Skip to content

ᒪᒃᑯᒃᑐᑦ ᒥᖅᓱᖅᑏᑦ ᓄᑕᖅᑲᓂᒃ ᔭᐸᓕᐅᖅᑐᑦ

8 ᑲᖏᖅᖠᓂᕐᒥ ᓄᑕᖅᑲᑦ ᔭᐸᑖᕆᐊᓖᑦ ᓄᑖᓂᒃ ᔭᐸᑖᕈᒫᖅᑐᑦ ᐃᓕᓐᓂᐊᕐᓇᐅᔪᖅ ᐱᒋᐊᓕᕐᒥᒃᐸᑦ ᖁᔭᓕᓯᒪᔭᖅᐳᑦ ᓂᕕᐊᖅᓵᑯᓗᐃᑦ ᒥᖅᓱᓚᐅᖅᑐᑦ ᒥᖅᓱᕐᓂᕐᒥᒃ ᐃᓕᓐᓂᐊᖃᑕᐅᑎᓪᓗᒋᑦ.
26160720_web1_210811-kiv-parkas-rankininlet_1

8 ᑲᖏᖅᖠᓂᕐᒥ ᓄᑕᖅᑲᑦ ᔭᐸᑖᕆᐊᓖᑦ ᓄᑖᓂᒃ ᔭᐸᑖᕈᒫᖅᑐᑦ ᐃᓕᓐᓂᐊᕐᓇᐅᔪᖅ ᐱᒋᐊᓕᕐᒥᒃᐸᑦ ᖁᔭᓕᓯᒪᔭᖅᐳᑦ ᓂᕕᐊᖅᓵᑯᓗᐃᑦ ᒥᖅᓱᓚᐅᖅᑐᑦ ᒥᖅᓱᕐᓂᕐᒥᒃ ᐃᓕᓐᓂᐊᖃᑕᐅᑎᓪᓗᒋᑦ.

ᐅᑭᐅᖅ ᐱᒋᐊᓕᓵᖅᑎᓪᓗᒍ, ᐃᓕᑕᖅᓯᓂᒃᑯᑦ ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᑦ ᓴᖅᑭᑎᑦᑎᓚᐅᕐᒪᑕ ᐃᑲᔪᕐᓂᖅ ᒪᒃᑯᒃᑐᓂᒃ ᐃᓕᓐᓂᐊᕈᑎᒥᒃ, ᐃᑲᔪᖅᑐᐃᓲᖅ ᒪᒃᑯᒃᑐᓂᒃ ᓄᓇᖅᑲᑎᒥᓂᒃ ᐃᑲᔪᖃᑦᑕᖁᑉᓗᒋᑦ. ᑕᒪᓐᓇ ᐃᓕᓐᓂᐊᕈᑎ ᐱᐊᓂᑦᑎᐊᕐᓂᐊᕐᓗᒍ ᐊᑐᓂ ᐃᓕᓐᓂᐊᖅᑐᑦ 120-ᓂᒃ ᐃᑲᕐᕋᓂᒃ ᐃᑲᔪᖃᑦᑕᕆᐊᓖᑦ ᓄᓇᒋᔭᕐᒥᓂᒃ ᐊᑭᓕᖅᑐᖅᑕᐅᓇᑎᒃ.

ᑕᒡᕙᓂ ᒪᕐᕉᖕᓂᒃ ᐱᓇᓱᐊᕈᓰᖕᓂᒃ ᐃᓕᓐᓂᐊᕐᓂᖃᖅᑎᓪᓗᒋᑦ, ᐃᓚᐅᖃᑕᐅᔪᑦ ᐃᓕᓐᓂᐊᖅᑎᑕᐅᓚᐅᖅᑐᑦ ᔭᐸᓕᐅᕐᓂᕐᒥᒃ ᐱᒋᐊᕈᑎᒃᑯᑦ ᐃᓱᐊᓄᑦ ᓯᕗᓪᓕᖅᐹᒥ ᐱᓇᓱᐊᕈᓯᕐᒥᒃ. ᑕᒡᕙᓂ ᐱᓇᓱᐊᕈᓯᕐᒥ ᔭᐸᓕᐊᖏᑦ ᐃᓕᓐᓂᐊᖅᑐᓄᑦ ᓄᑕᖅᑲᓄᑦ ᔭᐸᖃᙱᑦᑐᓄᑦ ᔭᐸᓕᐊᖑᓚᐅᖅᑐᑦ.

