ᕿᓚᒥᐅᔪᒃᑯᑦ, ᑎᔅᒪᓐ ᕿᓚᒃ ᓄᑲᖅᖠᖅ ᐊᔪᓕᕋᓱᒋᓚᐅᐱᓪᓚᓚᐅᖅᑐᖅ ᑳᓐᓱᒥᒃ ᓵᓚᖃᕋᓱᒃᑎᓪᓗᒍ. “ᖁᔭᓈᑐᐃᓐᓇᕈᒪᓚᐅᙱᓐᓇᒪ, ᑭᓯᐊᓂ ᐃᓚᖓᒍᓪᓗ ᖁᔭᓈᕈᒪᑉᓗᖓ, ᐋᓐᓂᐊᕈᒪᙱᓕᖅᖢᖓ,” ᑕᐃᒪᓐᓇ ᐃᖅᑲᐅᒪᔪᖅ 15-ᓂᒃ ᐅᑭᐅᓕᒃ ᖃᒪᓂ’ᑐᐊᕐᒥᐅᑕᖅ. “ᓯᑯᙱᖅᖢᖓ ᐃᒃᐱᒋᓕᓚᐅᖅᑐᖓ ᑎᒥᒐ ᑐᖁᕙᓪᓕᐊᔫᔭᖅᖢᓂ.”
ᐃᒻᒥᖅᑐᖅᑕᐅᖃᑦᑕᕐᓂᖓ ᑳᓐᓱᖃᕐᓂᕐᒧᑦ ᕿᑎᐊᒍᑦ ᐃᒻᒥᖅᑐᖅᑕᐅᓕᖅᑎᓪᓗᒍ ᐊᑯᓂ ᐅᓗᕆᐊᓇᖅᑐᒃᑯᓪᓗ ᕿᖓᒃᑯᑦ ᐊᐅᖃᑦᑕᕈᑎᒋᓚᐅᕐᒪᒍ.
ᐋᓐᓂᐊᕐᕕᖕᒦᑉᐸᒃᖢᓂ ᐊᑯᓂᓗᐊᖅ ᐊᐅᓕᕌᖓᑦ ᕿᖓᒃᑯᑦ, ᑎᔅᒪᓐ ᓄᑲᖅᖠᖅ ᓴᙱᓕᕙᓪᓕᐊᓚᐅᖅᑐᖅ. “ᐊᔪᓕᖅᐸᓪᓕᐊᔫᔭᓚᐅᖅᑐᖓ,” ᑕᐃᒪᓐᓇ ᐅᖃᖅᖢᓂ. “ᐊᐅᖏᔭᑦᑎᐊᓚᐅᕋᒪ. ᑕᒪᓐᓇ ᐅᕙᒻᓄᑦ ᑲᑉᐱᐊᓇᓚᐅᖅᑐᖅ.”
ᕿᖓᒃᑯᑦ ᐊᐅᖃᑦᑕᕆᐊᓕᓚᐅᖅᑐᖅ ᐃᒡᓗᒥ ᐊᑐᖅᑕᒥᓂᒃ ᐋᓐᓂᐊᕐᕕᐅᑉ ᖃᓂᒋᔭᖓᓂᒃ ᐊᓈᓇᒥᓃᖦᖢᓂ, ᓴᓈᖅ ᕿᓚᒃᒥ.
ᑎᔅᒪᓐ ᓄᑲᖅᖠᖅ ᐋᓐᓂᐊᕐᕕᓕᐊᕈᒪᙱᖅᑳᖅᖢᓂ, ᐊᐅᒍᓐᓃᖅᓯᐊᖑᔪᒪᑉᓗᓂ. “ᐊᐅᓗᐊᒧᑦ ᑲᒃᑭᐅᑎᒃᓴᑦ ᓱᓇᐅᔪᓐᓃᖅᖢᑎᒃ,” ᑕᐃᒪᓐᓇ ᐅᖃᖅᖢᓂ. “ᐊᐅᒃᑐᒻᒪᕆᐊᓘᓕᓚᐅᖅᑐᖓ. ᐋᓐᓂᐊᕐᕕᓕᐊᕈᒪᓇᖓ, ᐃᖕᒥᓂᒃ ᐊᐅᒍᓐᓃᕋᓱᖃᑦᑕᓕᖅᖢᖓ.”
