ᑯᕋᐃᒡ ᖃᖁᓛᖅ ᐱᓕᕆᓕᒪᓪᓗᓂ ᓯᑭᑑᖅᑎᐅᕗᖅ ᖃᔅᓯᒐᓚᖕᓂ ᐊᑯᓂᐅᔪᓂ ᐃᖏᕐᕋᓂᖃᖅᓯᒪᓪᓗᓂ ᐊᑕᐅᓯᕐᒥ ᕿᑎᕐᒥᐅᓂ ᓄᓇᓕᐅᔪᒥ ᐊᓯᐊᓄᑦ.
ᓇᒃᓴᖃᑦᑕᕋᓗᐊᖅᑎᓪᓗᒍ ᐊᔾᔨᒌᙱᕈᓘᔭᖅᑐᓂ ᐱᖁᑎᓂᑦ, ᖃᐅᔨᒪᕗᖅ ᑭᓱᑐᐃᓐᓇᐃᑦ ᐊᔪᓕᕈᓐᓇᖅᐳᑦ. ᐊᒻᒪ ᑕᐃᒪᐃᓚᐅᖅᐳᖅ ᒪᕐᕈᐃᖅᓱᖅᑐᒥ ᒫᓐᓇᓕᓴᐅᔪᒥ.
ᖃᖁᓛᖅ ᓯᕗᓪᓕᖅᐹᖓᓂ ᓯᑭᑑᒃᑯᑦ ᐊᐅᓪᓛᕐᓂᖃᓚᐅᖅᐳᖅ ᐅᕐᓗᖅᑑᒥ ᐊᒻᒪᓗ ᐃᖃᓗᒃᑑᑦᑎᐊᕐᒧᑦ, ᖁᕐᓗᖅᑑᒥ ᐊᐅᓪᓚᖅᖢᓂ ᐊᐃᑉᕆᓕ 29−ᒥ.
ᐃᖏᕐᕋᓚᐅᖅᑎᓪᓗᒍ ᐃᑲᕐᕋᐸᓗᖕᓄᑦ 36−ᓄᑦ, ᓯᑭᑑᖓ ᐆᓇᖅᓯᓗᐊᓕᓚᐅᖅᐳᖅ 40 ᑭᓛᒥᑐᐸᓗᖕᓂ ᐃᖃᓗᒃᑑᑦᑎᐊᑉ ᓯᓚᑖᓂ. ᖃᒧᑎᖓ ᐲᓚᐅᖅᐸᖓ ᐊᒻᒪᓗ ᓯᑭᑑᖓᓂ ᓂᒡᓚᖅᓯᐊᕆᓪᓗᓂᐅᒃ. ᓇᓗᓇᐃᖅᓯᓚᐅᖅᐳᖅ ᐃᓂᖓᓂ ᑕᒻᒪᕇᒃᑯᑎᖓᓂ ᐊᒻᒪᓗ ᐃᖏᕐᕋᓪᓗᓂ ᑭᖑᓪᓕᖅᐹᖓᓂ ᐃᖏᕐᕋᓂᐅᔪᒥ ᓄᓇᓕᖕᓄᑦ, ᖃᒧᑎᖃᕐᓇᓂ, ᑎᒥᖓ ᓴᖕᓂᖅᖢᓂ ᐊᒻᒪ ᑕᖃᖓᓪᓗᓂ ᐊᐅᓪᓛᕐᓂᖓᓂ.
“ᓯᓂᒍᒪᓚᐅᙱᓐᓇᒪ ᑕᕆᐅᕐᒥ,” ᐅᖃᓚᐅᖅᐳᖅ ᖃᖁᓛᖅ.
