ᖃᒪᓂ’ᑐᐊᕐᒥᐅᑕᖅ ᐊᕐᓇᖅ ᐅᐃᖏᓚᐅᖅᓯᒪᔪᖅ ᐊᑕᐅᓯᕐᒥᒡᓗ ᐃᕐᓃᖅᖢᓂ ᐃᓅᓯᕐᒥᓂᒃ ᑭᐱᓯᓯᒪᔪᓂᒃ ᑲᔪᓯᑎᑦᑎᓂᐊᖅᑐᖅ 7-ᒋᔭᖓᓂᒃ ᐊᕐᕌᒍᑕᒫᒃᑯᑦ ᐱᓱᒃᑎᑦᑎᖃᑦᑕᖅᑎᓪᓗᒍ ᐃᓅᓯᕐᒥᓂᒃ ᑭᐱᓯᖃᑦᑕᖁᔨᙱᓐᓂᕐᒧᑦ ᐱᓱᖕᓂᐊᖅᑐᑦ ᐊᒐᓯ 25-ᒥ.
ᑐᕆᓴ ᐋᓯᕙᒃ ᐸᑲ ᐱᒋᐊᖅᑎᑦᑎᓚᐅᖅᑐᖅ ᐱᓱᒃᑎᑦᑎᖃᑦᑕᕈᒪᑉᓗᓂ ᔭᓄᐊᕆ 2014-ᒥ ᐃᕐᓂᖓ ᐃᓅᓯᕐᒥᓂᒃ ᑭᐱᓯᓚᐅᖅᑎᓪᓗᒍ ᑎᓯᐱᕆᒥ 2013−ᒥ. ᐅᐃᒡᒐᓚᐅᖅᖢᓂᓗ 2007-ᒥ.
“ᑕᒪᓐᓇ ᐱᒻᒪᕆᐅᑎᑕᕋ ᐊ’ᐊᕌᓘᖕᒪᑦ ᐃᓚᐃᖅᖢᓂ,” ᑕᐃᒪᓐᓇ ᐸᑲ ᐅᖃᖅᑐᖅ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ. “ᑕᒪᓐᓇ ᐃᑲᔫᑕᐅᖃᑦᑕᖅᑐᖅ ᐅᕙᒻᓄᑦ ᐃᓱᒪᒋᖃᑦᑕᕋᑉᑭᑦ ᑕᐃᑉᑯᐊ ᐊᒃᓱᕈᕐᓇᖅᑐᒃᑰᖅᑐᑦ. ᐃᒃᐱᒋᖃᑦᑕᖅᑕᒃᑲ ᐋᓐᓂᐊᖏᑦ ᐃᓚᐃᕌᖓᑕ ᓇᒡᓕᒋᔭᒥᓂᒃ ᐃᓅᓯᒃᑯᑦ ᑭᐱᓯᔪᓂᒃ.”
ᓯᕗᓪᓕᖅᐹᒥ ᐅᑭᐅᒥ, ᒪᕐᕈᐃᖅᑕᖅᖢᓂ ᐱᓱᒃᑎᑦᑎᓚᐅᖅᓯᒪᔪᖅ: ᔭᓄᐊᕆᒥ ᐊᒻᒪᓗ ᐱᓱᒃᑎᑦᑎᒃᑲᓐᓂᖅᖢᓂ ᐃᕐᓂᕆᓚᐅᖅᑕᖓᑕ ᓇᓪᓕᐅᑎᕝᕕᒋᖃᑦᑕᓚᐅᖅᑕᖓᓂᒃ ᐅᑉᓗᕐᒥ ᐊᒐᓯ 31-ᒥ. ᐅᑭᐅᖅ, ᐋᖅᑭᒋᐊᖅᓯᔭᕆᐊᖃᓚᐅᖅᑐᖅ ᐅᑉᓗᕐᒥᒃ ᐊᒐᓯ 25-ᒧᑦ ᐃᓱᒫᓘᑎᖃᖅᖢᓂ ᐅᔭᕋᖕᓂᐊᕐᕕᖕᒥ ᓴᓇᔭᖅᑐᕆᐊᖃᕈᒫᖅᑐᒃᓴᐅᓂᖓᓄᑦ ᐊᒐᓯ 31-ᒥ.
ᑭᓇᑐᐃᓐᓇᖅ ᐃᓚᐅᔪᒪᔪᖅ ᑲᑎᖃᑕᐅᔪᓐᓇᖅᑐᖅ ᓯᐊᕐᕆᔮᕐᕕᖕᒥ ᐅᑉᓛᒃᑯᑦ 8:30-ᒥ ᐱᓱᒋᐊᕈᓐᓇᕈᒪᑉᓗᑎᒃ 9:00-ᒥ ᐅᑉᓛᒃᑯᑦ.