ᐃᓕᓐᓂᐊᖅᑐᑦ ᑐᒡᓕᐊᓂ ᐱᓇᓱᐊᕈᓯᕐᒥ ᐊᔪᙱᓐᓂᕐᒥᓂᒃ ᐱᒋᐊᖅᑎᑦᑎᒃᑲᓐᓂᓚᐅᖅᑐᑦ ᐃᖕᒥᓂᒃ ᔭᐸᓕᐅᖅᖢᑎᒃ.

“ᑕᒪᕐᒥᒃ ᖁᕕᐊᒋᔭᖃᑦᑎᐊᓚᐅᖅᑐᑦ ᐃᓕᓐᓂᐊᖅᑕᒥᓂᒃ. ᓇᑉᐸᖏᖅᑲᐃ ᐃᓕᓐᓂᐊᖅᑐᑦ ᒥᖅᓲᑎᒥᒃ ᐊᑐᓚᐅᖅᓯᒪᙱᑦᑐᑦ. ᐃᓕᓐᓂᐊᕌᓂᒃᑎᓪᓗᒋᑦ ᓇᓗᓇᓚᐅᙱᑦᑐᖅ ᒥᖅᓱᖃᑦᑕᕐᓂᐊᓕᕐᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ ᐃᓕᑕᖅᓯᓂᒃᑯᑦ ᐃᑲᔫᑎᓂᒃ ᑲᒪᔨᖓ ᑭᓕ ᑲᓛᒃ−ᓕᓐᑎᐅᓪ.

ᒥᖅᓱᖅᑎᑕᐅᑎᓪᓗᒋᑦ, ᑲᓛᒃ − ᓕᓐᑎᐅᓪ ᐅᖃᓚᐅᕐᒥᔪᖅ ᐃᓕᓐᓂᐊᖅᑐᑦ 45 ᒥᓂᑦᓂᒃ ᐅᑉᓛᒃᑯᑦ ᐅᖃᐅᓯᓕᕆᓂᕐᒥᒃ ᐃᓕᓐᓂᐊᖅᑎᑕᐅᖃᑦᑕᓚᐅᕐᓂᖏᓐᓄᑦ, ᑎᑎᕋᖅᐸᒃᖢᑎᒃ ᖃᓄᐃᓕᐅᖅᓯᒪᓂᖏᓐᓄᑦ ᐅᕝᕙᓘᓐᓃᑦ ᐅᖃᖃᑎᒌᒃᐸᒃᖢᑎᒃ, ᐃᓱᒪᒃᐸᓪᓕᐊᔪᓐᓇᖅᓯᖁᑉᓗᒋᑦ.

“ᐱᐊᓂᒃᑎᓪᓗᒋᑦ ᐃᓄᑦᑕᐅᓯᓯᒪᓕᕐᓗᑎᒃ ᐱᐊᓂᖁᓐᓇᖅᑐᑦ. ᐃᓛᓐᓂᒃᑯᑦ ᐅᕙᑉᑎᓐᓂᒃ ᐋᖅᑭᒋᐊᖅᓯᔪᓐᓇᐃᓪᓕᖃᑦᑕᕋᑉᑕ ᓄᓇᕐᔪᐊᕐᒥ ᖃᓄᐃᓕᐅᕈᓘᔮᓗᓕᖅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ.

