ᓄᓇᕗᒻᒥ ᒐᕙᒪᒃᑯᑦ ᐱᓕᕆᕙᓪᓕᐊᕗᑦ ᖃᔅᓯᒐᓚᖕᓂ ᐱᒋᐊᕈᑎᒃᓴᐅᔪᓂ ᐃᑲᔪᕐᓂᕐᒧᑦ ᓄᓇᕗᒻᒥᐅᓂ ᑭᖑᓪᓕᖅᐹᖑᔪᒥ ᓴᖅᑭᓐᓂᐅᔪᒥ ᓄᕙᒡᔪᐊᕐᓇᖅ-19−ᒥ, ᓯᕗᓕᖅᑎ P.J. ᐊᕿᐊᕈᖅ ᐅᖃᓚᐅᖅᐳᖅ ᔭᓄᐊᕆ 13−ᒥ ᓄᕙᒡᔪᐊᕐᓇᖅ-19−ᒥ ᓄᑖᙳᕆᐊᖅᑎᑕᐅᓂᐅᔪᒥ, ᐅᓄᕐᓂᖅᓴᐅᔪᒥ $8 ᒥᓕᐊᓐᓂ ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑕᐅᓂᐅᔪᓂ ᑐᓂᔭᐅᔪᓂ.
ᐅᑯᐊ ᐱᒋᐊᕈᑕᐅᔪᑦ ᐃᓚᖃᖅᐳᑦ $4.5 ᒥᓕᐊᓐᓂ ᖁᕝᕙᕆᐊᖅᑎᑦᑎᓂᕐᒧᑦ ᓄᕙᒡᔪᐊᕐᓇᖅ-19−ᒧᑦ ᐅᐸᒃᑕᐅᑦᑕᐃᓕᒪᓂᐅᔪᒥ ᓂᕿᓄᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᓂ, $4 ᒥᓕᐊᓐᓂ ᑐᕌᕐᓂᐊᖅᑐᒥ ᐱᓪᓚᕆᐅᔪᓄᑦ ᓄᓇᓕᖕᓂ ᐱᔨᑦᑎᕋᕐᓂᐅᔪᓄᑦ ᓲᕐᓗ ᐃᒪᕐᒧᑦ, ᑯᕕᖅᑕᕐᓂᕐᒧᑦ ᐊᒻᒪ ᐊᓯᖏᓐᓂ ᐱᓪᓚᕆᐅᔪᓂ ᐊᐅᓚᓂᐅᔪᓂ ᐊᒻᒪ ᐅᑎᕐᓂᖓᓂ $5,000−ᒥ ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᒥ ᓇᖕᒥᓂᖃᖅᑐᓄᑦ ᐃᑲᔪᕈᑕᐅᔪᓂ ᑮᓇᐅᔭᖃᖅᑎᑕᐅᓂᐅᔪᓂ.
$4 ᒥᓕᐊᓐ ᑐᕌᖓᓂᐊᖅᑐᒥ ᐱᓪᓚᕆᐅᔪᓄᑦ ᐱᔨᑦᑎᕋᕐᓂᐅᔪᓄᑦ ᐃᑲᔪᕐᓂᐊᖅᐳᑦ ᕼᐋᒻᓚᐅᔪᓂ ᐊᒻᒪ ᓄᓇᓕᖕᓂ ᑮᓇᐅᔭᓂᑦ ᓇᓗᓇᐃᖅᓯᓂᕐᒧᑦ ᓄᕙᒡᔪᐊᕐᓇᖅ-19−ᒧᑦ ᑭᐅᓂᖓᓄᑦ ᐊᒃᓱᕈᕐᓂᐅᔪᓂ ᐊᑲᐅᙱᓕᐅᕈᑎᓕᐅᙱᓐᓂᖓᓂ ᓄᓇᓕᐅᑉ ᑮᓇᐅᔭᖁᑎᖏᓐᓂ ᖃᓄᐃᓕᖓᓂᐅᔪᓂ.
