Skip to content

Conservative-ᑯᑦ ᐊᑐᐊᒐᖏᑦ ᒪᓕᒃᑐᑦ ᐃᓄᐃᑦ ᐱᒻᒪᕆᐅᑎᑕᖏᓐᓂᒃ, ᑕᐃᒪᓐᓇ ᐅᖃᖅᖢᓂ ᒪᑭᓐᓯ

ᑲᖏᖅᖠᓂᕐᒥᐅᑕᖅ ᓗᐊᕋ ᒪᑭᓐᓯ ᐅᖃᖅᖢᓂ ᐊᒃᓱᕈᕐᓂᐊᕋᒥ ᑭᒡᒐᖅᑐᕐᓗᒋᑦ ᓄᓇᕗᒥᐅᑦ ᓂᕈᐊᖅᑕᐅᒍᓂ ᓄᓇᕗᒥᐅᓂᒃ ᑭᒡᒐᖅᑐᐃᔨᐅᓂᕐᒧᑦ ᓯᑎᐱᕆ 20-ᒥ ᒐᕙᒪᑐᖃᒃᑯᑦ ᓂᕈᐊᕕᒡᔪᐊᖅᑎᑦᑎᑎᓪᓗᒋᑦ.
26315629_web1_210901-kiv-election-mackenzie_1
ᑲᖏᖅᖠᓂᕐᒥᐅᑕᖅ ᓗᐊᕋ ᒪᑭᓐᓯ ᓂᕈᐊᖅᑕᐅᓇᓱᒃᑐᖅ Conservative-ᑯᓐᓄᑦ ᓂᕈᐊᒐᒃᓴᓕᐊᖑᓯᒪᑉᓗᓂ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᔪᒫᖅᑎᓪᓗᒋᑦ ᓯᑎᐱᕆ 20-ᒥ. ᐊᔾᔨ ᓗᐊᕋ ᒪᑭᓐᓯᒥᙶᖅᑐᖅ.

ᑲᖏᖅᖠᓂᕐᒥᐅᑕᖅ ᓗᐊᕋ ᒪᑭᓐᓯ ᐅᖃᖅᖢᓂ ᐊᒃᓱᕈᕐᓂᐊᕋᒥ ᑭᒡᒐᖅᑐᕐᓗᒋᑦ ᓄᓇᕗᒥᐅᑦ ᓂᕈᐊᖅᑕᐅᒍᓂ ᓄᓇᕗᒥᐅᓂᒃ ᑭᒡᒐᖅᑐᐃᔨᐅᓂᕐᒧᑦ ᓯᑎᐱᕆ 20-ᒥ ᒐᕙᒪᑐᖃᒃᑯᑦ ᓂᕈᐊᕕᒡᔪᐊᖅᑎᑦᑎᑎᓪᓗᒋᑦ.

ᒪᑭᓐᓯ ᐅᖃᐅᓯᐅᓚᐅᖅᑐᖅ ᓂᕈᐊᒐᒃᓴᓕᐊᖑᓯᒪᓂᖓᓄᑦ Conservative-ᑯᑎᒍᑦ ᐊᒐᓯ 16-ᒥ.

ᓂᕈᐊᖅᑕᐅᓇᓱᖕᓂᐊᕐᓂᕐᒧᑦ ᐱᒋᐊᕈᑎᒃᑯᑦ ᐅᖃᓪᓚᒃᑎᓪᓗᒍ, ᒪᑭᓐᓯ ᐅᖃᓚᐅᖅᑐᖅ ᓂᕈᐊᒐᒃᓴᙳᕈᒪᓕᓚᐅᕐᓂᕐᒥᓄᑦ Conservative -ᑯᑎᒍᑦ Conservative-ᑯᑦ ᐱᒻᒪᕆᐅᑎᑕᖏᑦ ᒪᓕᖕᒪᑕ ᐃᓄᐃᑦ ᐱᒻᒪᕆᐅᑎᑕᖏᓐᓄᑦ.

“ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪᓗ Conservative-ᑯᑦ ᐊᑐᐊᒐᖏᑦ ᐊᔾᔨᒌᕈᔪᖕᓂᖏᓐᓄᑦ Conservative-ᑯᓐᓄᑦ ᓂᕈᐊᖅᑕᐅᔪᒪᓂᕆᓚᐅᖅᑕᕋ,” ᑕᐃᒪᓐᓇ ᐅᖃᖅᖢᓂ. “ᐃᓄᐃᑦ ᐅᒃᐱᕈᓱᖕᒪᑕ ᐱᔨᑦᓯᕐᓂᕐᒥᒃ, ᑐᑭᖃᖅᑐᖅ ᐃᒪᓐᓇ ‘ᐱᔨᑦᓯᖃᑦᑕᕆᐊᖃᕐᓂᕐᒧᑦ ᐃᓅᖃᑎᒥᒃ ᖃᓄᐃᙱᓐᓂᖅᓴᐅᔪᓐᓇᖅᓯᖁᑉᓗᒋᑦ.’ ᑕᒪᓐᓇ ᒪᓕᒃᑐᖅ Conservative-ᑯᑦ ᐅᒃᐱᕆᔭᖓᓄᑦ ᑭᒡᒐᖅᑐᐃᖃᑦᑕᕐᓂᒃᑯᑦ ᑕᒪᐃᓐᓂᒃ ᐅᑭᐅᖅᑕᖅᑐᒥᐅᑕᓂᒃ ᑲᓇᑕᒥᐅᑕᓂᒃ.”