ᐃᓐᓇᑐᖃᕆᔭᐅᔪᖅ ᐊᖑᒐᓴᒃ ᓵᓐᑎ ᐊᒻᒪᓗ ᐃᐱᒃᓴᐅᑦ ᑎᐊᓐ ᐃᓕᓐᓂᐊᖅᑎᑦᑎᓚᐅᖅᑑᒃ ᐃᓕᓐᓂᐊᖅᑎᑦᑎᔨᖃᕆᑉᓗᑎᒃ ᑐᕆᓯ ᐊᔭᕈᐊᕐᒥᒃ.

ᑲᓛᒃ−ᓕᓐᑎᐅᓪ ᐅᖃᖅᖢᓂ ᓂᕕᐊᖅᓵᑯᓗᐃᑦ ᓯᕗᓪᓕᖅᐹᒥ ᐅᑉᓗᕐᒥ ᕿᒥᕐᕈᓚᐅᕐᓂᖏᓐᓄᑦ ᔭᐸᒃᓴᓂᒃ ᐊᑐᕈᒪᓇᔭᖅᑕᖏᓐᓂᒃ ᑎᑎᕋᐅᔭᖅᑳᕐᓇᑎᒃ ᔭᐸᓕᐊᕆᓂᐊᖅᑕᒥᓂᒃ.

“ᐱᒋᐊᓕᓵᖅᑎᓪᓗᒋᑦ ᐃᓱᒪᖅᓲᔭᓚᐅᖅᑐᑦ,” ᑕᐃᒪᓐᓇ ᐅᖃᖅᖢᓂ ᑲᓛᒃ−ᓕᓐᑎᐅᓪ.

ᐃᓕᑕᖅᓯᓂᒃᑯᑦ ᑲᒪᔨᖓ ᐃᒥ ᐊᐃᖏᓪᓖᒃ ᐅᖃᖅᖢᓂ ᑐᒡᓕᐊᓂᒎᖅ ᓂᕕᐊᖅᓵᑯᓗᐃᑦ ᔭᐸᓕᐅᓕᕋᒥᒃ ᐃᖕᒥᓄᑦ, ᐃᖕᒥᓂᒃ ᐅᒃᐱᕈᓱᖕᓂᖅᓴᐅᓕᓚᐅᖅᑐᑦ ᐊᔪᙱᓐᓂᕐᒥᓂᒃ.

“ᑕᒪᕐᒥᒃ ᐊᔾᔨᒌᙱᑦᑑᑎᐊᓗᖕᓂᒃ ᔭᐸᓕᐅᓚᐅᖅᑐᑦ − ᐅᔾᔨᕐᓇᓚᐅᖅᑐᖅ ᐱᓗᐊᖅᑐᒥ ᐃᖕᒥᓂᒃ ᔭᐸᓕᐅᓕᕋᒥᒃ,” ᑕᐃᒪᓐᓇ ᐅᖃᖅᖢᓂ.

ᐳᕆᓐᓴᔅ ᐊᐅᑐᑦ, ᐃᓕᓐᓂᐊᖅᑐᓂᒃ ᐃᓚᐅᖃᑕᐅᓚᐅᖅᑐᖅ, ᐅᖃᓚᐅᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᐃᓕᓐᓂᐊᖃᑕᐅᑉᓗᓂᒎᖅ ᒥᖅᓱᕆᐅᓚᐅᖅᑐᖅ.

“ᔭᐸᓕᐅᓚᐅᖅᓯᒪᙱᓐᓇᒪ ᖃᓄᖅ ᓂᕆᐅᒋᐊᒃᓴᖅ ᓇᓗᓚᐅᖅᑐᖓ,” ᑕᐃᒪᓐᓇ ᐅᖃᖅᖢᓂ. “ᐊᓈᓇᒐ ᐅᕙᑉᑎᓐᓂᒃ ᑕᒪᐃᓐᓂᒃ ᔭᐸᓕᐅᖃᑦᑕᕐᒪᑦ ᐅᑭᐅᒃᑯᑦ ᔭᐸᒋᓂᐊᖅᑕᑉᑎᓐᓂᒃ. ᐃᓱᒪᒃᓴᖅᓯᐅᖅᖢᖓ ᐃᓱᒪᓕᓚᐅᕋᒪ ᐊᓈᓇᒻᓂᒃ ᐃᑲᔪᕈᓐᓇᓕᕐᓂᒻᓄᑦ.”

