Skip to content

ᓴᓇᔩᑦ ᑐᐊᕕᖅᑐᑦ ᓴᐳᓐᓂᐊᖅᖢᑎᒃ ᖃᒪᓂ’ᑐᐊᑉ ᐃᒪᖅᑖᕐᕕᒋᕙᒃᑕᖓᓂᒃ ᐅᖅᓱᐊᓗᒃ ᑯᕕᖅᑳᖅᑎᓪᓗᒍ

ᑐᐊᕕᖅᑐᑦ ᓴᓗᒻᒪᖅᓴᐃᑉᓗᑎᒃ ᓱᕈᖅᑕᐅᓯᒪᔪᒥᒃ ᒪᕋᕐᒥᒃ ᐊᐳᑎᒥᒡᓗ ᑯᕕᔪᖃᓚᐅᕐᓂᖅᑎᓪᓗᒍ 10,000 ᓖᑕᓂᒃ ᐅᖅᓱᐊᓗᖕᒥ ᖃᒪᓂ’ᑐᐊᑉ ᐅᖅᓱᐊᓗᖃᐅᓯᕝᕕᖓᓂᒃ ᒫᑦᓯᐅᓚᐅᖅᑐᒥ.
25184542_web1_210519-KIV-fuelspillINUK_1
ᓴᓗᒻᒪᖅᓴᑕᐅᔪᖅ ᓇᓚᐅᑦᑖᖅᑕᐅᓯᒪᔪᒃᑯᑦ 10,000 ᓖᑕᓂᒃ ᐊᖏᓂᓕᒃ ᐅᖅᓱᐊᓗᒃ ᑯᕕᔪᕕᓂᖅ ᖃᒪᓂ’ᑐᐊᕐᒥ ᓴᓇᔩᑦ ᑲᑎᑦᑎᔪᑦ ᓱᕈᖅᑕᐅᓯᒪᔪᓂᒃ ᒪᕋᕐᓂᒃ ᐊᒻᒪᓗ ᐊᐳᑎᒥᒃ ᐊᐅᖅᑳᖅᑎᓐᓇᒍ. ᐊᔾᔨ ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᓐᓂᙶᖅᑐᖅ

ᑐᐊᕕᖅᑐᑦ ᓴᓗᒻᒪᖅᓴᐃᑉᓗᑎᒃ ᓱᕈᖅᑕᐅᓯᒪᔪᒥᒃ ᒪᕋᕐᒥᒃ ᐊᐳᑎᒥᒡᓗ ᑯᕕᔪᖃᓚᐅᕐᓂᖅᑎᓪᓗᒍ 10,000 ᓖᑕᓂᒃ ᐅᖅᓱᐊᓗᖕᒥ ᖃᒪᓂ’ᑐᐊᑉ ᐅᖅᓱᐊᓗᖃᐅᓯᕝᕕᖓᓂᒃ ᒫᑦᓯᐅᓚᐅᖅᑐᒥ.

“ᐊᒥᓲᔪᑦ ᓄᓇᖅᑲᑎᒌᑦ ᐃᓱᒫᓘᑎᓖᑦ ᐅᖅᓱᐊᓗᖃᐅᓯᕝᕕᒃᐳᑦ ᒪᔪᖅᑲᒦᒻᒪᑦ ᑰᒍᓐᓇᖅᖢᓂ ᐃᒪᖅᑖᕐᕕᐅᕙᒃᑐᒧᑦ,” ᒪᐃᔭ ᕆᑦᓱᑦ ᐊᒃᓴᕐᓂᖅ ᑕᐃᒪᓐᓇ ᐅᖃᐅᔾᔨᓚᐅᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ ᒪᐃ 14-ᒥ.

ᓄᓇᕗᑦ ᒐᕙᒪᒃᑯᖏᑦ ᓇᓚᐅᑦᑖᖅᓯᒪᔪᒃᑯᑦ ᓴᓗᒻᒪᖅᓴᖅᑕᐅᔪᖅ ᐊᑭᖃᕐᓂᐊᕋᓱᒋᔭᖓ $500,000-ᒥᒃ $1 ᒥᓕᔭᒧᑦ.

