Great egret ᑎᖕᒥᐊᖅ ᒥᑦᑐᖅ ᑲᖏᖅᖠᓂᕐᒥ.
ᐊᔾᔨᐅᙱᑦᑐᖅ ᑎᖕᒥᐊᖅ ᖃᖓᑕᔪᖅ ᑭᕙᓪᓕᕐᒥ ᑕᖅᑭᐅᓚᐅᖅᑐᒥ – ᑎᖕᒥᐊᓂᒃ ᑕᐅᑐᒍᒪᒐᔪᒃᑐᖅ ᐳᕐᓃᔅ ᓵᓐᑎ ᖃᑉᓯᑲᓪᓚᖕᓂᒃ ᐅᑉᓗᓂᒃ ᕿᓂᖅᖢᓂ ᐊᔾᔨᓕᐅᖅᓯᔪᓐᓇᖅᓯᓚᐅᖅᑐᖅ ᑎᖕᒥᐊᕐᒥᒃ ᒪᓴᒐᓚᖕᒥ ᑲᖏᖅᖠᓂᐅᑉ ᐊᓄᓪᓚᒃᓰᕝᕕᖓᑕ ᑐᓄᐊᓂ.
“ᐅᐃᒪ ᑕᑯᑎᓚᐅᕐᒫᖓ Facebook-ᑯᑦ ᐊᔾᔨᒥᒃ ᓴᖅᑭᑎᑦᑎᔪᒥᒃ. ᑕᑯᒐᑉᑯ ᐃᓱᒪᓕᓚᐅᖅᑐᖓ ‘ᐅᐊᒃ, ᐊᓕᐊᓇᐃᑦᑐᒥᓇᖅᑐᖅ, ᓇᓂᔪᒪᔭᕋ,” ᑕᐃᒪᓐᓇ ᐅᖃᖅᖢᓂ ᓵᓐᑎ. “ᒪᕐᕉᖕᓂᒃ ᐅᑉᓘᖕᓂᒃ ᕿᓂᓚᐅᖅᑕᕋ ᓇᓂᔪᓐᓇᕐᓇᒍ, ᐊᒻᒪᓗ ᑕᑯᑕᐃᓐᓇᖅᖢᒍ ᐅᑐᐱᕆ 17-ᒥ.”
ᓵᓐᑎ ᑕᑯᑎᑦᑎᓚᐅᖅᑐᖅ ᐊᔾᔨᓕᐊᒥᓂᒃ ᖃᕆᑕᐅᔭᒃᑯᑦ ᐊᒥᓱᑦ ᐃᓄᐃᑦ ᓂᑉᓕᐅᑎᖃᖅᖢᑎᒃ ᐊᔾᔨᓂᒃ, “ᓄᑖᖑᖕᒪᑦ ᓄᓇᖅᑲᑎᒌᖕᓄᑦ,” ᑕᐃᒪᓐᓇ ᐅᖃᖅᖢᓂ.
ᑕᑯᔭᐅᒐᔪᒃᑑᒐᓗᐊᑦ ᖃᑉᓗᓈᑦ ᓄᓇᖓᓂᒃ ᑲᓇᑕᒥ, ᐃᐅᕆᒃ ᕇᑦ, ᑎᖕᒥᐊᓂᒃ ᖃᐅᔨᓴᐃᔨ ᔭᓗᓇᐃᕝᒥ, ᐅᖃᖅᖢᓂ ᑎᖕᒥᐊᑦ ᑕᐃᒪᐃᑦᑐᑦ ᑕᑯᔭᐅᒐᔪᙱᑦᑐᑦ ᐅᑭᐅᖅᑕᖅᑐᒥ.
“ᑕᑯᔭᐅᒐᔪᙱᑦᑐᑦ,” ᑕᐃᒪᓐᓇ ᐅᖃᖅᖢᓂ. “ᑭᓯᐊᓂᑦᑕᐅᖅ, ᐅᑭᐅᖅᑕᖅᑐᒥ ᐃᓄᖃᓗᐊᙱᑎᓪᓗᒍ, ᑕᑯᙱᑐᐃᓐᓇᖃᑦᑕᖅᑐᒃᓴᐅᔪᑦ.”
