Skip to content

Oil tanker hit bottom outside Baker Lake

Event shows hydrographic maps can be unreliable
34647882_web1_231129-KIV-bottomcontactboat_2
Damage to the vessel, viewed from the exterior as seen in the Transportation Safety Board of Canada’s report. Photo from Coastal Shipping Limited

ᐊᕐᕌᓂ ᐅᖅᓱᐊᓗᖕᒥᑦ ᐅᓯᖃᑦᑕᖅᑐᖅ ᐃᒃᑲᕐᕆᖅᖄᖅᑎᓪᓗᒍ ᐃᒡᓗᓕᒑᕐᔪᒥᙶᖅᖢᓂ, ᑕᕆᐅᒃᑯᑦ ᐅᒥᐊᖅᑐᖃᑦᑕᖅᑐᑦ ᐃᖅᖃᐃᑎᑕᐅᔪᑦ ᐃᒪᕐᓄᑦ ᓇᓗᓇᐃᔭᐅᑏᑦ ᑕᑯᒃᓴᐅᑎᑦᑎᔪᑦ ᑕᐃᑉᓱᒪᓂᒥᑦ ᐃᒪᐅᑉ ᖃᓄᐃᖓᓂᕆᔭᖓᓂᑦ ᖃᐅᔨᓴᖅᑕᐅᓚᐅᖅᑐᓂᑦ ᐊᒻᒪᓗ ᑕᑯᒃᓴᐅᑎᑦᑎᙱᑦᑐᖕᓇᖅᑐᑦ ᖃᓄᐃᓕᐅᕐᓂᕆᔭᖓᑕ ᑕᕆᐅᑉ ᐊᓗᐊᓂᑦ.

ᑲᓇᑕᒥᑦ ᐃᖏᕐᕋᔭᒃᑐᓂᒃ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᑦ ᓴᖅᕿᓚᐅᖅᑕᖓᑦ ᖃᐅᔨᓴᐃᓂᖓᓐᓄᑦ ᐅᓂᑉᑳᖓᑦ ᖃᒪᓂᑦᑐᐊᑉ ᓯᓚᑖᓂᑦ ᐃᑲᕐᕆᓚᐅᖅᑐᒧᑦ ᐅᑭᐅᓖᑦ 28, 2022-ᒥᑦ. ᑭᕙᓪᓕᖅ W., (Kivalliq W.) ᐅᒥᐊᕐᔪᐊᑉ ᐊᑭᕋᖓ ᓴᓂᕋᖓᓗ ᒪᕐᕈᐃᖓᔪᒥᑦ ᐅᖅᓱᐊᓗᖕᒥᑦ ᐊᓯᖏᓐᓄᓪᓗ ᐅᓯᖃᑦᑕᖅᑐᖅ ᓇᖕᒥᓂᕆᔭᐅᔪᖅ ᐃᒪᒃᑯᑦ ᐊᒡᔭᖅᑐᐃᔨᑦ ᓕᒥᑎᑦ-ᑯᓐᓄᑦ (Coastal Shipping Limited), ᐱᐊᓂᓚᐅᖅᑕᖓᑦ ᐅᒥᐊᕐᔪᐊᕐᒥᑦ-ᐅᒥᐊᕐᔪᐊᕐᒧᐊᖅᓯᓂᖓᑦ ᒫᕐᓕᓐ ᐊᒥᑐᕆᓐ-ᒧᑦ (Marlin Ametrine) ᑭᓴᖅᓯᒪᑎᓪᓗᒋᑦ ᖃᓂᑕᖓᓂᑦ ᖁᓕᒥᒎᓕᒃ ᕿᑭᖅᑕᐅᑉ (Helicopter Island) ᐊᒻᒪᓗ ᐅᓕᖅᖄᖅᑎᓪᓗᒍ ᒪᕐᕉᒃ ᐃᑲᕐᕋᓂᑦ ᐃᒡᓗᓕᒑᕐᔫᑉ ᓱᑉᓗᐊᓂᙵᕐᓗᑎᒃ ᖃᒪᓂᑦᑐᐊᕐᒧᐊᕐᓂᐊᕐᓗᑎᒃ.

