ᐊᕙᑎᓕᕆᔨᒃᑯᑦ ᐊᖏᙱᑦᑐᑦ ᐊᒡᓃᑯᒃᑯᑦ ᑲᖏᖅᖠᓂᐅᑉ ᖃᓂᑖᓃᑦᑐᖅ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᖅ ᐅᐃᒍᒋᐊᒃᑲᓐᓂᕈᒪᔭᖓᓐᓂᑦ, ᑭᓯᐊᓂ ᑲᒻᐸᓂᒃᑯᑦ ᐆᒃᑐᐃᓐᓇᕐᓂᐊᖅᑐᑦ.
“ᐊᓕᐊᓇᒋᓚᐅᖏᑕᕘᒐᓗᐊᖅ ᒫᓐᓇᐅᔪᖅ ᐱᓕᕆᐊᖅ ᑲᔪᓯᓂᖅ ᐊᔪᖅᑎᑦᑎᔪᒪᓂᖓᓐᓂᑦ, ᒪᓕᒃᖢᒋᑦ ᐊᐅᓛᖅᑎᑦᑎᓂᕆᖃᑦᑕᖅᓯᒪᔭᕗᑦ ᑭᕙᓪᓕᕐᒥᑦ 15 ᐅᑭᐅᓄᑦ, ᐊᔾᔨᐅᖏᑦᑑᖏᑦᑐᖅ ᐱᔪᖕᓇᖅᑎᑦᑎᔾᔪᑎᓕᕆᑎᓪᓗᒋᑦ ᐳᒥᑦᓂᒃ ᐊᕙᑎᓕᕆᔨᒃᑯᓐᓄᑦ ᐊᖏᖅᑕᐅᖏᓪᓗᓂ ᐊᒻᒪᓗ ᐱᔪᖕᓇᖅᑎᑦᑎᔾᔪᑎᑖᖅᑎᑕᐅᖏᓐᓇᕐᓗᓂ ᐳᒥᑦᒥᒃ,” ᐅᖃᖅᓯᒪᔪᖅ ᐊᒡᓃᑯᒃᑯᓐᓂᑦ ᑎᑎᕋᖅᑕᐅᔪᖅ ᑭᕙᓪᓕᕐᒥᑦ ᑐᓴᒐᒃᓴᓕᕆᔨᒃᑯᓐᓄᑦ.
ᑲᑕᒑᕆᕝᕕᒃ 17-ᒥᑦ ᐃᓱᒪᓕᐊᖓᓐᓂᑦ, ᐊᕙᑎᓕᕆᔨᒃᑯᑦ ᑕᓯᕐᔪᐊᕐᒥᑦ ᐅᐃᒍᒋᐊᖅᑕᐅᔪᒪᔪᒧᑦ ᒫᓐᓇᐅᔪᖅ ᐊᔪᖅᑎᑕᐅᖁᓚᐅᖅᑕᖓᑦ, ᐅᖃᖅᖢᑎᒃ “ᓇᓗᓇᕐᓂᖃᕐᓂᖓ ᑐᒃᓯᕋᐅᓯᐅᖅᑕᐅᔪᒥᑦ ᐱᑦᑕᐅᖏᑦᑐᓂᒃ ᐱᑕᖃᖅᑎᑦᑎᓇᔭᕐᓂᖓᓄᑦ, ᑐᒃᑐᓄᑦ ᐊᑯᓂᐅᔪᒧᑦ ᖃᓄᐃᖓᓕᖅᑎᑦᑎᓂᖃᕈᖕᓇᕐᓗᓂ, ᐊᒻᒪᓗ ᓇᓗᓇᕐᓂᖃᕐᓂᖓ ᑲᑎᑉᐸᓪᓕᐊᔪᓂᒃ ᖃᓄᐃᖓᓕᖅᑎᑦᑎᓂᐅᔪᓂᑦ.”
