ᐊᕐᕌᒍᒐᓴᓂ ᐸᕐᓇᖕᓂᕐᒧᑦ ᐱᓪᓚᕆᙳᓚᐅᖅᐳᖅ ᒪᑐᐃᕐᓂᖓᓂ ᐊᐅᐸᖅᑐᒥ ᐃᖃᓗᖕᒥ ᓴᓇᐅᒐᓕᕆᕝᕕᖓᓂ ᐃᖃᓗᒃᑑᑦᑎᐊᕐᒥ ᓯᑎᐱᕆ 7–ᒥ.
ᐃᒡᓗᕐᔪᐊᖅ ᐃᖃᓗᓕᕆᕝᕕᐅᓚᐅᖅᓯᒪᕗᖅ, ᑲᔪᖏᖅᓴᐃᔪᒥ ᓴᓇᐅᒐᓕᕆᕝᕕᐅᑉ ᐊᑎᖓᓂ. ᐱᔭᕆᐊᖃᓚᐅᖅᐳᖅ ᖃᓂᒋᔭᖓᓂ $700,000–ᓂ ᓄᑖᙳᕆᐊᖅᑎᑕᐅᓂᖓᓂ ᐊᑐᖅᖢᑎᒃ ᒐᕙᒪᑐᖃᒃᑯᓐᓂ, ᓄᓇᕗᒻᒥ ᐊᒻᒪᓗ ᓄᓇᓕᖕᓂ ᑮᓇᐅᔭᖃᖅᑎᑕᐅᓂᖓᓂ ᓴᖑᑎᑦᑎᓂᕐᒧᑦ ᐃᓂᐅᔪᒥ, ᐅᖃᐅᓯᐅᓪᓗᓂ ᒫᕐᓚ ᓕᒧᓰᓐᒧᑦ, ᐃᖃᓗᒃᑑᑦᑎᐊᑉ ᓄᓇᓕᖕᓄᑦ ᐊᐅᓚᑦᑎᔨᖓ. ᑮᓇᐅᔭᓄᑦ ᐃᑲᔪᖅᓱᐃᓂᖃᓚᐅᕆᕗᖅ ᐅᕘᓇ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᖃᐅᓯᐊᖓᓐᓂ ᐊᒻᒪᓗ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ.
ᑲᑎᙵᓂᐅᔪᓂ ᓯᐊᒻᒪᖅᑎᑦᑎᓂᕐᒧᑦ ᐃᓕᓐᓂᐊᕐᕕᐊᕈᓯᕐᓂ ᐃᓄᑐᖃᕐᓄᑦ ᐊᒻᒪ ᒪᒃᑯᒃᑐᓄᑦ — ᑭᖑᓪᓕᐅᔪᖅ ᐊᑐᐃᓐᓇᐅᑎᑕᐅᓪᓗᓂ ᐃᓕᓐᓂᐊᕌᓂᒃᑳᖓᑕ — ᐱᓕᕆᐊᖑᕙᓪᓕᐊᓕᕇᖅᐳᑦ. ᐅᑯᐊ ᐱᓕᕆᐊᖑᔪᑦ ᐊᑭᖃᙱᓚᑦ. ᐊᓯᖏᑦ ᐊᑭᖃᕐᓂᐊᖅᐳᑦ.
“ᓴᓇᐅᒐᓕᕆᕝᕕᒃ ᐃᒻᒥᓂᒃ–ᒪᑭᒪᔪᓐᓇᖁᕙᕗᑦ ᖃᖓᒃᑲᓐᓂᐅᓛᖅᑐᒥ. ᐅᔾᔨᕈᓱᒃᐳᒍᑦ ᐊᑯᓂᐅᒐᓚᖕᓂᐊᕐᓂᖓᓂ ᑭᓯᐊᓂ ᐋᖅᑭᒃᓱᐃᕌᓂᒃᑯᑦᑕ ᐃᓚᖏᓐᓂ,” ᓕᒧᓰᓐ ᐅᖃᓚᐅᖅᐳᖅ.
