“ᐊᐱᕆᙱᑦᑎᓪᓘᓐᓃᑦ,” ᐃᒡᓚᖅᖢᓂ ᐅᖃᖅᑐᖅ ᓯᓗ ᐊᐅᑐᑦ ᐊᐱᕆᔭᐅᒐᒥ ᖃᑉᓯᓂᒃ ᐅᖃᓗᒡᕕᐅᓯᒪᓚᐅᕐᒪᖔᕐᒥ ᑐᒡᓕᐊᓂ ᐱᓇᓱᐊᕈᓯᕐᒥ ᔭᓄᐊᕆᒥ.
ᐊᔾᔭᖅᑐᐃᔨᐅᓕᖅᖢᑎᒡᓗ ᓂᕿᑖᖑᔪᓂᒃ, ᑲᖏᖅᖠᓂᕐᒥ ᑖᒃᓯᖓ ᐊᔾᔭᖅᑐᖅᑎᐅᓚᐅᕐᒥᔪᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᓂᐅᕕᕈᑎᑖᖅᑎᑦᑎᔾᔪᑎᖏᓐᓂᒃ ᑕᒪᐃᓐᓄᖅᑲᔭᖅ ᐃᓄᖕᓄᑦ ᓄᓇᓕᖕᒥ.
ᐅᖃᓘᑎᖓ ᓂᐸᖏᕈᓐᓇᐃᓪᓕᓚᐅᖅᑐᖅ ᐊᒻᒪᓗ Facebook-ᑯᑦ ᑎᑎᕋᕐᕕᐅᖏᓐᓇᓕᖅᖢᓂ, ᑭᓯᐊᓂ ᖃᑉᓰᓐᓇᕐᓂᒃ ᒥᓂᑦᓂᒃ ᐅᖃᖃᑎᖃᕈᓐᓇᖅᓯᓚᐅᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓂᒃ ᖃᓄᖅ ᒫᓐᓇᐅᔪᖅ ᐃᓄᐃᑦ ᐊᓂᑦᑕᐃᓕᑎᑕᐅᑎᓪᓗᒋᑦ ᐊᒻᒪᓗ ᓯᕗᓪᓕᖅᐹᒥ ᐅᑭᐅᒥ ᑖᒃᓯᖃᖅᑎᐅᓕᖅᑎᓪᓗᒍ ᑲᔪᓯᓂᖃᕐᒪᖔᑦ.
“ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐅᕙᑉᑎᓐᓄᑦ ᖃᐅᔨᒋᐊᓚᐅᖅᑐᑦ ᓯᑕᒻᒥᕐᒥ. ᑕᒪᕐᒥᒃ ᑐᓂᕐᕈᑎᒃᓴᖏᑦ ᑐᓂᐅᖅᑲᐅᑕᐅᖁᑉᓗᒋᑦ ᑕᓪᓕᒻᒥᕐᒥ. ᐃᒪᓐᓇᐃᓕᓚᐅᖅᑕᒃᑲ, ᐅᐊᓗᐊᖅ.”
ᑐᐸᒃᖢᓂ 6:00-ᒥ ᐅᑉᓛᒃᑯᑦ ᖃᐅᖕᒪᑦ ᐊᒻᒪᓗ ᐱᓕᕇᓐᓇᖅᖢᓂ 3:00-ᒧᑦ ᐅᑉᓛᒃᑯᑦ.
“ᑕᖃᓇᖅᑐᐊᓘᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᐊᐅᑐᑦ. “ᐱᔭᕆᐊᑐᔪᐊᓗᒃ. ᑭᓯᐊᓂ ᐱᐊᓂᒍᓐᓇᖅᑕᖅᐳᑦ.”
ᓯᕗ ᑖᒃᓯ ᐱᒋᐊᖅᑎᓚᐅᖅᑕᖅᐳᑦ ᐊᕐᕌᓂ ᕕᕗᐊᕆᒥ ᒪᕐᕉᖕᓂᒃ ᐊᖁᑎᖃᖅᖢᑕ. ᒫᓐᓇᐅᔪᖅ ᐊᖁᑎᖏᑦ 7-ᖑᓕᖅᑐᑦ ᐊᒻᒪᓗ ᐃᑯᒪᓕᕆᔨᖃᖅᖢᓂ.
“ᓇᖕᒥᓂᕆᔭᖅᐳᑦ ᐱᐅᔫᔪᖅ,” ᑕᐃᒪᓐᓇ ᐅᖃᖅᖢᓂ ᐊᐅᑐᑦ. “ᓯᕗᓪᓕᖅᐹᒥ ᐃᓄᐃᑦ ᐊᓂᑦᑕᐃᓕᑎᑕᐅᖕᒪᑕ, ᖃᐅᔨᒪᓗᐊᓚᐅᙱᑦᑐᒍᑦ ᖃᓄᐃᓕᐅᕆᐊᖃᕐᒪᖔᑉᑕ, ᑕᐃᒪᐃᒻᒪᑦ ᓱᓇᓗᒃᑖᑦ ᑭᒡᓕᖃᓚᐅᖅᑐᑦ.”
ᑭᓯᐊᓂ ᑐᒡᓕᐊᓂ, ᑐᑭᓯᐅᒪᓂᖅᓴᐅᓕᓚᐅᖅᑐᒍᑦ ᓄᓇᒥ ᓄᓇᐅᑉ ᖃᓄᖅ ᐋᖅᑭᒃᓱᖅᓯᒪᓂᖓᓂᒃ.
