ᐅᓐᓄᐊᕌᓗᖓᓂ ᔭᓄᐊᕆ 20,–ᒥ ᐃᒡᓗᓕᖕᒥ ᖃᑦᑎᕆᔨᒃᑯᓐᓂ ᐊᖓᔪᖅᑳᖓ ᔫᓕᐊᔅ ᐸᓂᒥᕋ ᖃᐅᔨᒪᓚᐅᙱᓚᖅ ᐹᖅᓯᓂᐊᕐᓂᖓᓂ ᐊᖏᓛᖑᔪᒥ ᑐᐊᕕᕐᓇᕐᓂᐅᔪᒥ ᖃᑦᑎᕆᓂᕐᒧᑦ ᐱᓕᕆᐊᕆᔭᒥᓂᑦ.
ᒪᓕᒐᕋᓛᓕᕆᔨᒥ ᓴᖅᑭᑦᑐᖃᓚᐅᖅᐳᖅ ᐹᖓᓂ ᑐᐊᕕᕐᓇᖅᑐᖃᕐᓂᖓᓂ 3:30 ᐅᓪᓛᐸᓗᒃᑯᑦ, ᓄᓇᓕᖕᓄᑦ ᑯᐊᐸᒃᑯᓐᓄᑦ ᓂᐅᕕᕐᕕᖓᓄᙵᐅᑎᑲᐅᖅᑐᖅᖢᓂᐅᒃ, ᐃᑭᑦᑐᖃᕐᔪᐊᖅᑐᒧᑦ.
"ᕿᕐᓂᖅᑕᒥ ᐳᔪᖃᓚᐅᖅᐳᖅ ᑕᒪᒃᑭᓂ ᐹᖑᔪᓂ ᐊᒻᒪᓗ ᐃᑭᖦᖢᓂ ᐃᒡᓘᑉ ᐊᑖᓂ," ᐸᓂᒥᕋ ᐅᖃᓚᐅᖅᐳᖅ ᐃᒡᓗᕐᔪᐊᖑᔪᒥ.
ᖃᑦᑎᕆᔨᒃᑯᑦ 10–ᖑᔪᓂ ᐊᓯᖏᓐᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᖃᐅᔨᑎᑕᐅᓚᐅᖅᐳᑦ ᐃᑭᑦᑐᐊᓗᖕᒧᑦ ᓄᓇᓕᖕᓂ ᑐᐊᕕᕐᓇᖅᑐᒥ ᖁᖁᐊᕈᑎᖓᓐᓂ.
ᕼᐋᒻᓚᒃᑯᑦ ᖃᑦᑎᕆᓂᕐᒧᑦ ᓄᓇᓯᐅᑎᑐᐊᖓ – 1999–ᒥ ᓴᓇᐅᒐᖅ – ᐅᐸᒍᑎᓚᐅᖅᐳᖅ ᐃᓂᐅᔪᒧᑦ. ᓄᓇᓕᐅᑉ ᑎᓴᒪᓂ ᐃᒥᖅᑕᐅᑎᖏᓐᓂ ᓄᓇᓯᐅᑎᓂ ᐊᑐᓕᖅᑎᑕᐅᓚᐅᕆᕗᑦ ᐱᔨᑦᑎᕋᕐᓂᕐᒧᑦ.
ᓄᓇᓕᖕᓂ ᐅᓇᑕᖅᑐᒃᓴᙳᐊᑦ ᐃᑲᔪᓚᐅᕆᕗᑦ ᐃᓄᒋᐊᓂᒃ ᐊᐅᓚᑦᑎᓂᖏᓐᓂ ᐅᓄᖅᓯᕙᓪᓕᐊᔪᓂ ᓄᓇᖃᖅᑎᐅᔪᓂ ᐅᐸᒃᐸᓪᓕᐊᓚᐅᕐᒪᑕ ᐱᕈᔪᒡᔪᐊᕐᓂᐅᔪᒥ.
ᓂᒡᓚᓱᓚᐅᖅᐳᖅ – ᐅᕙᓂ -40 C –ᒐᓚᖕᓂ ᐊᓄᕆᐅᑉ ᓂᒡᓚᓱᖕᓂᖓ ᐃᓚᐅᓪᓗᓂ – ᐊᓄᕌᖏᓐᓇᒐᓚᖕᓂᖃᖅᖢᓂ ᓂᒋᕐᒥᑦ. ᐊᓄᕆ ᑭᖑᓂᐊᒍᑦ ᓱᒃᑲᓂᖃᓕᓚᐅᖅᐳᖅ ᖁᑦᑎᖕᓂᐅᔪᒧᑦ 65 ᑭᓛᒥᑐᓂ ᐃᑲᕐᕋᑕᒫᒥ.