ᐅᑎᓚᐅᖅᐳᖅ ᐊᐃᒃᓯᕆᐊᖅᑐᖅᖢᓂ ᖃᒧᑎᖓᓐᓂ ᖃᔅᓯᐊᕐᔪᑦ ᐅᓪᓗᐃᑦ ᐊᓂᒍᕐᒪᑕ, ᒪᐃ 2−ᒥ, ᑭᓯᐊᓂ ᐊᑐᒐᔪᒃᑕᖓᓂ ᑕᒻᒪᕇᒃᑯᑎᖓ ᕚᑕᓖᕈᑎᓚᐅᖅᐳᖅ ᐅᑎᖅᐸᓪᓕᐊᑎᓪᓗᒍ ᐃᖃᓗᒃᑑᑦᑎᐊᕐᒧᑦ.
ᖃᖁᓛᖅ, 38, ᐃᒻᒥᓂᒃ ᖃᐅᔨᓇᓱᐊᑦᑎᐊᓚᐅᖅᐳᖅ ᑭᓯᐊᓂ ᑲᓇᖕᓇᓕᐊᖔᓯᓚᐅᖅᐳᖅ.
ᑕᑐᖦᖤᑐᐊᓚᐅᖅᐳᖅ ᐃᒡᓗᕋᓛᓂ ᐃᓅᓱᒃᑐᓂ ᐊᖑᑎᓂᑦ ᐊᖑᓇᓱᒋᐊᖅᓯᒪᓚᐅᖅᑐᓂ ᒥᑭᑦᑑᑎᓂᒃ ᐆᒪᔪᓂᑦ. ᐅᐸᒃᑲᒥᒋᑦ ᐊᐱᕆᓪᓗᓂᒋᑦ ᓇᒧᑦ ᑐᕌᕆᐊᖃᕐᓂᖓᓂ ᐊᖁᒃᑲᓗᐊᕐᒪᖔᑦ ᐃᖃᓗᒃᑑᑦᑎᐊᕐᒧᑦ. ᐅᖃᐅᔾᔨᓚᐅᖅᐳᑦ ᓇᒧᙵᐅᓪᓗᐊᕐᓂᖓᓂ.
“ᖁᕕᐊᓱᕐᔪᐊᖅᐳᖓ ᐹᓚᐅᕐᓂᔅᓯᓐᓂ,’” ᐅᖃᐅᑎᓚᐅᖅᐸᖏᑦ. “ᑕᐃᒫᒃ ᑕᐃᒃᑯᐊ ᓄᑲᑉᐱᐊᑦ ᑐᙵᓇᓚᖅᐅᐳᖅ ᐅᕙᓐᓂ ᐃᑲᔪᕐᓂᖏᓐᓂ ᓄᓇᓕᖕᓄᑦ ᐅᑎᕐᓂᕐᒧᑦ.”
ᐹᓚᐅᙱᒃᑯᓂᒋᑦ, ᓇᓚᐅᑦᑖᕆᓚᐅᖅᐳᖅ ᐅᖅᓱᐃᕋᔭᓚᐅᕐᓂᖓᓂ ᑲᓇᖕᓇᓕᐊᖔᖅᑎᓪᓗᒍ. ᑭᓯᐊᓂ ᐃᒃᐱᒍᓱᖕᓂᖃᓚᐅᙱᓚᖅ ᐅᐃᒻᒪᖕᓂᐅᔪᒥ.
“ᖃᓄᐃᓚᐅᙱᓚᖓ. ᐊᖏᕐᕋᐅᔭᕆᐊᖃᓚᐅᖅᐳᖓ ᕿᑐᕐᙵᓐᓄᑦ. ᑕᖅᑭᐸᓗᖕᒥ ᐊᐅᓪᓚᖅᓯᒪᓚᐅᕋᒪ ᑕᐃᒫᒃ ᐃᖅᑲᐅᒪᓂᕋ ᐃᖏᕐᕋᔾᔪᑎᒌᓐᓇᓚᐅᖅᐸᕋ,” ᐅᖃᓚᐅᖅᐳᖅ ᒪᕐᕉᖕᓂ ᕿᑐᕐᙵᒥᓂᑦ.
