ᐹᓂ ᑐᑐ ᖃᑉᓯᐊᕐᔪᖕᓂᑦ ᓱᓕ ᒪᐃᓕᓂᒃ ᓂᕆᐅᒍᖕᓇᖅᑐᖅ ᓱᓕ ᐃᑎᒐᖏᑦ ᖁᒻᒧᒃᓯᒪᓗᒋᑦ ᐊᒻᒪᓗ ᖁᕕᐊᒋᓗᒍ ᓂᐱᖃᓗᐊᖏᓐᓂᖃᖅᑐᒥᒃ ᐃᓅᓯᖃᕐᓂᖅ, ᐊᓕᐊᓇᐃᒋᙱᒃᑲᓗᐊᖅᖢᓂᐅᒃ.
ᑐᑐ ᐃᓅᓚᐅᖅᑐᖅ ᐊᐅᐸᓗᒃᑑᑉᓄᓈᓂᑦ, ᐊᑯᓐᓂᖓᓃᑦᑐᖅ ᑲᖏᖅᖠᓂᐅᑉ ᐊᒻᒪᓗ ᑎᑭᕋᕐᔪᐊᑉ.
ᒪᕐᕉᒃ ᐃᕐᓂᖏᑦᑎᑐᑦ ᑭᖑᓂᐊᒍᑦ ᐃᓅᓯᖓᓂᒃ ᒪᓕᓕᓚᐅᖅᑑᒃ, ᑐᑐ ᖁᕕᐊᒋᔭᖃᑦᑎᐊᓚᐅᖅᑐᖅ ᕼᐋᑭᒥᑦ. ᐊᐅᐸᓗᒃᑑᑉ ᓄᓇᓃᕐᒥᐅᑕᐅᓚᐅᖅᑐᖅ ᑭᓯᐊᓂ ᒪᕐᕉᖕᓂᒃ ᐱᖓᓱᓂᓪᓘᓐᓃᑦ ᐅᑭᐅᖃᓕᖅᖢᓂ ᐊᒻᒪᓗ ᐃᖕᒥᓂᑦ ᐊᒻᒪᓗ ᖃᑕᙳᑎᖏᑦ ᓯᒡᔭᖅᐸᓯᖕᒦᓕᕐᒪᑕ ᑰᒡᔪᐊᑉ ᖃᓂᑖᓂᑦ.
ᑐᑐ ᐅᖃᓚᐅᖅᑐᖅ 17 ᐅᑭᐅᑦ ᖃᓂᑖᓂᑦ ᑰᒡᔪᐊᑉ ᖃᓂᑖᓂᕐᒥᐅᑕᐅᓚᐅᖅᑐᖅ. ᖃᒪᓂᑦᑐᐊᓕᐊᖅᐸᒃᖢᓂ ᐊᐅᔭᒃᑯᑦ ᐅᑎᖅᖢᓂᓗ ᑰᒡᔪᐊᕐᒧᑦ, ᐊᖓᔪᖓ, ᔫ, ᓄᓇᒋᔭᖓ ᓱᓕ ᒫᓐᓇ, ᖁᑦᑎᖕᓂᖅᐹᖑᖃᑕᐅᔪᒥᑦ ᕼᐋᑭᑦᑐᖕᓇᕐᓂᐊᕐᓗᓂ. ᑕᐃᒪᓐᓇᐃᓚᐅᖅᑐᖅ ᖃᑉᓯᐊᕐᔪᐃᑦ ᐅᑭᐅᓄᑦ ᐊᒻᒪᓗ ᕿᑎᖃᑦᑕᓕᖅᖢᓂᓘᓐᓃᑦ ᐋᓚᓐ ᐃᕐᒧᓯᕐᒧᑦ ᑖᒻᓴᓐ ᕼᐋᒃᑯᓐᓂᑦ ᕿᑎᐊᓃᖓᔪᒥᑦ ᕼᐋᑭᑦᑐᓕᕆᔨᐅᓚᐅᖅᑐᓄᑦ.
