ᐊᐅᓚᑦᑎᓂᕐᒥ ᒥᑭᑦᑐᒥ ᐃᓚᒌᓄᑦ ᓇᖕᒥᓂᕆᔭᐅᔪᒥ ᐊᔪᕐᓇᙱᑦᑐᑯᓘᙱᓚᖅ ᐅᑭᐅᖅᑕᖅᑐᒥ, ᑭᓯᐊᓂ ᑲᐃᓚ ᐊᓄᒑᖅ−ᒑᒻᐳᓪ ᑭᓱᓕᒫᖓᓐᓂ ᑐᓂᓯᕗᖅ Red Top ᐊᔾᔨᒌᙱᑦᑑᑎᓂ ᓂᐅᕕᕐᕕᖓᓂ ᑲᖏᖅᖠᓂᕐᒥ.
ᓂᐅᕕᕐᕕᒃ ᓇᓗᓇᐃᒃᑯᑕᐅᓯᒪᕗᖅ ᓄᓇᓕᖕᓂ ᐊᕐᕌᒍᓄᑦ 34−ᓄᑦ, ᓯᕗᓪᓕᖅᐹᒥ ᒪᑐᐃᖅᑕᐅᓚᐅᖅᖢᓂ ᔮᓐ ᒑᒻᐳᓪᒧᑦ ᐊᒻᒪ ᐋᓐᔨᓚ ᐊᓄᒑᕐᒧᑦ ᐃᓄᒃᓱᒃ ᓂᐅᕕᕐᕕᐅᓪᓗᓂ, Red Top−ᖑᓪᓚᕆᓚᐅᙱᓐᓂᖓᓂ ᓄᕕᐱᕆ 1989−ᒥ.
“ᐊᓈᓇ ᐊᒻᒪ ᐊᑖᑕ ᑐᙵᕕᖃᑎᒌᒃᓯᒪᕗᑦ ᓇᖕᒥᓂᖃᕐᓂᐅᔪᒥ,” ᐅᖃᓚᐅᖅᐳᖅ ᐊᓄᒑᖅ−ᒑᒻᐳᓪ, ᐃᖅᑲᓇᐃᔭᓕᓚᐅᖅᑐᒥ ᓂᐅᕕᖅᑎᐅᓂᕐᒥ ᐅᑭᐅᑲᖅᖢᓂ 12−ᓂ.
“ᓇᒡᓕᖕᓂᖏᑦ, ᑐᕌᖓᓂᖃᕐᓂᖏᓐᓂ, ᐊᐅᒃᑲᓐᓂᖓᑦ, ᐊᐅᖏᑦ, ᖁᕝᕕᐅᕐᓂᖏᑦ – ᐊᒻᒪ ᖃᔅᓯᐊᕐᔪᖕᓂ ᐅᖃᐱᓗᖕᓂᐅᔪᓂ – ᑕᒪᐅᙵ ᑎᑭᑎᑦᑎᓯᒪᕗᑦ ᓇᖕᒥᓂᕆᔭᖓᓐᓂ. ᐱᒋᐊᓚᐅᖅᐳᑦ ᐱᓯᒪᑐᐃᓐᓇᖅᑕᖏᓐᓂ ᐃᒃᐱᐊᕐᔪᖏᓐᓂ, ᐊᒻᒪ ᐱᖓᓱᓂ ᕿᑐᕐᙵᖏᓐᓂ ᐊᔭᐅᕆᓂᖃᖅᑎᑦᑎᓚᐅᖅᐳᖅ ᐃᖏᕐᕋᑏᓐᓇᕐᓂᖏᓐᓂ ᑕᐃᒪᓐᓇᑎᒋ ᐊᑯᓂᐅᑎᒋᔪᒥ.”
ᐊᓄᒑᖅ−ᒑᒻᐳᓪ ᓯᕗᓪᓕᕐᒥ ᐸᕐᓇᓚᐅᖅᓯᒪᕗᖅ ᐃᓇᖏᖅᓯᓂᖃᕐᓂᖓᓐᓂ ᓂᐅᕕᕐᕕᖕᒥ ᐊᓂᖓᓂ D.J.−ᒥ ᐊᒻᒪ ᐱᔪᓐᓇᖅᑎᑦᑎᓗᓂ ᐃᖅᑲᓇᐃᔭᕐᓂᕐᒥ ᓄᖅᑲᕐᓂᕐᒧᑦ ᖃᓪᓗᓈᑦ ᓄᓇᖓᓐᓂ ᒫᓂᑑᐸᒥ, ᑭᓯᐊᓂ ᐃᓅᔪᓐᓃᑳᓪᓚᖕᓂᖓᓂ D.J.−ᒥ 2010−ᒥ ᐊᓯᔾᔩᓚᐅᖅᐳᖅ ᐊᒻᒪ ᓄᖅᑲᖅᑎᑦᑎᓪᓗᓂ ᑕᐃᒃᑯᓂᖓ ᐸᕐᓇᐅᑎᐅᔪᓂ.