ᐅᓇ ᖃᓄᐃᓐᓂᐅᔪᖅ ᓄᖅᑲᖅᑎᑦᑎᓯᒪᙱᑦᑎᐊᖅᐳᖅ ᐊᓯᖏᓐᓂ ᐊᐅᓪᓛᕐᓂᐅᓂᐊᖅᑐᓄᑦ. ᐸᕐᓇᐅᑎᖃᖅᐳᖅ ᓯᑭᑑᕐᓂᕐᒧᑦ ᐅᖅᓱᖅᑑᒧᑦ, ᓄᑖᖑᓗᓂ ᐊᖏᕐᕋᕆᓂᐊᓕᖅᑕᒥᓂᑦ.
ᓯᕗᓂᐊᓂ ᓯᑭᑑᒃᑯᑦ ᐃᖏᕐᕋᓂᖃᖅᓯᒪᕗᖅ ᐅᖅᓱᖅᑑᒥ ᑰᒑᕐᔪᖕᒧᑦ ᐊᒻᒪᓗ ᑰᒑᕐᔪᖕᒥ ᓇᐅᔮᑦ ᐃᓂᖓᓄᑦ – ᐊᑐᓂ ᐃᖏᕐᕋᓂᐅᔪᓂ ᐃᑲᕐᕋᐸᓗᖕᓂ 13−ᖑᓚᐅᖅᑐᓂ.
ᐊᐅᓪᓛᕐᓂᐊᓕᕌᖓᒥ, ᐱᓯᒪᐃᓐᓇᐅᔭᖅᐳᖅ ᒫᓃᑉᐳᖔᕈᑎᒥᒃ ᐱᓕᕆᔾᔪᑕᐅᔪᒥ, ᐱᔪᓐᓇᖅᑎᑦᑎᔪᒥ ᑐᐊᕕᕐᓇᖅᑐᒥ ᐅᖃᐅᔾᔨᓂᐅᔪᒥ ᐸᖅᓴᐃᔨᐅᔪᓄᑦ. ᐅᖃᖃᑎᖃᓲᖑᒋᕗᖅ ᐊᖑᓇᓱᒃᑐᓕᕆᔨᒃᑯᓐᓂ ᒥᑭᒋᐊᖅᑎᐊᖅᑎᒃᑯᓐᓂᓪᓗ ᑲᑐᔾᔨᖃᑎᒌᖑᔪᓂ ᖃᐅᔨᓇᓱᐊᕐᓂᕐᒧᑦ ᓇᓕᐊᑦ ᐃᓂᐅᔪᑦ ᐅᐸᓪᓗᐊᙱᑕᖏᓐᓄᑦ ᐊᐅᓪᓛᖅᑎᓪᓗᒍ. ᐊᒻᒪᓗᑦᑕᐅᖅ, ᐃᒡᓕᓂᓂ ᓄᓇᙳᐊᖃᖅᐳᖅ ᓯᕗᕚᖏᓐᓂ, ᑕᑯᒃᓴᐅᑎᑦᑎᔪᓂ ᐊᐅᓪᓛᕐᕕᐅᒐᔪᒃᑐᓂ ᐊᖅᑯᑕᐅᔪᓂ.
ᖃᖁᓛᕐᒧᑦ, ᐃᑲᕐᕋᒐᓵᓗᖕᓂ ᐃᖏᕐᕋᔭᒃᖢᓂ ᕿᑎᕐᒥᐅᓂ ᓄᓇᖓᓂ ᖁᕕᐊᓇᐅᒐᔪᒃᐳᖅ.
“ᓄᓇᐅᑉ ᓴᓇᐅᒐᖓᓂ ᑕᑯᒥᓇᖅᑐᓂ, ᐃᓄᖃᙱᑦᑎᐊᖅᑐᒥ,” ᐅᖃᓚᐅᖅᐳᖅ.