Skip to content

Hᐊᒻᓚᒃᑯᑦ, ᑲᖏᖅᖠᓂᕐᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᖃᓄᐃᓕᐅᕈᑎᖃᕋᓱᒃᑐᑦ ᑲᐱᔭᐅᖃᑦᑕᕆᐊᖃᕐᓂᕐᒧᑦ ᒪᓕᒐᒃᑯᑦ

ᑲᖏᖅᖠᓂᕐᒥ ᐅᓐᓄᒃᑯᑦ ᐃᖃᐃᓕᓴᕐᕕᖕᒥ ᕿᑎᒋᐊᖅᑐᕐᓂᐅᓲᑦ ᓴᐃᒪᓐ ᐊᓚᐃᑦᑐᖅ ᐃᓕᓐᓂᐊᕐᕕᖕᒥ ᓄᖅᑲᖓᑎᑕᐅᔪᑦ ᒫᓐᓇᐅᔪᖅ Hᐊᒻᓚᒃᑯᑦ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᖏᖃᑎᒌᒃᓯᒪᙱᒻᒪᑕ ᑲᐱᔭᐅᓯᒪᖃᑦᑕᕆᐊᖃᕐᓂᐅᑉ ᒪᓕᒐᖓᒍᑦ.
28374492_web1_220309-KIV-hamletDEAfued_1
Albert Netser, Chair of the Rankin Inlet District Education Authority, said the hamlet’s vaccine passport bylaw is “creating two societies.” Stewart Burnett/NNSL photo ᐃᐅᐳᑦ ᓇᑦᓯᖅ, ᑲᖏᖅᖠᓂᕐᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦᑕ ᐃᒃᓯᕙᐅᑕᖓ, ᐅᖃᖅᖢᓂ ᑲᖏᖅᖠᓂᕐᒥ Hᐊᒻᓚᒃᑯᑦ ᑲᐱᔭᐅᖃᑦᑕᖅᓯᒪᔭᕆᐊᖃᕐᓂᕐᒧᑦ ᒪᓕᒐᖓᒎᖅ “ᒪᕐᕉᓕᖓᓕᖅᑎᑦᑎᔪᖅ.”

ᑲᖏᖅᖠᓂᕐᒥ ᐅᓐᓄᒃᑯᑦ ᐃᖃᐃᓕᓴᕐᕕᖕᒥ ᕿᑎᒋᐊᖅᑐᕐᓂᐅᓲᑦ ᓴᐃᒪᓐ ᐊᓚᐃᑦᑐᖅ ᐃᓕᓐᓂᐊᕐᕕᖕᒥ ᓄᖅᑲᖓᑎᑕᐅᔪᑦ ᒫᓐᓇᐅᔪᖅ Hᐊᒻᓚᒃᑯᑦ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᖏᖃᑎᒌᒃᓯᒪᙱᒻᒪᑕ ᑲᐱᔭᐅᓯᒪᖃᑦᑕᕆᐊᖃᕐᓂᐅᑉ ᒪᓕᒐᖓᒍᑦ.

Hᐊᒻᓚᒃᑯᑦ ᒪᑐᐃᖓᑎᑦᑎᔪᒪᔫᒐᓗᐊᑦ ᐅᓐᓄᒃᑯᑦ ᕿᑎᒋᐊᖅᑐᖃᑦᑕᕐᓂᐅᔪᓂᒃ ᐃᓕᓐᓂᐊᕐᕕᖕᒥ, ᑭᓯᐊᓂ ᑲᖏᖅᖠᓂᕐᒥ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐱᑎᑦᑎᑦᑕᐃᓕᖕᒪᑕ ᒪᓕᒐᖅ 326 – ᑲᐱᔭᐅᓯᒪᔭᕆᐊᖃᕐᓂᕐᒧᑦ ᒪᓕᒐᖅ – ᑲᔪᓯᑎᑕᐅᓯᒪᒃᐸᑦ.