ᓄᓇᓕᐅᔪᖅ ᑐᓴᖅᑎᑕᐅᖅᑳᓚᐅᖅᑐᖅ ᑯᕕᔪᕕᓂᕐᒥᒃ ᐅᖅᓱᐊᓗᖃᕐᕕᖕᒥ ᒫᑦᓯ 5-ᒥ, ᑯᕝᕕᕕᒃ ᓱᖁᒥᓚᐅᕐᓂᖅᑎᓪᓗᒍ ᓱᑉᓗᓕᖓᒍᑦ.

ᓯᖁᒥᓚᐅᖅᑐᖅ ᐋᖅᑭᒃᑕᐅᓯᒪᓕᕐᓂᕋᖅᑕᐅᒐᓗᐊᖅᑎᓪᓗᒍ, ᐅᖅᓱᐊᓗᒃ ᑯᕕᓂᕋᖅᑕᐅᓚᐅᕐᒪᑦ ᖃᒪᓂ’ᑐᐊᑉ ᐅᖅᓱᐊᓗᖃᐅᓯᕝᕕᖓᑕ ᖄᒥᑦᑕᐅᓕᔾᔪᑎᖓᒍᑦ ᐅᖅᓱᐊᓗᖃᐅᓯᕝᕕᑦ ᐊᕙᓗᖓᓂᒃ ᒫᑦᓯ 29-ᒥ. ᑭᓯᒥ ᐊᐃᕆᓕ 21-ᒥ Hᐊᒻᓚᒃᑯᑦ ᖃᐅᔨᓚᐅᖅᑐᑦ ᖃᓄᖅ ᐊᖏᑎᒋᔪᒥᒃ ᑯᕕᔪᖃᕐᓂᖓᓄᑦ ᑐᓴᖅᑎᑕᐅᑉᓗᑎᒃ ᓄᓇᕗᑦ ᒐᕙᒪᒃᑯᖏᓐᓄᑦ.

ᒪᓕᒃᖢᒍ ᖃᕆᑕᐅᔭᒃᑯᑦ ᑎᑎᖅᑲᖅᑖᖑᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᑦᑕ ᐅᖅᓱᐊᓗᓕᕆᔨᒃᑯᖏᓐᓂᒃ, ᐊᕙᑎᓕᕆᓂᕐᒧᑦ ᑲᒪᔩᑦ ᑎᑭᑎᑕᐅᓚᐅᖅᑐᑦ ᖃᒪᓂ’ᑐᐊᕐᒧᑦ ᐊᐃᕆᓕ 24-ᒥ.

ᓴᓇᔪᑦ ᓇᑉᐸᖅᑎᕆᓯᒪᓕᖅᑐᑦ 20 ᒦᑕᓂᒃ 40 ᒦᑕᓄᑦ ᐊᕙᓗᒥᒃ ᐅᖅᓱᐊᓗᖃᐅᓯᕝᕕᐅᑉ ᓂᒋᐊᓂ. ᐊᕙᓗᐃᑦ ᐃᓗᓕᖃᖅᑐᑦ ᖄᒥᑦᑕᐃᓕᔾᔪᑎᓂᒃ, ᐃᑭᐊᕈᑕᖃᖅᖢᓂ ᐱᐅᓂᖅᐹᖑᔪᓂᒃ, ᓯᐊᒻᒪᖁᓇᒍ ᐊᐳᑎ ᐊᒻᒪᓗ ᐊᐅᒃᐸᓪᓕᐊᔪᖅ.

“ᐱᓕᕆᕐᔪᐊᖅᓯᒪᔪᑦ ᓯᐊᒻᒪᖁᓇᒍ ᖃᒪᓂ’ᑐᐊᑉ ᐃᒪᖅᑖᕐᕕᒋᕙᒃᑕᖓᓄᑦ, ᑭᓯᐊᓂᓕ, ᐅᓗᕆᐊᓇᖅᑐᒦᑦᑐᑦ ᓱᓕ ᐋᖅᑭᒃᑕᐅᓪᓚᑦᑖᙱᓐᓂᓗᒃᑖᖓᓄᑦ,” ᑕᐃᒪᓐᓇ ᐅᖃᖅᓯᒪᔪᖅ ᑎᑎᖅᑲᖅᑖᖑᓚᐅᖅᑐᖅ ᒐᕙᒪᒃᑯᑦ ᐅᖅᓱᐊᓗᓕᕆᔨᒃᑯᖏᓐᓂᒃ.