ᑲᒪᒋᔪᒪᔭᖓᑕ ᐃᓚᖓ, ᓂᕈᐊᖅᑕᐅᒍᓂ, ᓄᓇᕗᒥ ᐃᒡᓗᑭᒃᓴᖃᑦᑕᕐᓂᖅ ᐃᒡᓗᕐᓗᖃᑦᑕᕐᓂᖅ, ᐃᓱᒪᒃᑯᑦ ᐋᓐᓂᐊᖃᑦᑕᖅᑐᑦ, ᐃᓐᓇᑐᖃᐃᑦ ᑲᒪᒋᔭᐅᑦᑎᐊᖃᑦᑕᕆᐊᖃᕐᓂᖏᑦ ᐊᒻᒪᓗ ᐊᒥᖅᑳᕈᑎᔭᕆᐊᖃᕐᓂᖅ ᓂᖏᖅᑕᐅᑎᓂᒃ.

ᐅᖃᖃᑎᖃᖅᖢᓂ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓂᒃ, ᒪᑭᓐᓯ ᐅᖃᓚᐅᖅᑐᖅ ᑲᒪᒋᓂᐊᕐᓗᒍᒎᖅ ᐃᒡᓗᑭᒃᓴᕐᓂᖅ ᐃᒡᓗᕐᓗᖃᑦᑕᕐᓂᕐᓗ ᐊᒥᓲᔪᒃᑯᑦ ᖃᓄᖅᑑᕈᑎᒋᔭᕆᐊᖃᕐᓂᐊᖅᑐᖅ.

ᐃᓱᒪᒋᔭᖓᑕ ᐃᓚᖓ ᓴᓇᔨᑖᒃᑲᓐᓂᖃᑦᑕᕆᐊᖃᕐᓂᖅ ᐅᑭᐅᖅᑕᖅᑐᒥ ᐃᒡᓗᓕᐅᕐᓂᕐᒧᑦ ᐊᑭᓕᒃᓴᑦ ᐊᑦᑎᖕᓂᖅᓴᐅᔪᓐᓇᖃᑦᑕᖁᑉᓗᒋᑦ. ᐅᖃᖅᖢᓂᓗ ᑕᑯᒃᑲᓐᓂᕈᒪᒐᒥ ᐃᒡᓗᓕᐊᖑᔪᓂᒃ ᓴᓇᔪᓐᓃᖅᑐᓄᑦ ᐃᓐᓇᑐᖃᕐᓄᑦ ᐊᑐᖅᑕᐅᖃᑦᑕᕋᔭᖅᑐᓂᒃ ᓄᓇᕗᒥ. ᑲᒪᒋᔭᐅᑦᑎᐊᖃᑦᑕᖁᑉᓗᒋᑦ ᐃᓐᓇᑐᖃᐃᑦ ᒫᓐᓇᑲᐅᑎᒋ ᐊᒻᒪᓗ ᓅᑦᑐᓐᓇᖃᑦᑕᖁᑉᓗᒋᑦ ᐃᓂᒋᓂᐊᖅᑕᖏᓐᓄᑦ ᐃᖢᐊᕆᔭᖏᓐᓄᑦ ᐋᓐᓂᐊᓕᓗᐊᖅᑳᖅᑎᓐᓇᒋᑦ, ᑕᐃᒪᓐᓇ ᐅᖃᖅᖢᓂ. ᐃᑲᔫᑕᐅᓇᔭᕐᒥᔪᖅ ᐃᒡᓗᑦ ᐊᑐᐃᓐᓇᐅᓂᖅᓴᐅᓕᕐᓗᑎᒃ ᒪᒃᑯᖕᓂᖅᓴᓄᑦ.

“ᑲᒪᒋᔭᐅᔭᕆᐊᖃᓕᖅᑳᖅᑎᓐᓇᒋᑦ ᖁᑦᑎᖕᓂᖅᓴᒃᑯᑦ ᑲᑎᒪᑎᑕᐅᖃᑦᑕᕋᔭᕐᒪᑕ. ᓲᕐᓗ ᐃᓐᓇᑐᖃᐃᑦ ᐊᖏᕐᕋᖅᑖᕆᖃᑦᑕᖅᑕᖏᑦᑎᑐᑦ ᖃᑉᓗᓈᑦ ᓄᓇᖓᓂ,” ᑕᐃᒪᓐᓇ ᐅᖃᖅᖢᓂ.