“ᐃᒪᖅ, ᑯᕕᖅᑕᖅᑕᐅᓂᖅ, ᑕᒪᓐᓇ ᖃᐅᑕᒫᖅᓯᐅᑕᐅᕗᖅ ᐃᒡᓗᓕᒫᑦ ᐃᑲᔪᖅᓯᖅᑕᐅᔭᕆᐊᖃᕐᓂᖏᓐᓂ, ᐱᓕᕆᖃᑎᖃᖅᐳᒍᑦ ᐊᑐᓂ ᕼᐋᒻᓚᐅᔪᓂ ᐊᒻᒪ ᓄᓇᓕᖕᓂ ᓇᓗᓇᐃᖅᓯᓂᕐᒧᑦ ᐱᔨᑦᑎᕋᕐᓃᑦ ᐃᖏᕐᕋᐃᓐᓇᓕᒫᕐᓂᖏᓐᓂ ᐱᔪᓐᓇᕐᓂᓕᒫᖏᓐᓂ,” ᐅᖃᓚᐅᖅᐳᖅ ᑕᐃᕕᑦ ᔪᐊᓇᓯ, ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓄᑦ.
ᐊᓂᑦᑕᐃᓕᔭᕆᐊᖃᕐᓂᖅ ᐃᓱᓕᑉᐸᓪᓕᐊᓕᖅᐳᖅ
ᓄᓇᕘᑉ ᐃᖏᕐᕋᓂᐅᔪᒥ ᓄᖅᑲᖅᑎᑦᑎᓯᒪᓂᖓᓐᓂ ᐊᓂᑦᑕᐃᓕᔭᕆᐊᖃᕐᓂᐅᔪᖅ ᐃᓱᓕᓐᓂᐊᖅᐳᖅ ᔭᓄᐊᕆ 17−ᒥ ᒥᑭᑦᑐᒥ ᖃᓱᒋᐊᕐᓂᖃᕐᓗᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᓕᖃᖅᑎᑕᐅᓂᐅᔪᒥ, ᐃᓚᖃᖅᑐᒥ ᒪᑐᐃᒃᑲᓐᓂᕐᓂᐅᔪᒥ ᐸᐃᕆᕝᕕᓂ ᐃᒡᓗᕐᔪᐊᓂ ᐊᒻᒪ ᑭᕕᒃᓯᓂᐅᔪᒥ ᓄᓇᓕᖕᓂ ᐊᐅᓪᓛᕐᓂᐅᔪᒥ ᑭᒡᓕᖃᖅᑎᑕᐅᓂᐅᔪᓂ, ᑭᓯᐊᓂ ᐱᓪᓚᕆᐅᙱᑦᑐᓄᑦ ᐊᐅᓪᓛᕐᓂᖅ ᓱᓕ ᐊᑐᖁᔭᐅᓇᔭᙱᓚᖅ.
“ᓇᓚᐅᑦᑖᕆᔭᕗᑦ ᐅᑯᐊ ᓄᓇᓕᐅᔪᑦ ᐱᖃᙲᓐᓇᖅᑐᓂ ᐱᓕᕆᓂᐅᔪᓂ ᖃᓱᒋᐊᖅᑎᑕᐅᓂᐊᖅᐳᑦ ᕿᓚᒻᒥᐅᓂᖅᓴᐅᔪᒥ. ᓄᓇᓕᐅᔪᑦ ᐊᐃᑦᑐᐃᓂᖃᐃᓐᓇᖅᑐᑦ ᐊᒻᒪ ᓄᑖᓂ ᐱᖃᖅᑐᓂ ᓱᕐᕋᔾᔮᙱᓚᑦ ᐅᕙᓂ ᒫᓐᓇᐅᔪᒥ ᑭᒡᓕᐅᔪᒥ ᐊᑯᓂᐅᒃᑲᓐᓂᖅᑐᒥ.