ᐊᓂᒎᑎᓂᕐᒧᑦ ᐸᕐᓇᐅᑎᖓ ᒪᓕᒃᖢᒍ, ᐅᒥᐊᕐᔪᐊᑉ ᐊᑖ ᐊᔪᙱᓐᓂᐊᖅᑐᕆᔭᐅᓚᐅᖅᑐᖅ 1 ᒦᑕᒥᒃ ᑕᕆᐅᑉ ᐊᓗᐊᓂᑦ ᐃᖏᕐᕋᑎᓪᓗᒍ ᐃᒡᓗᓕᒑᕐᔫᑉ ᓱᑉᓗᐊᓂᙶᕐᓗᓂ.

ᐅᑉᓛᒃᑯᑦ 4:50-ᒧᐊᖅᑎᓪᓗᒍ, ᐅᒥᐊᕐᔪᐊᖅ ᓴᖑᑉᓗᓂ ᐃᒡᓗᓕᒑᕐᔫᑉ ᓱᑉᓗᐊᓂᙶᕆᐊᖅᖢᓂ, ᐅᒥᐊᕐᔪᐊᓗᒃᑖᒥᑦ ᓴᔪᕋᓛᖅᑐᒥᒃ ᐃᒃᐱᒋᑉᓗᑎᒃ, ᐊᒻᒪᓗ ᐅᒥᐊᕐᔪᐊᖅ ᐅᐸᓗᑲᐅᑎᒋᓚᐅᖏᑦᑐᖅ ᖃᓄᐃᓕᐅᖁᓂᕐᓄᑦ, ᑎᑎᕋᖅᓯᒪᔪᖅ ᐅᓂᑉᑳᒥᑦ.

“ᑭᖑᓂᑦᑎᐊᖓᒍᑦ, ᐊᖓᔪᖅᖄᖅ ᑎᓕᓯᓚᐅᖅᑐᖅ ᐱᓕᕆᔨᒥᒃ ᖃᐅᔨᓴᖁᑉᓗᒍ ᐅᓯᔭᐅᔪᓄᑦ ᐊᐅᓚᑦᑎᕝᕕᖕᒥᑦ ᖃᐅᔨᓴᕐᓗᒋᑦ ᖃᐅᔨᑎᑦᑎᔾᔪᑏᑦ ᐃᒪᖅᑖᖅᐸᓪᓕᐊᖕᒪᖔᑦ, ᐱᒋᐊᖅᑎᑦᑎᑉᓗᓂᓗ ᑐᐊᕕᓇᖅᑐᖃᖅᐸᑦ ᐊᑐᖅᑕᐅᔪᒃᓴᓂᒃ,” ᑎᑎᕋᖅᓯᒪᔪᖅ ᐅᓂᑉᑳᒥᑦ. “ᐃᓱᒪᒋᔭᐅᓚᐅᖅᑐᖅ ᐅᒥᐊᕐᔪᐊᖅ ᐃᒃᑲᕆᑦᑐᖅ ᑎᑎᕋᖅᑕᐅᓯᒪᙱᑦᑐᒥᑦ ᑕᕆᐅᑉ ᐊᓗᐊᓃᑦᑐᒧᑦ.”

ᐅᒥᐊᕐᔪᐊᕐᒥᑦ ᐱᓕᕆᔩᑦ ᖃᐅᔨᑎᑦᑎᑉᓗᑎᒃ ᖃᐅᔨᓴᖅᑕᐅᖁᑉᓗᒋᑦ ᐅᒥᐊᕐᔪᐊᕐᒦᑦᑐᑦ ᐃᒪᖃᐅᓯᕝᕖᑦ ᐃᒪᖅᑖᖅᐸᓪᓕᐊᖕᒪᖔᑕ.