“ᓯᕗᓪᓕᖅᐹᒥᑦ ᑲᖏᖅᖠᓂᕐᒧᙵᐅᓚᐅᖅᑐᖓ ᐱᓕᕆᐊᒃᓴᖅᓯᐅᖅᖢᖓ,” ᐅᖃᖅᑐᖅ ᑐᑐ. “ᐊᖓᔪᒐ, ᐸᑏᓯ, ᐱᓕᕆᓚᐅᖅᓯᒪᔪᖅ ᑕᒡᕙᓂ ᐊᒻᒪᓗ ᐱᓕᕆᐊᖅᑖᓕᓚᐅᖅᑐᖓ ᑕᒡᕙᓂ, ᑕᐃᒪᙵᓂᑦ ᖃᑉᓯᐊᕐᔪᐃᑦ ᐅᑭᐅᓂᑦ ᑕᒡᕙᓃᓕᖅᑐᖓ.
“ᑕᐃᒪᓐᓇᐃᓕᐅᖏᓐᓇᓚᐅᖅᑐᖓ, ᐊᐅᔭᒃᑯᑦ ᐱᓕᕆᑉᓗᖓ ᑲᖏᖅᖠᓂᕐᒥᑦ ᐊᒻᒪᓗ ᐅᑎᖃᑦᑕᖅᖢᖓ ᑰᒡᔪᐊᕐᒧᑦ ᕼᐋᑭᑦᑕᖅᑐᖅᖢᖓ.
“ᑎᑭᕋᕐᔪᐊᕐᒧᐊᓚᐅᖅᑐᒍᑦ ᐱᖓᓱᓄᑦ ᐅᑭᐅᓄᑦ ᐃᖏᕐᕋᔭᖃᑦᑕᖅᑎᓪᓗᑕ, ᐃᓕᓐᓂᐊᕐᓂᖅ ᓄᑕᖅᖃᓄᑦ ᐱᐅᓗᐊᓚᐅᖏᒻᒪᑦ ᑲᖏᖅᖠᓂᕐᒧᑦ ᐅᑎᕈᒪᓕᓚᐅᖅᑐᒍᑦ.
ᑐᑐ ᐅᖃᓚᐅᖅᑐᖅ ᐃᖕᒥᓂᑦ ᐊᒻᒪᓗ ᓄᓕᐊᓂ, ᕉᔅ, ᑲᑎᓚᐅᖅᓯᒪᔫᒃ ᑰᒡᔪᐊᕐᒥᑦ ᕼᐋᑭᖃᑦᑕᖅᑎᓪᓗᒍ, ᐅᑎᓚᐅᖅᑐᑦ ᑲᖏᖅᖠᓂᕐᒧᑦ ᐊᐅᔭᖓᓂᑦ 1985-ᒥᑦ. ᑲᑎᑎᑕᐅᓚᐅᖅᑑᒃ ᑎᕆᒡᓗᐃᑦ 22, 1976-ᒥᑦ.
ᑐᑐ ᐱᓕᕆᓂᑯᖃᓕᖅᐸᓪᓕᐊᓕᓚᐅᖅᑐᖅ, ᐱᒋᐊᓚᐅᖅᑐᖅ ᒐᕙᒪᒃᑯᑦ ᑭᑐᑐᐃᓐᓇᓄᑦ ᐱᓕᕆᐊᓕᕆᔨᒃᑯᓐᓄᑦ, ᒫᓐᓇ ᑕᐃᔭᐅᖃᑦᑕᓕᖅᑐᑦ ᓄᓇᓕᖕᒥᑦ ᐊᒻᒪᓗ ᒐᕙᒪᒃᑯᓐᓂᑦ ᐱᔨᑦᑎᕋᐃᔨᒃᑯᑦ-ᓂᑦ.
