“ᑕᐃᒪᓐᓇ ᐅᖃᖃᑦᑕᖅᓯᒪᓕᖅᑐᒍᑦ ᐊᒥᓱᓄᑦ ᐅᑭᐅᓄᑦ, ᐱᕕᖃᕐᓂᐅᔪᖅ ᐱᑕᖃᕈᖕᓃᓕᖅᑐᖅ, ᐱᕕᖃᕐᓂᖅ ᐱᑕᖃᕈᖕᓃᓕᖅᑐᖅ,” ᐃᖅᖃᐅᒪᔪᖅ ᓕᓐ ᐱᑉᓕᓐᔅᑭ, ᐃᓄᒃᑎᑐᑦ ᐃᓂᐅᔪᓂᒃ ᐊᑎᑐᖃᕆᔭᐅᔪᓄᑦ ᐊᐅᓚᑦᑎᔨᐅᔪᖅ ᐃᓄᐃᑦ ᐃᑦᑕᕐᓂᑕᓂᒃ ᐸᐸᑦᑎᔨᒃᑯᓐᓄᑦ, ᓄᓇᙳᐊᓕᐅᖅᓯᒪᓕᖅᑐᑦ ᓄᓇᕗᒻᒥᑦ ᐃᓂᐅᔪᓂᒃ ᐃᓄᒃᑎᑐᑦ ᐊᑎᑐᖃᖏᓐᓂᒃ ᐊᑎᖃᐅᖅᑐᓂᒃ.
“ᐱᕕᖃᕐᓂᖅ ᓄᖑᓕᒻᒪᕆᒃᑐᖅ. ᑭᖑᕚᕇᑦ ᐃᓐᓇᕆᔭᐅᔪᑦ ᐱᕈᖅᓴᓚᐅᖅᑐᑦ ᖃᑕᙳᑎᖏᑦ ᐱᖃᑎᒋᑉᓗᒋᑦ ᓄᓇᒥᑦ ᐊᒻᒪᓗ ᓄᓇᓕᖕᓄᑦ ᓅᔅᖢᑎᒃ ᖃᐅᔨᒪᓂᕐᒥᑦ ᐱᓯᒪᓚᐅᖅᑐᓂᑦ ᐱᑕᖃᕈᖕᓃᓕᖅᑐᑦ. ᓄᑕᖅᖃᖏᑦ ᓄᑖᖑᑉᓗᑎᒃ ᐃᓐᓇᕆᔭᐅᔫᓕᖅᑐᑦ, ᑭᓯᐊᓂ ᐊᖓᔪᖅᖄᕆᓚᐅᖅᑕᖏᓐᓂᑦ ᖃᐅᔨᒪᓂᕐᒥᒃ ᐱᓯᒪᙱᑦᑐᑦ, ᑕᐃᒪᓐᓇᒧᑦ ᓄᓇᙳᐊᑦ ᐱᒻᒪᕆᐅᑦᑎᐊᖅᑐᑦ.”
ᐃᓄᐃᑦ ᐃᑦᑕᕐᓂᑕᓂᒃ ᐸᐸᑦᑎᔨᒃᑯᑦ ᐱᐊᓂᓵᓚᐅᖅᑐᑦ ᓇᐅᔮᓄᑦ ᓄᓇᙳᐊᖅ, ᐃᓄᒃᑎᑐᑦ ᐊᑎᑐᖃᖃᐊᖅᖢᓂ ᐱᔭᐅᔪᓂᒃ ᐃᓐᓇᕆᔭᐅᔪᓂᑦ ᐊᒻᒪᓗ ᖃᐅᔨᒪᓂᖃᖅᑐᓂᒃ, ᐊᒻᒪᓗ ᑐᓂᐅᖅᖃᐅᑕᐅᓚᐅᖅᑐᑦ ᓄᓇᓕᖕᒧᑦ ᓂᕆᕕᒡᔪᐊᖅᑎᓪᓗᒋᑦ. ᒫᓐᓇ, ᐊᐅᓚᑦᑎᔨᐅᔪᑦ ᓄᓇᙳᐊᓕᕆᔪᑦ ᖃᒪᓂᑦᑐᐊᕐᒧᑦ - ᖃᐅᔨᒪᓂᕆᔭᐅᔪᖅ ᑕᐃᒪᐅᑎᓐᓂᐊᕐᓗᒍ, ᑭᓯᐊᓂ ᓄᓇᙳᐊᖅ ᐱᓕᕆᐊᖃᑐᐃᓐᓇᖏᑦᑐᑦ ᓄᓇᓕᖕᒥᑦ ᖃᒪᓂᑦᑐᐊᕐᒥᑦ.