“ᐊᒥᐊᕐᔪᐊᖅ ᓯᕗᓂᐊᓂᑦ ᓴᓂᐊᓄᑦ ᖃᐅᔨᒋᐊᕐᒪᑦ, ᐃᒪᖃᓚᐅᖅᑐᖅ ᓈᓴᐅᑎ 3-ᒥᑦ ᓯᕗᓂᐊᑕ ᓴᓂᐊᓂᑦ ᐃᒪᖃᐅᕝᕕᖕᒥᑦ,” ᐅᓂᑉᑳᒥᑦ ᑎᑎᕋᖅᓯᒪᔪᖅ. “ᐃᖏᕐᕋᓂᐊᓵᖅᑎᓪᓗᒋᑦ, ᐃᒪᖃᐅᓯᕝᕕᒃ ᐃᒪᖃᓚᐅᖏᑦᑐᖅ; ᐃᒪᖃᕐᓂᖓ ᐃᒪᖃᐅᓯᕝᕕᒃ ᐱᓕᕆᔨᓂᒃ ᓇᓗᓇᐃᖅᓯᓚᐅᖅᑐᖅ ᐅᒥᐊᕐᔪᐊᖅ ᐃᑲᕐᕆᒻᒪᑦ ᐊᒻᒪᓗ ᐅᓯᕝᕕᒃ ᐊᒃᑐᖅᑕᐅᑉᓗᓂ. ᐊᓯᓗᒃᑖᖏᑦ ᐃᒪᖃᐅᓯᕝᕖᑦ ᖃᓄᐃᑦᑑᔭᙱᖦᖢᑎᒃ, ᐃᓚᐅᑉᓗᑎᒃ ᐃᑯᒪᖏᓐᓄᑦ ᐃᓂᐅᔪᑦ. ᑐᓴᖅᑎᑦᑎᖅᖄᖅᑎᓪᓗᒋᑦ ᑲᓇᑕᒥᑦ ᐃᖏᕐᕋᔭᒃᑐᓂᒃ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᓐᓂᑦ ᐊᒻᒪᓗ ᒥᐊᓂᖅᓯᔨᒃᑯᓐᓂᑦ, ᐅᒥᐊᕐᔪᐊᖅ ᐃᖏᕐᕋᐃᓐᓇᖁᔭᐅᓚᐅᖅᑐᖅ ᖃᒪᓂᑦᑐᐊᕐᒧᑦ, ᑕᐃᑲᓂ ᕿᒥᕐᕈᔭᐅᒃᑲᓐᓂᕐᓂᐊᕐᓗᓂ.”

ᕿᒥᕐᕈᔭᐅᖅᖄᖅᑎᓪᓗᒍ, ᓈᒻᒪᒋᔭᐅᓚᐅᖅᑐᖅ ᓇᖕᒥᓂᖅ ᐆᒻᒪᖅᖁᑎᖏᑦ ᐊᑐᕐᓗᒋᑦ ᑯᐸᐃᒃᒥᑦ ᐃᒃᓴᕐᕕᖕᒧᙵᐅᓗᓂ ᐋᖅᕿᒃᓱᖅᑕᐅᓂᐊᕐᓗᓂ.

ᑕᐃᑉᓱᒪᓂ, ᐊᓄᕌᓚᐅᖏᑦᑐᖅ ᐊᒻᒪᓗ ᓂᒡᓕᓇᕐᓂᖅ 0-ᒦᖦᖢᓂ, ᓯᑯᓂᒃ ᑕᑯᒃᓴᐅᔪᖃᙱᖦᖢᓂ.

ᑭᕙᓪᓕᖅ W., (Kivalliq W.) ᐅᒥᐊᕐᔪᐊᖅ ᓯᓚᑖ ᐊᒃᑐᖅᑕᐅᓚᐅᖅᑐᖅ ᑐᖔᓃᑦᑐᒥᑦ ᐃᒪᕐᒧᑦ ᑭᒡᓕᐅᑉ ᐱᖓᓱᓪᓗᐊᓂᑦ ᒦᑦᑐᓂᒃ ᑕᑭᑎᒋᔪᒥᒃ.

