ᐊᖑᑎᑦ ᑭᔾᔭᖅᑕᐅᑦᓯᐊᕈᓐᓇᖅᓯᕗᑦ ᐃᖃᓗᖕᓂ ᒪᑐᐃᖅᓯᓚᐅᖅᑎᓪᓗᒋᑦ ᐊᖑᑎᓄᑦ ᓄᔭᓕᕆᕕᖕᒥᒃ.
ᓄᓇᓕᐸᐅᔭᒥᐅᑕᐃᑦ ᓄᑖᖅ ᐊᖑᑎᓄᑦ ᓄᔭᓕᕆᕕᒃ, ᓖᔾᔭᒦᑦᑐᖅ, ᒪᑐᐃᖅᑕᐅᓚᐅᖅᐳᖅ ᐱᕕᒡᔪᐊᖅᑎᑎᓪᓗᑎᒃ ᐱᖓᑦᓯᕐᒥ, ᐊᒃᑐᐱᕆ 11-ᐅᑎᓪᓗᒍ.
“ᖁᕕᐊᓱᒃᑐᑦ ᓇᓗᓇᖏᑉᐳᖅ,” ᐅᖃᓚᐅᖅᐳᖅ ᒧᕼᐊᒪᑦ ᐋᔅᒪᓐ, ᐱᒋᐊᖅᑎᑎᓚᐅᖅᑐᖅ ᑖᑉᓱᒥᖓ ᐃᖃᓗᖕᒥᐅᑕᐅᖃᑎᖏᓪᓗ ᓵᒻᓴᓐ ᒫᑎᐅᔅ ᐊᒻᒪ ᓱᕋᕕᐊ ᐋᔅᕆᔅ. “ᑭᒃᑯᑐᐃᓐᓇᐃᑦ ᖁᕕᐊᓱᒃᐳᖅ ᐱᑕᖃᓚᐅᖏᑦᑐᒥᒃ ᐱᑕᖃᖅᑎᑎᓂᐊᓕᕋᑦᑕ.”
ᐋᔅᒪᓐ ᐱᖃᑎᖏᓪᓗ, ᑕᒪᕐᒥᒃ ᐊᖑᑎᓂᒃ ᓄᔭᓕᕆᔨᐅᓪᓗᑎᒃ, ᒪᑐᐃᖅᓯᒍᒪᓕᓚᐅᖅᐳᑦ ᑖᑦᓱᒥᐊ ᑭᔾᔭᖅᑕᐅᒍᒪᔪᑦ ᐊᐱᖅᓱᖃᑦᑕᓚᐅᕐᒪᑕ ᐃᖃᓗᖕᒥ ᑕᐃᒪᓐᓇᐃᑦᑐᒥᒃ.
ᑕᐃᒪ 8,000ᓂᒃ ᐃᓄᒋᐊᖕᓂᖃᖅᐳᖅ ᓄᓇᕗᑦ ᐊᖓᔪᖄᖃᕐᕕᐊᓂ, ᐱᑕᖃᓗᐊᖏᑦᖢᓂᓗ ᐊᖑᑎᓄᑦ ᐊᑐᖅᑕᐅᔪᒃᓴᓂᒃ ᐃᖃᓗᖕᓂ.
“ᓄᓇᓕᐸᐅᔭᐅᖕᒪᑦ, ᑐᔪᕐᒥᐊᖃᕋᔪᒃᖢᑕᓗ ᑭᔾᔭᖅᑕᐅᒍᒪᕙᒃᑐᓂᒃ,” ᐅᖃᓚᐅᖅᐳᖅ ᐋᔅᒪᓐ. “ᐃᓄᐃᑦ ᖃᓪᓗᓈᑦ ᓄᓇᖓᓐᓄᑦ ᑭᔾᔭᖅᑕᐅᒋᐊᖅᑐᕈᒪᕙᖕᒪᑕ, ᐅᑕᕿᓂᕋᖅᖢᑎᒡᓗ ᑭᔾᔭᖅᑕᐅᓂᐊᕐᓂᕐᒧᑦ ᐅᑕᕿᖓᒧᑦ. ᑕᐃᒪᓐᓇ ᑖᒃᑯᐊ ᑲᑎᓕᓚᐅᖅᐳᑦ ᐊᓯᐊᓄᐊᕆᐊᖃᖏᒻᒪᑕ ᐃᓄᐃᑦ ᑭᔾᔭᖅᑕᐅᓂᐊᕐᓗᑎᒃ.
“ᐃᓱᒪᖁᒐᑦᑎᒍ ᑭᓱᐃᓐᓇᕐᓂᒃ ᐱᒍᒪᒍᑎᒃ ᑕᒡᕙᓂ ᓄᓇᕗᒥ ᐱᔪᓐᓇᕐᒪᑕ,” ᐅᖃᓚᐅᖅᐳᖅ.
Blue Ice Barbershop ᒪᑐᐃᓚᐅᖅᐳᖅ ᓄᑖᓂᒃ ᑭᓱᓕᒫᖃᖅᖢᓂ ᐊᖑᑎᓄᑦ ᓄᔭᓕᕆᕕᖕᒥ ᐱᑕᖃᖅᐸᒃᑐᓂᒃ, ᐊᔾᔨᒌᖏᑦᑐᓂᒡᓗ ᑭᔾᔭᖅᑕᐅᓂᖃᕈᓐᓇᖅᖢᑎᒃ, ᐅᖃᓚᐅᖅᐳᖅ ᐋᔅᒪᓐ. ᑭᔾᔭᖃᑦᑕᕐᓂᐊᖅᖢᑎᒡᓗ ᑕᒪᒃᑯᓄᖓ ᐊᑭᓖᒍᓐᓇᖏᑦᑐᓄᑦ.