"ᐅᖃᓗᑲᐅᑎᒋᓚᐅᖅᐳᖓ ᖃᑦᑎᕆᔨᕐᔪᐊᒃᑯᓐᓄᑦ ᐊᖓᔪᖅᑳᖓᓄᑦ ᖃᐅᔨᑐᐊᕋᒪ ᖃᒥᑦᑐᓐᓇᔾᔮᙱᓐᓂᓐᓂ," ᐸᓂᒥᕋ ᐅᖃᓚᐅᖅᐳᖅ, ᐅᖃᖅᖢᓂ ᐱᓕᕆᐊᒃᓴᖅ ᐊᖏᓗᐊᓚᐅᕐᒪᑦ ᖃᑦᑎᕆᔨᖏᓐᓄᑦ, ᐊᒻᒪᓗ ᖃᑦᑎᕆᔾᔪᑎᖏᓐᓄᑦ ᐃᓱᒪᖅᓲᑎᒋᔭᖏᓐᓄᑦ.
ᐊᒃᓱᕈᕐᔪᐊᖅᖢᑎᒃ ᐱᓕᕆᓚᐅᖅᐳᑦ, ᑭᓯᐊᓂ, ᖃᒪᑎᑦᑎᓇᓱᐊᖅᖢᑎᒃ ᐃᑭᕐᔪᐊᖅᑐᒥ ᑎᑭᐅᑎᔪᒧᑦ ᐃᑲᕐᕋᓄᑦ 18–ᓄᑦ. ᐊᑕᐅᓯᐅᔪᒥ ᐱᓪᓚᕆᐅᔪᒥ ᐅᓂᒃᑳᕆᓂᐅᔪᒥ ᑕᐃᑲᓂ ᐊᑯᓂᐅᓂᐅᔪᒥ ᓇᓗᓇᐃᖅᓯᓂᖓᓂ ᑎᓴᒪᑦ ᓱᓪᓗᑯᑖᑦ ᓯᒥᒃᑕᐃᓕᒪᑎᑕᐅᓂᖏᓐᓂ ᑭᓱᑐᐃᓐᓇᐃᑦ ᓱᒃᑲᐃᒡᓕᒋᐊᖅᓯᔪᒥ ᓄᖅᑲᖅᑎᑦᑎᔪᒥᒡᓘᓐᓃᑦ ᐃᒪᐅᑉ ᐃᖏᕐᕋᓂᖓᓂ ᑐᑭᖃᓚᐅᕐᒪᑦ ᖁᐊᖃᐅᖅᑐᕈᓐᓇᕐᒪᑦ ᓂᒡᓚᓱᕐᔪᐊᖅᑐᒥ ᓯᓚᒥ, ᐸᓂᒥᕋ ᐅᓂᒃᑳᕆᓚᐅᖅᐳᖅ.
ᖃᑦᑎᕆᓂᕐᒧᑦ ᓄᓇᓯᐅᑎᖓ ᕿᕿᓚᐅᖅᐳᖅ 2–ᒥ ᐅᓐᓄᓴᒃᑯᑦ, ᐃᒥᖅᑕᐅᑎᓂ ᓄᓇᓯᐅᑎᓂ ᐊᑐᕐᓂᖅᓴᐅᑎᑕᐅᒃᑲᓐᓂᕐᓂᖓᓂ ᖃᒪᑎᑦᑎᓇᓱᐊᕐᓂᐅᔪᒥ ᐃᑭᑦᑐᐊᓗᖕᒥ.
ᓄᓇᕘᑉ ᖃᑦᑎᕆᔨᕐᔪᐊᒃᑯᑦ ᐊᖓᔪᖅᑳᖓ ᐊᒻᒪ 8–ᖑᔪᓂ ᖃᑦᑎᕆᔨᓂᑦ ᐃᖃᓗᖕᓂ ᑎᑭᓚᐅᖅᐳᑦ 3:30 ᐅᓐᓄᓴᐸᓗᖕᒥ.