ᑭᓯᐊᓂᓕ, ᐊᓈᓇᒥᓂᒃ ᐊᖏᕐᒪᑦ ᑐᐊᕕᕐᓇᖅᑐᒃᑯᑦ ᐋᓐᓂᐊᕐᕕᓕᐊᕈᔾᔭᐅᓕᓚᐅᖅᑐᖅ, ᐊᕙᓗᔭᐅᑲᐅᑎᒋᑉᓗᓂ ᓇᔭᙳᐊᓄᑦ ᐃᖢᐊᖅᓴᐃᔨᓄᓪᓗ.
“ᐊᐅᓗᐊᒧᑦ ᑎᒥᒐᓘᓐᓃᑦ ᐊᐅᓚᔪᓐᓇᐃᓪᓕᓪᓗᓂ,” ᑕᐃᒪᓐᓇ ᐃᖅᑲᐅᒪᔪᖅ ᑎᔅᒪᓐ ᓄᑲᖅᖠᖅ.
ᐊᐅᒍᓐᓃᖅᑎᑕᐅᓚᐅᖅᑐᖓ ᑕᐃᑲᓂ ᐅᓐᓅᔪᒥ, ᑭᓯᐊᓂ ᒪᕐᕉᒃ ᐅᑉᓘᒃ ᐱᐊᓂᖕᒪᑕ ᑕᐃᑲᓂ ᐋᓐᓂᐊᕐᕕᐅᑉ ᐃᒡᓗᑕᖓᓂ, ᐊᐅᓕᕐᒥᒋᑉᓗᓂ. ᑕᐃᑲᓂ ᑎᔅᒪᓐ ᓄᑲᖅᖠᖅ ᑕᑯᔫᔭᓚᐅᖅᑐᖅ.
“ᑐᐸᒍᓐᓇᐃᓪᓕᓐᓂᕋᒪ ᒪᕐᕉᖕᓂᒃ ᐅᑉᓗᓂᒃ, ᐃᒃᐱᒋᔪᓐᓃᖅᖢᖓᓗ,” ᑕᐃᒪᓐᓇ ᐅᖃᖅᖢᓂ. “ᐊᐅᓚᔪᓐᓇᕐᓇᖓ. ᑕᑯᑉᓗᖓ ᖃᐅᒪᔪᑯᓗᖕᒥᒃ. ᐅᕐᓂᓕᖅᖢᒍ ᖃᐅᒪᔪᖅ. ᐱᓱᒃᑑᔭᖅᖢᖓ ᖃᐅᒪᔪᒧᑦ ᑭᓯᐊᓂ ᖃᐅᒪᔪᖅ ᒥᑭᔪᑯᓘᑉᓗᓂ. ᑎᑭᑦᑐᓐᓇᖅᑑᔭᕐᓇᒍ. ᑎᑭᓐᓇᓱᒃᑕᒻᒪᕆᐊᓗᒋᓚᐅᖅᑕᕋ. ᐅᒡᓚᒃᑑᔭᖅᖢᖓ ᖃᐅᒪᔪᒧᑦ, ᑭᓯᐊᓂ ᑎᑭᙲᓐᓇᖅᖢᒍ.”
ᐃᒻᒥᖅᑐᖅᑕᐅᑉᓗᓂ ᕿᖓᒃᑯᑦ ᐊᐅᑐᐃᓐᓇᖃᑦᑕᓚᐅᙱᑦᑐᖅ, ᑲᒪᒋᔭᐅᑉᓗᓂ ‘ᑲᐴᑎᒃᑯᑦ’ ᓯᕝᕕᐊᖓᒍᑦ ᐃᓕᔭᐅᓯᒪᔪᒃᑯᑦ.
ᑎᔅᒪᓐ ᓄᑲᖅᖠᖅ ᐅᖃᖅᖢᓂ ᑳᓐᓱᖃᕐᓂᕆᓚᐅᖅᑕᖓᒎᖅ ᐃᒪᓐᓇ ᐅᖃᐅᓯᕆᔪᓐᓇᖅᑕᖓ ᖃᓄᖅ ᐃᒃᐱᖕᓇᓚᐅᕐᓂᖓᓄᑦ “ᐋᓐᓂᕐᓇᓚᐅᖅᑐᖅ ᑎᒥᒃᑯᑦ ᐊᒃᓱᕈᕐᓇᓚᐅᖅᑐᖅ.”
