ᓗᐊᕆ ᐃᓪᓚᐅᑦ ᕿᓂᖅᐳᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᙳᕋᓱᒃᐳᖅ ᓄᓇᕗᒻᒧᑦ ᐅᕘᓇ NDP–ᑯᑦ ᐊᐅᓚᖁᑎᖓᓐᓂ, ᓵᓚᖃᓚᐅᖅᑎᓪᓗᒍ ᓂᕈᐊᒐᖓᒃᓴᙳᕐᓂᖓᓂ ᐋᒍᔅᑎ 10–ᒥ ᐊᓂᕙᓪᓕᐊᔪᖅ NDP–ᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᓂᕈᐊᒐᒃᓴᐅᒃᑲᓐᓂᕈᒪᓚᐅᙱᒻᒪᑦ.
ᐃᒡᓗᓕᖕᒥᐅᑕᓪᓚᕆᐅᓪᓗᓂ, ᐃᓪᓚᐅᑦ ᑭᒡᒐᖅᑐᐃᔨᐅᕗᖅ ᐊᒻᒪ ᓇᖕᒥᓂᖃᖅᑎᐅᓪᓗᓂ, ᑭᒡᒐᖅᑐᐃᓯᒪᓪᓗᓂ ᓄᓘᔮᑦ ᓄᓇᒥ ᒥᐊᓂᖅᓯᔨᐅᓪᓗᓂ ᐹᕙᓐᓛᓐ ᑎᑎᕋᐃᓚᐅᕐᓂᖓᓂ ᓄᖅᑲᖓᑎᑦᑎᓂᕐᒥ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᔪᓂᒃ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ. ᓂᕈᐊᖅᑕᐅᓯᒪᒋᕗᖅ ᐃᖃᓗᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᒪᕐᕈᐃᖅᓱᖅᖢᓂ.
NDP–ᑯᑦ ᓇᓗᓇᐃᒃᑯᑕᖓ ᐅᕙᓂ ᓂᕈᐊᕐᓂᐅᔪᒥ ᐅᓇᐅᕗᖅ ᐸᕐᓇᒃᓯᒪᕗᑦ ᐱᐅᓂᖅᓴᐅᔪᒥ, ᐃᓚᖃᖅᑐᒥ ᓱᓕᓂᕋᐃᓂᐅᔪᓂ ᐱᐅᓂᖅᓴᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ, ᖃᓄᐃᓕᐅᕐᓂᐅᔪᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓴᐃᒻᒪᖃᑎᒌᖕᓂᕐᒥ, ᐃᓚᐅᑎᑦᑎᓂᕐᒥ, ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ. ᐸᕐᓇᒃᓯᒪᔪᑦ ᐱᐅᓂᖅᓴᐅᔪᒥ, ᐃᓪᓚᐅᑦ ᐅᖃᖅᐳᖅ, ᑲᓇᑕᐅᑉ ᐊᒻᒪ ᓄᓇᕘᑉ ᐱᐅᓂᖅᐹᖑᔪᒥ ᐊᖅᑯᑕᐅᕗᖅ ᓯᕗᒻᒧᐊᕆᓂᕐᒧᑦ.
“ᑐᓴᖅᓯᒪᕗᒍᑦ ᐊᒥᓱᓗᐊᓂ ᓱᕋᒃᓯᒪᔪᓂ ᓱᓕᓂᕋᐃᔪᓂ Liberal–ᑯᓐᓄᑦ ᐊᒻᒪ Conservatives–ᑯᓐᓄᑦ. ᐸᕐᓇᒃᓯᒪᔪᑦ ᐱᐅᓂᖅᓴᐅᔪᒥ ᐅᖃᖅᐳᒍᑦ ᖃᓄᐃᒻᒪᑦ ᐱᐅᓛᖑᓂᑦᑎᓐᓂ ᑲᑎᒪᔨᕐᔪᐊᖑᔪᓄᑦ ᐊᐅᓚᑦᑎᓂᕐᒧᑦ, ᑐᙵᕕᖃᖅᑐᒥ ᐊᖏᖅᓯᒪᓂᑦᑎᓐᓂ ᐃᑲᔪᖅᓱᐃᓂᖃᒃᑲᓐᓂᕐᓂᕐᒧᑦ ᓄᓇᓕᐅᔪᓄᑦ, ᑕᐅᑐᒃᑕᑐᐊᖃᑲᐃᓐᓇᙱᓪᓗᑕ ᐊᒃᖢᙱᑦᑐᓂ ᑮᓇᐅᔭᖃᕐᓂᖅᓴᐅᓂᖏᓐᓂ ᑭᓯᐊᓂ ᑖᒃᓯᓂ ᐊᑭᓖᖃᑦᑕᕐᓂᖏᓐᓄᑦ,” ᐅᖃᓚᐅᖅᐳᖅ.