ᑕᐃᒪᐃᒻᒪᑦ, ᕇᑦ ᐅᖃᖅᖢᓂ ᑭᖑᓪᓕᖅᐹᒥᒎᖅ ᑕᑯᔪᖃᓚᐅᖅᓯᒪᔪᖅ ᑕᐃᒪᐃᑦᑐᒥᒃ ᑎᖕᒥᐊᕐᒥᒃ ᓄᓇᕗᒥ, ᖃᐅᔨᒪᔭᖓᒍᑦ, 2019-ᒥ ᐊᑭᒥᔅᑭ ᕿᑭᖅᑕᒥ James Bay-ᒥ.
Great egret ᑎᖕᒥᐊᖅ ᑕᑯᔭᐅᓚᐅᖅᓯᒪᖕᒥᔪᖅ 2017-ᒥ ᐃᓅᕝᕕᖕᒥ ᐊᒻᒪᓗ ᑕᑯᔭᐅᖃᑦᑕᖅᓯᒪᖕᒥᔪᑦ ᐊᓛᔅᑲᒥ ᐊᒻᒪᓗ Hawaii–ᒥ, “ᑕᐃᒪᐃᒻᒪᑦ ᐅᖓᓯᒃᑐᓄᑦ ᖃᖓᑕᔪᓐᓇᖅᑐᑦ,” ᑕᐃᒪᓐᓇ ᐅᖃᖅᖢᓂ ᕇᑦ.
ᐅᐱᕐᖔᒃᑯᑦ, ᑕᐃᒪᐃᑦᑐᑦ ᑎᖕᒥᐊᑦ ᐊᐅᓪᓚᑲᑕᓕᓲᑦ ᐅᖓᓯᒃᑐᓄᑦ, ᑎᑭᖃᑦᑕᓕᖅᖢᑎᒃ ᓄᑖᓄᑦ ᓄᓇᓄᑦ “ᑎᑭᑉᐸᒃᖢᑎᒡᓗ ᓄᓇᓄᑦ ᓂᕆᐅᒋᔭᐅᓇᑎᒃ,” ᑕᐃᒪᓐᓇ ᐅᖃᖅᖢᓂ ᕇᑦ.
ᐃᓛᓐᓂᒃᑯᑦ ᓄᑖᓂᒃ ᓄᓇᓂᒃ ᓄᓇᖃᓕᓲᑦ ᓈᒻᒪᒋᒃᐸᒍ ᓄᓇ “ᑕᐃᒪᐃᒻᒪᑦ ᓇᓗᓇᖅᑐᖅ ᖃᓄᐃᓐᓂᐊᕐᒪᖔᑦ? ᐃᒻᒪᖄ ᑕᑯᒐᔪᖕᓂᖅᓴᐅᓂᐊᓕᖅᑐᒍᑦ ᑕᐃᒪᐃᑦᑐᓂᒃ ᑎᖕᒥᐊᓂᒃ ᐅᑭᐅᖅᑕᖅᑐᒥ.”
ᐅᕝᕙᓘᓐᓃᑦ, “ᑕᒻᒪᖅᓯᒪᑐᐃᓐᓇᕆᐊᓖᑦ,” ᑕᐃᒪᓐᓇ ᐅᖃᖅᖢᓂ. “ᐊᑕᐅᓰᑐᐃᓐᓇᖅᖢᓂ ᑕᑯᔭᐅᓯᒪᑎᓪᓗᒍ, ᐅᕙᒻᓄᑦ, ᓇᓗᓇᖅᑐᖅ ᐱᑕᖃᒃᑲᓐᓂᓕᕋᔭᕐᒪᖔᑦ.