“ᐱᓕᕆᖃᑎᒌᖕᓂᖅᑕᖃᖅᑐᖅ ᐊᑯᓐᓂᖏᓐᓂᑦ ᐅᖅᓱᖅᑑᖅ ᐊᒻᒪᓗ ᖃᒪᓂᑦᑐᐊᖅ, ᐃᓱᒪᒋᑉᓗᒍ ᐅᖓᓯᒌᒃᑑᔭᖅᑐᑦ, ᐊᒻᒪᓗ ᐅᖓᓯᒌᒃᑑᔪᑦ, ᑭᓯᐊᓂ ᐃᓄᐃᑦ ᓄᓇᖃᕐᕕᒋᓚᐅᖅᑕᖏᑦ ᐊᒻᒪᓗ ᐱᓱᒃᖢᑎᒃ ᐃᖏᕐᕋᔭᕐᕕᒋᖃᑦᑕᓚᐅᖅᑕᖏᑦ ᐊᒻᒪᓗ ᐅᖓᓯᒃᑐᓄᑦ ᑎᑭᐅᑎᖃᑦᑕᓚᐅᖅᑐᑦ,” ᐅᖃᖅᑐᖅ ᐱᑉᓕᓐᔅᑭ, ᐅᖃᐅᓯᕆᑉᓗᒍ ᓄᓇᙳᐊᕐᒥᑦᑐᑦ ᐱᒻᒪᕆᐅᔫᑉᓗᑎᒃ ᑐᑭᓯᐅᒪᔾᔪᑎᐅᒪᑕ ᐃᓂᐅᔪᒥᑦ ᐊᑯᓐᓂᖏᓐᓃᑦᑐᑦ ᒪᕐᕉᒃ ᓄᓇᓖᒃ, ᐊᒥᓲᔪᓂᒃ ᖃᑕᙳᑎᒌᓂᒃ ᐊᒃᑐᐊᓂᖃᖅᖢᑎᒃ ᐅᖅᓱᖅᑑᕐᒥᑦ ᐊᒻᒪᓗ ᖃᒪᓂᑦᑐᐊᕐᒥᑦ.
“ᑕᐅᑐᒐᕆᑐᐃᓐᓇᕈᑉᑎᒍᑦ ᖃᒪᓂᑦᑐᐊᖅ ᑭᓯᒥ… ᐊᖏᔪᒥᒃ ᐃᓚᒋᔭᐅᔪᒥᒃ ᐱᙱᓐᓇᔭᖅᑐᒍᑦ.”
ᐱᖓᓲᓕᖅᑐᑦ ᐅᑭᐅᑦ ᐊᓂᒍᖅᑐᓂᑦ, ᐸᐸᑦᑎᔨᒃᑯᑦ ᓄᓇᙳᐊᓕᐅᓚᐅᖅᑐᑦ ᐊᕐᕕᐊᓄᑦ, ᐊᒻᒪᓗ ᐱᓕᕆᐊᖃᖅᑐᑦ ᒫᓐᓇᐅᔪᖅ ᓄᑖᙳᖅᑎᕐᓂᐊᕐᓗᒍ ᓴᓪᓕᕐᒧᑦ ᓄᓇᙳᐊᖅ ᓄᑖᐅᔪᓄᑦ ᓄᓇᙳᐊᖅᑎᑐᑦ.