ᐊᒡᓃᑯᒃᑯᑦ ᐅᐃᒍᒋᐊᕈᒪᓚᐅᖅᑕᖓᑦ ᐅᔭᕋᒃᑕᕆᐊᕐᒥᑦ ᐊᐅᓛᖅᑎᑦᑎᓂᖅ 11 ᐅᑭᐅᓂᒃ ᐃᓚᔭᐅᓗᓂ ᐊᔾᔨᒌᙱᑦᑐᒃᑯᑦ ᐊᖏᒡᓕᒋᐊᖅᓯᓗᑎᒃ ᐊᐅᓛᖅᑎᑦᑎᓂᖓᓐᓄᑦ. ᐊᕙᑎᓕᕆᔨᒃᑯᑦ ᑭᑐᓗᒃᑖᓂᒃ ᑲᑎᒪᑎᑦᑎᑎᓪᓗᒋᑦ ᑲᖏᖅᖠᓂᕐᒥᑦ ᐅᑭᐅᒃᓵᒥᐅᓚᐅᖅᑐᖅ, ᓈᒻᒪᒋᔭᐅᓚᐅᖏᑦᑐᑦ ᐊᓄᕆᒥᑦ ᑲᐃᕕᑎᑕᐅᔪᓂᑦ ᐆᒻᒪᖅᖁᑎᓕᐅᕆᕝᕕᒃ, ᑲᒻᐸᓂᒃᑯᑦ ᐃᓕᔪᒪᔭᖏᑦ 11-ᖑᔪᑦ ᐊᓄᕆᒧᑦ ᑲᐃᕕᑎᑕᐅᔪᑦ ᓴᓗᒪᔪᒥᒃ ᐆᒻᒪᖅᖁᑎᓕᐅᕆᓂᐊᖅᑐᓂᒃ ᐅᔭᕋᒃᑕᕆᐊᕐᒧᑦ.
“ᖃᐅᔨᓴᐃᓂᖃᖅᑎᓪᓗᒋᑦ, ᑲᑎᒪᔩᑦ ᑐᓵᖃᑦᑕᓚᐅᖅᑐᑦ ᐃᓱᒫᓘᑎᒋᔭᐅᔪᓂᒃ ᐃᓚᐅᓕᖃᑕᐅᔪᓄᑦ ᐊᒻᒪᓗ ᐊᒃᑐᖅᑕᐅᓯᒪᔪᖕᓇᖅᑐᓄᑦ ᑭᕙᓪᓕᕐᒥᑦ, ᐅᐊᖕᓇᖅᐸᓯᖓᓂᑦ ᒫᓂᑑᐸᒥᑦ ᐊᒻᒪᓗ ᐅᐊᖕᓇᖅᐸᓯᖓᓂᑦ ᓴᔅᑳᑦᓱᐊᓐᒥᑦ ᓄᓇᓕᖕᓂᑦ ᓇᓗᓇᕐᓂᖅᑕᖃᖅᑎᓪᓗᒍ ᖃᓄᐃᑦᑑᓂᖓᓄᑦ ᐊᒻᒪᓗ ᐊᖏᑎᒋᓂᐊᕐᓂᖏᑦ ᐱᑦᑕᐅᖏᑦᑐᑦ ᐊᒃᑐᖅᓯᓃᑦ ᑐᒃᑐᐃᑦ ᖃᓄᐃᖏᑦᑎᐊᕐᓂᖏᓐᓄᑦ, ᐊᒥᓲᑎᒋᓂᖏᓐᓄᑦ ᐊᒻᒪᓗ ᐱᖅᖁᓯᕆᔭᖏᓐᓄᑦ ᐊᖏᒡᓕᒋᐊᖅᑕᐅᓂᖓᓄᑦ ᐅᔭᕋᒃᑕᕐᓂᖅ ᐱᔪᓂᒃ, 11-ᓂᒃ ᐃᓚᓯᓗᑎᒃ ᐅᔭᕋᒃᑕᕆᐊᖅ ᐊᐅᓛᖅᑎᑕᐅᓂᖓᓄᑦ ᐊᒻᒪᓗ ᓴᓇᔭᐅᓂᖏᑦ ᐊᒻᒪᓗ ᐊᐅᓛᖅᑎᑕᐅᓂᖏᑦ ᐊᓄᕆᒥᑦ ᑲᐃᕕᑎᑕᐅᔪᓂᒃ ᐆᒻᒪᖅᖁᑎᓕᐅᕆᔪᑦ ᑐᒃᓯᕋᐅᓯᐅᖅᑕᐅᔪᖅ ᐅᐃᒍᒋᐊᖅᓯᓂᕐᒧᑦ ᑐᒃᓯᕋᐅᑎᒥᑦ,” ᐅᖃᖅᑐᑦ ᑲᑎᒪᔩᑦ ᑐᓴᒐᒃᓴᒥᑦ ᓴᖅᕿᑕᐅᔪᒥᑦ ᐃᒃᓯᕙᐅᑕᕐᒥᙶᖅᑐᖅ ᑲᕕᒃ ᑲᓗᕋᖅ-ᒥᑦ.