ᐊᐅᑐᑦ ᐅᖃᖅᖢᓂ ᐃᖕᒥᓄᒡᒎᖅ ᔭᐸᓕᐊᓂ ᐊᑑᑎᖃᑦᑎᐊᖅᑐᓐᓇᓱᓚᐅᖅᑕᖓ, ᐃᓂᖃᑦᑎᐊᖁᑉᓗᒍ ᐃᒃᐱᐊᕐᔪᒃᓴᓄᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᓂᕈᑐᒋᐊᖅᖢᒍ.

ᑭᓯᐊᓂᓕ, ᐃᖕᒥᓂᒃ ᒥᖅᓱᓕᕋᒥ, ᐃᖕᒥᓄᑦ ᑐᕋᖓᑎᒋᐊᓚᐅᖅᑕᓂ ᐃᖢᐊᕆᔭᒥᒍᑦ.

“ᐊᓈᓇᒪ ᔭᐸᓕᐅᖏᓐᓇᖃᑦᑕᕐᒫᖓ, ᑭᑉᐹᕆᒐᔪᖕᒪᒍ. ᐊᒃᑐᐊᓗᐊᖃᑦᑕᕐᓇᑎᒃ. ᑭᓯᐊᓂ ᐅᕙᒻᓂᒃ ᓴᓇᔾᔪᔾᔨᔪᒪᓚᐅᕋᒪ ᐊᒃᑐᐊᓂᖅᓵᕐᔪᖕᒥᒃ. ᐊᕐᓇᖅᓯᐅᑕᐅᓂᖅᓴᖅ,” ᑕᐃᒪᓐᓇ ᐅᖃᖅᖢᓂ.

ᐊᒃᑐᐊᓂᖅᓴᐃᑦ ᔭᐸᓕᐊᑦ ᐅᖁᙱᓐᓂᖅᓴᐅᓂᕋᖅᑕᐅᖃᑦᑕᖅᑎᓪᓗᒋᑦ ᐅᕝᕙᓘᓐᓃᑦ ᐃᓕᖅᑯᓯᑐᖃᑎᒍᑦ ᑐᕌᖓᙱᓐᓂᖅᓴᐅᓂᕋᖅᑕᐅᖃᑦᑕᖅᑎᓪᓗᒋᑦ, ᑲᓛᒃ−ᓕᓐᑎᐅᓪ ᐅᖃᖅᖢᓂ ᑕᐃᒪᓐᓇᒎᖅ ᒪᒃᑯᒃᑐᑦ ᓴᓇᓂᖅᓴᐅᖃᑦᑕᓕᖅᑐᑦ ᐱᐅᒋᔭᒥᓂᒃ.

“ᒫᓐᓇᐅᔪᖅ ᐊᑐᖅᑕᐅᖃᑦᑕᖅᑐᑦ ᓴᖅᑭᖃᑦᑕᓕᕐᒪᑕ ᐊᔾᔨᒌᕈᔪᒃᖢᑎᒃ. ᔭᐸᓯᒪᓐᓇᕐᒪᑦ. ᐱᔭᕆᐊᖃᓪᓚᑦᑖᖅᑐᒃᑰᙱᑦᑐᖅ ᑭᓯᐊᓂᓕ ᖃᓄᖅ ᑕᐅᑦᑐᖃᕈᒪᓂᕐᒨᖓᔪᖅ. ᑕᐃᒪᓐᓇᐃᓕᖅᑐᑦ ᒫᓐᓇᐅᔪᖅ ᒪᒃᑯᒃᑐᑦ: ᐃᖕᒥᓄᑦ ᑐᕌᖓᔪᓂᒃ ᐊᓐᓄᕌᓕᐅᕐᓂᖅᓴᐅᓕᖅᑐᑦ.”