ᑲᒪᒋᓗᐊᖃᑦᑕᖅᑕᖅᐳᑦ ᐃᓄᐃᑦ ᓇᒧᙵᐅᔪᒪᑎᓪᓗᒋᑦ ᓂᐅᕕᕐᕕᓪᓗ, ᑕᐃᒪᐃᒻᒪᑦ ᐊᒥᓱᓂᒃ ᐱᓕᕆᐊᖃᒃᑲᓐᓂᓕᓚᐅᖅᑐᖅ, ᓂᕿᑖᖑᔪᑦ ᐊᔾᔭᖅᑐᖅᐸᒃᖢᒋᑦ ᓂᐅᕕᕈᑏᓪᓗ.
14-ᖑᔪᑦ ᓄᓇᒃᑰᕈᑎᖏᑦ ᒫᓐᓇᐅᔪᖅ, ᖁᓕᑦ ᐊᐅᓪᓛᖅᑐᑦ.
“ᖁᕕᐊᓱᑦᑎᐊᖅᑐᖓ ᖃᓄᖅ ᐃᑲᔪᕈᓐᓇᕐᓂᑉᑎᓐᓄᑦ ᓄᓇᓕᖕᒥ,” ᑕᐃᒪᓐᓇ ᐅᖃᖅᖢᓂ ᐊᐅᑐᑦ.
“ᐃᓄᓗᒃᑖᑦ ᐱᔨᑦᓯᕋᐅᑎᑉᑎᓐᓂᒃ ᐊᑐᕆᐊᖃᖃᑦᑕᕐᒪᑕ, ᑕᐃᒪᓐᓇ ᐱᐊᓂᒃᓯᓇᓱᖃᑦᑕᖅᑐᒍᑦ.”
ᐱᑕᖃᙱᑐᐃᓐᓇᖅᑐᖅ ᓇᖕᒥᓂᖅ ᓄᓇᒃᑰᕈᑕᐅᓯᕝᕕᖃᙱᓐᓇᒥ, ᑕᒪᓐᓇ ᑕᒡᕙ ᑐᕌᒐᕆᓕᖅᑕᖓ ᓇᖕᒥᓂᕆᔭᒃᑯᑦ.
ᒪᑐᐃᙶᖃᑦᑕᕐᓂᖅ ᐅᑉᓗᑕᒫᒃᑯᑦ ᐊᒻᒪᓗ ᓄᓇᒃᑰᕈᑏᑦ ᐊᐅᓪᓛᑦᑎᐊᖃᑦᑕᖁᑉᓗᒋᑦ ᐊᑐᐃᓐᓇᐅᔪᓐᓇᖁᑉᓗᒋᑦ ᖃᐅᒃᐸᒧᑦ ᐱᔭᕆᐊᑐᔫᓯᒪᔪᖅ, ᑕᒪᓐᓇ ᐊᒃᑐᖅᓯᓯᒪᓪᓚᑦᑖᖅᑐᖅ ᐅᑉᓗᑕᒫᒃᑯᑦ ᐃᓅᖃᑎᒥᓂᒃ ᐃᓚᒥᓂᒃ ᐃᓅᖃᑎᖃᕈᓐᓇᕋᔭᕐᓂᖓᓄᑦ.
“ᐊᖑᓇᓱᒍᒪᓪᓕᖅᑐᖓ. ᓄᓇᒦᑦᑐᒪᓪᓕᖅᑐᖓ. ᐃᓚᓐᓈᒃᑲ ᑕᑯᔪᒪᓪᓕᖅᑕᒃᑲᑦᑕᐅᖅ,” ᑕᐃᒪᓐᓇ ᐅᖃᖅᖢᓂ.
ᐊᐅᑐᑦ ᖁᔭᓕᔪᖅ ᓄᓇᓕᖕᒥ ᐃᑲᔪᖅᑐᖅᑕᐅᑦᑎᐊᖃᑦᑕᕋᒥ, ᐊᒻᒪᓗ ᐃᖕᒥᓂᒃᑕᐅᖅ ᓄᓇᖅᑲᑎᒥᓂᒃ ᐃᑲᔪᕋᓱᒃᐸᒃᑐᖅ ᐊᒧᓯᖃᑦᑕᖅᖢᑎᒃ ᓵᓚᒃᓴᒐᒃᓴᓂᒃ.
“ᖁᔭᓕᑦᑎᐊᖅᑐᒍᑦ ᐱᓕᕆᐊᒃᓴᖃᕋᑉᑕ ᓄᓇᓕᖕᒥ,” ᑕᐃᒪᓐᓇ ᐅᖃᖅᖢᓂ ᐊᐅᑐᑦ. “ᖁᔭᓐᓇᒦᖁᒪᔭᒃᑲ ᓄᓇᖅᑲᑎᒃᑲ ᐊᒻᒪᓗ ᐱᓗᐊᖅᑐᒥ ᓴᓇᔨᕗᑦ ᐱᓕᕆᕐᔪᐊᖃᑦᑕᕐᒪᑕ ᐅᕙᒻᓂᒃ ᐱᓕᕆᔾᔪᔾᔨᓪᓗᑎᒃ.”