ᐊᑖᑕᖓ ᐃᖅᑲᓇᐃᔮᒥᓂᒃ ᓄᖅᑲᓚᐅᖅᐳᖅ, ᑭᓯᐊᓂ ᐊᓈᓇᖓ ᐃᓚᐅᖃᑕᐅᓕᓚᐅᖅᐳᖅ ᐊᓄᒑᖅ−ᒑᒻᐳᓪᒥ Red Top ᐊᐅᓚᐃᓐᓇᕐᓂᖓᓂ ᑕᐃᒪᙵᓂ.
ᐊᒥᓱᓂ ᖁᕕᐊᓇᑦᑎᐊᖅᑐᓂ ᐃᓚᖃᖅᐳᖅ ᐊᐅᓚᑦᑎᓂᕐᒥ ᒥᑭᑦᑐᒥ ᐃᓚᒌᖑᔪᓄᑦ ᓇᖕᒥᓂᕆᔭᐅᔪᒥ ᐱᔨᑦᑎᕋᖅᑐᒥ ᓄᓇᓕᖕᓂ ᐱᔭᕆᐊᓕᖏᓐᓂ, ᐱᔪᒪᔭᖏᓐᓂ ᐊᒻᒪ ᐱᔪᒪᓇᔭᖅᑕᖏᓐᓂ, ᐅᖃᓚᐅᖅᐳᖅ. ᑕᒪᓐᓇ ᐃᓚᖃᖅᐳᖅ ᑐᙵᓱᒃᑎᑦᑎᓂᕐᒥ, ᖃᐅᑕᒫᒥ ᐳᓚᕋᖅᑎᐅᔪᓂ ᐊᒻᒪ ᓄᑖᖑᔪᓂ ᑮᓇᕐᓂ, ᐋᔩᖃᑎᖃᕐᓂᕐᒥ ᑐᓂᓯᔨᐅᔪᓂ ᖃᓪᓗᓈᑦ ᓄᓇᖓᓐᓂ ᐊᒻᒪ ᐋᓪᓚᓂᑦ ᐃᓚᒋᔭᐅᓕᑐᐃᓐᓇᖅᑐᓄᑦ.
“ᖁᕕᐊᓇᐃᓐᓇᐅᔭᖅᐳᖅ ᑮᖏᖅᓯᓂᕐᒥ ᐅᑯᓂᖓ ᐹᖑᔪᓂ ᐊᒻᒪ ᓴᖅᑭᑎᓪᓗᒍ ᑕᐃᒃᑯᐊ ᒪᑐᐃᖓᓂᖓᓂ ᓇᓗᓇᐃᒃᑯᑕᐅᔪᓂ,” ᐅᖃᓚᐅᖅᐳᖅ ᐊᓄᒑᖅ−ᒑᒻᐳᓪ.
ᐊᒃᓱᕈᕐᓇᕐᓂᐅᔪᓂ ᐃᓚᖃᖅᐳᖅ ᐃᑲᒧᖅᑕᐅᓂᕐᒥ ᑮᓇᐅᔭᖃᖅᑎᑕᐅᓂᐅᔪᓂ ᐊᒻᒪ ᑐᓂᕐᕈᑎᓂᑦ ᐊᓯᖏᓐᓂ ᑲᒻᐸᓂᐅᔪᓂ ᐊᔪᕐᓇᙱᓐᓂᖅᓴᒥ ᐱᔪᓐᓇᖅᑑᔮᖅᑕᖏᓐᓂ, ᐃᓚᒋᐊᖅᓯᓚᐅᖅᐳᖅ.
“ᑭᓯᐊᓂ ᐊᖓᔪᖅᑳᒃᑲ ᐅᕙᓐᓂ ᐃᓕᓐᓂᐊᖅᑎᑦᑎᓚᐅᖅᐳᑦ ᓴᐱᓕᓚᐅᖅᓯᒪᙱᓐᓂᕐᒧᑦ,” ᐅᖃᓚᐅᖅᐳᖅ ᐊᓄᒑᖅ−ᒑᒻᐳᓪ.
