ᑲᖏᖅᖠᓂᕐᒥ Hᐊᒻᓚᒃᑯᑦ ᒪᑐᐃᖅᓯᓚᐅᖅᑐᑦ ᐸᑲᓪᓚᒃ ᑕᐃᒻᒥᒃ ᓴᖅᑭᑎᑦᑎᑉᓗᑎᒃ ᓄᑖᒥᒃ ᑕᑯᔭᒃᓴᒥᒃ ᑐᕌᖓᔪᖅ ᓈᓚᒡᕕᓕᕆᔨᐅᖏᓐᓇᓚᐅᖅᑐᒧᑦ ᕕᑖ ᐊᒃᓴᒡᔪᐊᕐᒧᑦ, ᐅᐱᒋᑉᓗᒍ ᓈᓚᒡᕕᓕᕆᔨᐅᓚᐅᖅᑐᖅ.
ᐊᒃᓴᒡᔪᐊᖅ ᐃᓅᔪᓐᓃᑳᓚᓚᐅᕐᒪᑦ ᓄᕕᐱᕆ 2021-ᒥ, ᓈᓚᒡᕕᓕᕆᔨᐅᖅᑳᖅᖢᓂ 40-ᖃᔭᕐᓂᒃ ᐅᑭᐅᓂᒃ.
“ᕕᑖ ᑲᖏᖅᖠᓂᐅᑉ ᓂᐱᒋᓚᐅᖅᑕᖓ,” ᑕᐃᒪᓐᓇ ᐅᖃᖅᖢᓂ ᐅᐃᔅᓕ ᐃᓄᒃᓱᒃ, ᐊᖓᔪᖅᑳᕆᔭᐅᔪᖅ ᓈᓚᒡᕕᖕᒥ. ᐅᖃᖅᖢᓂ ᑐᕌᖓᑎᓕᖅᖢᒍᒎᖅ ᓈᓚᒡᕕᒃ ᕕᑖᒧᑦ ᐅᕿᓪᓕᕚᓪᓕᕈᑕᐅᓚᐅᖅᑐᖅ ᓴᓇᔨᓄᑦ. “ᐃᒃᐱᖕᓇᖅᑐᐊᓘᓚᐅᖅᑐᖅ.”
ᐃᓄᒃᓱᒃ ᓈᓚᒡᕕᖕᒥ ᐱᓕᕆᓕᓚᐅᖅᓯᒪᔪᖅ 2005-ᒥ ᐅᖃᓪᓚᒃᑎᐅᑉᓗᓂ, ᐱᖓᓱᓂᒃ ᐅᑭᐅᓂᒃ ᓴᓇᖃᑎᖃᓚᐅᖅᑐᖅ ᐊᒃᓴᒡᔪᐊᕐᒥ.
“ᐊᖓᔪᖅᑳᑉ ᐃᓂᖓ ᒪᑐᐃᕐᓂᐊᓕᕐᒪᑦ,” ᑕᐃᒪᓐᓇ ᐃᖅᑲᐅᒪᑉᓗᓂ ᐃᓄᒃᓱᒃ. “ᕕᑖ ᐅᕙᒻᓂᒃ ᕿᕕᐊᖅᖢᓂ ᐃᒪᓐᓇ ᐅᖃᓚᐅᖅᓯᒪᔪᖅ, ‘ᐊᑏ ᓴᓇᕝᕕᒃᑖᕆᒍᒃ, ᐅᐃᔅᓖ.’ ᑕᐃᒪᙵᓂ 2008-ᒥ ᐅᑉᓗᒥᒧᑦ ᐊᖓᔪᖅᑳᕆᔭᐅᓕᖅᑐᖓ ᓈᓚᒡᕕᖕᒥ.”
ᐊᒃᓴᒡᔪᐊᖅ ᐃᓄᑦᑎᐊᕚᓘᓚᐅᖅᑐᖅ ᐃᖕᒥᓂᒃ ᒥᑭᓪᓕᑎᕆᕙᒃᖢᓂ, ᑕᐃᒪᓐᓇ ᐅᖃᖅᖢᓂ, ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᖅ ᑕᒪᐃᓐᓂᒃ ᓈᓚᒡᕕᖕᒥ ᓴᓇᓕᖅᑐᓂᒃ.