ᐱᓇᓱᐊᕈᓯᐅᑉ ᓄᙳᐊᓂ ᑲᒥᓪᓛᕈᑎᓄᑦ–ᖄᖓᓂ ᓴᐸᖓᓕᕆᓂᕐᒥ ᐃᓕᓐᓂᐊᕐᓂᐅᔪᒥ ᐋᖅᑭᒃᑕᐅᓯᒪᔪᖃᓚᐅᖅᐳᖅ ᐊᐅᐸᖅᑐᒥ ᐃᖃᓗᖕᒥ, ᐃᓄᖃᕈᓐᓇᖅᑐᓂ 20–ᓂ ᐃᓄᖕᓂ.
ᐊᑕᐅᓯᕐᒥ ᓇᑉᐸᖓᓂ ᐃᑦᑕᕐᓂᓴᓕᕆᕕᖕᒥ ᒥᕐᙳᐃᖅᓯᕐᕕᖓᓂ ᐃᒡᓗᕐᔪᐊᖓᓂ ᑐᕌᖓᓂᖃᖅᐳᖅ ᓴᓇᐅᒐᓕᕆᓂᕐᓄᑦ, ᓲᕐᓗ ᐊᒥᐊᕆᓂᕐᒥ, ᒥᖅᓱᕐᓂᖅ, ᓇᑉᐸᖅᑕᓕᐅᕐᓂᕐᒥ ᐊᒻᒪ ᒫᒃᕈᒪᐃ, ᐊᐃᑉᐸᖓ ᐊᑐᖅᑕᐅᓪᓗᓂ ᐊᐅᖅᑭᖅᓯᓂᕐᒥ ᐊᒻᒪ ᕿᔪᓕᕆᓂᕐᒧᑦ ᐱᓕᕆᐊᒃᓴᐅᔪᓄᑦ. “ᐱᔪᒪᓂᐅᔪᖅ” ᓴᓇᔭᐅᓯᒪᔪᓄᑦ ᐊᐅᖅᑭᖅᓯᓂᕐᒥ ᐊᔪᙱᓐᓂᐅᔪᓂ ᑐᕌᕈᓐᓇᓛᖁᕙᖓᑦ ᓯᕗᓂᐊᓂ–ᐱᓕᕆᐊᖑᔪᓄᑦ ᐱᕕᒃᓴᖃᕐᓂᐅᔪᓄᑦ ᑲᑎᙵᓂᖃᖅᑐᒥ ᓯᓚᑦᑐᖅᓴᕐᕕᖕᒥ ᐃᒻᒪᖄᓘᓐᓃᑦ ᐃᓕᓐᓂᐊᖅᐸᓪᓕᐊᓗᓂ ᐃᖅᑲᓇᐃᔮᖅᑖᕋᓱᐊᕈᑎᓄᑦ ᐱᔪᒪᓇᔭᖅᑐᓄᑦ ᓄᓇᓕᖕᓂ ᐱᓕᕆᔨᐅᓗᑎᒃ, ᐅᖃᓚᐅᖅᐳᖅ ᓕᒧᓰᓐ.
ᓴᓇᐅᒐᓕᕆᔨᓄᑦ ᐊᐅᓚᑦᑎᔨᐅᔪᒥ ᐃᖅᑲᓇᐃᔭᖅᑎᑖᓚᐅᖅᐳᑦ ᐊᒻᒪᓗ ᐊᐅᐸᖅᑐᒥ–ᓇᓗᓇᐃᒃᑯᓯᖅᓯᒪᔪᒥ ᐊᐅᖅᑭᖅᓱᐃᔨᒥ ᐃᓕᓯᓯᒪᕗᑦ ᐃᓕᓐᓂᐊᖅᑎᑦᑎᓂᐊᖅᑐᒥ ᑕᐃᒃᑯᓂᖓ ᐊᔪᙱᓐᓂᐅᔪᓄᑦ. ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᐊᓕᐊᓇᐃᒋᔭᖃᖅᑐᒥ ᓴᓇᐅᒐᓕᕆᓂᕐᒧᑦ ᖃᐃᖁᔭᐅᓯᒪᕗᑦ ᐃᓕᓐᓂᐊᖅᑎᑦᑎᓂᕐᒥ ᐊᓯᖏᓐᓂ ᐊᒡᒐᒧᑦ ᓴᓇᐅᒐᓂ ᓱᓇᑐᐃᓐᓇᐃᓪᓗ, ᑭᓯᐊᓂ ᐊᑭᓖᓂᐅᔪᒥ ᐅᑯᓄᖓ ᐃᓕᓴᐃᔨᐅᔪᓄᑦ ᐱᔪᓐᓇᕐᓂᐊᖅᐳᖅ ᐃᓚᐅᖃᑕᐅᔪᑦ ᐊᑭᓖᓂᖃᕈᑎᒃ, ᓕᒧᓰᓐ ᐅᖃᓚᐅᖅᐳᖅ.