ᐃᓚᖓᓂ, ᑎᖑᖓ ᐳᕕᓕᓚᐅᖅᑐᖅ, ᐃᖢᐊᖅᓴᙱᖦᖢᓂᓗ ᐃᓅᓯᕐᒥᒍᑦ ᐊᒃᑐᖅᓯᓂᖃᖅᖢᓂ ᐃᓕᖅᑯᓯᖓᓄᑦ. “ᓂᙵᐅᒪᓚᐅᖅᑐᖓ ᐃᖢᐊᖅᓴᐃᔨᓄᑦ ᓇᔭᙳᐊᓄᓪᓗ,” ᑕᐃᒪᓐᓇ ᐃᖅᑲᐅᒪᔪᖅ. “ᐅᕙᒻᓂᒃ ᑕᑯᔭᖅᑐᕌᖓᑕ ᖃᐅᔨᓴᕆᐊᖅᑐᑐᐊᕌᖓᑕ, ᐱᑦᑎᐊᖃᑦᑕᓚᐅᙱᑕᒃᑲ ᓂᑉᓕᕐᕕᒋᔪᓐᓇᕐᓇᒋᓪᓗ … ᑕᐃᑉᓱᒪᓂ ᐊᒃᓱᕈᕐᓇᓪᓚᕆᓚᐅᕐᒪᑦ, ᐊᖏᕐᕋᖅᓯᓗᐊᒧᓪᓗ.”
ᓯᕙᓂᖅᑐᖅ ᐊᑖᑕᖓᑕ ᑐᓴᕐᓂᕆᓪᓚᕆᓚᐅᖅᑕᖓ
ᑎᔅᒪᓐ ᓄᑲᖅᖠᖅ ᖁᕕᐊᒋᔭᖃᕐᒪᑦ ᑭᒍᑎᒥᓂᒃ ᑮᓯᒪᔪᓐᓇᕐᓂᕐᒧᑦ ᐋᓐᓂᐊᓕᕌᖓᒥ. ᐊᐅᔭᒃᑯᑦ 2021-ᒥ, ᓈᕐᒥᒍᑦ ᐋᓐᓂᐊᕈᓱᒃᖢᓂ ᐊᒃᓱᒻᒪᕆᐊᓗᒃ. “ᐋᓐᓂᐊᕕᒡᔪᐊᖃᑦᑕᓕᖅᖢᓂᐅᒃ ᐅᑉᓗᑕᒫᒃᑯᑦ,” ᑕᐃᒪᓐᓇ ᐅᖃᖅᖢᓂ.
“ᐊᓕᐊᓇᐃᒋᔭᕋᓂᒃ ᐊᑐᕈᓐᓇᐃᓪᓕᓚᐅᖅᑐᖓ ᓲᕐᓗ ᐊᖑᓇᓱᖕᓂᕐᒥᒃ, ᐸᐅᕐᖓᖅᑕᕐᓂᕐᒥᒃ ᐅᕝᕙᓘᓐᓃᑦ ᐊᓃᑐᐃᓐᓇᕐᓂᖅ. ᑕᒪᒃᑯᐊ ᐊᑐᕈᓐᓇᐃᓪᓕᓚᐅᖅᑕᒃᑲ. ᐊᖏᕐᕋᐅᒪᑐᐃᓐᓇᖃᑦᑕᓕᖅᖢᖓ. ᑭᓇᑐᐃᓐᓇᕐᒧᑦ ᐅᖃᖃᑦᑕᕐᓇᖓ ᐋᓐᓂᐊᕆᔭᒻᓂᒃ ᒪᕐᕉᖕᓂᖃᐃ ᑕᖅᑭᕐᓂᒃ, ᐊᖏᕐᕋᐅᒪᑐᐃᓐᓇᖅᐸᒃᖢᖓ, ᐅᖃᓘᑎᒐᓃᖦᖢᖓ ᐊᒻᒪᓗ ᐋᓐᓂᐊᕐᓂᕋ ᓄᖅᑲᖅᓯᐊᕆᕙᒃᖢᒍ.”