ᐳᔪᕐᔪᐊᒥ ᕿᓚᖕᒧᐊᖅᐸᓪᓕᐊᔪᒥ ᓴᖅᑭᔮᓚᐅᖅᐳᖅ ᑎᑭᑉᐸᓪᓕᐊᔪᓄᑦ ᖃᑦᑎᕆᔨᐅᔪᓄᑦ ᖃᖓᑕᓲᖓ ᒥᑦᑕᖅᑐᖅᐸᓪᓕᐊᑎᓪᓗᒍ, ᐅᖃᓚᐅᖅᐳᖅ ᓛᓐᑎᔅ ᑳᒪᐃᑯᓪ, ᖃᑦᑎᕆᔨᒃᑯᓐᓂ ᐊᖓᔪᖅᑳᖓ ᑐᒡᓕᐊ ᐃᖃᓗᖕᓂ ᑐᐊᕕᕐᓇᖅᑐᒥ ᐱᔨᑦᑎᕋᕐᓂᐅᔪᓂ.
"ᓱᓕ ᐊᖏᐸᓗᒃᑐᒥ ᐃᑭᓐᓂᐅᔪᒥ ᖃᓄᐃᓐᓂᖃᓚᐅᖅᐳᖅ. ᐊᕙᓗᖓ ᑲᑕᒃᓯᒪᓚᐅᖅᐳᖅ ᑭᓯᐊᓂ ᒪᕐᕉᖕᓂ ᐊᒥᐊᒃᑯᔪᓂ ᐃᓱᐊᓂ ᓴᓂᕋᕐᓂᑦ," ᑳᒪᐃᑰᓪ ᓯᕗᓪᓕᖅᐹᒥ ᑕᑯᓂᕆᔭᖓᓐᓂ.
ᖃᔅᓯᒐᓚᖕᓂ ᖄᒃᑲᓐᓂᐊᒍᑦ ᐅᓗᕆᐊᓇᕈᑕᐅᔪᓂ ᓇᓗᓇᐃᖅᑕᐅᔪᖃᖅᖢᓂ – ᐊᑐᖅᓯᒪᙱᑦᑐᓂ ᓱᓇᒐᕐᓂ, ᐅᖅᓱᐊᓗᒃ, ᐳᓪᓚᖕᒨᖅᑐᓂ ᖃᑦᑕᓄᑦ ᑐᖅᑯᐃᕝᕕᒃ ᐊᒻᒪᓗ ᐊᖏᕐᕋᒧᑦ ᐃᓚᐅᕈᑎᒃᓴᓂ – ᑕᒪᕐᒥᒐᓚᐃᑦ ᓄᖑᓚᐅᖅᐳᑦ ᐃᖃᓗᖕᓂ ᖃᑦᑎᕆᔩᑦ ᒥᓯᒪᓕᖅᑎᓪᓗᒋᑦ, ᐅᖃᐅᓯᐅᓪᓗᓂ ᑳᒪᐃᑯᓪᒧᑦ.
ᐸᓂᒥᕋ ᐊᑕᐅᓯᕐᒥ ᕿᑲᕐᓂᖃᓚᐅᑲᓚᐅᖅᐳᖅ ᖃᓄᐃᓕᐅᕐᓂᐅᔪᒥ, 5 ᐅᓐᓄᒃᑯᑦ 8 ᐅᓐᓄᒐᓱᐊᕐᓂᖓᓄᑦ ᓄᓇᓕᖕᓂ ᐋᓐᓂᐊᕕᖕᒦᖦᖢᓂ, ᐳᔪᕐᒥ ᓂᐅᖅᓯᓂᖃᕐᓂᖓᓄᑦ ᖃᐅᔨᓴᖅᑕᐅᓪᓗᓂ ᐊᒻᒪᓗ ᐊᓂᖅᓵᖅᑑᑎᔭᖅᑎᑕᐅᓪᓗᓂ. ᕿᓚᒥᑯᓗᒃ ᓯᓂᓚᐅᑲᓚᐅᕆᕗᖅ.
ᐊᓱᐃᓛᒃ ᐅᑎᓚᐅᕆᕗᖅ ᐊᒻᒪ ᐱᓕᕆᒃᑲᓐᓂᓕᖅᖢᓂᒋᑦ ᐱᓕᕆᐊᒃᓴᖏᓐᓂ.
ᐃᓂᐅᔪᖅ ᐱᔭᕇᖅᑕᐅᑕᐃᓐᓇᓚᐅᖅᐳᖅ 10 ᐅᓐᓄᒃᑯᐸᓗᒃ ᔭᓄᐊᕆ 20–ᒥ.
"ᐃᒡᓗᕐᔪᐊᖅ ᐊᑐᖅᑕᐅᔪᒃᓴᐅᔪᓐᓃᑦᑎᐊᓚᐅᖅᐳᖅ," ᑳᒪᐃᑯᓪ ᐅᖃᓚᐅᖅᐳᖅ.