ᐃᓚᒋᐊᖅᓯᕗᖅ ᑐᓂᓯᔪᒪᓂᖓᓂ ᐱᐅᓂᖅᓴᓂ ᐃᑲᔪᕈᑎᒃᓴᓂ ᐊᒻᒪ ᐱᔨᑦᑎᕋᕐᓂᐅᔪᓂ ᓯᕗᓪᓕᐅᔾᔭᐅᖁᔭᐅᔪᓂ ᐃᓂᐅᔪᓂ, “ᓲᕐᓗ ᐃᒡᓗᖃᖅᑎᑦᑎᒃᑲᓐᓂᕐᓂᕐᒥ, ᓄᑖᙳᕆᐊᖅᑎᑦᑎᓂᕐᒥ ᐊᒻᒪ ᐋᖅᑭᒋᐊᖅᓯᓂᕐᒥ ᐱᑕᖃᖅᐸᒌᖅᑐᓂ ᐃᒡᓗᓂᑦ. ᐃᒡᓗᒃᓴᓂ ᐊᑐᐃᓐᓇᐅᑎᑦᑎᒃᑲᓐᓂᕐᓂᕐᒥ ᐃᓄᑐᖃᕐᓄᑦ ᐊᒻᒪ ᑭᐅᓂᕐᒥ ᐅᖁᖕᒧᑦ ᑐᐊᕕᕐᓇᕐᓂᐅᔪᒥ.”
ᐱᓕᕆᔪᑦ ᓴᙱᓂᐅᔪᓄᑦ
ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐊᕙᑎᒧᑦ ᓴᐳᔾᔨᓯᒪᓂᐅᔪᒥ ᐊᒻᒪ ᐱᐅᓂᖅᓴᒥ ᐊᑐᐃᓐᓇᖃᕐᓂᖏᓐᓂ ᐃᒪᕐᒧᑦ ᐃᓚᒋᔭᐅᖃᑕᐅᕗᑦ ᐃᓪᓚᐅᑦ ᓯᕗᓪᓕᐅᔾᔭᐅᖁᔭᖏᓐᓂ, ᐃᓚᒋᔭᐅᔪᓂ ᐅᑯᓇᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐸᕐᓇᐅᑎᓂ ᐅᖃᐅᓯᖃᓪᓚᕆᓚᐅᖅᐳᖅ ᐱᐅᓯᒋᐊᖅᑎᑦᑎᓂᕐᒥ ᖃᕋᓴᐅᔭᑎᒍᑦ ᐊᑐᐃᓐᓇᖃᕐᓂᖓᓂ ᓄᓇᕗᒻᒥᐅᓄᑦ.
ᑭᒡᒐᖅᑐᐃᓪᓗᓂ ᓄᓇᕗᒻᒥ ᐊᒃᓱᕈᕐᓇᖅᑎᓪᓗᒍ ᐊᑕᐅᓯᑐᐊᒥ ᑭᒡᒐᖅᑐᐃᔨᖃᖅᑎᓪᓗᒍ, ᐃᓪᓚᐅᑦ ᐅᖃᖅᐳᖅ ᑕᐅᑐᒃᑕᑐᐊᖃᑲᐃᓐᓇᕈᒪᓂᖓᓂ “ᓴᙱᓂᐅᔪᓄᑦ-ᑐᙵᕕᓕᖕᒥ ᑐᕌᒐᕆᔭᐅᔪᒥ” ᓴᖑᑎᑦᑎᓂᕐᒥ ᐅᖃᓪᓚᖕᓂᐅᔪᒥ ᓄᓇᕗᒻᒥᐅᑦ ᑭᓇᐅᓂᖏᓐᓂ.