“ᖃᓱᒐᓛᑐᐃᓐᓇᖅᑕᕗᑦ ᐊᒻᒪ ᓱᓕ ᓱᑲᖓᕐᔪᐊᖅᐳᑦ ᑕᐅᑐᒃᖢᒍ ᑕᒪᕐᒥᒐᓚᖕᒥ ᑲᓇᑕᒥ,” ᐅᖃᓚᐅᖅᐳᖅ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᐹᑐᓴᓐ.
ᓄᓇᕗᑦ 172−ᓂ ᓇᓗᓇᐃᖅᑕᐅᓯᒪᔪᓂ ᐱᖃᖅᐳᑦ ᔭᓄᐊᕆ 13−ᒥ, ᑲᑎᓪᓗᒍ 202−ᓂ ᖃᓄᐃᑦᑐᓐᓃᖅᑐᖃᖅᑎᓪᓗᒍ ᒫᓐᓇᐅᔪᒥ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19−ᒥ. 7−ᓂ ᐃᓄᖕᓂ ᐊᓐᓂᐊᕕᖕᒧᑦ ᐅᓂᒃᑎᑕᐅᔪᖃᓚᐅᖅᐳᖅ.
ᓄᓇᕗᒻᒥ ᐃᓕᓴᐃᔨᐅᔪᑦ ᓂᕆᐅᒋᔭᐅᕗᑦ ᐅᑎᓛᕐᓂᖏᓐᓂ ᔭᓄᐊᕆ 17−ᒥ ᖃᕋᓴᐅᔭᑎᒍᑦ ᐃᓕᓐᓂᐊᖅᑎᑦᑎᓂᐅᔪᒥ, ᐅᑎᕐᓗᑎᒃ ᐃᓕᓐᓂᐊᕐᕕᐊᕈᓯᕐᓄᑦ ᐃᓕᓐᓂᐊᕐᓂᐅᔪᒥ ᐋᖅᑭᒃᓯᒪᓪᓗᓂ ᔭᓄᐊᕆ 24−ᒥ. ᑕᒪᓐᓇ 100 ᐳᓴᓐᑎᒥ ᐅᕝᕙᓘᓐᓃᑦ 50 ᐳᓴᓐᑎᖓᓄᑦ ᐃᓐᓄᒍᓐᓇᕐᓂᖓᓂ, ᒪᓕᖕᓂᐊᖅᐳᖅ ᓄᕙᒡᔪᐊᕐᓇᖃᕐᓂᖓᓂ ᖃᓄᐃᓕᖓᓂᐅᔪᒥ ᐊᑐᓂ ᓄᓇᓕᐅᔪᒥ.
41−ᓂ ᐃᓕᓐᓂᐊᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᓄᓇᕗᒻᒥ ᓱᓕ ᓯᕗᓂᐊᒍᑦ ᐊᖏᖅᑕᐅᓯᒪᔪᓂ ᓄᖅᑲᓂᖃᖅᐳᑦ. 29−ᓂ ᐃᖅᑲᓇᐃᔭᖅᑎᓂ ᐅᐸᒃᑕᐅᑦᑕᐃᓕᒪᔭᕆᐊᖃᖅᐳᑦ, ᐃᓚᖏᑦ ᐅᐸᒃᑕᐅᑦᑕᐃᓕᒪᔭᕆᐊᖃᖅᖢᑎᒃ ᐋᓐᓂᐊᕈᑕᐅᖃᑦᑕᖅᑐᓂ ᐱᑕᖃᕐᓂᖓᓂ, ᐊᓯᖏᑦ ᐅᐸᒃᑕᐅᑦᑕᐃᓕᔭᕆᐊᖃᖅᖢᑎᒃ ᐱᔾᔪᑎᖃᖅᑐᒥ ᐋᓐᓂᐊᓕᕇᒃᑯᓯᖅᓯᒪᓂᖏᓐᓄᑦ ᖃᓄᐃᓕᖓᓂᐅᔪᒥ, ᐅᖃᐅᓯᐅᓪᓗᓂ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ.
