ᐊᒥᓱᑦ ᓯᑭᑑᑦ ᓯᑕᒪᓖᓪᓗ ᐊᑭᖃᙱᑦᑐᒃᑯᑦ ᐋᖅᑭᒃᓱᖅᑕᐅᓚᐅᖅᑐᑦ 8-ᖑᔪᓄᑦ ᑯᐊᐸᒃᑯᑦ ᓴᓇᔨᖏᓐᓄᑦ ᓄᓇᕗᒥᐅᑕᓄᑦ ᐃᓚᐅᖃᑕᐅᑉᓗᒍ ᒥᑭᔪᓂᒃ ᐃᑯᒪᓂᒃ ᐋᖅᑭᒃᓱᐃᔪᓐᓇᖅᓯᔪᒪᓂᕐᒧᑦ ᐃᓕᓐᓂᐊᕈᑎᒃᑯᑦ ᑲᖏᖅᖠᓂᕐᒥ ᐃᓕᓐᓂᐊᓚᐅᖅᑐᑦ ᐱᓇᓱᐊᕈᓯᐅᓚᐅᖅᑐᒥ.
“ᓴᕆᒪᒋᑦᑎᐊᖅᑕᒃᑲ ᑖᑉᑯᐊ ᐊᖑᑎᑦ,” ᑕᐃᒪᓐᓇ ᐅᖃᖅᖢᓂ ᓯᐅᕆ ᓯᒪᑎᓚ, ᐃᓕᓐᓂᐊᕈᑎᒥᒃ ᑲᒪᔨ ᐃᓚᒌᒃᓴᒃᑯᓐᓄᑦ.
ᑕᒪᓐᓇ ᐃᓕᓐᓂᐊᕈᑎ ᐋᖅᑭᒃᓱᖅᑕᐅᓯᒪᔪᖅ ᐃᓕᓐᓂᐊᕈᑕᐅᔪᓐᓇᖁᑉᓗᒍ ᓄᓇᓕᖕᓂᒃ ᑯᐊᐸᒃᑯᑦ ᐃᑯᒪᓕᕆᔨᖏᓐᓄᑦ ᐃᓕᓐᓂᐊᒃᑲᓐᓂᕈᓐᓇᖁᑉᓗᒋᑦ ᐱᕚᓪᓕᕈᑎᒃᓴᒃᑯᑦ ᓴᓇᕝᕕᖏᓐᓂᒃ ᐃᑯᒪᓕᕆᔨᐅᓂᖏᓐᓂᒡᓗ.
“ᓯᕗᓪᓕᖅᐹᑦᑎᐊᕐᒥ ᐃᓄᖕᓂᒃ ᐃᓕᓐᓂᐊᖅᑎᑦᑎᔨᓂᒃ ᐊᑐᖅᑐᒍᑦ, ᑕᒪᓐᓇ ᐱᒻᒪᕆᐊᓗᒃ ᑲᔪᓯᑎᓯᒪᔭᖅᐳᑦ,” ᑕᐃᒪᓐᓇ ᐅᖃᖅᖢᓂ ᓯᒪᑎᓚ.
ᐃᓕᓐᓂᐊᖅᑎᑦᑎᔨᐅᓚᐅᖅᑐᑦ ᔭᐃᒥ ᓇᑲᓱᒃ ᐊᒻᒪᓗ ᔮᑭ ᓇᐅᓪᓚᖅ, ᐸᓐᓂᖅᑑᑉ ᑯᐊᐸᖓᓂᕐᒥᐅᑖᒃ.
“ᓯᕗᓪᓕᖅᐹᑦᑎᐊᕐᒥ ᐃᓕᓐᓂᐊᖅᑎᑦᑎᒋᐅᖅᖢᑎᒡᓗ, ᖁᔭᓐᓇᒦᖅᑕᒃᑲ ᐃᓕᓐᓂᐊᖅᑎᑦᑎᔪᓐᓇᕐᓂᕋᓚᐅᕐᒪᑎᒃ ᓴᓇᔨᑖᒃᑲᓐᓂᕈᓐᓇᖁᑉᓗᑕ ᐃᓄᖕᓂᒃ ᐃᓕᓐᓂᐊᖅᑎᑦᑎᔨᒃᓴᓂᒃ, ᐊᒻᒪᓗ ᑕᐃᒪᑐᖅ ᓯᕗᓂᒃᓴᒥ ᐃᓕᓐᓂᐊᖅᑎᑦᑎᖃᑦᑕᒃᑲᓐᓂᕈᒫᖅᑎᓪᓗᑕ, ᐃᓕᑦᑎᓯᒪᔪᓂᒃ ᐃᓕᓐᓂᐊᖅᑎᑦᑎᖃᑕᐅᔪᖃᖃᑦᑕᕈᒫᖅᐳᖅ.”
ᒪᕐᕉᒃ ᑯᐊᐸᒃᑯᑦ ᓴᓇᔨᖏᑦ ᐃᓕᓐᓂᐊᖃᑕᐅᓚᐅᖅᑑᒃ ᑭᕙᓪᓕᕐᒥᐅᑕᐅᓚᐅᖅᑑᒃ: ᐲᑕ ᓄᑲᖅᖠᖅ ᐊᑦᑖᑦᓯᐊᖅ ᖃᒪᓂ’ᑐᐊᕐᒥᐅᑕᖅ ᐊᒻᒪᓗ ᕋᐱ ᐊᒡᓘᒃᑲᖅ ᓇᐅᔮᕐᒥᐅᑕᖅ.