“ᓄᓇᕗᒻᒥᐅᑦ ᓴᙱᓂᖃᕐᔪᐊᖅᐳᑦ,” ᐅᖃᓚᐅᖅᐳᖅ ᐃᓪᓚᐅᑦ, “ᐆᒪᔪᓐᓇᕐᓂᕐᒥ ᐅᑭᐅᖅᑕᖅᑐᒥ ᐊᒻᒪᓗ ᓴᙱᓂᕗᑦ (ᐊᑐᖅᑕᐅᓂᖓᓂ) ᐋᔩᖃᑎᖃᖅᑎᓪᓗᑕ ᒐᕙᒪᑐᖃᒃᑯᓐᓂ, ᐅᓇᐅᙱᖔᖅᑐᖅ ᓄᓇᕗᒻᒥᐅᑦ ᑐᒃᓯᕋᕐᔪᐊᖅᖢᑎᒃ ᐃᑲᔪᕈᑎᒃᓴᒃᑲᓐᓂᕐᓂ ᐊᒻᒪᓗ ᐱᔨᑦᑎᕋᒃᑲᓐᓂᕐᓂᐅᔪᒥ.
“ᓇᓗᓇᐃᖅᓯᔭᕆᐊᖃᖅᐳᒍᑦ ᒐᕙᒪᑐᖃᒃᑯᑦ ᐃᑲᔪᕈᑎᒃᓴᓂ ᐱᔪᒪᒋᕗᑦ ᐅᕙᑦᑎᓐᓂ, ᐃᓕᓯᔪᒥ ᐃᓂᒃᑲᓐᓂᐊᔪᒥ ᐱᔪᓐᓇᕐᓂᖃᕐᓂᐅᔪᒥ.”
ᐃᓪᓚᐅᑦ ᓂᕈᐊᒐᒃᓴᐅᓂᖓᓄᑦ ᐱᓕᕆᓯᒪᕗᖅ ᑕᐃᒪᙵᓂ ᐋᒍᔅᑎᒥ, ᐳᓚᕋᖅᖢᓂ ᐊᔾᔨᒌᙱᑦᑐᓄᑦ ᓄᓇᓕᐅᔪᓄᑦ ᐃᓚᖃᖅᑐᒥ ᐃᒡᓗᓕᒃ, ᒥᑦᑎᒪᑕᓕᒃ, ᑲᖏᖅᖢᒑᐱᒃ, ᐸᖕᓂᖅᑑᖅ, ᑭᙵᐃᑦ ᐊᒻᒪᓗ ᐃᖃᓗᐃᑦ. ᐸᕐᓇᒃᓯᒪᓂᖃᕆᕗᖅ ᐳᓚᕋᕐᓂᕐᒥ ᐊᕐᕕᐊᓄᑦ ᐊᒻᒪ ᖃᒪᓂᑦᑐᐊᕐᒧᑦ, ᐃᓚᖃᖅᑐᒥ ᐳᓚᕋᒃᑲᓐᓂᕐᓂᐅᔪᓂ ᑲᖏᖅᖠᓂᕐᒧᑦ ᐊᒻᒪ ᐃᖃᓗᖕᓄᑦ.
ᐋᒍᔅᑎ 30–ᒥ, Liberal–ᑯᑦ ᓯᕗᓕᐅᖅᑎᖓ ᐊᒻᒪ ᑲᓇᑕᒥ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐳᓚᕋᓚᐅᖅᐳᖅ ᐃᖃᓗᖕᓄᑦ, ᓯᕗᓪᓕᖅᐸᐅᓪᓗᓂ ᒐᕙᒪᑐᖃᒃᑯᑦ ᓯᕗᓕᐅᖅᑎᐅᔪᒥ ᑕᐃᒪᐃᓐᓂᖓᓄᑦ, ᓱᓕᓂᕋᐃᓪᓗᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᒃ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ $360 ᒥᓕᐊᓐᓂ ᓱᓕᓂᕋᐃᓪᓗᑎᒃ ᐃᒡᓗᒃᓴᖃᖅᑎᑦᑎᓂᕐᒧᑦ ᓄᓇᕗᒻᒥ. ᓱᓕᓂᕋᐃᔪᑦ ᑕᒪᒃᑭᑦ ᐃᓗᓕᖃᖅᑑᔮᙱᑦᑐᓂ ᐊᒻᒪ ᓱᖏᐅᓐᓇᖅᖢᓂ ᐃᓪᓚᐅᒻᒧᑦ.