“ᐊᑯᓂᕐᓚᖅ ᐱᓕᕆᐊᒻᓃᓚᐅᖅᑐᖓ ᑭᓯᐊᓂ… ᐊᑯᓂᐅᓗᐊᖏᑦᑐᖅ ᐱᓕᕆᑉᓗᖓ ᓄᖅᖃᖅᑎᑕᐅᕙᒃᖢᖓ ᐱᖓᓱᑦ ᓯᑕᒪᐃᓘᓐᓃᑦ ᐅᑉᓗᓂᑦ ᓄᖅᖃᖓᑉᓗᖓ ᐊᒻᒪᓗ ᐱᓕᕆᓕᒃᑲᓐᓂᖅᐸᒃᖢᖓ. ᑕᐃᒪᓐᓇᐃᓕᐅᓚᐅᖅᑐᑦ ᐱᓕᕇᓐᓇᐅᔭᖅᑐᙳᖅᑎᑕᐅᓂᐊᖏᓐᓇᒪ,” ᐃᖅᖃᐅᒪᔪᖅ. “ᐱᓕᕇᓐᓇᐅᔭᕐᓂᐊᕐᓗᖓ ᐱᓕᕆᔨᑖᙳᓕᕋᑕᓚᐅᖅᑐᖓ ᐃᓕᑕᕆᔭᐅᔾᔪᑎᖃᓕᕋᒪ ᐱᓕᕆᐊᖃᕐᓂᕐᒧᑦ. ᓯᕗᓪᓕᖅᐹᒥᑦ ᐅᖅᓱᓕᕆᓂᕐᒧᑦ ᐃᓕᑕᕆᔭᐅᔾᔪᑎᑖᖅᖢᖓ, ᐊᒻᒪᓗ ᓱᑉᓗᓕᕆᔨᒧᑦ ᐃᓕᑕᕆᔭᐅᔾᔪᑎᑖᖅᖢᖓ. ᑭᖑᓂᐊᒍᑦ, ᐃᓗᐃᑦᑑᖓᔪᒥᒃ, ᐃᒃᑲᒃᓴᐅᑎᓕᕆᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᖅᖢᖓ.
“ᑕᒪᕐᒥᓗᒃᑖᖅ ᐊᐅᐸᓗᒃᑐᖅ ᓂᐱᐅᑎᖃᖅᖢᑎᒃ ᐃᓕᑕᕆᔭᐅᔾᔪᑎᐅᔪᑦ, ᑕᐃᑲᙵᑦ ᐱᐅᓯᓂᖅᓴᐅᓚᐅᖅᑐᖅ.”
ᑐᑐ, 75-ᓂᒃ ᐅᑭᐅᓕᒃ, ᐅᖃᖅᑐᖅ ᐊᓯᐊᙳᑦᑎᐊᓕᖅᑐᖅ ᐅᑉᓗᒥᐅᔪᖅ, ᓄᓇᓕᖕᒥᑦ ᐃᓐᓇᕆᔭᐅᔪᑦ ᑕᐅᑐᒐᐅᓂᖏᑦ ᒪᒃᑯᒃᑐᓄᑦ.
ᐅᖃᖅᑐᖅ ᒪᒃᑯᓚᐅᖅᑎᓪᓗᒍ, ᐃᓐᓇᕆᔭᐅᔪᓂᒃ ᐱᖃᑎᖃᕋᓱᐃᓐᓇᖅᐸᓚᐅᖅᑐᒍᑦ ᐊᒻᒪᓗ ᓄᓇᓕᐊᖃᑎᒋᓇᓱᐃᓐᓇᖅᐸᒃᖢᒋᑦ.
“ᐊᐃᑦᑖᖑᔪᖅ, ᐅᑉᓗᒥ, ᐃᓐᓇᕆᔭᐅᔪᑦ ᐃᓱᒪᒋᔭᐅᖏᑦᑎᐊᓕᖅᑐᑦ. ᓂᑲᓪᓗᕈᑎᒋᖃᑦᑕᖅᑕᕋ ᑕᑯᑉᓗᒋᑦ ᐃᓐᓇᕆᔭᐅᔪᑦ ᐃᓱᒪᒋᔭᐅᖏᑦᑎᐊᖃᑦᑕᓕᕐᒪᑕ ᐅᑉᓗᒥᐅᓕᖅᑐᖅ.
