ᑕᐃᑉᑯᐊ ᐊᑭᓕᒐᒃᓴᖅᑖᖅᑎᑕᐅᔪᑦ ᓯᑕᒪᓕᖕᒥᒃ ᐃᖏᕐᕋᔭᖕᓂᕐᒧᑦ ᓇᓴᖃᙱᖦᖢᑎᒃ ᐅᕝᕙᓘᓐᓃᑦ ᑕᐃᒪᓐᓇᕐᓚᒃ ᖃᐅᔨᔭᐅᓯᒪᔪᑦ ᐊᐅᔭᖅ ᐊᑭᓕᕆᐊᖃᖅᑕᒥᓂᒃ ᑕᑯᔪᓐᓇᖅᓯᓚᐅᖅᑐᑦ ᖁᔭᓈᖅᑕᐅᑎᓪᓗᒋᑦ ᐅᐸᒍᑎᓂᕐᒧᑦ ᐊᑉᖁᑎᒃᑯᑦ ᐊᑦᑕᓇᖅᑐᒦᑦᑕᐃᓕᒪᓂᕐᒧᑦ ᐱᓕᕆᐊᖑᔪᒃᑯᑦ ᑲᖏᖅᖠᓂᕐᒥ ᓯᑕᒫᓂ, ᔪᓚᐃ 7-ᒥ.
“ᐅᔾᔨᕈᓱᓚᐅᕋᑉᑕ ᐅᑭᐅᑉ ᐱᒋᐊᕐᓂᖓᓂᒃ − ᐊᒻᒪᓗ ᑲᑎᒪᔩᑦ ᖃᐅᔨᓚᐅᖅᖢᑎᒃ − ᐊᒥᓱᑦ ᐃᓄᐃᑦ ᐊᑐᖃᑦᑕᓚᐅᙱᓐᓂᖏᓐᓄᑦ ᓯᑎᔪᓂᒃ ᓇᓴᕐᓂᒃ,” ᑕᐃᒪᓐᓇ ᐅᖃᖅᖢᓂ ᐳᑭᖅᑕᓕᒃᑯᑦ ᐊᖓᔪᖅᑳᖓ ᐱᓐᔭᒥᓐ ᑳᒻᓕ.
“ᑕᒪᓐᓇ ᓯᕗᓪᓕᖅᐸᐅᑎᑦᑕᕆᐊᖃᕋᓱᒋᓚᐅᕋᑉᑎᒍᑦ, ᖁᕝᕙᖅᑎᕆᔪᒪᓕᓚᐅᖅᑐᒍᑦ ᓯᑕᒪᓕᖕᓂᒃ ᐊᖁᖃᑦᑕᕐᓂᐊᕐᓗᓂ ᐊᑦᑕᓇᖅᑐᒦᑦᑕᐃᓕᒪᑎᑦᑎᓂᕐᒧᑦ ᐊᒻᒪᓗ ᓯᑎᔪᓂᒃ ᓇᓴᖅᓯᒪᑎᑦᑎᖃᑦᑕᕆᐊᖃᕐᓂᕐᒧᑦ ᐃᒪᓐᓈᖅᑐᐃᓗᐊᕌᓗᙱᓪᓗᑕ. ᑕᒪᕐᒥᒃ ᓄᓇᖅᑲᑎᒌᑦ ᐊᑭᓕᒐᒃᓴᖅᑖᖅᑎᑦᑐᒪᖏᖢᒋᑦ. ᐅᐸᒍᑎᑐᐃᓐᓇᖁᓚᐅᖅᑕᖅᐳᑦ ᓄᓇᓕᖕᒥ ᖃᓄᐃᓕᐅᖅᑎᑦᑎᓗᑕ ᐃᓕᑦᑎᔪᓐᓇᕐᓗᑎᒡᓗ ᖁᕝᕙᖅᑎᕆᓗᑎᒡᓗ ᐊᑦᑕᓇᖅᑐᒦᑎᑦᑎᔭᕆᐊᖃᙱᓐᓂᕐᒧᑦ.”
