ᐋᔅᑐᕉ ᑕᕐᕆᔭᕐᕕᖓ ᐱᓇᔪᐃᓐᓇᖅᐳᑦ ᑕᐃᑲᓂ ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ, ᖁᔭᓐᓇᒦᒃ ᐃᓄᓕᒫᓄᑦ ᐱᔪᒪᓂᐅᔪᒥ ᑕᕐᕆᔭᖅᑎᑕᐅᓂᕐᒥ ᑕᕐᕆᔭᕐᕕᖕᒥ ᐃᖃᓗᖕᓂ ᖁᑦᑏᓐᓇᕐᓂᖓᓂ, ᐅᖃᖅᐳᖅ ᓇᖕᒥᓂᖃᖃᑕᐅᔪᖅ ᓵᓕᑦ ᑎᐅᓪᕝ.
“ᐊᐱᕆᔭᐅᖏᓐᓇᖅᐸᒃᐳᒍᑦ ᕙᐃᔅᐳᒃᑯᑦ, ‘ᖃᖓ ᒪᑐᐃᓛᖅᐱᓯ?’”
ᒪᕐᕉᖕᓂ-ᑕᓗᓕᖕᓂ ᑕᕐᕆᔭᕐᕕᒃ ᒪᑐᐃᕈᓐᓇᖅᓯᒪᙱᓚᖅ ᑕᑖᕐᓗᓂ ᑕᒪᕐᒥᒐᓚᖕᒥ ᖄᖏᖅᓯᒪᔪᒥ ᐊᕐᕌᒍᓄᑦ ᒪᕐᕉᖕᓄᑦ, ᐃᓄᓕᒫᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᓂᐅᔪᓂ ᓇᑉᐸᓪᓗᐊᖓᓂ ᐅᓄᙱᓐᓂᖅᓴᓂᒡᓘᓐᓃᑦ ᐃᓯᕈᓐᓇᖅᑎᑦᑎᑐᐃᓐᓇᖅᐸᒃᖢᑎᒃ ᐊᐃᑦᑐᐃᓂᖃᖅᑎᓪᓗᒍ.
ᐊᓂᑦᑕᐃᓕᒪᓂᐅᔪᓕᒫᒥ ᑕᕐᕆᔭᕐᕕᖓᑕ ᓂᐅᕕᕐᕕᕋᓛᖓ ᒪᑐᐃᖓᐃᓐᓇᓚᐅᖅᐳᖅ, ᑭᓯᐊᓂ ᐅᑯᐊ ᓂᐅᕕᖅᑕᐅᕙᒃᑐᑦ ᓈᒻᒪᑐᐃᓐᓇᖅᐳᑦ ᐊᑭᓖᓂᕐᒧᑦ ᑮᓇᐅᔾᔭᒃᓴᓂᐅᔪᓂ ᐅᓪᓗᓕᒫᖅᓯᐅᑎᓂ ᐃᖅᑲᓇᐃᔭᖅᑎᐅᔪᓄᑦ ᐊᒻᒪᓗ ᐊᓯᖏᓐᓂ ᐊᑭᐅᔪᓂ ᐊᑭᓖᔪᓐᓇᙱᓚᑦ, ᐅᖃᓚᐅᖅᐳᖅ ᑎᐅᓪᕝ.
ᒫᓐᓇ ᑕᐃᒪᐃᒃᑲᓐᓂᓕᖅᐳᖅ ᑎᑭᐅᑎᔪᒥ ᐆᒥᖓ ᒫᓐᓇᐅᔪᒥ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐱᒋᐊᓚᐅᖅᑐᒥ ᑎᓯᐱᕆ 2021 ᓄᙳᐊᓂ.
“ᐊᒃᓱᕈᕐᓇᖅᓯᒪᕗᖅ … ᐊᕐᕌᒍᑦ ᒪᕐᕉᖕᓂ ᐊᒻᒪ ᓇᑉᐸᓪᓗᐊᖓᓂ ᒪᑐᓯᒪᔭᕆᐊᖃᓚᐅᖅᐳᒍᑦ ᓄᑖᙳᕆᐊᖅᑎᑕᐅᓂᐅᔪᓄᑦ, ᐊᓱᐃᓛᒃ ᓄᕙᒡᔪᐊᕐᓇᖃᓕᓚᐅᖅᐳᖅ. ᐱᓕᕆᓯᒪᑐᐃᓐᓇᖅᐳᒍᑦ ᐱᓕᕆᔭᕆᐊᖃᖅᑕᑦᑎᓐᓂ.”