ᐊᖏᓂᖅᐹᖑᖃᑕᐅᔪᖅ ᐱᕙᓪᓕᐊᔪᓐᓇᕐᓂᖅ ᓂᖏᖅᑕᕈᑎᓂᒃ ᓄᓇᕗᒥ. ᐅᖃᖅᖢᓂ ᑕᒪᓐᓇ ᓄᓇᕗᒥᐅᓄᑦ ᐊᐅᓚᑦᑎᔾᔪᑕᐅᒃᑲᓐᓂᕋᔭᕐᒪᑦ ᑮᓇᐅᔭᓂᒃ ᐊᒻᒪᓗ ᐊᑐᐃᓐᓇᕈᖅᑎᑦᑎᒃᑲᓐᓂᕋᔭᖅᖢᓂ ᑮᓇᐅᔭᓂᒃ ᐱᖁᑎᕐᔪᐊᒃᓴᓄᑦ ᐊᒻᒪᓗ ᐃᒡᓗᕐᔪᐊᒃᓴᓄᑦ.

“ᑮᓇᐅᔭᕆᒍᑉᑎᒍᑦ ᐊᒻᒪᓗ ᓄᓇᕗᑦ ᓄᓇᖁᑎᒋᒍᑉᑎᒍᑦ, ᐅᔾᔨᖅᑐᑦᑎᐊᕐᓂᐊᖅᑐᒍᑦ,” ᑕᐃᒪᓐᓇ ᐅᖃᖅᖢᓂ. “ᓄᒃᑎᖅᑎᕆᓂᕐᒧᑦ ᑐᕌᖓᔪᖅ ᐊᒻᒪᓗ ᐅᑎᖅᑎᑦᑎᓂᖅ ᓄᓇᕗᒧᑦ.”

ᑲᒪᒋᓂᐊᕐᓗᒍ ᓄᓇᕗᒥ ᐃᓱᒪᒃᑯᑦ ᐋᓐᓂᐊᖃᖃᑦᑕᕐᓂᖅ, ᒪᑭᓐᓯ ᐅᖃᖅᖢᓂ ᐃᓕᖅᑯᓯᑐᖃᑎᒍᒡᒎᖅ ᐃᒃᐱᒍᓱᒃᑐᑦ ᓄᓇᖅᑲᑎᒌᑦ ᐅᖃᐅᔾᔨᒋᐊᖅᑏᑦ ᐊᑐᐃᓐᓇᐅᔭᕆᐊᓖᑦ ᐱᑕᖃᕈᓐᓇᖁᑉᓗᒍ ᐅᑉᓗᑕᒫᒃᑯᑦ ᐃᑲᕐᕋᑕᒫᒃᑯᑦ ᐃᑲᔪᖅᑎᒃᓴᓂᒃ ᑕᐃᑉᑯᓄᙵ ᐃᑲᔪᖅᑕᐅᔭᕆᐊᓕᖕᓄᑦ.

“ᐅᒃᐱᕈᓱᓪᓚᕆᒃᑐᖓ ᐊᒃᓱᕈᕐᓇᖅᑐᒃᑰᖅᑐᑦ ᐃᑲᔪᕐᓂᐊᕈᑉᑎᒍᑦ ᐃᓄᖕᓄᑦ ᐃᓕᖅᑯᓯᑐᖃᑎᒍᑦ ᑲᒪᒋᔭᐅᔭᕆᐊᖃᕐᒪᑕ, ᐃᖢᐊᕋᔭᖅᑰᖅᑐᖅ ᑲᔪᓯᓂᖃᑦᑎᐊᕐᓗᓂᓗ,” ᑕᐃᒪᓐᓇ ᐅᖃᖅᖢᓂ.

ᐃᓄᐃᑦ ᑲᐱᔭᐅᓪᓚᑦᑖᕆᐊᖃᓕᖅᐸᑕ, ᒪᑭᓐᓯ ᐅᖃᖅᖢᓂ ᐃᖕᒥᓂᒃ ᑲᐱᔭᐅᓯᒪᑉᓗᓂ ᐊᒻᒪᓗ ᐃᓅᖃᑎᓂ ᑲᐱᔭᐅᖃᑦᑕᖁᑉᓗᒋᑦ, ᐃᓄᐃᑦ ᐃᓱᒪᖅᓱᕆᐊᓖᑦ ᓇᖕᒥᓂᖅ ᐃᓱᒪᓕᐅᖃᑦᑕᕐᓗᑎᒃ ᑕᒡᕘᓇ.