ᕕᕗᐊᕆ 25-ᒥ, ᑲᖏᖅᖠᓂᕐᒥ Hᐊᒻᓚᒃᑯᑦ ᑲᑎᒪᔨᖏᑦᑕ ᑎᑎᕋᖅᑎᖓ ᑎᐊᓇ ᕕᑦᓯᐸᑐᕆᒃ ᖃᕆᑕᐅᔭᒃᑯᑦ ᑎᑎᕋᓚᐅᖅᑐᖅ ᑲᖏᖅᖠᓂᐅᑉ Hᐊᒻᓚᒃᑯᑦ ᕿᑎᒃᑐᓕᕆᔨᖓᓄᑦ ᑕᐃᕕᑎ ᑲᓛᒃᒧᑦ ᑎᑎᕋᖅᖢᓂ ᐅᑉᓗᒥᒧᑦ ᒪᓕᒃᑕᒃᓴᓕᐊᖑᓯᒪᔪᑦ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᕐᒧᑦ ᑕᐃᒪᐅᑎᓪᓗᒋᑦ ᐊᒻᒪᓗ ᖃᓱᒋᐊᖅᓯᓯᒪᑎᓪᓗᒍ ᒪᓕᒃᑕᐅᔭᕆᐊᓕᖕᓂᒃ ᕕᕗᐊᕆ 28-ᒥ, ᑲᑎᒪᔩᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᒪᑐᐃᖅᓯᒃᑲᓐᓂᕋᔭᕐᓂᖏᓐᓄᑦ ᐅᓐᓄᒃᑯᑦ ᕿᑎᒋᐊᖅᑐᖅᐸᒃᑐᓂᒃ ᓴᐃᒪᓐ ᐊᓚᐃᑦᑐᖅ ᐃᓕᓐᓂᐊᕐᕕᖕᒥ – ᐊᑕᐅᓯᕐᒥᒃ ᒪᓕᒋᐊᖃᖅᑎᑦᑎᓗᑎᒃ.

“ᐊᑕᐅᓯᐅᔪᖅ ᒪᓕᒃᑕᐅᔭᕆᐊᓕᒃ, ᐊᐃᕙᐅᑕᐅᔪᓐᓇᙱᑦᑐᖅ ᑲᔪᓯᒋᐊᕈᑕᐅᓇᔭᖅᑐᖅ,” ᑕᐃᒪᓐᓇ ᑎᑎᕋᖅᖢᓂ ᕕᑦᓯᐸᑐᕆᒃ. “ᑲᑎᒪᔩᑦ ᐊᑐᖅᑎᑦᑎᔾᔮᙱᑦᑐᑦ ᓇᓗᓇᐃᖅᓯᔭᕆᐊᖃᖃᑦᑕᕐᓂᕐᒧᑦ ᑲᐱᔭᐅᓯᒪᓂᕐᒥᒃ ᒪᓕᒡᓗᒍ ᒪᓕᒐᖅ ᓈᓴᐅᑎᓕᒃ 326-ᒥ ᐊᔭᐅᖅᑑᑕᐅᔾᔮᙱᑦᑐᖅ ᐃᓕᓐᓂᐊᕐᕕᖕᓂ. ᐃᓕᓐᓂᐊᕐᕕᑦ ᑕᒪᕐᒥᒃ ᑕᒪᐃᓐᓂᒃ ᐃᓄᖕᓂᒃ ᐃᓚᐅᖃᑕᐅᑎᑦᑎᓇᓱᒃᐸᖕᒪᑕ ᐊᒻᒪᓗ ᑕᒪᕐᒥᒃ ᐃᑲᔫᑏᑦ ᕿᑎᒃᑎᑦᑎᓂᐅᕙᒃᑐᑦ ᐃᓕᓐᓂᐊᕐᕕᖕᓂᒃ ᒪᑐᐃᖓᔭᕆᐊᓖᑦ ᑕᒪᐃᓐᓄᑦ ᐃᓄᖕᓄᑦ ᓄᓇᓕᖕᒥ.”

ᑲᓛᒃ ᑐᓂᓯᑉᓗᓂ ᖃᕆᑕᐅᔭᒃᑯᑦ ᑎᑎᕋᐅᑕᐅᓯᒪᔪᒥᒃ Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓᓄᑦ ᑎᐅᕆᓐ ᕕᓕᓐᒧᑦ, ᑎᐅᕆᓐ ᕕᓕᓐ ᖃᐅᔨᒋᐊᓚᐅᖅᖢᓂ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᕐᒧᑦ ᐃᖢᐊᖅᓴᐃᔨ ᒪᐃᑯ ᐸᑐᓴᓐᒧᑦ ᖃᓄᐃᓕᐅᕆᐊᖃᕐᒪᖔᕐᒥ.