ᐊᑕᐅᓯᖅ ᐅᔾᔨᕐᓇᖅᑐᖅ ᐃᓂᐅᔪᓂᒃ ᐊᑎᕐᓂᑦ ᓄᓇᙳᐊᒥᑦ ᐊᔾᔨᒌᙱᓐᓂᕆᔭᖏᑦ ᐊᑯᓐᓂᖏᓐᓂᑦ ᐃᓄᒃᑎᑐᑦ ᐊᑦᑎᖅᑕᐅᓯᒪᔪᑦ ᐃᓂᖏᑦ ᑕᐅᑐᖔᖅᖢᒋᑦ ᐱᖓᖕᓇᖓᓂᑦ ᓄᓇᕐᔪᐊᖑᔪᒦᑦᑐᓄᑦ: ᐱᖓᖕᓇᖓᓂᑦ ᐊᑦᑎᖅᑐᐃᒋᐊᔭᒃᑐᑦ ᐃᓄᐃᑦ ᐊᑎᖏᓐᓂᑦ ᐊᑦᑎᖅᑕᐅᑉᓗᑎᒃ, ᐃᓄᐃᓪᓕ ᐊᑐᖃᑦᑕᖅᑐᑦ ᑐᑭᓕᐅᖅᓯᒪᑉᓗᒍ ᐅᖃᐅᓯᒃᑯᑦ, ᐅᖃᖅᖢᑎᒃ ᓇᓃᓐᓂᖏᑦ ᑐᒃᑐᓄᑦ ᐃᓂᒋᔭᐅᓲᑦ, ᐅᓗᕆᐊᓇᖅᑐᓖᑦ, ᐅᓕᑦᑕᕐᓂᕐᒧᑦ ᑎᓂᑦᑕᕐᓂᕐᒧᑦ ᐊᐅᓚᓃᑦ ᐅᕝᕙᓘᓐᓃᑦ ᑕᑯᔭᐅᑉᓗᑎᒃ ᓇᓗᓇᐃᖅᓯᔾᔪᑏᑦ.
ᐊᖏᑎᒋᓂᖓ ᖃᐅᔨᒪᓂᕆᔭᐅᔪᖅ ᐊᓯᐅᔨᔭᐅᔪᖕᓇᖅᑐᑦ ᐅᑉᓗᓂᑦ ᐊᓂᒍᖅᐸᓪᓕᐊᔪᓂᑦ ᓄᓇᙳᐊᓕᐅᕆᙱᑉᐸᑕ, ᐅᖃᖅᑐᖅ ᐱᑉᓕᓐᔅᑭ.
“ᓄᓇᙳᐊᕐᒧᐊᖅᓯᙱᒃᑯᕕᑦ, ᐊᑏᑦ ᐳᐃᒍᖅᑕᐅᓂᐊᖅᑐᑦ ᐊᒻᒪᓗ ᐊᓯᐅᔨᔭᐅᓗᑎᒃ ᐊᒻᒪᓗ ᑕᑯᔭᐅᒃᑲᓐᓂᓚᐅᖅᓯᒪᔪᖕᓃᕐᓗᑎᒃ,” ᐅᖃᖅᑐᖅ.
ᓴᕆᒪᓱᓗᐊᖅᖢᓂᓗ ᐱᑦᑕᐅᔫᓂᖓᓂᑦ, ᐃᒪᕐᒧᑦ ᖃᐅᓯᓕᕐᓂᖅ ᐊᔪᖅᑐᖅ ᐊᓕᓚᔪᒧᐊᖅᓯᒪᖕᒪᑕ ᓄᓇᙳᐊᑦ.
“ᐱᒻᒪᕆᐅᔪᖅᐊᓕᓚᔫᓂᒃ ᓄᓇᙳᐊᓂᑦ ᐱᖃᕆᐊᖃᖅᑐᒍᑦ.”