“ᐅᕙᒻᓄᑦ, ᓄᑕᖅᖃᐃᑦ ᐅᑉᓗᒥ ᐊᔾᔨᒋᙱᑦᑎᐊᓕᖅᑕᖏᑦ. ᐃᓐᓇᕆᔭᑉᑎᖕᓂᑦ ᐱᖃᑎᖃᕈᒪᖃᑦᑕᓚᐅᖅᑐᒍᑦ ᐊᒻᒪᓗ ᓱᓇᓂᒃ ᐃᓕᑦᑎᕝᕕᒋᓗᒋᑦ ᐱᖅᖁᓯᑐᖃᕆᔭᐅᔪᓂᒃ ᖃᐅᔨᒪᓂᕆᔭᖏᓐᓂᑦ. ᒪᒃᑯᒃᑐᐃᑦ ᐅᑉᓗᒥ ᐃᓱᒪᔫᔭᖃᑦᑕᖅᑐᑦ ᓱᓇᓗᒃᑖᓂᒃ ᖃᐅᔨᒪᓇᓱᒋᑉᓗᑎᒃ. ᑭᓯᐊᓂ ᖃᐅᔨᒪᓂᖃᙱᑦᑎᐊᖅᑐᑦ ᖃᓄᖅ ᒪᖃᐃᑦᑕᕆᐊᖃᕐᓂᕐᒥᒃ ᓂᕿᖃᖅᑎᓐᓂᐊᕐᓗᒋᑦ ᖃᑕᙳᑎᖏᑦ ᐊᒻᒪᓗ ᐃᓕᑦᑎᓗᑎᒃ ᓲᕐᓗ ᖃᓄᖅ ᐋᒃᑐᐃᓂᕐᒥᒃ ᑐᒃᑐᓂᒃ. ᐱᖅᖁᓯᒃᑯᑦ ᓄᓇᒦᓐᓂᕐᒥᒃ ᐊᔪᙱᓐᓂᕆᔭᐅᔪᓂᑦ ᐱᑕᖃᓗᐊᖏᒻᒪᕆᒃᑐᑦ.
“ᐃᕐᖑᒃᑲᓘᓐᓃᑦ, ᖃᐅᔨᒪᔪᑎᑦ, ᓄᓇᒧᙵᐅᔪᒪᖃᑦᑕᙱᑦᑐᑦ. ᐃᓱᒪᔪᖓ ᑲᑉᐳᔾᔭᓅᖅᑐᑦ ᖃᕆᑕᐅᔭᐃᑦ ᐱᔾᔪᑕᐅᔪᑦ ᑕᐃᒪᓐᓇᐃᓐᓂᖏᓐᓄᑦ.
“ᑕᐃᒪᓐᓇᒧᑦ ᑕᒡᕗᖓ ᐅᑉᓗᒥᒧᑦ ᑎᑭᖦᖢᒍ, ᐅᖃᓘᑎᐊᓛᖃᙱᑦᑐᖓ. ᑭᑐᑐᐃᓐᓇᓂᑦ ᐃᓄᖕᓂᑦ ᑕᑯᖃᑦᑕᖅᑐᒍᑦ ᐱᓱᒃᑐᑦ ᐅᖃᓘᑎᒥᖕᓃᑦᑐᓂᑦ. ᐃᓚᒃᓯᒐᓗᐊᖅᖢᓂ ᑕᒡᕙᓗ ᐅᖃᓘᑎᓕᕆᔪᑦ. ᐃᓚᒃᓯᔭᐅᔪᖕᓇᖅᑐᑦ ᑭᓯᐊᓂᑐᐃᓐᓇᖃᐃ, ᐅᖃᓘᑎᐊᓛᒃᑯᑦ ᑎᑎᕋᕐᕕᒋᓗᒋᑦ.”
ᑐᑐ ᐅᖃᖅᑐᖅ ᓂᑲᓪᓗᕈᑎᒋᖃᑦᑕᖅᑕᖓ — “100 ᐳᓴᓐᑎᖑᔪᒥᑦ,” — ᑕᑯᑉᓗᓂ ᐱᖅᖁᓯᑐᖃᒃᑯᑦ ᐊᔪᙱᓐᓂᕆᔭᐅᔪᓂᑦ ᐊᒻᒪᓗ ᓯᕗᓕᕆᔭᖏᓐᓂᒃ ᐅᑉᓗᒥᐅᔪᖅ ᒪᒃᑯᒃᑐᐃᑦ ᐊᓯᐅᔨᓂᖏᓐᓂᑦ.