“ᑖᒃᑯᓂᖓᑦᑕᐃᓐᓇᖅ ᐅᖃᐅᓯᖃᕐᓂᕐᒥ ᓱᓕᓂᕋᐃᔪᓂ ᐊᐃᑦᑖᕈᓱᖕᓇᖅᐳᖅ,” ᐅᖃᓚᐅᖅᐳᖅ, “ᐊᑲᖅᓴᕐᓇᙱᓚᖅ, ᓱᓕ ᓈᒻᒪᙱᓚᖅ ᓄᓇᕗᒻᒥᐅᓄᑦ.”
“ᑐᓂᔭᐅᓚᐅᖅᐳᖓ ᓈᓴᐅᑎᓂ ᐸᖕᓂᖅᑑᒦᑎᓪᓗᖓ (ᓯᑎᐱᕆ 2–ᒥ),” ᐅᖃᓚᐅᖅᐳᖅ. “ᐅᑯᐊ ᓈᓴᐅᑎᐅᔪᑦ ᐅᕙᑦᑎᓐᓄᑦ ᑐᓂᔭᐅᓚᐅᖅᑐᓂ Liberals–ᑯᓐᓄᑦ ᐱᑎᑦᑎᓇᔭᖅᐳᖅ ᐱᖓᓱᓂ ᓄᑖᓂ ᐃᒡᓗᒃᓴᐅᔪᓂ ᐊᕐᕌᒍᑕᒫᒥ ᐸᖕᓂᖅᑑᒥ … 5–ᐸᓗᖕᓂ ᐃᓄᖕᓂ ᐅᑕᖅᑭᔪᓂ ᐃᒡᓗᑖᕋᓱᐊᖅᑐᓂ.
“ᓱᓕᓂᕋᐃᕗᑦ ᓄᓇᕗᒻᒥᐅᑦ ᐅᑕᖅᑭᔪᓃᖏᓐᓇᕐᓂᐊᕐᓂᖏᓐᓂ ᐃᒡᓗᑖᕋᓱᐊᖅᑐᓂ.”
ᑭᒡᒐᖅᑐᐃᓪᓗᓂ ᓄᓇᕗᒻᒥ ᐋᑐᕚᒥ ᓂᕆᐅᒋᔭᐅᑎᓪᓗᒍ ᐊᒃᓱᕈᕐᓇᕐᓗᓂ ᐃᖅᑲᓇᐃᔮᖑᓂᖓᓂ, ᐃᓪᓚᐅᑦ ᐅᒃᐱᕈᓱᖕᓂᖃᑦᑎᐊᖅᐳᖅ NDP–ᑯᑦ ᐃᒻᒥᓂᒃ ᐃᑲᔪᖅᓱᐃᑦᑎᐊᕐᓂᐊᕐᓂᖏᓐᓂ ᐊᒻᒪᓗ ᓇᓗᓇᐃᖅᓯᓗᑎᒃ ᐱᐅᓂᖅᓴᓂ ᐃᑲᔪᖅᓱᐃᓂᖃᕐᓂᖏᓐᓂ ᐊᒻᒪ ᓄᓇᕗᒻᒥᐅᓂᒃ ᖃᓪᓗᓈᑦ ᓄᓇᖓᓐᓃᑎᓪᓗᒍ.
“ᐱᐅᔪᐊᓗᖕᓂ ᑲᑎᒪᔨᐅᖃᑎᖃᕐᓂᐊᖅᐳᖓ ᐅᕙᓐᓂ ᐃᑲᔪᖅᓱᐃᓂᐊᖅᑐᓂ ᐊᒻᒪᓗ ᓇᓗᓇᐃᖅᓯᓂᕐᒥ ᐃᑲᔪᖅᓱᐃᓂᖃᑦᑎᐊᕐᓂᑦᑎᓐᓂ ᐊᒻᒪ ᐱᕚᓪᓕᕈᑕᐅᔪᓂ ᐅᑎᖅᑐᓄᑦ ᓄᓇᕗᒻᒧᑦ,” ᐅᖃᓚᐅᖅᐳᖅ.