ᑕᐃᑉᑯᐊ ᐊᑭᓕᒐᒃᓴᖅᑖᖅᓯᒪᔪᑦ ᖃᐃᔪᓐᓇᓚᐅᖅᑐᑦ ᑐᓵᔭᖅᑐᕐᓗᑎᒃ ᐊᑉᖁᑎᒃᑯᑦ ᖃᓄᖅ ᐊᑦᑕᓇᖅᑐᒦᑎᑦᑎᑦᑕᐃᓕᒪᔪᓐᓇᕐᓂᕐᒧᑦ, ᐊᒻᒪᓗ ᓵᓚᒃᓴᒐᒃᓴᖅᑕᖃᖃᑦᑕᕐᓗᓂ, ᐊᑭᓕᒐᒃᓴᖏᑦ ᖁᔭᓈᖅᑕᐅᔪᓐᓇᕐᓗᑎᒃ. ᑳᒻᓕ ᐅᖃᖅᖢᓂ ᐃᒻᒪᖄᒎᖅ 15 ᐃᓄᐃᑦ ᐊᑭᓕᒐᒃᓴᖏᑦ ᖁᔭᓈᖅᑕᐅᓚᐅᖅᑐᑦ.
“ᖃᐃᓚᐅᖅᑐᑦ ᐃᒻᒪᖄ 50% ᐊᑭᓕᒐᒃᓴᖅᑖᖅᓯᒪᔪᑦ,” ᑕᐃᒪᓐᓇ ᐅᖃᖅᖢᓂ ᑳᒻᓕ.
ᐳᑭᖅᑕᓕᒃᑯᑦ ᖃᐃᔪᒪᔪᓂᒃ ᐱᕕᒃᓴᖃᖅᑎᑦᑎᖃᑦᑕᖅᓯᒪᔪᑦ, ᑭᓯᐊᓂ ᐳᑭᖅᑕᓕᒃᑯᑦ ᓯᕗᓪᓕᖅᐹᒥ “ᐋᖅᑭᐅᒪᔪᑯᓘᙱᑦᑐᒃᑯᑦ, ᐊᑭᓕᒐᒃᓴᓂᒃ ᖃᓄᖅᑑᕈᑎᖃᕈᓐᓇᓚᐅᖅᑐᑦ,” ᑕᐃᒪᓐᓇ ᐅᖃᐅᓯᕆᑉᓗᓂᐅᒃ.
“ᑕᒪᓐᓇ ᐊᔾᔨᐅᙱᑦᑑᓇᓱᒋᓐᖏᑕᕋ ᐃᓱᒪᒋᔭᐅᖃᑦᑕᖅᓯᒪᔪᓂᒃ,” ᑕᐃᒪᓐᓇ ᐅᖃᖅᖢᓂ ᑲᒻᓕ. “ᖃᐅᔨᒪᔪᖓ ᑕᐃᒪᐃᓕᐅᖅᑎᑦᑎᖃᑦᑕᖅᓯᒪᖕᒪᑕ ᐊᓯᖏᓐᓂᒃ ᓄᓇᓕᖕᓂᒃ. ᐃᓱᒪᔪᖓᓕ ᐃᓱᒪᒋᔭᐅᖃᑦᑕᖅᓯᒪᔪᓂᒃ ᖃᓄᖅ ᐃᑲᔪᕋᔭᕐᓂᕐᒧᑦ ᓄᓇᓕᖕᓂᒃ ᐊᑦᑕᓇᖅᑐᒦᖁᓇᒋᑦ ᐊᒻᒪᓗ ᐃᓅᖃᑎᖃᕈᓐᓇᖅᓯᓂᕐᒧᑦ. ᑕᒪᓐᓇ ᐃᓱᒪᒋᑐᐃᓐᓇᓚᐅᖅᑕᕋ ᐅᑉᓘᑉ ᐃᓚᖓᓂᒃ, ᑕᐃᒪᓐᓇᐅᖅᑰᖅᑐᖅ.”