“ᐃᓄᐃᑦ ᐊᔭᐅᖅᑐᖅᑕᐅᕌᓗᒋᐊᖃᙱᑦᑐᑦ,” ᑕᐃᒪᓐᓇ ᐅᖃᖅᖢᓂ. “ᐃᖅᑲᐅᒪᒐᒪ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐃᓱᒪᖅᓱᖅᑎᑕᐅᖃᑦᑕᓚᐅᙱᒻᒪᑕ. ᑕᒪᓐᓇ ᐅᒃᐱᕆᙱᑕᕋ.”

ᐊᒥᓱᑦ ᐃᓗᕕᑦ ᖃᐅᔨᔭᐅᕙᓪᓕᐊᓕᖅᑎᓪᓗᒋᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᒃᑯᑦ, ᒪᑭᓐᓯ ᐅᖃᖅᖢᓂ ᑕᑯᒋᐊᕈᒪᓇᔭᖅᑐᕉᖅ ᑮᓇᐅᔭᖅᑖᖅᑎᑦᑎᖃᑦᑕᕋᔭᕐᓂᕐᒧᑦ ᓄᓇᕗᒥᐅᓂᒃ ᑕᑯᔭᖅᑐᕈᑎᒃᓴᓂᒃ ᐃᓗᕕᕐᓂᒃ ᐃᓚᒋᔭᐅᔪᑦ ᓄᓇᕗᑦ ᓯᓚᑖᓂ ᐃᓗᕕᖅᑕᐅᓯᒪᔪᑦ.

“ᐃᓚᒌᑦ ᑕᐃᒪᐅᔪᒃᓴᐅᔪᑦ ᐃᓚᒋᓚᐅᖅᑕᖏᑦᑕ ᐃᓗᕕᖏᓐᓂᒃ ᑕᑯᔭᖅᑐᕈᒪᔪᑦ. ᑕᐃᒪᐅᔪᒃᓴᐅᔪᑦᑕᐅᖅ ᐳᕙᒡᓗᒡᕕᖕᓄᑦ ᐊᐅᓪᓚᖅᑎᑕᐅᖃᑦᑕᓚᐅᖅᑐᑦ ᐅᑎᓚᐅᖅᓯᒪᙱᑦᑐᑦ ᐊᒻᒪᓗ ᐃᓚᒥᓂᒃ ᑕᑯᒃᑲᓐᓂᓚᐅᖅᓯᒪᙱᑦᑐᑦ. ᑕᒪᓐᓇ ᑕᑯᒋᐊᕆᐊᖃᖅᑕᖅᐳᑦ ᓯᕗᓂᒃᓴᒥ ᐊᒻᒪᓗ ᐅᖃᕐᓗᑕ ᖃᓄᐃᓕᐅᕐᓂᐊᕐᒪᖔᑉᑕ ᐱᓕᕆᖃᑎᒌᖕᓂᒃᑯᑦ ᐃᓚᒋᔭᐅᔪᑦ ᐃᓗᕕᖏᑦ ᑕᑯᔭᖅᑐᖅᑕᐅᔪᓐᓇᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐃᓗᕕᕐᓂᒃ ᑕᑯᔭᖅᑐᖅᓯᒪᔪᑦ ᐃᖢᐊᖅᓯᕚᓪᓕᕈᑕᐅᓇᔭᕐᒥᖕᒪᑕ.

ᒪᑭᓐᓯ 15 ᐅᑭᐅᑦ ᐅᖓᑖᓂ ᓄᓇᕗᑦ ᒐᕙᒪᒃᑯᖏᓐᓄᑦ ᓴᓇᖃᑦᑕᖅᓯᒪᔪᖅ, ᐊᖓᔪᖅᑳᖑᓚᐅᖅᖢᓂ ᐱᕙᓪᓕᐊᔪᓕᕆᔨᒃᑯᓐᓄᑦ ᐃᖏᕐᕋᔭᒃᑐᓕᕆᔨᒃᑯᓐᓄᓪᓗ.

ᖃᑉᓯᑲᓪᓚᖕᓂᒃ ᒥᑭᔪᓂᒃ ᓇᖕᒥᓂᖃᖃᑦᑕᖅᓯᒪᖕᒥᔪᖅ ᐃᓚᐅᖃᑕᐅᖃᑦᑕᖅᓯᒪᑉᓗᓂᓗ ᑮᓇᐅᔾᔭᒃᓴᖅᑎᐅᙱᑦᑐᓂᒃ ᑎᒥᐅᔪᓂᒃ, ᓲᕐᓗ ᑲᖏᖅᖠᓂᐅᑉ ᐸᐃᕆᕝᕕᖓᓂᒃ ᕿᒫᕝᕕᖓᓂᓗ.





Pop-up banner image