“ᖃᓄᑐᐃᓐᓇᖅ ᓄᔭᓕᕆᔪᓐᓇᖅᐳᒍᑦ ᐊᖑᑎᓂᒃ,” ᐅᖃᓚᐅᖅᐳᖅᔭ “ᐊᔾᔨᒌᖏᑦᑐᓂᒡᓗ ᖃᐃᔪᖃᖃᑦᑕᖅᖢᓂ.
“ᐃᓚᒌᒃᐳᒍᑦ ᑕᒡᕙᓂ. ᑭᔾᔭᖅᑕᐅᔪᖃᕆᐊᖃᖅᐸᑦ ᑮᓇᐅᔭᖃᖏᑉᐸᑕᓗ, ᐃᑲᔪᕈᓐᓇᖅᐳᒍᑦ ᐊᑭᓖᑎᖏᓪᓗᒋᑦ.”
ᑖᒃᑯᐊᓗ ᖃᐅᔨᒪᔭᒥᓂᒃ ᐃᓕᓐᓂᐊᖅᑎᑎᒍᒪᕗᑦ ᐃᖃᓗᖕᓂ ᒪᒃᑯᒃᑐᓄᑦ.
“ᐃᓕᓐᓂᐊᖅᑎᑎᓂᐊᖅᐳᒍᑦ ᐃᖃᓗᖕᒥᐅᓂᒃ, ᒪᒃᑯᒃᑐᓂᒃ, ᐃᑲᔪᕈᓐᓇᖁᓪᓗᒋᑦ ᐊᖑᑎᓂᒃ ᓄᔭᓕᕆᓂᕐᒧᑦ ᐃᓗᓐᓂᐊᕐᓗᑎᒃ,” ᐅᖃᓚᐅᖅᐳᖅ ᐋᔅᒪᓐ.
ᓄᓇᓕᖕᓂᒥᐅᓂᒃ ᐃᑲᔪᕈᒪᓂᖏᓐᓄᑦ ᐃᓱᒪᖃᑦᓯᐊᖅᐳᑦ ᑎᑎᕋᐅᓯᕆᓯᒪᓪᓗᓂᐅᒃ ᐋᔅᒪᓐ, ᒫᑎᐅᔅ ᐊᒻᒪ ᓱ ᐋᔅᕆᔅ, ᒪᑐᐃᖅᓯᓚᐅᖏᑎᓪᓗᒋᑦ ᓱᓕ.
ᖁᔭᓐᓇᒦᕐᓇᐅᑎᓪᓗᒍ ᐱᓇᓱᐊᕈᓯᐅᑉ ᓄᖑᐊᓂ, ᑖᒃᑯᐊ ᐱᖓᓱᑦ ᓂᕆᑎᑎᓚᐅᖅᐳᑦ ᐊᒡᔭᖅᓯᖃᑦᑕᖅᖢᑎᒃ ᓄᓇᓕᖕᓂᒥᐅᓄᑦ ᓂᕆᓂᐊᖅᑕᖏᓐᓂᒃ ᐊᔪᖅᓴᖅᑐᑦ ᖁᔭᓐᓇᒦᕈᑎᖃᕈᒪᓪᓗᑎᒡᓗ ᓄᓇᓕᐸᐅᔭᕐᒥᐅᑦ ᐱᔪᓐᓇᖅᑎᑎᓯᒪᖕᒪᑕ ᒪᑐᐃᖅᓯᓂᖏᓐᓄᑦ ᓄᑖᒥᒃ ᐱᔅᓂᔅᒥᒃ.
“ᒪᑐᐃᖅᓯᓂᐊᕐᓂᕐᒧᑦ ᐃᓱᒪᓪᓗᓂ, ᑕᐃᒪᓐᓇ ᐃᓱᒪᓇᖅᐳᖅ ᖃᑦᓯᓂᒃ ᐱᓕᕆᔪᓐᓇᕐᓂᐊᕐᒪᖔᑦᑕ ᐅᓪᓗᒥᒧᑦ,” ᐅᖃᓚᐅᖅᐳᖅ. “ᑕᐃᒪᓐᓇ ᐊᔾᔨᐅᖏᑦᑐᒥᑦ ᐱᒍᒪᓚᐅᕋᑦᑕ ᖁᔭᓐᓇᒦᕐᓗᒋᑦ ᓄᓇᓕᖕᓂᒥᐅᑦ ᒪᑐᐃᖅᓯᓐᓇᐅᑎᓪᓗᒍ.”
“ᐃᓚᒋᔭᐅᒐᑦᑕ ᓄᓇᓕᖕᓂᒥᐅᓄᑦ ᖁᔭᓐᓇᒦᕈᒪᓪᓗᒋᑦ ᖃᓄᑐᐃᓐᓇᖅ ᐅᖃᓪᓚᖃᑦᑕᐅᑎᓗᑕᓗ.”