ᓂᕆᐅᖕᓂᖃᖅᐳᖅ 2023 ᓇᒃᓴᕐᓂᐊᕐᓂᖓᓂ ᐃᑲᔪᖅᓱᐃᓂᐅᔪᒥ ᐱᔭᕆᐊᖃᖅᑕᒥᓂ ᐃᑲᔪᕐᓂᕐᒧᑦ ᐃᓚᖏᓐᓂ−ᐊᐅᓚᑕᐅᔪᒥ ᓇᖕᒥᓂᕆᔭᐅᔪᒥ.
ᐊᕐᓇᐅᓪᓗᓂ ᓇᖕᒥᓂᖃᖅᑎᐅᓪᓗᓂ, ᐊᓄᒑᖅ−ᒑᒻᐳᓪ ᑐᓂᓯᕗᖅ ᐅᖃᐅᓯᒃᓴᒥ ᓂᕆᐅᖕᓂᖃᕐᓂᕐᒥ ᐊᒻᒪ ᐱᓇᔪᐃᓐᓇᕐᓂᐅᔪᒥ ᒪᒃᑯᖕᓂᖅᓴᓄᑦ ᐃᓄᖕᓄᑦ ᒪᓕᒍᒪᑐᐃᓐᓇᕆᐊᓕᖕᓂ ᐊᔾᔨᐸᓗᐊᓂ ᑐᒥᐅᔪᓂ.
“ᑭᓱᑐᐃᓐᓇᑦᑎᐊᖅ ᐃᓱᒪᓕᐅᕆᔭᕐᓂ ᐊᒻᒪ ᐱᔪᒪᓂᖃᖅᑎᐊᖅᑐᒥ, ᑎᑭᐅᑎᔪᓐᓇᖅᐸᐃᑦ,” ᐅᖃᓚᐅᖅᐳᖅ. “ᑕᐃᒃᑯᐊᓘᓐᓃᑦ ᐊᑭᕋᖅᑐᖅᑎᐅᔪᓂ, ᓴᙲᓐᓇᕐᓗᑎᑦ. ᓯᕗᕚᑦᑎᓐᓂ ᐅᐱᒍᓱᒃᑎᑦᑎᔭᕆᐊᖃᖅᐳᒍᑦ.”
ᐅᖃᐅᓪᔨᕗᖅ ᓇᖕᒥᓂᖃᖅᑎᙳᕈᒪᔪᓂ ᐱᓕᕆᓂᕐᒥ ᐅᓪᓗᕐᒥ ᐊᑕᐅᓯᐅᑦᑕᕐᓗᒍ, ᐊᑕᐅᓯᕐᒥ ᐱᓱᖕᓂᐅᔪᒥ ᐊᒻᒪ ᐊᑕᐅᓯᕐᒥ ᐱᓕᕆᓂᐅᔪᒥ ᐊᑕᐅᑦᑎᒥᒃ ᐱᔭᕆᐊᖃᖅᐸᑕ.
“ᑭᓇᑐᐃᓐᓇᒥᒃ ᖃᖓᑐᐃᓐᓇᖅ ᐊᖓᒧᒃᖠᐅᔪᒥ ᓄᑲᖅᖠᐅᔪᒥᓪᓘᓐᓃᑦ ᐃᓕᖕᓄᑦ ᑕᐅᑐᒃᑐᒥ,” ᐅᖃᓚᐅᖅᐳᖅ. “ᒪᓕᒡᓗᒍ ᐱᔪᒪᓂᕆᔭᕐᓂ, ᐱᔪᒪᓂᕆᔭᕐᔪᐊᕐᓂᑦ, ᑭᓯᐊᓂ ᐱᓛᖑᔪᒥ, ᐆᒻᒪᑎᖕᓂ. ᐸᕐᓇᐅᑏᑦ ᐊᓯᔾᔨᕈᓐᓇᖅᐳᑦ ᐃᕐᙲᓐᓇᑲᐅᑎᒋ, ᑕᐃᒫᒃ ᐱᓐᓇᕆᓗᒋᑦ ᖃᓄᐃᓐᓂᐅᔪᓂ, ᐃᓄᖕᓂ ᐊᒻᒪ ᐃᓚᖕᓂ ᐊᒻᒪ ᐱᖃᓐᓇᕆᔭᕐᓂ ᓴᓂᓕᕆᔭᕐᓂ.”