ᑕᒪᓐᓇ ᐱᓕᕆᐊᖑᓚᐅᖅᑐᖅ ᐳᑭᖅᑕᓕᖕᓄᑦ, ᐳᑭᖅᑕᓕᙳᐊᕐᓄᑦ ᐊᒻᒪᓗ ᓄᓇᓕᖕᒥ ᐃᖅᑲᖅᑐᐃᔪᓕᕆᔨᒃᑯᓐᓄᑦ ᐊᒻᒪᓗ ᐱᕕᒃᓴᖃᖅᑎᑦᑎᑉᓗᑎᒃ ᐃᓄᖕᓂᒃ ᐃᑲᔫᓯᐊᖅᑖᕈᓐᓇᕐᓂᕐᒧᑦ ᖁᑭᐅᑎᖏᓐᓂᒃ ᓚᐃᓴᑖᕈᑕᐅᔪᓐᓇᖅᑐᒃᑯᑦ.
ᐸᕐᐸ ᑕᖅᑕᖅ, ᓄᓇᓕᖕᒥ ᐃᖅᑲᖅᑐᐃᔪᓕᕆᔨᒃᑯᑦ ᑲᑎᒪᔨᕋᓛᖏᓐᓂᙶᖅᓯᒪᔪᖅ, ᐊᖏᓚᐅᖅᑐᖅ ᑕᒪᓐᓇ ᑲᔪᓯᑦᑎᐊᕐᓂᖓᓄᑦ.
“ᖁᕝᕙᖅᑎᕆᖕᒪᑦ ᐊᖁᖦᖢᓂ ᐊᑦᑕᓇᖅᑐᒦᑦᑕᐃᓕᒪᔭᕆᐊᖃᕐᓂᕐᒧᑦ ᐊᒻᒪᓗ ᒪᓕᒐᓂᒃ ᒪᓕᖃᑦᑕᕆᐊᖃᕐᓂᕐᒧᑦ ᓯᑕᒪᓕᒃᑯᑦ ᑐᕌᖓᔪᓄᑦ ᐊᖁᓐᓂᐊᕐᓗᓂ ᓄᓇᓕᖕᒥ, ᐃᒃᐱᒍᓱᑦᑎᐊᕆᐊᖃᕐᓂᕐᒧᑦ ᒪᓕᒐᓂᒃ ᐊᒻᒪᓗ ᐊᑦᑕᓇᖅᑐᒦᑦᑕᐃᓕᒪᔭᕆᐊᖃᕐᓂᕐᒧᑦ ᓇᓂᓗᒃᑖᖅ,” ᑕᐃᒪᓐᓇ ᐅᖃᖅᖢᓂ.
ᐊᓕᐊᓇᐃᒍᓱᒃᑐᖅ ᑕᐃᒪᐃᓕᐅᖅᑎᑦᑎᖃᑦᑕᕐᓂᐊᓕᕐᒪᑕ.
“ᖁᔭᓕᑦᑎᐊᖅᑐᖓ ᐱᕕᒃᓴᖃᖅᑎᑕᐅᒐᒪ ᑕᐃᒪᓐᓇ,” ᑕᐃᒪᓐᓇ ᐅᖃᖅᖢᓂ ᑕᖅᑕᖅ. “ᑲᑎᓐᓇᖃᑦᑕᕐᒪᑦ ᐃᓅᖃᑎᒌᒃᖢᓂ ᑎᒥᐅᔪᑦ ᐊᔾᔨᒌᙱᑦᑑᑕᐅᔪᑦ ᑲᑎᒃᑳᖓᑕ. ᐊᕕᒃᑐᖅᓯᒪᑐᐃᓐᓇᙱᖦᖢᑕ, ᑲᑎᖃᑦᑕᖅᑐᒍᑦ ᓄᓇᓕᖕᒥ ᑎᒥᐅᔪᑦ ᖁᕝᕙᖅᑎᕆᔭᕌᖓᑕ ᓄᓇᓕᖕᒥ ᖃᓄᐃᙱᑦᑐᓐᓇᕐᓂᕐᒧᑦ ᖃᓄᐃᓕᐅᕈᑎᓂᒃ ᐊᑦᑕᓇᖅᑐᒦᑦᑐᓐᓇᕐᓂᕐᒧᓪᓗ. ᑕᐃᒪᓐᓇ ᑕᑯᔪᒪᖃᑦᑕᖅᑐᒍᑦ.”