“ᑲᑎᒪᔩᑦ ᑐᓵᓚᐅᕐᒥᔪᑦ ᐃᓚᐅᓕᖃᑕᐅᔪᓂᑦ, ᓄᓇᓕᖕᒥᑦ ᑭᒡᒐᖅᑐᐃᔪᓂᑦ ᐊᒻᒪᓗ ᐃᓄᖕᓂᑦ ᐃᓱᒫᓘᑎᖃᖅᑐᓂᑦ ᐅᐃᒍᒋᐊᖅᓯᓂᕐᒧᑦ ᑐᒃᓯᕋᐅᑕᐅᔪᒥᑦ ᐱᔪᖕᓇᖅᑐᓂᒃ ᑲᑎᑉᐸᓪᓕᐊᔪᓂᒃ ᖃᓄᐃᖓᓕᖅᑎᑦᑎᓂᖃᖅᑐᓂᒃ ᐃᒪᑦᑎᐊᕙᖕᒧᑦ, ᐊᓂᖅᓵᖅᑐᖅᑕᑉᑎᖕᓄᑦ ᐊᒻᒪᓗ ᑕᕆᐅᕐᒥ ᐃᒪᕐᒧᑦ.”
ᐊᓄᕆᒥᑦ ᑲᐃᕕᑎᑕᐅᔪᓄᑦ, ᑲᑎᒪᔩᑦ ᑐᓵᓚᐅᖅᑐᑦ ᐃᓄᖕᓂᑦ ᐃᑲᔪᖅᑐᐃᔪᓂᒃ ᑲᒻᐸᓂᒃᑯᑦ ᐊᓯᖏᓐᓂᒃ ᐊᑐᖅᑕᐅᖔᕈᖕᓇᖅᑐᓂᒃ ᐆᒻᒪᖅᖁᑎᓕᐅᕆᓗᑎᒃ, ᐃᑲᔪᖅᑐᐃᖏᑦᑐᑦ ᐃᓂᒋᔭᐅᓂᐊᖅᑐᒥᒃ ᐊᓄᕆᒧᑦ ᑲᐃᕕᑎᑕᐅᔪᓄᑦ.
“ᐃᓚᐅᖃᑕᐅᔪᑦ ᐅᖃᓚᐅᖅᑐᑦ ᑲᑎᒪᔨᓄᑦ ᐃᑲᔪᖅᑐᐃᖏᓐᓂᕆᔭᖓᑦ ᐱᔾᔪᑎᒋᑉᓗᒍ ᐃᓂᒋᔭᐅᓂᐊᖅᑐᖅ ᐊᓄᕆᒧᑦ ᑲᐃᕕᑎᑕᐅᔪᓄᑦ ᓇᓗᓇᖅᑐᖃᕐᓂᖓᓄᑦ ᖃᓄᐃᖓᓕᖅᑎᑦᑎᓂᖃᓕᕈᖕᓇᕐᓂᖅ ᑐᒃᑐᓄᑦ,” ᐅᖃᖅᓯᒪᔪᖅ ᑐᓴᒐᒃᓴᒥᑦ.
ᐊᕙᑎᓕᕆᔨᒃᑯᑦ ᖃᐅᔨᓚᐅᖅᑐᑦ “ᐊᖏᔪᒥᒃ ᓇᓗᓇᕐᓂᖃᕐᓂᖓ” ᑐᒃᓯᕋᐅᓯᐅᖅᑕᐅᔪᒥᑦ ᐱᔪᓂᒃ ᖃᓄᐃᖓᓕᖅᑎᑦᑎᓂᐅᔪᖕᓇᖅᑐᓄᑦ ᐊᐅᓚᓂᖏᓐᓄᑦ ᐊᒻᒪᓗ ᖃᓄᐃᖏᑦᑎᐊᕐᓂᖏᓐᓄᑦ ᖃᒪᓂᕐᔪᐊᖅ ᑐᒃᑐᖏᑦ, ᐊᓂᖅᓵᖅᑐᖅᑕᑉᑕ, ᐃᒪᖓᓄᑦ ᑕᓯᕐᔪᐊᕐᒥᑦ ᐊᒻᒪᓗ ᐃᑎᕕᐊᓂᑦ ᐊᒻᒪᓗ ᖃᓄᐃᖏᑦᑎᐊᕐᓂᖏᑦ, ᐃᓅᓯᖏᑦ, ᐱᖅᖁᓯᖏᑦ ᓄᓇᒥᑦ ᐊᑐᖃᑦᑕᖅᑐᑦ ᐃᓄᐃᑦ ᑭᕙᓪᓕᕐᒥᑦ.