ᐋᔅᑐᕉ ᑕᕐᕆᔭᕐᕕᖓ, ᑕᐃᒪᓐᓇᑎᑐᑦ ᐊᓯᖏᓐᓂ ᓇᖕᒥᓂᖃᖅᑎᐅᔪᓂ, ᐊᑐᖅᑎᑦᑎᓚᐅᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ ᒥᑭᑦᑐᓄᑦ ᓇᖕᒥᓂᖃᖅᑎᐅᔪᓄᑦ ᐃᑲᔪᖅᓱᐃᓂᕐᒥ ᐱᓕᕆᐊᖑᔪᓂ ᐊᒻᒪ ᑎᐅᓪᕝ ᐅᖃᖅᐳᖅ ᐃᑲᔪᖅᓯᒪᔪᒥ, ᐃᓚᖃᖅᖢᓂ ᐊᓯᖏᓐᓂ ᐃᑲᔪᖅᓱᐃᓂᐅᔪᓂ ᐱᓕᕆᐊᖑᔪᓂ ᐊᑐᐃᓐᓇᐅᑎᑕᐅᔪᓂ ᒐᕙᒪᑐᖃᒃᑯᓐᓂ ᑕᐃᑲᓂ ᐊᒥᓱᓄᑦ ᖃᓂᒻᒪᓐᓇᐅᔪᒥ.
ᑕᕐᕆᔭᕐᕕᖓᓂ ᒪᑐᐃᖓᓂᖓᓂ ᐊᑲᐅᓚᐅᕋᔭᖅᑎᓪᓗᒍ, ᓇᖕᒥᓂᖃᖅᑎᐅᔪᑦ ᑐᑭᓯᐅᒪᕗᑦ ᐱᔭᕆᐊᖃᕐᓂᐅᔪᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᔪᓂ.
“ᐃᒃᐱᒋᑦᑎᐊᕆᐊᖃᖅᐸᐃᑦ ᐱᒻᒪᕆᐅᓂᖅᓴᐅᖕᒪᑦ ᓄᓇᓕᖕᒥᐅᓄᑦ ᐊᑦᑕᓇᔾᔭᐃᖅᓯᓯᒪᓂᖏᓐᓂ. ᑭᒃᑯᓕᒫᑦ ᐊᒃᓱᕈᖅᐳᑦ ᐊᒻᒪ ᐃᓚᖏᓐᓂ ᓴᒃᑯᐃᓐᓂᖃᕆᐊᖃᖅᐳᒍᑦ,” ᐅᖃᓚᐅᖅᐳᖅ.
Spiderman–ᒥ ᑕᕐᕆᔭᕈᒪᓂᖅ: No Way Home, ᖁᑦᑎᓛᖑᔪᒥ ᑮᓇᐅᔾᔭᒃᓴᓂᐅᔪᒥ ᑕᕐᕆᔭᓕᐊᖑᔪᒥ 2021–ᒥ, ᖁᑦᑏᓐᓇᕆᕗᖅ ᐊᒻᒪ ᐃᖃᓗᖕᒥᐅᑦ ᑕᕐᕆᔭᕆᐊᕈᓐᓇᓛᖅᐳᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᑦ ᖃᓱᒋᐊᖅᐸᑕ, ᐊᒻᒪᓗ Sing 2, ᐊᓕᐊᓇᐃᒋᔭᐅᕐᔪᐊᓚᐅᕐᒥᔪᖅ ᐃᖃᓗᖕᒥᐅᓄᑦ, ᐅᖃᐅᓯᐅᓪᓗᓂ ᑎᐅᓪᕝᒧᑦ.
“ᑕᑯᒃᓴᐅᑎᑦᑎᑐᐃᓐᓇᖃᑦᑕᙱᓚᒍᑦ ᕼᐋᓕᕗᑦᒥ ᑕᕐᕆᔭᓕᐊᖑᔪᓂ, ᑕᕐᕆᔭᖅᑎᑦᑎᓲᖑᒋᕗᒍᑦ ᓄᓇᖃᖅᑳᖅᓯᒪᔪᓄᑦ, ᓄᓇᕗᒻᒥ ᓴᓇᔭᐅᓯᒪᔪᓂ ᑕᕐᕆᔭᓕᐊᓂ, ᑕᕐᕆᔭᖅᑎᑦᑎᓯᒪᒋᕗᒍᑦ ᓄᓇᕗᒻᒥ ᕿᕐᓂᖅᑕᓄᑦ ᐊᑐᖅᐸᓚᐅᖅᑕᖏᓐᓂ ᑲᑐᔾᔨᖃᑎᒌᖑᔪᓄᑦ. ᑕᕐᕆᔭᕐᕕᑐᐃᓐᓇᐅᙱᑦᑐᖅ, ᓄᓇᓕᖕᓄᑦ ᑕᕐᕆᔭᕐᕕᐅᕗᖅ,” ᐅᖃᓚᐅᖅᐳᖅ.
“ᐊᓕᐊᓇᐃᓐᓂᐊᖅᐳᖅ ᑕᐃᒃᑯᓂᖓ ᑕᓗᐊᓗᖕᓂ ᑕᑯᒃᓴᐅᑎᑦᑎᒃᑲᓐᓂᕐᓂᖏᓐᓂ ᑕᕐᕆᔭᓂ.”