ᐊᐃᑦᑐᐃᓂᖅ, ᐋᓐᓂᐊᓕᕇᒃᑯᓯᖅᓯᒪᓂᖓ ᐊᒻᒪ ᖃᐅᔨᓴᖅᑕᐅᓂᖓ
ᓄᓇᕗᒻᒥ ᐅᔭᕋᖕᓂᐊᕐᕕᖏᑦ ᑕᑯᐃᓐᓇᖅᓯᒪᑎᓪᓗᒋᑦ ᓄᑖᓂ ᓴᖅᑭᑎᑕᐅᓂᐅᔪᓂ ᐃᖅᑲᓇᐃᔭᖅᑎᓂ ᑎᑭᑉᐸᓪᓕᐊᔪᓂ ᖃᓪᓗᓈᑦ ᓄᓇᖓᓐᓂ, ᐹᑐᓴᓐ ᐅᖃᓚᐅᖅᐳᖅ ᒫᓐᓇᐅᔪᒥ ᐃᓱᒫᓗᓗᐊᕌᓗᓂᖃᙱᓚᖅ ᐊᐃᑦᑐᖅᑕᐅᕙᓪᓕᐊᙱᒻᒪᑦ ᐃᓄᖕᒥ ᐃᓄᖕᒧᑦ.
ᐃᓄᑐᖃᕐᓂ ᐋᑐᕚᒥ ᐃᐊᒻᐸᓯ ᐱᓇᖕᓇᕐᒥ, ᐊᑕᐅᓯᖅ ᖃᓄᐃᑦᑐᓐᓃᖅᓯᒪᕗᖅ ᓄᕙᒡᔪᐊᕐᓇᖅ-19−ᒥ. ᒫᓐᓇᐅᔪᒥ 7−ᓂ ᓄᓇᕗᒻᒥᐅᑕᓂ ᐃᒡᓗᕐᔪᐊᕐᒦᑦᑐᓂ ᓄᕙᒡᔪᐊᕐᓇᖅ-19−ᖃᖅᑐᓂ. ᐱᖓᓱᓂ ᑐᓵᔨᓂᑦ ᒫᓐᓇᐅᔪᒥ ᐃᑲᔪᖅᓱᐃᕗᑦ ᐃᓄᑐᖃᕐᓂ ᐃᐊᒻᐸᓯ ᐱᓇᖕᓇᕐᒥ.
ᖃᔅᓯᒐᓚᖕᓂ ᓄᓇᕗᒻᒥ ᐋᓐᓂᐊᕕᖏᓐᓂ ᓱᓕ ᑭᒡᓕᖃᖅᑎᑕᐅᓯᒪᕗᑦ ᑐᐊᕕᕐᓇᖅᑐᓄᑦ ᐱᔨᑦᑎᕋᕐᓂᐅᔪᓄᑦ ᐱᔾᔪᑎᖃᖅᑐᒥ ᐃᖅᑲᓇᐃᔭᖅᑎᑭᓗᐊᕐᓂᖏᓐᓄᑦ, ᖃᓄᐃᓐᓂᐅᔪᒥ ᓄᖅᑲᖅᑎᑦᑎᓯᒪᔪᒥ ᓄᓇᕗᒻᒥ ᐋᓐᓂᐊᓕᕇᒃᑯᓯᖅᓯᓂᐅᔪᒥ ᐅᐸᒃᑕᐅᕕᒃᓴᓂᑦ.