“ᑕᑯᔪᒥᓇᖅᑐᒻᒪᕆᐊᓗᒃ ᐊᒻᒪᓗ ᓄᓇᒋᒐᔪᒃᑕᒥᓃᙱᑦᑐᖅ, ᑭᓯᐊᓂ ᖃᑯᒍᙳᖅᐸᑦ ᑭᓯᐊᓂ ᓇᓗᓇᕈᓐᓃᕐᓂᐊᖅᑐᖅ ᑕᑯᒐᔪᖕᓇᔾᔮᙱᒻᒪᖔᑕ ᐅᕝᕙᓘᓐᓂᑦ ᐃᓚᕚᓪᓕᕐᓂᐊᕐᒪᖔᑕ ᓯᕗᓂᒃᓴᒥ,” ᑕᐃᒪᓐᓇ ᐅᖃᒃᑲᓐᓂᖅᖢᓂ. ᕇᑦ ᐅᖃᖅᖢᓂ ᓇᓚᐅᑦᑖᕈᓐᓇᑐᐃᓐᓇᖅᑐᕉᖅ ᓱᖕᒪᑦ ᑕᐃᒪᐃᑦᑐᖅ ᑎᖕᒥᐊᖅ ᑕᒪᐅᙵ ᑎᑭᓐᓂᕐᒪᖔᑦ ᑲᖏᖅᖠᓂᕐᒧᑦ ᑭᓯᐊᓂ ᓂᕿᓂᒃ ᒪᓕᒃᑐᒃᓴᐅᔪᖅ ᓂᕿᖃᕐᕕᐅᔪᓂᒃ ᐃᖃᓗᒐᓚᖕᓂᒃ ᐊᒻᒪᓗ ᒥᑭᓂᖅᓴᓂᒃ ᐃᖃᓗᖕᓂᒃ.
“ᐃᒻᒪᖄ ᒪᓕᒃᑐᖅ ᑰᖕᒥᒃ, ᐅᑭᐅᖅᑕᖅᑐᒧᑦ ᑎᑭᑉᐸᓪᓕᐊᑉᓗᓂ ᑲᔪᓯᑐᐃᓐᓇᖅᖢᓂ,” ᑕᐃᒪᓐᓇ ᐅᖃᖅᖢᓂ.
ᑕᐃᒪᐃᑦᑐᑦ ᑎᖕᒥᐊᑦ ᐅᑭᐅᖃᑦᑕᖅᑐᓄᑦ ᓅᑲᑕᖕᓂᖅᓴᐅᓲᑦ ᐊᒥᐊᓕᑲᒃᑯᑦ ᓄᓇᖓᓂᒃ ᓯᓚ ᓂᒡᓕᓂᖅᓴᐅᑎᓪᓗᒍ ᐊᒻᒪᓗ ᓂᕿᒃᓴᖅᓯᐅᖅᖢᑎᒃ ᐊᒻᒪᓗ ᕇᑦ ᐅᖃᖅᖢᓂ ᑎᖕᒥᐊᑦ ᑕᐃᒪᐃᓕᐅᖃᑦᑕᕆᐊᓖᑦ ᓄᓇ ᖁᐊᖅᑳᖅᑎᓐᓇᒍ.
“ᑕᐃᒪᐃᑦᑐᖅ ᑎᖕᒥᐊᖅ ᐅᑭᐅᖅᑕᖅᑐᒧᑦ ᑎᑭᓐᓇᓱᒃᖢᓂ ᓇᓚᐅᑦᑖᖅᑐᑎᑐᑦ ᐱᓇᓱᑐᐃᓐᓇᖅᑐᒃᓴᐅᔪᖅ,” ᑕᐃᒪᓐᓇ ᐅᖃᖅᖢᓂ. “ᑭᓯᐊᓂ ᖃᓄᐃᙱᑉᐸᑦ, ᓂᕆᑦᑎᐊᖃᑦᑕᖅᐸᑦ, ᓈᒻᒪᒃᐸᑦ, ᐊᐅᓪᓚᕐᓂᐊᖅᑐᒃᓴᐅᔪᖅ ᐅᑉᓗᓂᒃ ᖃᐃᔪᓂᒃ ᑕᓯᖁᑎᒋᔭᖅᐳᑦ ᖁᐊᖅᐸᑕ ᓂᕿᖃᙱᓐᓂᖅᓴᐅᓕᕐᓂᐊᕐᒪᑦ.”