ᖃᐃᖁᔨᓂᖅ ᐃᑲᔪᕆᐊᖅᑐᖅᑐᓂ ᐃᖃᓗᖕᓂ ᑐᑭᖃᓚᐅᖅᐳᖅ ᐃᓚᒋᔭᐅᔪᓂ ᒪᕐᕉᔪᓂ ᖃᑦᑎᕆᔨᐅᔪᓂ ᓱᒃᑲᔪᒥ ᖃᐅᔨᓇᓱᐊᕆᐊᖃᓚᐅᖅᐳᑦ ᖃᓄᖅ ᐱᓕᕆᖃᑎᒌᑦᑎᐊᕐᓂᐅᔪᒥ.
"ᑲᑎᙵᓂᐅᓪᓗᑕ ᐱᓕᕆᑦᑎᐊᕋᓱᒋᓚᐅᐳᖓ ᐊᒻᒪ ᖁᕕᐊᑉᐳᖓ ᐋᓐᓂᖅᑐᖃᓚᐅᙱᓐᓂᖓᓂ ᐅᕝᕙᓘᓐᓃᑦ ᑐᖁᔪᖃᓚᐅᕐᓇᓂ ᑕᐃᑲᓂᓗᒃᑖᖅ ᐱᓕᕆᓂᐅᔪᒥ," ᑳᒪᐃᑯᓪ ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᑰᑎᓚᐅᖅᓯᒪᓂᖓᓂ ᐸᓂᒥᕋᒥ ᐃᒡᓗᓕᖕᒥ ᖃᑦᑎᕆᔨᒃᑯᓐᓂ ᐊᖓᔪᖅᑳᖓ ᐃᖃᓗᖕᓃᑎᓪᓗᒍ ᐃᓕᓐᓂᐊᕆᐊᖅᓯᒪᑎᓪᓗᒍ ᐊᐅᔭᐅᔪᒥ. "ᑕᐃᒫᒃ ᑕᐃᔅᓱᒪᓂ ᐱᓕᕆᖃᑎᖃᕐᓂᐅᔪᒥ ᐃᑲᔪᕐᓂᖃᓚᐅᖅᐳᖅ ᓴᓇᓂᕐᒧᑦ ᐅᒃᐱᕈᓱᑦᑎᐊᕐᓂᐅᔪᒥ ᕿᓚᒻᒥᐅᔪᒥ."
ᐊᒻᒪᓗ ᐃᑲᔪᕐᓂᕐᒥ ᐊᒡᒐᓂᑦ ᖁᔭᒋᔭᐅᓚᐅᖅᐳᖅ.
"ᐅᐱᓐᓇᓚᐅᖅᐳᖅ ᖃᒥᑎᑦᑎᓇᓱᐊᕐᓂᐅᔪᒥ ᐃᑲᐊᓚᔪᐊᓗᖕᒥ ᓴᓂᓕᖏᓐᓂ," ᐸᓂᒥᕋ ᐅᖃᓚᐅᖅᐳᖅ ᖃᑦᑎᕆᔨᐅᖃᑎᒥᓂᑦ ᓄᓇᕗᒻᒥ ᐊᖓᔪᖅᑳᖃᕐᕕᖕᒥ.
ᐃᖃᓗᖕᓂ ᖃᑦᑎᕆᔨᒃᑯᓐᓂ ᐊᖓᔪᖅᑳᖓᑕ ᑐᒡᓕᐊ ᐅᐱᒍᓱᖕᓂᖃᓚᐅᕆᕗᖅ ᐃᒡᓗᓕᖕᒥ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᓂᑦ, ᐱᓕᕆᓂᖃᖅᓯᒪᔪᓂ ᖃᓂᒋᔭᖓᓄᑦ ᐃᑲᕐᕋᓄᑦ 12–ᓄᑦ ᐃᑲᔪᖅᑎᒃᓴᓂ ᑎᑭᓚᐅᖅᑳᕋᑎᒃ ᓄᓇᓕᐸᐅᔭᒥᑦ.