“ᐊᐃᑦᑖᖑᒐᓗᐊᖅ ᐱᔾᔪᑎᖃᖅᑐᒥ ᐃᖅᑲᓇᐃᔭᖅᑎᓄᑦ ᐊᑲᐅᙱᓕᐅᕈᑕᐅᔪᓄᑦ ᓄᖅᑲᖓᑎᑦᑎᔭᕆᐊᖃᑲᓚᐅᖅᐳᒍᑦ ᐋᓐᓂᐊᓕᕇᒃᑯᓯᖅᓯᓂᐅᔪᒥ ᐊᔾᔨᒌᙱᑦᑐᓂ ᓄᓇᓕᐅᔪᓂ,” ᐅᖃᓚᐅᖅᐳᖅ ᒪᐃᓐ, “ᐸᕐᓇᒃᐳᒍᑦ ᑕᖅᑭᐅᑉ ᓄᙳᐊᓂᐸᓗᒃ ᐱᓕᕆᓂᕐᒥ ᐊᒥᓱᓂ ᐋᓐᓂᐊᓕᕇᒃᑯᓯᖅᓯᓂᐅᔪᒥ ᐅᐸᒃᑕᐅᕕᒃᓴᓂ ᓄᓇᕗᓕᒫᒥ.”
ᒪᐃᓐᓇᓗᓇᐃᖅᓯᓚᐅᙱᓚᖅ ᓇᓕᐊᑦ ᓄᓇᓕᐅᔪᑦ ᐃᖅᑲᓇᐃᔭᖅᑎᑭᓗᐊᕐᓂᖏᓐᓂ ᐊᒻᒪ ᐅᖃᖅᐳᖅ ᓄᓇᕗᒻᒥ ᒐᕙᒪᒃᑯᑦ ᓱᓕ ᐅᑕᖅᑭᕗᑦ ᒐᕙᒪᑐᖃᒃᑯᓐᓂ ᐃᑲᔪᕐᓂᖏᓐᓂ ᐃᖅᑲᓇᐃᔭᖅᑎᖃᖅᑎᑦᑎᓂᕐᒥ.
ᓱᒃᑲᔪᒥ ᖃᐅᔨᓴᕈᑎᓂ ᑐᒃᓯᕋᖅᑕᐅᔪᓂ ᒐᕙᒪᑐᖃᒃᑯᓐᓂ ᑎᑭᓚᐅᕆᕗᑦ ᐊᒻᒪᓗ ᑐᓐᓂᖅᓴᖅᑕᐅᓪᓗᑎᒃ ᒥᑦᑕᕐᕕᖕᓄᑦ ᐊᐅᓪᓚᕆᐊᖅᑐᖅᑐᓄᑦ ᓄᓇᓕᐅᔪᓄᑦ ᓲᕐᓗ ᐃᐊᑦᒪᓐᑕᓐ, ᑲᖏᖅᖠᓂᖅ, ᐋᑐᕚ, ᐃᖃᓗᐃᑦ, ᐅᐃᓂᐱᐊᒡ, ᓴᓂᑭᓗᐊᖅ ᐊᒻᒪ ᔭᓗᓇᐃᕝᙵ. ᑐᒃᓯᕋᖅᑕᐅᓚᐅᖅᑐᑦ ᑐᓂᔭᐅᓂᐅᔪᓂ N95 ᒪᑐᐊᕐᓂ ᓱᓕ ᑎᑭᓚᐅᙱᓚᑦ.
ᐱᖃᙱᓐᓂᕋᐃᔪᒥ ᓱᒃᑲᔪᒥ ᖃᐅᔨᓴᖅᑕᐅᓂᕐᒧᑦ ᖃᓄᐃᓕᖓᓂᐅᔪᒥ ᐃᓇᖏᖅᓯᓂᐅᙱᓚᖅ ᐅᓪᓗᓄᑦ−14−ᓄᑦ ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᐅᔪᒥ.
ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᐅᔪᒥ ᐱᔭᕆᐊᖃᖅᑐᓂ ᐋᓐᓂᐊᓕᕇᒃᑯᓯᖅᓯᒪᙱᑦᑐᓂ ᐃᓄᖕᓄᑦ ᐅᑎᖅᐸᓪᓕᐊᔪᓂ ᐊᐅᓪᓛᕐᓂᕐᒧᑦ ᖃᓪᓗᓈᑦ ᓄᓇᖓᓐᓂ ᐊᓯᔾᔨᖅᓯᒪᙱᓚᖅ ᐊᒻᒪ “ᐅᐸᒃᑕᐅᑦᑕᐃᓕᒪᓂᕐᒧᑦ ᑐᔪᕐᒥᕖᑦ ᓱᓕ ᒪᑐᐃᖓᕗᑦ,” ᐅᖃᓚᐅᖅᐳᖅ ᐹᑐᓴᓐ.
ᖃᐅᔨᓴᕐᕕᖕᒥ ᖃᐅᔨᓴᖅᑕᐅᓂᐅᔪᑦ ᓂᕆᐅᒋᔭᐅᕗᖅ ᐊᙳᑎᓂᐊᕐᓂᖓᓂ ᑎᑭᑉᐸᓪᓕᐊᔪᓂ ᐅᓪᓗᓂᑦ ᐊᒻᒪ ᓄᑖᖑᔪᓂ ᖃᓄᐃᓕᖓᓂᐅᔪᓂ ᕿᓚᒻᒥᐅᔪᒥ ᓂᕆᐅᒋᔭᐅᕗᑦ ᐃᓗᐊᓂ ᐃᑲᕐᕋᓂ 24−ᓂ ᑲᖏᖅᖠᓂᕐᒥ ᐅᕝᕙᓘᓐᓃᑦ ᐃᖃᓗᖕᓂ ᖃᐅᔨᓴᕐᕕᐅᔪᓂ.
“ᑐᑭᖃᙱᓚᖅ ᐅᑎᕐᓂᐊᕐᓂᑦᑎᓐᓂ ᑭᒡᓕᐅᔪᒧᑦ ᐊᒥᓱᓂᑦ ᖃᐅᔨᓴᖅᑕᐅᓂᐅᔪᓄᑦ ᐊᑐᖅᐸᓚᐅᖅᑕᑦᑎᓐᓂ, ᓱᓕ ᑭᒡᓕᖃᖅᑎᑦᑎᓂᐊᖅᐳᒍᑦ PCR−ᒥ ᑐᙵᕕᖃᖅᑐᒥ ᓯᕗᓪᓕᐅᔾᔭᐅᔭᕆᐊᓕᖕᓂ ᑲᑎᙵᓂᐅᔪᓂ ᐊᒻᒪ ᓄᑖᖑᔪᓄᑦ ᓄᓇᓕᐅᔪᓄᑦ,” ᐅᖃᓚᐅᖅᐳᖅ ᐹᑐᓴᓐ. “ᑭᒡᓕᖃᖅᑎᑦᑎᑎᓪᓗᑕ ᐅᓄᕐᓂᐅᔪᓂ ᖃᐅᔨᓴᖅᑕᐅᓂᐅᔪᓂ ᐱᓕᕆᕙᒃᑕᑦᑎᓐᓂ, ᓱᓕ ᖃᐅᔨᓴᕆᐊᖃᖅᐳᒍᑦ ᐃᓚᖏᓐᓂ ᐃᓄᖕᓂ. ᑭᓯᐊᓂ ᐃᓚᖏᓐᓂ ᖃᓄᐃᓐᓂᐅᔪᓂ ᒪᓕᖕᓂᐊᖅᐳᒍᑦ ᐋᓐᓂᐊᕈᑕᐅᖃᑦᑕᖅᑐᓄᑦ ᓱᖅᑯᐃᖅᓯᓂᕐᒥ ᓄᕙᒡᔪᐊᕐᓇᖅ-19−ᒥ.”