“ᐃᓚᒋᔭᐅᑉᓗᓂ, ᑲᑎᒪᔩᑦ ᐅᖃᓚᐅᖅᑐᑦ ᓇᓗᓇᕐᓂᖃᑦᑎᐊᕐᓂᖓ ᑕᐃᒪᐅᔪᒧᑦ ᐅᕝᕙᓘᓐᓃᑦ ᐊᓯᐊᙳᕆᐊᖅᑕᐅᔪᓄᑦ ᐊᖏᓗᐊᖏᒋᐊᖅᑎᑦᑎᓂᕐᒧᑦ ᐱᓕᕆᐊᖑᔪᑦ ᓈᒻᒪᒐᔭᕋᓗᐊᕐᒪᖔᑕ ᒥᐊᓂᕆᔭᐅᓂᐊᕐᓗᑎᒃ ᐱᑕᖃᖅᑕᐃᓕᑎᑦᑎᓃᑦ ᐅᕝᕙᓘᓐᓃᑦ ᐱᓕᕆᐊᕆᓗᒋᑦ ᐱᑦᑕᐅᖏᑦᑐᑦ ᖃᓄᐃᖓᓕᖅᑎᑦᑎᓂᐅᓂᐊᖅᑐᑦ ᑐᒃᓯᕋᐅᑕᐅᔪᒥᑦ ᐱᔪᓂᒃ ᑐᒃᑐᓄᑦ, ᐱᓗᐊᖅᑐᒥᑦ ᐱᒻᒪᕆᐅᓂᖓ ᓄᕐᕆᐅᖅᑎᓪᓗᒋᑦ ᐊᒻᒪᓗ ᓄᕐᕆᐅᕌᓂᒃᑎᓪᓗᒋᑦ ᐅᑉᓗᕆᔭᐅᔪᓂᑦ,” ᐅᖃᖅᓯᒪᔪᖅ ᑐᓴᒐᒃᓴᒥᑦ. “ᑲᑎᒪᔩᑦ ᓇᓗᓇᐃᕐᒥᔪᑦ ᓇᓚᐅᑦᑖᖅᑕᐅᓯᒪᙱᑦᑐᑦ ᐱᑦᑕᐅᖏᑦᑐᓂᒃ ᐊᒃᑐᖅᓯᓂᐅᔪᑦ ᑐᒃᑐᓄᑦ ᑕᒡᕙᑲᐅᑎᒋᒥᑦ ᐱᐅᖏᑦᑐᓂᒃ ᖃᓄᐃᖓᓕᖅᑎᑦᑎᓂᖃᕈᖕᓇᖅᑐᑦ ᐊᔪᙱᓐᓂᐊᕐᓂᖏᓐᓄᑦ ᐃᓄᐃᑦ, ᐃᖅᕿᓖᑦ ᐊᒻᒪᓗ ᐃᓚᖏᑦ ᓂᕆᔭᒃᓴᕆᓗᒋᑦ ᑐᒃᑐᐃᑦ, ᐱᑦᑕᐅᖏᑦᑐᒥᒃ ᐊᒻᒪᓗ ᐊᑯᓂᐅᔪᒥᒃ ᖃᓄᐃᖓᓕᖅᑎᑦᑎᓂᖃᕈᖕᓇᖅᑐᑦ ᐃᓅᓯᖏᓐᓄᑦ, ᖃᓄᐃᖏᑦᑎᐊᕐᓂᖏᓐᓄᑦ ᐊᒻᒪᓗ ᐱᖅᖁᓯᖏᓐᓄᑦ.”
ᑲᑎᒪᔩᑦ ᐅᖃᓚᐅᖅᑐᑦ “ᐃᑲᔪᖅᑐᐃᔪᑦ” ᐱᓕᕆᐊᖃᖅᑐᓂᑦ ᐊᓯᖏᓐᓂᒃ ᐱᑦᑕᐅᖏᑦᑐᓕᐅᕆᙱᓐᓂᖅᓴᐅᔪᓂᒃ ᓇᓂᓯᓂᐊᕐᓗᑎᒃ ᐆᒻᒪᖅᖁᑎᓕᐅᕆᔪᓂᒃ.
