎ ᐃᓱᓕᓯᒪᓕᖅᑎᓪᓗᒍ, ᑲᓛᒃ–ᓕᓐᑎᐅᓪ ᐅᖃᖅᖢᓂ ᐃᓕᑕᖅᓯᓂᒃᑯᑦ ᐋᖅᑭᒃᓱᐃᕙᓪᓕᐊᓕᕐᒥᔪᑦ ᐊᓯᖏᓐᓂᒃ ᒪᒃᑯᒃᑐᓂᒃ ᐃᓕᓐᓂᐊᖅᑎᑦᑎᓂᐊᕐᓂᕐᒧᑦ.
ᖁᓕᐅᔪᓂᒃ ᒪᒃᑯᒃᑐᓄᑦ ᒫᓐᓇᐅᔪᖅ ᐃᓕᓐᓂᐊᖃᑕᐅᔪᓂᒃ, ᖁᓕᖏᓗᐊᖅᑐᑦ ᐱᓕᕆᒃᑲᓐᓂᕈᒪᓯᒪᔪᑦ ᐊᐅᔭᐅᔪᖅ.
“ᐃᓱᒪᒃᓴᖅᓯᐅᖏᓐᓇᖅᑐᒍᑦ ᓱᓇᓂᒃ ᑕᑯᔪᒪᓇᔭᕐᒪᖔᑕ, ᓱᓇᓂᒃ ᐱᔫᒥᒍᓱᒐᔭᕐᒪᖔᑕ,” ᑕᐃᒪᓐᓇ ᐅᖃᖅᖢᓂ ᑲᓛᒃ–ᓕᓐᑎᐅᓪ.