ᐅᖃᖅᑐᖅ ᖃᑕᙳᑎᖏᑦ ᐱᔪᖕᓇᑐᐊᕌᖓᒥ ᐊᐅᓪᓚᕈᑎᖃᑦᑕᓚᐅᖅᑕᖏᑦ, ᐊᒻᒪᓗ ᖁᕕᐊᒋᖃᑦᑕᓚᐅᖅᑕᖏᑦ ᐊᐅᓪᓚᖃᑎᒋᔭᐅᑉᓗᓂ.
ᑐᑐ ᐊᔾᔨᐅᖏᑦᑐᒥᒃ ᖃᐅᔨᒪᔭᐅᓂᖃᖅᑐᖅ, ᐊᑖᑕᐅᑉᓗᓂ ᑕᒪᐃᓐᓄᑦ ᓯᕗᓪᓕᖅᐸᐅᔪᓂᒃ ᐃᓅᔪᓂᑦ (ᑎᐅᕆᐊᓐᔅ) ᐊᑎᓕᐅᓚᐅᖅᑐᓂᑦ ᕼᐋᑭᑎᐅᓂᕐᒧᑦ ᑳᓐᑐᕌᒃᒥᑦ ᐊᒻᒪᓗ ᓯᕗᓪᓕᖅᐹᖑᑉᓗᓂ ᐃᓅᑉᓗᓂ (ᔪᐊᑎᓐ) ᕼᐋᑭᑎᓄᑦ NHL-ᒥᑦ ᕿᑎᖃᑕᐅᖃᑦᑕᖅᖢᓂ.
ᐅᖃᖅᑐᖅ ᓴᕆᒪᒋᖃᑦᑕᖅᑕᖓ ᑕᒪᓐᓇ, ᐃᒃᐱᒍᓱᒍᑎᒋᙱᑕᖓ ᐊᖏᓂᖅᓴᐅᓂᖓᓄᑦ ᐊᓯᖏᓐᓄᑦ.
“ᐱᓱᓗᑐᐃᓐᓇᖃᑦᑕᖅᑐᖓ ᑭᓇᒥᐊᖅᑎᑦᑐᑦ. ᐱᑦᑕᐅᓂᖅᓴᐅᖏᑦᑐᖓ ᑭᑐᑐᐃᓐᓇᓂᐅᖓᓂᑦ. ᑭᓯᐊᓂ ᐊᓕᐊᓇᐃᓚᐅᖅᑐᖅ ᐃᖏᕐᕋᔭᖃᑦᑕᕈᖕᓇᓚᐅᕋᒪ. ᑕᒪᓗᒃᑖᕐᓚᖕᒥᐅᔪᒃᓴᐅᔪᖅ ᑕᑯᔭᖅᑐᖅᓯᒪᔭᒃᑲ, ᑕᒪᓗᒃᑖᖑᙱᓐᓂᖅᐸᑦ ᕼᐋᑭᑎᓄᑦ NHL-ᓄᑦ ᓄᓇᓕᐸᐅᔭᐃᑦ.
“ᑭᓯᐊᓂ ᒫᓐᓇᐅᔪ, ᖁᕕᐊᓱᒃᑐᖓ ᓯᓚ ᐃᒃᑮᕐᓇᙱᓐᓂᖅᓴᐅᓕᕐᓂᐊᕐᒪᑦ ᓄᓇᓕᐊᕈᖕᓇᕐᓂᐊᕋᒪ ᒪᖃᐃᓪᓗᖓ ᐊᒻᒪᓗ ᐃᖃᓪᓕᐊᕐᓗᖓ.
“ᓄᓇᒧᙵᐅᖃᑦᑕᕈᒪᔪᖓ ᐊᔪᙱᓚᐅᕐᓂᒻᓂᑦ ᓇᒧᙵᐅᑲᑕᖕᓂᐊᕐᓗᖓ ᐊᒻᒪᓗ ᐊᓕᐊᓇᐃᒋᔭᒃᑲ ᓱᓕ ᐊᑐᕐᓗᒋᑦ.”