ᑭᓯᐊᓂ ᐋᓐᓂᐊᕐᓂᕋ ᓄᖅᑲᖃᑦᑕᓚᐅᙱᑦᑐᖅ, ᐊᒻᒪᓗ ᓯᑎᐱᕆᒥ, ᐋᓐᓂᐊᕐᕕᓕᐊᖅᖢᓂ. ᒫᓐᓇᑲᐅᑎᒋ ᐊᐅᓪᓚᖅᑎᑕᐅᓚᐅᖅᑐᖅ ᐅᐃᓂᐲᒃᒧᑦ ᐊᔾᔨᓕᐅᖅᑕᐅᔭᖅᑐᖅᖢᓂ ᑎᒥᒃᑯᑦ, ᐱᕈᖅᑐᒥᒃ ᓇᓂᓯᕝᕕᐅᓚᐅᖅᑐᖓ ᐲᖅᑕᐅᑉᓗᓂ ᓯᑎᐱᕆ 16-ᒥ.
ᐅᐃᓂᐲᒃᒦᓕᓚᐅᖅᑐᖅ ᐃᒻᒥᖅᑐᖅᑕᐅᖃᑦᑕᖅᖢᓂ, ᓯᕙᓂᕈᑎᒥᒡᓗ ᓯᕙᓂᖅᑎᑦᑎᑉᓗᓂ ᓇᓗᓇᐃᖅᓯᕐᓂᒧᑦ ᑳᓐᓱᖃᕈᓐᓃᕐᓂᖓᓄᑦ ᒫᑦᓯ 15-ᒥ.
ᐊᑖᑕᖓᓄᑦ ᑎᔅᒪᓐ ᕿᓚᒃ ᐊᖓᔪᒃᖠᕐᒧᑦ, ᑐᓴᕐᓂᕐᓂᖅᐹᖑᓚᐅᖅᑐᕉᖅ ᓯᕙᓂᖅᑐᖅ ᑐᓵᖃᑦᑕᖅᓯᒪᔭᒥᓂᒃ.
“ᑐᓴᖅᖢᒍ ᓯᕙᓂᖅᑐᖅ,” ᕿᐊᒍᑎᒋᓚᐅᖅᑕᖓ. “ᓯᐅᑎᒻᓄᑦ ᑐᓴᕐᓂᕐᓂᖅᐹᖅ. ᓄᓇᕐᔪᐊᕐᒥ ᑐᓴᕐᓂᕐᓂᖅᐹᖅ ᑕᐃᒪᐅᓚᐅᖅᑐᖅ.”
ᑎᔅᒪᓐ ᓄᑲᖅᖠᖅ ᒪᕐᕉᐃᖅᑕᒃᑲᓐᓂᕐᓗᓂ ᑕᑯᔭᐅᒃᑲᓐᓂᕆᐊᖃᓚᐅᖅᑐᖅ, ᑭᓯᐊᓂ ᐃᒻᒥᖅᑐᖅᑕᐅᔭᕆᐊᖃᕈᓐᓃᖅᖢᓂ ᐊᖏᕐᕋᐅᔪᓐᓇᖅᓯᓂᐊᖅᖢᓂ ᐊᐃᕆᓕᒥ.
“ᓴᙱᔪᐊᓗᒃ ᓄᑲᑉᐱᐊᑯᓗᒃ,” ᑕᐃᒪᓐᓇ ᐅᖃᖅᑐᖅ ᐃᓐᓇᐅᓂᖅᓴᖅ ᑎᔅᒪᓐ. “ᓴᐱᓕᕋᓱᓚᐅᖅᑑᒐᓗᐊᖅ ᑭᓯᐊᓂ ᑲᔪᓯᓚᐅᖅᑐᖅ ᖃᓄᐃᑦᑐᓐᓃᕈᒪᓂᕐᒧᑦ.” ᐳᐃᒍᓚᐅᖅᓯᒪᔾᔮᙱᑦᑐᖅ ᓯᕙᓂᖅᑐᒥᒃ.
“ᐊᓂᑉᓗᓂ ᓴᑭᒐ ᐊᖑᑕᐅᓂᖅᓴᖅ ᐱᖃᑎᒋᑉᓗᒍ, ᓴᑭᒐᓗ ᐊᕐᓇᐅᓂᖅᓴᖅ ᐊᒻᒪᓗ ᐊᖓᔪᖅᑳᒃᑲ. ᑎᑭᓚᐅᕐᒪᑕ ᐅᐃᓂᐲᒃᒧᑦ ᑕᐅᑐᒍᒪᑉᓗᑎᒃ ᓯᕙᓂᖅᓯᔪᒥᒃ. ᑐᓴᕐᓂᕐᓂᕐᐹᖅ ᐃᓛᓪᓚᑦᑖᖅ ᓯᕙᓂᖅᑎᑦᑎᖕᒪᑦ ᓯᕙᓂᕈᑎᒥᒃ.”