ᑲᓇᑕᒥᑦ ᐃᖏᕐᕋᔭᒃᑐᓂᒃ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᑦ ᐅᖃᓚᐅᖅᑐᑦ ᐅᑭᐅᓖᑦ 2022-ᒥᑦ, 15.8 ᐳᓴᓐᑎᖏᑦ ᑲᓇᑕᐅᑉ ᐅᑭᐅᖅᑕᖅᑐᒥᑦ ᐃᒪᖏᑦ ᖃᐅᔨᓴᖅᑕᐅᓚᐅᖅᑐᑦ ᕿᑎᐊᓃᖓᑉᓗᑎᒃ ᐅᕝᕙᓘᓐᓃᑦ ᓈᒻᒪᒃᖢᑎᒃ ᐊᑐᖅᑕᐅᔪᓄᑦ.

“ᐅᖓᓯᒃᑑᓂᖓᓄᑦ, ᓯᓚᕐᓘᑕᐅᖃᑦᑕᕐᓂᖓᓄᑦ, ᐅᑭᐅᑉ ᐃᓚᖓᓂᑦ ᐊᒻᒪᓗ ᓯᑯᖃᐃᓐᓇᖃᑦᑕᖅᑐᓄᑦ, ᐊᒻᒪᓗ ᑕᕆᐅᕐᒥᑦ ᐃᒫᓂᑦ ᐃᖏᕐᕋᔭᒃᑐᖃᓗᐊᖃᑦᑕᖏᓐᓂᖓᓄᑦ ᑲᓇᑕᐅᑉ ᐅᑭᐅᖅᑕᖅᑐᒥᑦ ᐃᒪᖏᓐᓂᑦ ᐱᔾᔪᑕᐅᔪᑦ ᐃᒪᕐᒧᑦ ᓈᓴᐅᑏᑦ/ᑎᑎᖅᖃᐃᑦ ᑲᑎᑕᐅᖃᑦᑕᕐᓂᖏᓐᓄᑦ, ᐃᓚᖏᑦ ᐊᒥᓱᑲᓪᓚᓂᒃ ᐅᑭᐅᓂᑦ ᐊᓂᒍᖅᑐᓂᑦ ᑎᑎᕋᐅᓯᐅᓚᐅᖅᓯᒪᑉᓗᑎᒃ,” ᑎᑎᕋᖅᓯᒪᔪᖅ ᐅᓂᑉᑳᒥᑦ.

ᐊᒻᒪᓗ, ᐅᓂᑉᑳᖅ ᕿᒥᕐᕈᓚᐅᖅᑕᖏᑦ ᐃᒪᕐᒧᑦ ᑎᑎᖅᑕᐅᓯᒪᔪᑦ ᐃᓂᐅᔪᒧᑦ.

ᓇᓗᓇᐃᔭᖅᓯᒪᔪᑦ ᑎᑎᖅᖃᐃᑦ ᓯᑰᓄ ᐃᒪᕐᒥᑦ (Schooner Harbour) ᖃᒪᓂᑦᑐᐊᕐᒧᑦ ᐃᓚᐅᖃᑕᐅᔪᑦ ᐃᒡᓗᓕᒑᕐᔫᑉ ᓱᑉᓗᖓ ᐊᒻᒪᓗ ᖃᓂᑖᓃᑦᑐᑦ ᐃᒪᐃᑦ, ᐊᒻᒪᓗ ᐱᖓᓱᓂᒃ ᐊᓯᖏᓐᓂᒃ ᓴᖅᕿᑦᑎᓯᒪᑉᓗᑎᒃ: 1975-ᒥᑦ, 1992-ᒥᑦ ᐊᒻᒪᓗ 2018-ᒥᑦ.