ᐸᑐᓴᓐ ᑭᐅᑉᓗᓂ ᑐᑭᓯᐅᒪᔭᒃᑯᒡᒎᖅ Hᐊᒻᓚᒃᑯᑦ ᓇᓗᓇᐃᔭᐃᖃᑦᑕᖁᔨᔪᓐᓇᖅᑐᑦ ᑲᐱᔭᐅᓯᒪᔪᓂᒃ ᓄᓇᓕᖕᒥ ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓂᕈᐊᖅᖠᕈᓐᓇᙱᑦᑐᑦ ᐊᑐᓕᖅᑎᑦᑎᓂᕐᒧᑦ ᐊᑐᓕᖅᑎᑦᑎᙱᓐᓂᕐᒧᓪᓘᓐᓃᑦ. “ᒪᑐᐃᖓᑎᑦᑎᖃᑦᑕᖅᐸᑕ ᐃᓄᖕᓄᑦ ᐅᕝᕙᓘᓐᓃᑦ ᐅᓐᓄᒃᑯᑦ ᕿᑎᒋᐊᖅᑐᖃᑦᑕᕐᓂᐊᖅᑐᓄᑦ ᑕᐃᒪᐃᓕᐅᖅᑎᑦᑎᔭᕆᐊᓖᑦ ᒪᓕᒡᓗᑎᒃ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᒐᒃᓴᓕᐊᖏᓐᓂᒃ ᐊᒻᒪᓗ ᓄᓇᓕᖕᒥ ᒪᓕᒐᕆᔭᐅᔪᒃᑯᑦ,” ᑕᐃᒪᓐᓇ ᑎᑎᕋᖅᖢᓂ ᐸᑐᓴᓐ.

Hᐊᒻᓚᒃᑯᑦ ᑲᑎᒪᔨᖏᑦ ᐅᖃᖃᑎᒌᒍᑎᖃᓚᐅᖅᑐᑦ ᐊᖏᖃᑎᒌᒍᑕᐅᙱᑦᑐᒥᒃ ᕕᕗᐊᕆ 28-ᒥ ᑲᑎᒪᑎᓪᓗᒋᑦ.

“ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓈᒻᒪᒃᑐᒥᒃ ᐃᓱᒪᓕᐅᕈᑎᖃᓚᐅᖅᓯᒪᙱᓕᖅᑐᑦ ᖁᓕᓂᒃ ᐅᑭᐅᓂᒃ,” ᑕᐃᒪᓐᓇ ᐅᖃᖅᖢᓂ ᔭᔅᑕᓐ ᒥᐅᕆᑦ, “ᑕᐃᒪᓕ ᓱᖕᒪᑦ ᒫᓐᓇ ᓈᒻᒪᒃᑐᒥᒃ ᐅᖃᓕᕋᔭᖅᐸᑦ?”

ᐅᖃᖅᖢᓂ Hᐊᒻᒪᒃᑯᑦ ᒪᑐᓯᒥᐊᕋᔭᕐᒪᑕ ᕿᑎᒋᐊᖅᑐᖅᐸᒃᑐᓂᒃ ᑕᖅᑭᓗᒃᑖᒥ ᖃᐃᔪᒥ ᑲᑎᒪᔩᑦ ᕿᒥᕐᕈᓂᖃᖅᑎᓪᓗᒋᑦ ᒪᓕᒐᕐᒥᒃ – ᑲᑎᒪᔩᑦ ᐅᖃᖅᖢᑎᒃ ᖁᔭᓈᖅᑕᐅᔪᓐᓇᕋᔭᕐᓂᖓᓄᑦ ᐊᐃᕆᓕᒥᓪᓘᓐᓃᑦ ᕿᓚᒻᒥᐅᓂᖅᐹᒃᑯᑦ ᑐᑭᓯᒋᐊᕈᑎᒃᓴᓂᒃ ᑲᑎᑦᑎᖅᑳᕐᓗᑎᒃ – ᐊᒻᒪᓗ ᐃᓄᐃᑦ ᑐᓴᐅᒪᑎᑕᐅᓗᑎᒃ ᓱᖕᒪᑦ ᑕᒪᓐᓇ ᕿᑎᒋᐊᖅᑐᕐᓂᐅᕙᒃᑐᖅ ᓄᖅᑲᖓᑎᑕᐅᖕᒪᖔᑦ.

“ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐱᑐᐃᓐᓇᐅᑎᑦᑎᓇᓱᙱᒻᒪᑕ ᐃᓱᒪᓕᐅᖁᔨᑉᓗᑎᒃ” ᑕᐃᒪᓐᓇ ᐅᖃᖅᖢᓂ ᑲᑎᒪᔨ ᒥᐅᕆᑦ. ᐱᕕᒃᓴᖃᖅᑎᑦᑎᙱᑦᑐᑦ ᕿᑎᒋᐊᖅᑐᖅᐸᒃᑐᑦ ᑲᔪᓯᑎᑕᐅᓇᔭᖅᑎᓪᓗᒋᑦ ᐊᑕᐅᓯᒃᑲᓐᓂᕐᒥᒃ ᑕᖅᑭᕐᒥᒃ.”

ᐅᖃᓕᕆᑉᓗᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ “ᐱᑐᐃᓐᓇᐅᓇᓱᙱᑐᐃᓐᓇᕐᒪᑕ” ᐊᒻᒪᓗ ᐅᖃᖅᖢᓂ, “ᖃᓄᖅᑑᕈᓐᓇᐃᓪᓕᑎᑕᐅᔾᔮᙱᑦᑐᖓ ᐊᓯᔾᔩᖁᔭᐅᓗᖓᓗ ᐅᖃᐅᑎᔭᐅᔾᔮᙱᑦᑐᖓ.”

ᐱᓇᓱᐊᕈᓯᐅᑉ ᐃᓗᐊᓂ ᐱᓇᓱᐊᕈᓯᖅ ᐃᓱᓕᓕᖅᑎᓪᓗᒍ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᑲᑎᒪᑉᓗᑎᒃ ᒫᑦᓯ 3-ᒥ ᐅᖃᐅᓯᖃᓚᐅᖅᑐᑦ ᐊᖏᖃᑎᒌᒍᑕᐅᙱᑦᑐᒥᒃ. ᐃᒃᓯᕙᐅᑕᖅ ᐃᐅᐳᑦ ᓇᑦᓯᖅ ᐅᖃᖅᖢᓂ ᐃᓕᓐᓂᐊᖅᑐᓕᕆᔨᒃᑯᒡᒎᖅ ᑲᑎᒪᔨᖏᑦ ᑎᑎᖅᑲᖅᑖᓚᐅᕐᒪᑕ ᖃᕆᑕᐅᔭᒃᑯᑦ ᕕᓕᓐᒥᒃ ᐅᖃᐅᓯᖃᖅᖢᓂ ᐃᓱᒪᓕᐅᕈᑕᐅᔪᒥᒃ Hᐊᒻᓚᒃᑯᑦ ᑲᑎᒪᔨᖏᓐᓄᑦ.

ᑐᓴᖅᑎᑦᑎᑉᓗᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ Hᐊᒻᓚᒃᑯᑦ ᑲᒪᒋᔭᖓ ᐃᖃᐃᓕᓴᕐᕕᒃ ᓴᐃᒪᓐ ᐊᓚᐃᑦᑐᖅ ᐃᓕᓐᓂᐊᕐᕕᖕᒥ ᒪᑐᔭᐅᓂᐊᓕᕐᒪᑦ ᒪᑐᐃᒃᑲᓐᓂᙱᓪᓗᓂ.

ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ, ᐃᖕᒥᒃᑯᑦᑕᐅᖅ ᐃᓱᒪᓕᐊᒥᓂᒃ ᒪᓕᖕᓂᐊᕐᓂᕋᖅᓯᒪᑉᓗᑎᒃ.

“ᒥᑭᓪᓕᑎᖅᑎᕆᓂᐅᔪᖅ ᐊᖏᖃᑎᒋᙱᑕᖅᐳᑦ,” ᑕᐃᒪᓐᓇ ᐅᖃᖅᖢᓂ ᓇᑦᓯᖅ, ᐅᖃᐅᓯᖃᖅᖢᓂ Hᐊᒻᓚᒃᑯᑦ ᑎᑎᕋᓚᐅᖅᑕᖓᓂᒃ ᕕᕗᐊᕆᒥ ᐅᖃᐅᓯᖃᖅᖢᑎᒃ ᓈᒻᒪᒃᓴᙱᓐᓂᖏᓐᓄᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦᑕ ᐃᒪᓐᓈᖅᑐᕈᑎᖓᓂᒃ ᐊᒻᒪᓗ ᐅᖃᐅᓯᖃᓚᐅᖅᖢᑎᒃ ᐱᒻᒪᕆᐊᓘᖕᒪᑦ ᐱᐅᓯᕚᓪᓕᖅᑎᑦᑎᓇᓱᒋᐊᖃᕐᓂᑉᑎᓐᓄᑦ ᓄᓇᖅᑲᑎᑉᑕ ᐃᓱᒪᖏᓐᓂᒃ ᑎᒥᖏᓐᓂᒡᓗ.