“ᑲᑎᒪᔩᑦ ᐅᖃᓚᐅᕐᒥᔪᑦ ᓯᕗᓂᒃᓴᒥᑦ, ᐃᓚᔭᐅᔪᓄᑦ ᐱᓕᕆᐊᕐᒧᑦ ᐊᒻᒪᓗ ᖃᓂᑦᑐᒥᑦ ᖃᐅᔨᓴᐃᓂᕐᓄᑦ, ᓇᓗᓇᙱᓐᓂᖅᓴᐅᓕᕋᔭᕐᓂᖓ ᓇᓚᐅᑦᑖᖅᑕᐅᔪᓂᒃ ᖃᓄᐃᖓᓕᖅᑎᑦᑎᓂᖃᖅᑐᓂᒃ ᐊᒻᒪᓗ ᐊᖏᓗᐊᖏᒋᐊᖅᑎᑦᑎᔪᓂᒃ ᐱᓕᕆᐊᖑᔪᓂᒃ ᖃᓄᐃᖓᓕᖅᑎᑦᑎᓂᖃᕈᖕᓇᖅᑐᓂᒃ ᑐᒃᑐᓄᑦ ᐊᒻᒪᓗ ᑲᑎᑉᐸᓪᓕᐊᔪᓂᒃ ᖃᓄᐃᖓᓕᖅᑎᑦᑎᓂᕐᓄᑦ ᓇᓗᓇᙱᓐᓂᖅᓴᐅᓕᖅᑎᑦᑎᔪᖕᓇᖅᑐᑦ ᐃᓚᖏᓐᓄᑦ ᐅᕝᕙᓘᓐᓃᑦ ᑕᒪᓗᒃᑖᕐᒧᑦ ᖃᓄᐃᓕᐅᕆᓂᕐᓄᑦ, ᐱᓕᕆᓂᕐᓄᑦ ᐊᒻᒪᓗ ᐱᓕᕆᐊᖑᔪᓄᑦ ᐱᓕᕆᐊᖑᔪᒪᔪᓂᑦ ᐅᐃᒍᒋᐊᖅᓯᓂᕐᒧᑦ ᑐᒃᓯᕋᐅᑎᒥᑦ ᐱᓕᕆᐊᖑᓗᑎᒃ ᐱᔭᕆᐊᖃᙱᑦᑐᓂᒃ ᐊᒻᒪᓗ ᐱᑦᑕᐅᖏᑦᑐᒃᑯᑦ ᐊᒃᑐᖅᓯᓂᖃᖅᑐᓂᒃ ᐱᕈᖅᐸᓪᓕᐊᓂᖃᖃᑎᒌᒃᑐᑦ ᐃᓗᐃᑦᑑᖓᑦᑎᐊᕐᓂᖏᓐᓄᑦ ᓄᓇᕗᒻᒥᑦ ᓄᓇᑖᖑᓯᒪᔪᒥᑦ,” ᐅᖃᖅᓯᒪᔪᖅ ᑐᓴᒐᒃᓴᒥᑦ.
ᑕᒡᕘᓇ ᐊᒡᓃᑯᒃᑯᑦ ᓂᕆᐅᖕᓂᖃᖅᑐᑦ ᓱᓕ.
“ᐱᓕᕆᖃᑎᒋᓂᐊᖅᑕᕗᑦ ᓱᓕ ᐃᓚᒋᔭᐅᔪᓂᒃ ᐱᓕᕆᐊᕆᓂᐊᕐᓗᒋᑦ ᐃᓱᒫᓘᑎᒋᔭᐅᔪᑦ ᓴᖅᕿᑕᐅᓚᐅᖅᑐᑦ ᐊᕙᑎᓕᕆᔨᒃᑯᓐᓄᑦ,” ᐅᖃᖅᑐᑦ ᐊᒡᓃᑯᒃᑯᑦ ᖃᕆᑕᐅᔭᒃᑯᑦ ᑎᑎᕋᖅᑕᖓᓂᑦ. “ᐊᕙᑎᓕᕆᔨᒃᑯᑦ ᐅᒃᑯᐃᖓᔪᑦ ᐱᔪᖕᓇᖅᑎᑦᑎᓂᕐᓄᑦ ᐅᖃᓪᓗᕆᒃᓴᐅᑎᓂᐊᕐᓗᑎᒃ, ᓇᓗᓇᐃᖅᓯᑉᓗᑎᒃ ᐱᐅᔪᒥᒃ ᐃᓅᖃᑎᒌᓄᑦ ᐊᒻᒪᓗ ᐱᕈᖅᐸᓪᓕᐊᓂᖃᕐᓂᕐᒧᑦ ᐊᒃᑐᖅᓯᓯᒪᓂᕆᔭᖓᓂᑦ ᑕᓯᕐᔪᐊᕐᒥᑦ ᐅᔭᕋᒃᑕᕆᐊᕗᑦ, ᐊᒻᒪᓗ ᐃᑲᔪᖅᑐᐃᓯᒪᔪᑦ ᑲᒻᐸᓂᒃᑯᓐᓂᑦ ᑐᓂᓯᒃᑲᓐᓂᓛᖁᑉᓗᒋᑦ ᑐᒃᓯᕋᐅᑎᒥᒃ ᓯᕗᓂᒃᓴᒥᑦ.”