ᒫᓐᓇᒧᑦ, 1,700 ᑭᑉᐹᕆᒃᑐᒃᑯᑦ ᒦᑕ ᐊᒃᑐᖅᑕᐅᓯᒪᔪᖅ ᐊᐳᑎ ᐊᒻᒪᓗ ᓯᑯ ᐊᕙᓗᓕᐊᖑᔫᑉ ᐃᓗᐊᓅᖅᑕᐅᓯᒪᔪᖅ.

ᑭᓂᖅᑐᓂᒃ ᒥᓗᒃᓯᓲᑦ ᑯᕕᔪᓂᒃ ᐊᕙᓗᓕᐊᖑᓲᑦ ᐊᓪᓚᕈᑎᕐᔪᐊᓪᓗ ᖃᒪᓂ’ᑐᐊᕐᒧᑦ ᑎᑭᑎᑕᐅᓚᐅᕐᒥᔪᑦ ᑲᒪᒋᔭᐅᔪᓐᓇᖁᑉᓗᒋᑦ ᐊᐅᒃᐸᓪᓕᐊᔪᑦ.

ᐱᓕᕆᔪᑦ ᓇᑉᐸᖅᑎᕆᔪᑦ ᐊᑖᒍᑦ ᑰᒃᐸᓪᓕᐊᔪᒃᑯᑦ ᐃᓂᒃᓴᖓᓂᒃ ᑰᖁᓇᒍ ᑯᕕᔪᒦᑐᐃᓐᓇᖁᑉᓗᒍ.

“ᐊᐳᑎ ᐊᐅᒃᐸᓪᓕᐊᑎᓪᓗᒍ ᓱᕈᖅᓯᒪᔫᑉ ᐃᓗᐊᓂ, ᐃᓕᔭᐅᓂᐊᖅᑐᖅ ᓴᓗᒻᒪᖅᓴᖅᑕᐅᓯᒪᔪᒧᑦ ᖃᑦᑖᓗᖕᒧᑦ ᐅᖅᓱᐊᓗᓕᕆᔨᒃᑯᑦ ᐅᖅᓱᐊᓘᓯᕝᕕᖃᕐᕕᖓᓄᑦ, ᐊᒻᒪᓗ ᖃᐅᔨᓴᖅᑕᐅᓗᓂ ᐃᒪᖃᕐᒪᖔᑦ ᐊᓯᐊᓅᖅᑕᐅᖅᑳᕐᓇᓂ,” ᑕᐃᒪᓐᓇ ᐅᖃᖅᓯᒪᑉᓗᓂ ᖃᕆᑕᐅᔭᒃᑯᑦ ᑎᑎᖅᑲᖅ.

ᐊᒃᓴᕐᓂᖅ ᐅᖃᖅᖢᓂ ᐅᖃᖃᑎᖃᐃᓐᓇᕋᒥᒎᖅ ᓴᓇᔪᓂᒃ ᓄᓇᒥ. Hᐊᒻᓚᒃᑯᑦ ᐱᓇᓱᐊᕈᓯᑕᒫᒃᑯᑦᑕᐅᖅ ᑲᑎᒪᖃᑎᖃᐃᓐᓇᖅᑐᑦ ᐅᖅᓱᐊᓗᓕᕆᔨᒃᑯᓐᓂᒃ.

ᖃᐅᔨᒪᔨᒋᔭᐅᔪᓂᒃ ᐅᖃᖃᑎᖃᐃᓐᓇᖅᑐᒍᑦ ᖃᕆᑕᐅᔭᒃᑯᑦ ᑎᑎᕋᕐᕕᒋᖃᖅᑕᖅᖢᒋᑦ, ᐅᖃᓗᒡᕕᒋᖃᑦᑕᖅᖢᒋᑦ ᐊᒻᒪᓗ ᑲᑎᖃᑎᒋᓪᓚᑦᑖᖃᑦᑕᖅᖢᒋᑦ,” ᑕᐃᒪᓐᓇ ᐅᖃᖅᖢᓂ. “ᑕᑯᓯᒪᔭᒃᑯᑦ, ᐱᓕᕿᑦᑎᐊᖅᑐᐊᓘᔮᖅᑐᑦ.”