ᖃᑦᑎᕆᔨᒃᑯᓐᓂ ᐊᖓᔪᖅᑳᖓ ᐃᓱᒪᕗᑦ ᐊᑯᓂᐅᓂᐅᔪᒥ
ᐸᓂᒥᕋ, 23-ᓂ-ᐅᑭᐅᓕᒃ ᐃᓚᒋᔭᐅᖃᑕᐅᔪᒥ ᐃᒡᓗᓕᖕᒥ ᖃᑦᑎᕆᔨᒃᑯᓐᓂ ᐊᕐᕌᒍᓄᑦ 6–ᓄᑦ ᐊᒻᒪ ᖃᑦᑎᕆᔨᒃᑯᓐᓄᑦ ᐊᖓᔪᖅᑳᕆᔭᐅᓪᓗᓂ ᐱᖓᓱᓄᑦ ᐊᕐᕌᒍᒐᑲᓴᖕᓄᑦ, ᐱᓕᕆᓇᓱᐊᕐᓂᖃᓚᐅᖅᐳᖅ ᐅᓄᕐᓂᖅᓴᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᒃᓴᖅᓯᐅᕐᓂᕐᒥ ᓄᓇᓕᐅᔪᓂ ᑭᓯᐊᓂ ᐊᔪᕐᓇᖅᑐᑯᓘᙱᓚᖅ.
"ᐊᒥᓱᐃᑦ ᐃᓄᐃᑦ ᐅᐃᒻᒪᓲᖑᕗᑦ ᐃᑭᑦᑐᒥ ᑕᑯᒑᖓᒥᒃ," ᐅᖃᓚᐅᖅᐳᖅ.
ᐃᓚᐅᖃᑕᐅᓕᓚᐅᖅᐳᖅ ᐱᖃᓐᓇᕆᔭᖓᓐᓂ ᐊᔭᐅᕆᔭᐅᒐᒥ. 6–ᑐᐃᓐᓇᑯᓗᖕᓂ ᐃᓚᒋᔭᐅᔪᖃᓚᐅᖅᐳᖅ ᓄᓇᓕᖕᓂ ᖃᑦᑎᕆᔨᐅᔪᓂ ᑕᐃᔅᓱᒪᓂ.
ᐊᕐᕌᒍᒐᓴᓂ ᐱᓕᕆᓕᒪᓂᖓᓂ, ᐸᓂᒥᕋ ᐃᑲᔪᖅᓯᒪᕗᖅ ᖃᑦᑎᕆᓂᕐᒥ ᖃᓂᒋᔭᖓᓂ 40–ᓂ ᐃᑭᑦᑐᓂ, ᑕᒪᕐᒥᒐᓚᑦ ᐃᒡᓗᕋᓛᖑᔪᓂ ᐊᒻᒪ ᓯᕐᓗᐊᕐᓂ, ᐃᓚᖏᓐᓂ ᓄᓇᓯᐅᑎᓂᑦ ᐃᑭᑦᑐᓂ.
ᐃᖃᓗᖕᓃᒃᑲᓐᓂᓚᐅᖅᐳᖅ ᔭᓄᐊᕆᐅᑉ ᓄᙳᐊᓂ, ᑕᒪᑐᒥᖓ ᖃᓄᐃᓐᓂᐅᔪᒥ ᐊᖓᔪᖅᑳᖑᓂᕐᒧᑦ ᐱᓕᒻᒪᒃᓴᕐᓂᐅᔪᒧᑦ, ᐸᕐᓇᐃᑦᑎᐊᕐᓂᖅᓴᐅᔪᒥ ᐊᐅᓚᑦᑎᓂᕐᒧᑦ ᐃᑲᔪᕈᑎᒃᓴᓂ ᐃᑭᑦᑐᓄᑦ ᐃᓂᐅᔪᓄᑦ.
"ᐸᕐᓇᒃᐳᖓ ᖃᑦᑎᕆᔨᒃᑯᓐᓂ ᐊᖓᔪᖅᑳᖓᓂᕐᒧᑦ ᑎᑭᑉᐸᓪᓕᐊᔪᓄᑦ ᐊᕐᕌᒍᓄᑦ 40–ᓄᑦ," ᐸᓂᒥᕋ ᐅᖃᓚᐅᖅᐳᖅ.
"ᐊᒥᓱᐊᓗᖕᓂ ᖁᔭᒋᔭᐅᑲᑕᒃᐳᖓ ᓄᓇᓕᖕᒥᐅᑕᓂ… (ᐃᓄᐃᑦ) ᐅᖃᖅᐳᑦ ᐊᖑᑎᑦᑎᐊᕙᐅᓂᓐᓂ, ᐊᒻᒪ ᖃᓄᕈᓘᔭᖅ, ᐊᒻᒪ ᖁᔭᒋᔭᐅᕗᖓ ᖃᓄᐃᓕᐅᖅᐸᖕᓂᓐᓂ. ᐅᖃᐅᑏᓐᓇᖅᑕᒃᑲ, 'ᖁᔭᓕᙱᓪᓗᖓ, ᖁᔭᓕᓗᒋᑦ ᖃᑦᑎᕆᔨᒃᑯᑦ'"