“Hᐊᒻᓚᒃᑯᑦ ᐅᖃᖅᓯᒪᑉᓗᑎᒃ ᐃᒃᐱᒍᓱᖕᓂᖏᓐᓄᑦ ᐃᓄᐃᑦ ᐃᓱᒪᖏᓐᓂᒃ ᖃᓄᐃᙱᑦᑐᓐᓇᖁᑉᓗᒋᓪᓗ ᓄᓇᖅᑲᑎᒌᑦ, ᑭᓯᐊᓂ ᐃᑎᖅᑎᑦᑎᑦᑕᐃᓪᒪᓇᔭᖅᑐᑦ ᑲᐱᔭᐅᓯᒪᙱᓐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᓇᑦᓯᖅ. “ᒪᕐᕉᓕᖓᓕᖅᑎᑦᑎᔪᑦ.”

ᕗᐊᑦ ᕕᑦᕆᒡ, ᑲᑎᒪᔨᙳᖅᑎᑕᐅᓵᓚᐅᖅᑐᖅ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᑲᑎᒪᒋᐊᓕᖅᑎᓪᓗᒋᑦ, ᐅᖃᖅᖢᓂ ᑲᖏᖅᖠᓂᕐᒥᒎᖅ ᐃᖃᐃᓕᓴᕐᕕᒋᔭᐅᔪᖅ ᐅᐸᒍᓐᓇᐃᓪᓕᒍᑎᒋᓚᐅᖅᑕᖓ ᑲᐱᔭᐅᓯᒪᖃᑦᑕᕆᐊᖃᓕᖅᑎᓪᓗᒋᑦ ᒪᓕᒐᖅ ᒪᓕᒃᖢᒍ.

“Hᐊᒻᓚᒃᑯᑦ ᐱᓕᕆᕝᕕᒋᖕᒪᒍ,” ᑕᐃᒪᓐᓇ ᐅᖃᖅᖢᓂ. “ᒪᓕᒐᖅ 326 ᐊᖏᖃᑎᒋᓚᐅᙱᑕᕋ. ᐃᖢᐊᖅᓴᙱᓐᓇᒪ ᐱᓕᕆᔾᔪᔾᔨᔭᕆᐊᒃᓴᖅ ᑎᒥᐅᔪᒥᒃ ᑕᐃᒪᑦᑐᒃᑯᑦ ᐊᐅᓚᑎᑦᑎᔪᓂᒃ.”

ᐅᖃᖃᑎᒌᖅᑳᖅᖢᑎᒃ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓇᓗᓇᐃᖅᓯᓚᐅᖅᑐᑦ ᐃᓄᐃᑦ ᑎᒥᖁᑎᒋᔭᐅᔪᓪᓗ ᐊᑐᕈᓐᓇᐃᓐᓇᕐᓂᐊᕐᒪᑕ ᓴᐃᒪᓐ ᐊᓚᐃᑦᑐᖅ ᐃᖃᐃᓕᓴᕐᕕᖕᒥ ᕿᑎᒋᐊᖅᑐᕐᓗᑎᒃ, ᑲᐱᔭᐅᓯᒪᒍᑎᒃ ᑲᐱᔭᐅᓯᒪᙱᒃᑯᑎᒡᓘᓐᓃᑦ – ᐊᑐᓂ ᑐᒃᓯᕋᐅᑎᒥᒃ ᐱᔭᖅᑐᑐᐃᓐᓇᕆᐊᓖᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦᑕ ᑎᑎᕋᕐᕕᖓᓄᑦ, ᑭᓯᐊᓂ Hᐊᒻᓚᒃᑯᑎᒍᑦ ᐋᖅᑭᒃᓱᖅᑕᐅᓯᒪᔪᑦ ᐃᓂᖃᖅᑎᑦᑎᖃᑦᑕᕐᓂᖏᑦ ᒫᓐᓇᐅᔪᖅ ᓄᖅᑲᖓᑎᑕᐅᔪᑦ, ᒪᓕᒐᑎᒍᑦ ᐃᓚᐅᖃᑕᐅᓯᒪᓂᖓᒍᑦ.