ᒪᐃᔭᒋᔭᐅᔪᖅ ᐅᖃᒃᑲᓐᓂᖅᖢᓂ ᓯᓚᒎᖅ ᓂᒡᓕᓇᓗᐊᖅᑎᓪᓗᒍ ᐊᒻᒪᓗ ᐊᓄᕌᓗᐊᖅᑎᓪᓗᒍ ᐱᕙᓪᓕᐊᑦᑎᐊᕐᓇᓚᐅᙱᑦᑐᖅ ᐱᓇᓱᐊᕈᓯᐅᓚᐅᖅᑐᒥ.

“ᐅᑉᓗᓂᒃ ᖄᖏᓵᖅᑐᓂᒃ ᓈᒻᒪᙱᑦᑐᒻᒪᕆᐊᓘᓯᒪᔪᖅ,” ᑕᐃᒪᓐᓇ ᐅᖃᖅᖢᓂ ᐊᒃᓴᕐᓂᖅ ᒪᐃ 14-ᒥ. “ᓯᓚ ᓂᒡᓕᓴᖅᑐᐊᓘᑎᓪᓗᒍ ᐱᔭᕆᐊᑐᑎᑦᑎᓕᖅᓯᒪᔪᖅ ᐊᕙᑎᑉᑎᓐᓂᒃ ᓴᓗᒻᒪᖅᓴᐃᑎᓪᓗᒋᑦ.”

ᐊᒃᓴᕐᓂᖅ ᐅᖃᖅᖢᓂ ᓄᓇᓕᒃ ᐊᑉᖁᑎᒥᒃ ᐊᐳᑕᐃᔭᐃᓯᒪᓕᕐᒪᑦ ᐅᖅᓴᐊᓗᖃᐅᓯᕝᕕᐅᑉ ᐱᖃᑖᒎᕈᑎᒥᒃ ᐅᔾᔨᖅᑐᖁᔨᑉᓗᑕ ᐃᑭᑦᑐᖃᑳᓚᖕᓂᖅᐸᑦ ᑯᕕᓚᐅᖅᑐᖅ ᐱᔾᔪᑎᒋᑉᓗᒍ.

“Hᐊᒻᓚᒃᑯᑦ ᒪᑐᐃᖅᓯᓚᐅᖅᑐᑦ ᐊᑉᖁᑎᒥᒃ ᐊᒡᓂᒍᒃᑯᑦ ᑭᓴᕐᕕᖓᓄᑦ, ᓈᒻᒪᙱᑦᑐᒥᒃ ᓴᖅᑭᑦᑐᖃᕐᓂᖅᐸᑦ ᐃᓱᒪᑉᓗᑎᒃ,” ᑕᐃᒪᓐᓇ ᐊᒃᓴᕐᓂᖅ ᐅᖃᖅᖢᓂ.

ᒪᓕᒃᖢᒍ ᒐᕙᒪᒃᑯᑦ ᐅᖅᓱᐊᓗᓕᕆᔨᒃᑯᖏᑦᑕ ᐅᖃᖅᓯᒪᔭᖓ, ᑕᒪᓐᓇ ᓴᓗᒻᒪᖅᓴᐃᓂᖅ ᐲᔭᐃᓂᕐᓗ ᓱᕈᖅᓯᒪᔪᓂᒃ ᐱᐊᓂᒐᔭᖅᑐᒃᓴᐅᔪᕉᖅ ᐊᐅᔭᖅ. ᑭᓯᐊᓂᓕ, ᖃᐅᔨᓴᖅᑕᐅᖏᓐᓇᕐᓂᐊᖅᑐᖅ ᐃᑉᔪᖓ 2022-ᒧᑦ ᐊᒻᒪᓗ 2023-ᒧᑦ.