ᒪᕐᕉᒃ ᓯᕗᓪᓖᒃ ᐃᒪᕐᓄᑦ ᑎᑎᖅᖃᐃᑦ ᐊᑐᓚᐅᖅᑐᑦ ᐃᒪᕐᒥᒃ ᖃᐅᔨᓴᖅᑕᐅᓚᐅᖅᑐᓂᒃ 1974-ᒥᑦ, ᑐᓴᖅᓴᐅᓃᑦ ᐅᖓᓯᒃᑎᒌᖕᓂᖃᖅᖢᑎᒃ 100 ᒦᑕᓂᒃ. ᑎᑎᖅᖃᓕᐊᖑᓚᐅᖅᑐᖅ 2004-ᒥᑦ ᐃᒃᑲᕐᕆᕝᕕᐅᔪᒧᑦ, ᐋᖅᕿᒋᐊᖅᓯᑉᓗᓂ ᐃᑎᓂᕐᒥᑦ ᖃᐅᔨᓴᖅᑕᐅᔪᒥᑦ 1997-ᒥᑦ. 2018-ᒥᑦ ᑎᑎᖅᖃᖅ ᐊᑐᓚᐅᖅᑐᖅ ᐃᒪᕐᓂᑦ ᖃᐅᔨᓴᖅᑕᐅᔪᓂᑦ 2016-ᒥᑦ.

1992-ᒥᑦ ᑎᑎᖅᖃᒥᑦ ᑕᑯᒃᓴᐅᔪᖅ ᐃᒃᑲᕐᕆᕝᕕᐅᔪᒥᑦ ᐃᑎᓂᖃᖅᑐᖅ 4.2 ᒦᑕᓂᒃ, 2018-ᒥᓕ ᑎᑎᖅᖃᒥᑦ, ᐊᑐᖅᑕᐅᔪᖅ ᑕᒡᕙᓂ, ᐊᔾᔨᖓᓂᒃ ᐃᒃᑲᓐᓂᕐᒥᑦ ᑕᑯᒃᓴᐅᑎᑦᑎᙱᑦᑐᑦ ᐃᓂᐅᔪᒥᑦ.

ᒪᓕᒃᖢᒋᑦ ᑲᓇᑕᒥᑦ ᐅᒥᐊᓂᑦ ᓇᒧᙵᐅᑎᑦᑎᔪᑦ ᐅᐊᖕᓇᖅᐸᓯᖓᓂᑦ ᑲᓇᑕᒥᑦ, ᐃᒪᕐᓄᑦ ᑎᑎᖅᖃᓂᑦ ᑕᑯᒃᓴᐅᔪᑦ ᖃᓄᐃᖓᓂᐅᔪᑦ ᑕᐃᑉᓱᒪᓂᒥᑦ ᐊᒻᒪᓗ ᐃᒪᕐᒥᑦ ᖃᐅᔨᓴᐃᓃᑦ ᓇᓂᓯᙱᑐᐃᓐᓇᕆᐊᖃᖅᑐᑦ ᐅᔭᖅᖃᓂᒃ ᐊᓗᐊᓃᑦᑐᓂᒃ.

“ᑕᐃᒪᓐᓇᐃᑦᑐᓄᑦ ᐃᒪᕐᓂᑦ, ᐊᑉᖁᑎᒋᔭᐅᖃᑦᑕᖅᑐᑐᖃᐃᑦ ᐊᒻᒪᓗ ᓱᑉᓗᐃᑦ ᒪᓕᒃᑕᐅᔭᕆᐊᖃᖃᑦᑕᖅᑐᑦ,” ᐅᓂᑉᑳᓕᐅᖅᑐᑦ ᑎᑎᕋᖅᑐᑦ. “ᑕᕆᐅᑉ ᐊᓗᐊ ᐃᒃᑲᕐᕆᕝᕕᐅᔪᒥᑦ ᐅᔭᖅᖃᐃᓐᓇᕐᓚᐅᔪᑦ.”