ᐸᑲ ᐱᓱᒃᑎᑦᑎᖃᑦᑕᖅᓯᒪᓕᖅᑐᖅ ᐅᑭᐅᑕᒫᒃᑯᑦ ᑕᐃᒪᙵᓂ 2014-ᒥ ᐱᒋᐊᖅᖢᒍ, ᑭᓯᒥ ᐱᑎᑦᑎᓚᐅᙱᖦᖢᓂ ᐊᐅᔭᒃᑯᑦ 2020-ᒥ ᓄᖅᑲᖅᑎᑕᐅᓚᐅᖅᑎᓪᓗᒍ ᓯᓚᓗᖕᓂᖓᓄᑦ.
“ᓈᒻᒪᒃᓴᓚᐅᙱᑦᑐᖓ ᐱᓱᙱᓐᓇᑉᑕ. ᐃᓄᐃᑦ ᐊᐱᖅᑯᑐᖃᐃᓐᓇᖃᑦᑕᓕᓚᐅᕐᒪᑕ,” ᑕᐃᒪᓐᓇ ᐅᖃᖅᖢᓂ.
ᐱᖓᓲᔪᑦ ᐃᓅᓯᕐᒥᓂᒃ ᑭᐱᓯᓯᒪᔪᑦ ᑭᕙᓪᓕᕐᒥ ᐱᓇᓱᐊᕈᓯᕐᓂᒃ ᖄᖏᓵᖅᑐᓂᒃ, ᐊᑕᐅᓯᖅ ᖃᒪᓂ’ᑐᐊᕐᒥ. ᓈᒻᒪᒍᓐᓃᓪᓚᕆᒃᑐᖅ ᑕᒪᓐᓇ ᓄᓇᕗᒥ, ᐸᑲ ᓂᕆᐅᒃᑐᖅ ᐊᒥᓲᓂᖅᐹᓂᒃ ᐱᓱᒋᐊᖅᑐᖁᔨᑉᓗᓂ.
“ᑐᓴᕌᖓᒪ ᐃᓅᓯᕐᒥᓂᒃ ᑭᐱᓯᔪᖃᕐᓂᖓᓄᑦ, ᑐᓴᕆᐊᒃᓴᖅ ᖁᕕᐊᒋᖃᑦᑕᙱᒻᒪᕆᒃᑕᕋ ᒪᕐᕉᖕᓂᒃ ᐃᓚᐃᖅᓯᒪᒐᒪ ᐃᓅᓯᕐᒥᓂᒃ ᑭᐱᓯᓯᒪᔪᒃᑯᑦ,” ᑕᐃᒪᓐᓇ ᐅᖃᖅᖢᓂ ᐸᑲ.
ᐅᖃᖅᖢᓂ ᐱᓱᒃᑎᑦᑎᖃᑦᑕᖅᑐᕉᖅ ᐃᓄᐃᑦ ᐃᓗᒃᑯᑦ ᐸᐸᑦᑎᑐᐃᓐᓇᖃᑦᑕᖁᓇᒋᑦ ᐃᒃᐱᒋᔭᒥᓂᒃ. ᐱᓱᒃᑎᓪᓗᒋᑦ, ᐸᑲ ᐊᔭᐅᖅᑐᐃᒐᔪᒃᑐᖅ ᐃᓄᐃᑦ ᐅᖃᐅᓯᖃᖃᑦᑕᖁᑉᓗᒋᑦ ᐃᒃᐱᒋᔭᒥᓂᒃ ᓂᐱᖃᒥᐊᕐᓗᑎᒃ ᑲᑉᐱᐊᓱᙱᓪᓗᑎᒃ ᑲᙳᓱᙱᓪᓗᑎᒡᓗ.
“ᐅᖃᐅᑎᖃᑦᑕᖅᑕᒃᑲ, ‘ᐃᕆᐊᓛᕈᒪᒍᑉᓯ, ᐱᓲᔭᕐᓗᓯ ᐃᕆᐊᓛᕈᓐᓇᖃᑦᑕᖅᑐᓯ. ᐃᓱᒪᒋᓗᒋᑦ ᐃᓗᒥᐅᑕᑎᑦ ᐊᒻᒪᓗ ᐃᖅᑲᐅᒪᓗᓯ ᐃᓄᑑᙱᓐᓇᑉᓯ.”