“ᑕᐃᒫᒃ ᓲᕐᓗ ᐱᓇᓱᐊᖅᐳᑦ ᑕᒪᒃᑭᓂ ᐊᔪᙱᓐᓂᐅᔪᓂ ᐅᕙᓂ ᓄᓇᓕᖕᓃᑦᑐᓂ,” ᐅᖃᓚᐅᖅᐳᖅ. “ᐱᓕᕆᑦᑎᐊᖅᐸᓪᓕᐊᕐᔪᐊᖅᐳᖅ. ᖁᕕᐊᑉᐳᖓ.”
ᑲᒪᒋᔭᖃᕐᓂᖅ ᐃᓵᕐᓂᐅᔪᒥ
ᓴᓇᐅᒐᓕᕆᕝᕕᒃ ᑭᖑᓪᓕᖅᐹᖑᓪᓗᓂ ᐃᓚᒋᔭᐅᖃᑕᐅᕗᖅ ᓄᓇᓕᐅᔪᒧᑦ ᐊᑐᖅᓯᒪᓂᖃᖅᑐᒥ ᐊᒥᓱᓂ ᓇᖕᒥᓂᕆᔭᐅᔪᓂ ᓱᔪᐃᓂᐅᔪᓂ ᖄᖏᖅᓯᒪᓕᖅᑐᓄᑦ ᖃᔅᓯᒐᓚᖕᓄᑦ ᑕᖅᑭᐅᔪᓄᑦ. ᐃᓄᑐᖃᒃᑯᕕᒃ ᐃᓵᖅᑕᐅᓚᐅᖅᐳᖅ ᔪᓚᐃ ᓄᙳᐊᓂ, ᕿᒪᒃᑕᐅᓪᓗᓂ ᓱᒃᑯᑦᑎᐊᖅᖢᓂ. ᐊᒥᓱᓂ ᐃᖅᑲᓇᐃᔭᖅᑎᓂ ᐃᑲᕐᕋᓂ ᐊᑐᓚᐅᖅᐳᑦ ᓴᓗᒻᒪᖅᓴᐃᓪᓗᑎᒃ ᓇᑎᖏᓐᓂ ᐊᒻᒪ ᑭᐳᖏᓐᓂ, ᐋᖅᑭᒃᓱᐃᓪᓗᑎᒃ ᒪᒃᐱᖅᑕᖅᑐᓂ, ᐃᓇᖏᖅᓯᓂᕐᒥ ᓱᕋᑦᑎᓯᒪᔪᓂ ᓂᕐᕆᓯᓂ, ᐊᒻᒪ ᐃᒋᑦᑎᓪᓗᑎᒃ ᓇᓚᕈᕐᕕᓂ ᐊᒻᒪ ᓇᑎᕋᕐᓂ ᓱᒃᑯᑕᐅᓚᐅᖅᑐᓂ. ᓕᒧᓰᓐ ᐅᐱᒍᓱᓚᐅᖅᐳᖅ ᐃᖅᑲᓇᐃᔭᖅᑎᓂ “ᑲᒪᓇᖅᑐᐊᓗᖕᒥ ᐱᓕᕆᓂᖏᓐᓂ.”