ᐱᔪᒪᓂᖅᐹᕆᔭᖓ
“ᖁᕕᐊᓱᑦᑎᐊᖅᑐᖓ,” ᑕᐃᒪᓐᓇ ᐅᖃᖅᖢᓂ ᑎᔅᒪᓐ ᓄᑲᖅᖠᖅ ᐃᓱᓕᑉᐸᓪᓕᐊᖕᒪᑦ ᐊᒃᓱᕈᕐᓇᖅᑐᒃᑰᕈᑎᒋᓚᐅᖅᑕᖓ.
ᓴᙱᒃᑎᑉᐸᓪᓕᐊᓕᖅᑐᖅ. ᓴᙱᓂᕐᒥᓂᒃ ᓴᑉᑯᐃᓇᓱᓕᖅᑎᓪᓗᒍ ᐊᒃᓱᕈᕐᓇᕐᓂᖅᐹᖑᓚᐅᖅᑐᖅ, ᑕᐃᒪᓐᓇ ᐅᖃᖅᖢᓂ ᓴᓈᖅ.
“ᐃᒻᒥᖅᑐᖅᑕᐅᕌᓂᒃᑳᖓᑦ, ᐃᖢᐊᖅᓴᐅᑏᑦ ᓴᙱᔪᐊᓘᖃᑦᑕᕐᒪᑕ ᓇᓪᓚᖓᑐᐃᓐᓇᖃᑦᑕᓚᐅᖅᑐᖅ ᐃᒡᓕᕐᒥᓂᒃ ᒪᕐᕉᖕᓂᒃ ᐱᖓᓱᓂᒡᓘᓐᓃᑦ ᐅᑉᓗᓂᒃ ᓄᑭᖃᑦᑎᐊᕋᓂ ᖃᓄᐃᓕᐅᕈᒪᓇᓂ,” ᑕᐃᒪᓐᓇ ᐃᖅᑲᐅᒪᔪᖅ ᓴᓈᖅ.
ᐃᓅᔪᓐᓃᖅᐸᓪᓕᐊᑎᓪᓗᒍ ᕿᖓᒃᑯᑦ ᐊᐅᓗᐊᒧᑦ, ᐋᓐᓂᐊᖃᕐᓇᙱᑦᑐᓕᕆᔨᓂᒃ ᓴᓇᔨᓂᒃ ᑐᒃᓯᕋᖅᖢᓂ ᐱᒻᒪᕆᐊᓘᓚᐅᖅᑐᖅ ᐊᒃᓱᕈᕐᓇᕐᓂᖓ.
“ᕿᖓᒃᑯᑦ ᐊᐅᒃᑐᐊᓘᖃᑦᑕᓚᐅᕐᒪᑦ ᐊᐅᒍᓐᓃᕈᓐᓇᐃᓪᓕᓪᓗᓂ, ᐊᑎᓕᐅᖁᔭᐅᓚᐅᖅᑐᖓ ᐃᓅᑎᑕᐅᓇᓱᒐᔭᕐᒪᖔᕐᒪ ᐊᓂᖅᓵᕈᓐᓃᕈᒪ, ᖃᐅᔨᒪᔭᐅᓕᕐᒪᑦ ᐃᓅᔾᔮᙱᓐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ. “ᐊᐅᒍᓐᓃᖅᑎᑕᐅᔪᓐᓇᓚᐅᖅᑐᖅ.”
ᖁᔭᓕᓪᓚᕆᒃᑐᖅ ᖃᐅᒪᔪᑯᓗᖕᒧᑦ ᑎᑭᑦᑐᓐᓇᓚᐅᙱᒻᒪᑦ.