ᓂᕆᐅᖕᓂᖃᖅᖢᓂ ᐱᓱᖕᓂᖅ ᐃᓗᒃᑯᑦ ᐃᖢᐊᖅᓯᒍᑕᐅᓇᔭᕐᓂᖓᓄᑦ ᐃᓅᖃᑎᒥᓄᑦ, ᐅᖃᖅᖢᓂ ᐃᑲᔫᑎᓪᓚᕆᒎᖅ ᐃᖕᒥᓄᑦᑕᐅᖅ.
“ᐅᕿᓪᓕᕚᓪᓕᖅᑑᔭᖃᑦᑕᖅᑐᖓ ᐃᓄᖕᓂᒃ ᑕᑯᔭᕌᖓᒪ ᐃᓚᐅᖃᑕᐅᔪᓂᒃ.”
ᐊᓯᖏᓪᓕ ᐱᓱᒃᑐᑦ ᓄᓇᓕᖕᒥᑐᐃᓐᓇᖅ ᐱᓱᖕᓂᖃᖅᐸᒃᑎᓪᓗᒋᑦ, ᐸᑲ ᓯᕗᓪᓕᐅᒐᔪᒃᑐᖅ Prince River-ᒧᑦ ᐱᓱᒃᑐᓂᒃ, ᑲᑎᓗᒃᑖᖅᖢᒍ ᑕᒪᓐᓇ ᐃᒻᒪᖄ ᐊᕐᕕᓂᓕᖕᓂᒃ ᐃᑲᕐᕋᓂᒃ ᐱᓱᖕᓇᖅᑐᖅ.
ᑭᓯᐊᓂᓕ, ᐅᑭᐅᖑᔪᖅ ᓇᐃᓪᓕᒋᐊᖅᑎᑦᑐᒪᔭᖓ ᐱᓱᖕᓂᐅᖃᑦᑕᖅᑐᖅ ᓄᕕᐅᑦᑐᕐᒧᑦ ᓄᕕᐊᓄᑦ. ᐸᑲ ᐅᖃᖅᖢᓂ ᐱᓱᖕᓂᐊᖅᑐᒃᓴᐅᔪᑦ ᓯᑕᒪᓂᒃ ᐃᑲᕐᕋᓂᒃ ᐅᑭᐅᖅ. ᐅᖃᖅᖢᓂ ᓇᐅᒃᑰᕐᕕᒋᓂᐊᖅᑕᖓ ᑐᕌᕐᓂᐊᕐᒪᑦ ᕿᑯᓕᖅᑐᖅᑕᐅᓵᖅᓯᒪᔪᒃᑯᑦ, ᓄᓇᑐᐃᓐᓇᒃᑰᙱᓪᓗᑎᒃ. ᐅᖃᖅᖢᓂ ᑕᐃᒪᑐᕉᖅ ᑕᒪᓐᓇ ᐊᒥᓱᒃᑲᓐᓂᕐᓄᑦ ᐱᔫᒥᓵᕈᑕᐅᓂᐊᖅᐳᖅ.
ᐸᑲ ᐊᔭᐅᖅᑐᐃᖕᒥᔪᖅ ᐃᓄᖕᓂᒃ ᐊᒃᓱᕈᕐᓇᖅᑐᒃᑰᖅᑐᓂᒃ ᐅᖃᖃᑎᖃᖃᑦᑕᖁᑉᓗᒋᑦ ᐃᓚᓐᓈᒥᓂᒃ ᖃᑕᙳᑎᒥᓂᒡᓗ ᐃᑲᔪᖅᑕᐅᔪᒪᓗᑎᒃ.
“ᑕᐃᒫᓗᐃᑦ ᐃᓄᐃᑦ ᓇᒡᓕᒍᓱᒃᑐᑦ ᐃᓕᖏᓂᒃ.”
ᖃᓄᐃᑦᑐᖃᕋᓗᐊᖅᐸᑦ ᐅᑭᐅᖑᔪᖅ, ᐸᑲ ᐅᖃᖅᖢᓂ ᑲᔪᓯᑎᑦᑏᓐᓇᖃᑦᑕᕐᓂᐊᖅᑐᕉᖅ ᐱᓱᖕᓂᕐᒥᒃ ᐱᔪᓐᓇᕐᓂᓗᒃᑖᒥᓂᒃ.
“ᐊᕐᕌᒍᑕᒫᒃᑯᑦ ᐱᓱᒃᑎᑦᑎᖃᑦᑕᕐᓂᐊᖅᑐᖓ ᐊᒐᓯᐅᓕᕌᖓᑦ ᐱᓱᒍᓐᓇᐃᓪᓕᓂᓗᒃᑖᒻᓄᑦ,” ᑕᐃᒪᓐᓇ ᐅᖃᖅᖢᓂ.