ᐊᑦᑖᑦᓯᐊᖅ ᐅᖃᓚᐅᖅᑐᖅ ᐊᓕᐊᓇᐃᑦᑐᐊᓘᓚᐅᖅᑐᕉᖅ ᑲᖏᖅᖠᓂᕐᒥ ᐃᓕᑦᑎᕙᓪᓕᐊᑉᓗᓂ ᐊᔾᔨᒌᙱᑦᑐᑕᐅᔪᓂᒃ ᐃᑯᒪᓂᒃ “ᐋᖅᑭᒃᓯᓚᐅᖅᑐᒍᑦ ᐃᒻᒪᖄ 15-ᓂᒃ 20-ᓄᑦ ᓯᑭᑑᓂᒃ ᐱᓇᓱᐊᕈᓯᐅᑉ ᐃᓗᐊᓂ,” ᑕᐃᒪᓐᓇ ᐅᖃᖅᖢᓂ ᐅᑎᕋᒥ ᐊᖏᕐᕋᒥᓄᑦ ᖃᒪᓂ’ᑐᐊᕐᒧᑦ. ᐊᕐᕕᓂᓕᖕᓂᒃ ᐅᑉᓗᓂᒃ ᐃᓕᓐᓂᐊᖅᑎᓪᓗᒋᑦ ᑲᖏᖅᖠᓂᕐᒥᐅᑦ ᓯᑭᑑᒥᓂᒃ ᐊᔾᔭᖅᑐᐃᖃᑦᑕᓚᐅᖅᑐᑦ ᐱᓕᕆᕝᕕᐅᔪᒧᑦ, ᐃᓛᓐᓂᒃᑯᑦ ᐳᐊᕐᕆᔭᖅᑕᐅᓯᒪᔪᑦ ᐱᖅᓯᖅᑳᓚᐅᖅᑎᓪᓗᒍ ᐊᒻᒪᓗ ᑲᒪᒋᔭᐅᓕᖅᖢᑎᒃ ᐱᓇᓱᐊᕈᓯᕐᒥᒃ ᑕᐃᑲᓂᑦᑕᐃᓐᓇᖅ, ᐃᑯᒪᓕᕆᔨᓄᑦ ᑲᒪᒋᔭᐅᓂᐊᖅᖢᑎᒃ ᐃᓕᓐᓂᐊᖅᑎᑦᑎᔨᑦ ᒥᐊᓂᖅᓯᔨᖏᑦ ᑕᐅᑐᒃᑎᓪᓗᒋᑦ.
ᐊᑐᓂ ᐃᓕᓐᓂᐊᖅᑎᑕᐅᔪᑦ ᐃᓕᑕᕆᔭᐅᔾᔪᑎᑖᓚᐅᖅᑐᑦ ᐃᓕᓐᓂᐊᕌᓂᒃᑲᒥᒃ.
ᓯᒪᑎᓚ ᐅᖃᖅᖢᓂ ᐃᓕᓐᓂᐊᕈᑎ ᑐᙵᕕᖃᕐᒪᑦ ᑯᐊᐸᒃᑯᑦ 7-ᖑᔪᒃᑯᑦ ᒪᓕᒐᖏᑦᑎᒍᑦ: ᐃᓕᓐᓂᐊᕐᓂᖅ ᐊᒻᒪᓗ ᐃᓕᓐᓂᐊᒃᑲᓐᓂᕈᓐᓇᕐᓂᖅ. ᐅᖃᖅᖢᓂ ᐱᒻᒪᕆᐊᓘᖕᒪᑦ ᓄᓇᓕᖕᓂ ᑯᐊᐸᒃᑯᓐᓄᑦ ᓴᓇᔨᖏᑦ ᐃᑯᒪᓕᕆᔪᓐᓇᕆᐊᖃᕐᓂᖏᓐᓄᑦ, ᓯᑕᒪᓕᖕᓂᒃ ᐋᖅᑭᒃᓱᐃᔪᓐᓇᕆᐊᖃᕐᓂᖏᓐᓄᑦ ᐊᒻᒪᓗ ᐊᓯᖏᓐᓂᒃ ᒥᑭᔪᓂᒃ ᐃᑯᒪᓂᒃ ᐊᐅᓪᓛᕈᑎᓂᒃ ᐊᑐᖅᑕᐅᕙᒃᑐᓂᒃ ᐅᑭᐅᖅᑕᖅᑐᒥ.
“ᖁᕕᐊᓱᒃᑐᑦ ᑕᑯᑉᓗᒋᑦ ᐃᓕᑕᕆᔭᐅᔾᔪᑎᑖᕌᖓᒥᒃ,” ᑕᐃᒪᓐᓇ ᐅᖃᖅᖢᓂ ᓯᒪᑎᓚ. “ᐱᒻᒪᕆᐊᓗᒃ ᐃᓕᑕᖅᓯᖃᑦᑕᕆᐊᖃᕐᓂᑉᑎᓐᓄᑦ ᐱᐊᓂᒃᓯᔪᖃᕌᖓᑦ.”