“ᖁᕕᐊᓱᑦᑎᐊᖅᑐᒍᑦ,” ᑕᐃᒪᓐᓇ ᐅᖃᖅᖢᓂ ᓴᓈᖅ. “ᓴᕆᒪᒋᑦᑎᐊᖅᑕᖅᐳᑦ. ᓴᙱᔪᒻᒪᕆᐊᓗᒃ ᒪᒃᑯᑯᓗᒃᖢᓂ ᓴᐱᓕᓚᐅᙱᑦᑐᖅ.”
ᓴᙱᒃᑎᑉᐸᓪᓕᐊᓕᕐᒥᔪᖅ ᓄᑭᑖᖅᐸᓪᓕᐊᓕᕐᒥᔪᖅ, ᐊᑕᐅᓯᕐᒥᒃ ᐱᔪᒪᓂᖅᐹᖓ ᐊᖏᕐᕋᕈᓂ.
“ᐊᑖᑕᑦᑎᐊᕐᒪ ᐃᓕᓐᓂᐊᖅᑎᓯᒪᖕᒫᖓ ᐊᖑᓇᓱᖕᓂᕐᒥᒃ ᒥᑭᔪᑯᓘᑉᓗᖓ,” ᑕᐃᒪᓐᓇ ᐅᖃᖅᖢᓂ ᑎᔅᒪᓐ ᓄᑲᖅᖠᖅ. “ᐊᕐᕌᓂ, ᐊᐃᕆᓕᒥ ᐊᑖᑕᑦᑎᐊᕐᒪ ᓯᑕᒪᓕᖕᒥᒃ ᓂᐅᕕᕈᑎᓚᐅᕐᒫᖓ ᐊᖑᓇᓱᒍᑎᒃᓴᒥᒃ. ᐊᖏᕐᕋᕈᒪ, ᓯᑭᑑᖅᑖᕐᓂᐊᕐᒫᖓ ᐊᖑᓇᓱᒍᑎᒥᒃ. ᐊᐱᕆᑉᓗᓂᖓ, “ᓱᓇᒥᒃ ᐱᔪᒪᓂᖅᐹᖑᕕᑦ?” ᑭᐅᓚᐅᖅᑐᖓ ᐊᖏᓂᖅᐹᒥᒃ ᐊᒃᖤᒍᒪᑉᓗᖓ ᓄᓇᕗᒥ. ᑕᐃᒪᐃᒻᒪᑦ ᐊᖏᕐᕋᕈᒪ, ᐊᒃᖤᒃᓯᐅᕈᒫᖅᑐᒍᑦ ᐊᖏᓂᖅᐹᒥᒃ ᐊᒃᖤᒍᓐᓇᖅᑕᕋᓂᒃ. ᐅᐊᕋᔮᖅ.”
ᑎᔅᒪᓐ ᐊᑖᑕᖓ ᖁᔭᓐᓇᒦᖅᑐᖅ ᐃᖢᐊᖅᓴᐃᔨᓂᒃ ᐅᐃᓂᐲᒃᒥ ᐊᒻᒪᓗ ᑕᒪᐃᓐᓂᒃ ᑐᒃᓯᐅᔾᔨᖃᑦᑕᓚᐅᖅᑐᓂᒃ. “ᑕᐃᒪᐃᓚᐅᙱᑉᐸᑕ, ᐃᕐᓂᖃᕈᓐᓃᕋᔭᓚᐅᖅᑐᒃᓴᐅᔪᒍᑦ,” ᑕᐃᒪᓐᓇ ᐅᖃᖅᖢᓂ ᑎᔅᒪᓐ ᐊᖓᔪᒃᖠᖅ.
ᑭᓇᑐᐃᓐᓇᖅ ᑕᐃᒪᐃᑦᑐᒃᑰᖅᑐᖅ ᑎᔅᒪᓐ ᓄᑲᖅᖠᐅᑉ ᓇᐅᒃᑰᕈᑎᒋᓚᐅᖅᑕᖓᑎᑐᑦ, ᓴᐱᓕᖅᑕᐃᓕᖁᓇᔭᖅᑕᒃᑲ. “ᖃᐅᒃᐸᑦ ᐅᑉᓗᖅ ᐱᐅᓂᖅᓴᐅᓂᐊᖅᑐᖅ ᐅᑉᓗᒥᐅᖓᓂ, ᖃᐅᒃᐸᒧᑦ ᑎᑭᓐᓇᓱᖃᑦᑕᕐᓗᓯ,” ᑕᐃᒪᓐᓇ ᐅᖃᖅᖢᓂ.