ᓄᓇᓕᖕᓂ ᑲᑎᒪᓂᖃᓚᐅᖅᐳᑦ ᐋᒍᔅᑎᒥ ᑭᐅᓂᕐᒧᑦ ᐊᑲᐅᙱᓕᐅᕈᑕᐅᔪᒥ. ᑭᐱᙳᓂᖅ ᒪᒃᑯᒃᑐᓂ ᐊᒻᒪᓗ ᐊᖏᕐᕋᒥᓃᙱᓚᐅᑲᒋᐊᖃᕐᓂᖏᓐᓂ ᖃᔅᓯᒐᓚᖕᓄᑦ ᐱᔾᔪᑕᐅᔪᓄᑦ ᑎᒃᑯᐊᕆᔭᐅᓚᐅᖅᐳᑦ ᖃᔅᓯᒐᓚᐅᔪᓂ ᐱᔾᔪᑕᐅᓂᖓᓂ ᐃᓵᖅᓯᓂᐅᔪᓄᑦ.
ᐃᓚᖏᓐᓂ ᐋᖅᑭᒍᑎᒃᓴᓂ ᓴᖅᑭᑎᑕᐅᔪᓂ ᓴᓇᐅᒐᓕᕆᓂᕐᒧᑦ ᐃᓅᓕᓴᖅᓯᓂᐅᔪᒥ ᐅᕘᓇ ᐊᐅᐸᖅᑐᒥ ᐃᖃᓗᖕᒥ ᓴᓇᐅᒐᓕᕆᕝᕕᖕᒥ ᐊᒻᒪᓗ ᐸᐃᑉᐹᓕᖕᒥ ᓴᓇᐅᒐᓕᕆᓂᕐᒧᑦ ᐃᓅᓕᓴᖅᓯᔨᐅᔪᒥ, ᐅᖃᓚᐅᖅᐳᖅ ᓕᒧᓰᓐ.
“ᐃᓚᐅᖃᑕᐅᖃᑦᑕᓕᖅᖢᓂ ᓴᓇᐅᒐᓕᕆᓂᕐᒥ … ᑐᓂᓯᓲᖑᕗᖅ ᐃᒻᒥᓂᒃ–ᐅᒃᐱᕈᓱᓕᖅᐸᓪᓕᐊᓂᐅᔪᒥ. ᐱᔭᒃᓴᖃᖅᑎᑦᑎᕗᖅ, ᐊᓯᐊᓂ ᐱᑕᖃᙱᒃᑯᓂ,” ᐅᖃᓚᐅᖅᐳᖅ.
ᐊᓯᖏᓐᓂ ᐸᕐᓇᒍᑎᓂ ᐅᖃᐅᓯᐅᓚᐅᖅᐳᑦ ᐃᓄᓕᒫᓄᑦ ᑲᑎᒪᓂᐅᔪᒥ, ᓕᒧᓰᓐ ᐅᖃᐅᓯᕆᓗᐊᕈᒪᓚᐅᙱᓚᖏᑦ ᒪᐃᔭᐅᑉ ᒪᒃᑯᒃᑐᓄᑦ ᐅᖃᐅᔾᔨᔨᐅᔪᓄᑦ ᑲᑎᒪᔨᖏᑦ ᐸᕐᓇᒃᐸᓪᓕᐊᖕᒪᑕ ᐃᓚᐅᑎᑦᑎᓂᖏᓐᓂ ᒪᒃᑯᒃᑑᖃᑎᖏᓐᓂ ᑲᑎᒪᓂᐅᔪᒥ ᑎᑭᑉᐸᓪᓕᐊᔪᓄᑦ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ ᐱᓇᓱᐊᕐᓗᑎᒃ ᐅᖃᐅᓯᒃᓴᖏᓐᓂ ᑐᕌᒐᕆᔭᐅᔪᓐᓇᑐᐃᓐᓇᕆᐊᓕᖕᓂ.
“ᐊᓱᐃᓛᒃ ᐃᓕᓗᑎᒍᑦ (ᐸᕐᓇᒍᑎᒃᓴᓂ) ᓴᓂᓕᕇᒡᓗᑎᒃ, ᐊᔭᐅᕆᙱᓪᓗᑎᒃ ᒪᒃᑯᒃᑐᓂ ᐊᖓᔪᖅᑳᖏᑦ ᐃᓐᓇᓪᓘᓐᓃᑦ ᐅᖃᖅᓯᒪᔭᖏᓐᓂ ᐅᖃᓚᐅᖅᐳᖅ (ᓯᕗᓂᐊᒍᑦ),” ᓕᒧᓰᓐ ᐅᓂᒃᑳᕆᓚᐅᖅᐳᖅ.