ᐃᖏᕐᕋᔭᖕᓂᕐᒧᑦ ᐅᔾᔨᖅᑐᖁᔨᔪᑦ ᐅᖃᓕᒫᒐᓕᐊᖑᓚᐅᖅᑐᑦ ᐅᑉᓗᕐᒥᑦ ᐃᒃᑲᕐᕆᓐᓂᖓᓄᑦ ᐱᓕᕆᔨᓄᑦ ᐅᖃᐅᓯᐅᖅᖄᖅᑎᓪᓗᒍ, ᐊᑐᖅᑕᐅᓗᓂ ᐃᒪᕐᒥᒃ ᖃᐅᔨᓴᐃᓂᖅᑕᖄᓂᒃᐸᑦ ᑭᓯᐊᓂ. ᑕᐃᒪᙵᓂᑦ, ᑲᓇᑕᒥᑦ ᐃᒪᓕᕆᔨᒃᑯᑦ ᕿᒥᕐᕈᓚᐅᖅᑐᑦ ᓈᓴᐅᑎᓂᒃ/ᑎᑎᖅᖃᓂᒃ 2016-ᒥᑦ ᑎᑎᖅᖃᓕᐊᖑᓚᐅᖅᑐᒥᑦ ᐊᒻᒪᓗ ᑎᑎᖅᖃᓕᐅᖅᖢᑎᒃ ᐋᖅᕿᒋᐊᖅᓯᒪᔪᒥᒃ ᐃᑎᓂᕐᓄᑦ 5.1 ᒦᑕᓂᒃ ᑕᐃᑯᖓ ᐃᓂᐅᔪᒧᑦ.

“ᐃᓂᐅᔪᖅ ᓇᓗᓇᐃᖅᑕᐅᒐᓗᐊᖅᐸᑦ ᐊᒻᒪᓗᖃᐅᔨᓴᖅᑕᐅᓗᓂ ᐅᑉᓗᒥᒧᑦ ᐃᒪᕐᓄᑦ ᐊᑐᖅᑕᐅᔪᓄᑦ, ᐅᒥᐊᖅᑐᖅᑏᑦ ᐃᖏᕐᕋᔭᒃᑐᑦ ᐅᔾᔨᖅᑐᑦᑎᐊᕆᐊᖃᖃᑦᑕᖅᑐᑦ ᐅᒥᐊᑉ ᐊᑖ ᐊᓗᐊᓄᑦ ᖃᓂᓗᐊᖏᒃᑲᓗᐊᕐᒪᖔᑦ,” ᑲᓇᑕᒥᑦ ᐃᖏᕐᕋᔭᒃᑐᓂᒃ ᐊᑦᑕᕐᓇᖅᑐᖃᙱᑦᑐᓕᕆᔨᒃᑯᑦ ᑎᑎᕋᖅᑐᑦ.

ᑕᕆᐅᕐᒥᑦ ᐃᖏᕐᕋᔭᒃᑐᑦ ᐃᒪᕐᓂᑦ ᐅᓕᑦᑕᕐᓂᕐᒥᒃ ᓇᓚᐅᑦᑖᖅᑕᐅᔪᑦ ᓈᓴᐅᓯᕆᓃᑦ ᐊᑐᖅᑕᐅᔪᓂᑦ ᖃᐅᔨᓂᐊᕐᓗᒍ ᐅᒥᐊᑉ ᐊᑖ ᐊᓗᐊᓄᑦ ᖃᓂᑎᒋᓂᖓᓂᑦ ᖃᐅᔨᒪᔭᕆᐊᖃᖅᑐᑦ ᐃᒪᐃᑦ ᓇᓃᓐᓂᕆᔭᖏᓐᓂᑦ ᓇᓚᐅᑦᑖᖅᑕᐅᔪᓂᒃ, ᐊᒻᒪᓗ ᓇᓗᓇᕐᓂᖅᑕᖃᕈᖕᓇᕐᓃᑦ ᐃᓱᒪᒋᔭᐅᔭᕆᐊᖃᖅᑐᑦ.”