“ᐅᕙᒻᓂᒃ ᐃᓕᓐᓂᐊᖅᑎᑦᑎᓯᒪᓂᖓ ᐅᐱᓐᓇᖅᑐᐊᓗᒃ,” ᑕᐃᒪᓐᓇ ᐅᖃᖅᖢᓂ ᐃᓄᒃᓱᒃ. “ᐃᓄᑦᑎᐊᕚᓘᓚᐅᖅᑐᖅ, ᐃᖕᒥᓂᒃ ᒥᑭᓪᓕᑎᕆᕙᒃᖢᓂ, ᕿᑦᑐᕆᐊᒥᒡᓘᓐᓃᑦ ᐋᓐᓂᖅᓯᓇᔭᙱᑦᑐᖅ.”
ᐃᓅᔪᓐᓃᕐᒪᑦ ᐊᒃᓱᕈᕐᓇᖅᑐᒃᑰᓚᐅᖅᑐᑦ ᓴᓇᔩᑦ ᐊᒻᒪᓗ ᓄᓇᖅᑲᑎᒌᑦ.
“ᐃᑎᕐᓂᐊᖅᑑᔭᖃᑦᑕᓚᐅᖅᑐᖅ ᑐᙵᓇᕐᓗᓂᓗ ᑕᒪᐃᓐᓄᑦ, Hᐊᐃᕐᓗᓂ, ᐅᑉᓛᑦᑎᐊᕙᑦᓚᓗᓂ, ᖃᓄᑉᐱᓰᓚᓗᓂ. ᓂᐱᖓ ᑐᓴᕐᓂᐊᖅᑑᔭᖃᑦᑕᓚᐅᖅᑕᕋ ᐃᓅᔪᓐᓃᖅᓯᒪᓕᖅᑎᓪᓗᒍ. ᐊᒃᓱᕈᕐᓇᖅᑐᐊᓘᓚᐅᖅᑐᖅ.”
ᑲᖏᖅᖠᓂᕐᒥ ᒪᐃᔭ Hᐊᕆ ᑕᐅᑐᙱ ᐅᖃᖅᖢᓂ ᐊᒃᓴᒡᔪᐊᖅ ᐅᓂᑉᑳᕋᔪᓚᐅᕐᒪᑦ ᑎᑉᓯᓇᖅᑐᓂᒡᓗ. ᐃᖅᑲᐅᒪᑉᓗᓂᓗ ᐊᒃᓴᒡᔪᐊᖅ ᐅᓂᑉᑳᓚᐅᖅᓯᒪᓂᖓᓄᑦ ᑕᐅᑐᓚᐅᕐᓂᕐᒥᓂᒃ ᐱᕐᕈᓗᐊᕿᔪᓂᒃ ᐊᑉᖁᑎᒃᑯᑦ ᓯᓚᒥ ᓱᐴᖅᑐᕆᐊᖅᑐᖅᓯᒪᑉᓗᓂ, ᐅᑎᕋᒥ ᐱᓕᕆᕝᕕᖕᒥᓄᑦ ᓈᓚᐅᑎᒃᑯᑦ ᓂᐸᐃᑯᑖᒃᑎᑦᑎᓚᐅᖅᑐᖅ ᐃᓄᖕᓂᒃ ᐃᓅᔪᓐᓃᖅᑐᖃᕋᓱᒋᑉᓗᓂ, ᑭᓯᐊᓂ ᑕᐃᑉᑯᐊ ᐱᕐᕈᓗᐊᕿᔪᑦ ᖃᓄᐃᙱᓐᓂᖅᖢᑎᒃ.
ᐃᓕᑕᕆᔭᐅᔾᔪᑎ ᓴᖅᑭᑎᑕᐅᕌᓂᖕᒪᑦ, ᓄᓇᖅᑲᑎᒌᑦ ᐃᓄᒃᓯᐅᑎᓂᒃ ᓂᕆᕕᒡᔪᐊᕐᓂᖃᓕᓚᐅᖅᑐᑦ, ᐊᒃᓴᒡᔪᐊᑉ ᐊᔾᔨᖓ ᑕᑯᒃᓴᐅᑉᓗᓂ ᓴᓂᕋᒃᑯᑦ.
