Skip to content

ᐃᑯᕐᕋᖅ ᓂᕿᑖᕐᕕᒃ ᓈᒻᒪᒃᓯᔪᖅ ᒫᓐᓇᐅᔪᖅ, ᑭᓯᐊᓂ ᓯᕗᓂᒃᓴᒥ ᐃᓱᒫᓘᑕᐅᓕᕈᓐᓇᖅᑐᖅ

ᐊᓯᖏᑦᑎᑐᑦ ᐊᐅᓚᑦᑎᔾᔪᑕᐅᕙᒃᑐᑎᑐᑦ, ᐱᓗᐊᖅᑐᒥ ᑕᐃᑉᑯᐊ ᑮᓇᐅᔾᔭᒃᓴᖅᑎᐅᙱᑦᑐᑦ, ᐊᒃᓱᕈᕐᓇᖃᑦᑕᕐᓂᐊᖅᑐᖅ ᓯᕗᓂᒃᓴᒥ ᐃᑯᕐᕋᖅ ᓂᕿᑖᕐᕕᒃ ᐊᒻᒪᓗ ᐊᓐᓄᕌᖅᑖᕐᕕᒃ, ᐊᖑᒻᒪᑎᓇᓱᒃᑎᓪᓗᒋᑦ ᓄᓇᓕᐅᑉ ᐱᔭᕆᐊᖃᖅᑕᖏᓐᓄᑦ ᐊᒥᓱᑦ ᒪᑐᖃᑦᑕᓕᖅᑎᓪᓗᒋᑦ ᐅᓗᕆᐊᒋᔭᐅᑎᓪᓗᒍ ᓄᕙᒡᔪᐊᕐᓂᐅᔪᖅ−19 ᑲᖏᖅᖠᓂᕐᒥ.

ᑕᐃᕕᑎ ᐹᓐ ᓯᓂᒃᓴᕐᕕᖕᒥᐅᑕᖅ, ᓴᐅᒥᖅᖠᕐᒥ, ᐊᒻᒪᓗ ᒋᓚᓐ ᐅᐃᑦᕗᑦ ᑭᓴᕐᕕᒃ ᑯᐊᐸᒃᑯᓐᓂᕐᒥᐅᑕᖅ ᖁᕕᐊᓱᖃᑎᒌᒃᑑᒃ ᐱᓕᕆᑦᑎᐊᖅᑲᐅᓂᕐᒥᓂᒃ Hᐊᑭᖅᑏᑦ ᐊᑎᒋᒋᖃᑦᑕᖅᑕᖏᓐᓂᒃ ᐊᑐᖅᑎᑦᑎᓚᐅᖅᑎᓪᓗᒋᒃ, ᑮᓇᐅᔭᓕᐊᖑᔪᑦ ᑐᓂᕐᕈᑕᐅᑉᓗᑎᒃ ᐃᑯᕐᕋᕐᒧᑦ ᓂᕿᑖᕐᕕᖕᒧᑦ ᑲᖏᖅᖠᓂᕐᒥ ᐊᐃᕆᓕ 5, 2019-ᒥ.

ᐃᑯᕐᕋᖅ ᐱᔨᑦᓯᕋᖃᑦᑕᖅᓯᒪᔪᖅ ᓄᓇᒋᔭᕐᒥᓂᒃ ᐊᔾᔨᒌᙱᑦᑑᑕᐅᔪᒃᑯᑦ 23-ᓂᒃ ᐅᑭᐅᓂᒃ ᖄᖏᖅᓯᒪᓕᖅᑐᓂᒃ ᐊᒻᒪᓗ ᑎᒥᙳᖅᑎᑕᐅᓯᒪᔪᖅ ᓴᓴᐃᔭᑎᒃᑯᑦ ᐱᖁᔭᖓᒍᑦ ᓄᓇᕗᒥ.

ᐊᑭᓕᖅᑐᖅᑕᐅᓇᓂ ᐱᓕᕆᓲᖅ ᑕᐃᕕᑎ ᕗᕆᑦᓚᓐ ᐊᒻᒪᓗ ᐃᓚᒋᔭᖏᑦ ᑲᒪᖃᑦᑕᖅᓯᒪᔪᑦ ᓂᕿᑖᕐᕕᖕᒥᒃ ᖃᑉᓯᑲᓪᓚᖕᓂᒃ ᐅᑭᐅᓂᒃ, ᐃᑲᔪᖅᑐᖅᑕᐅᑉᓗᑎᒃ ᐃᑲᔪᕈᒪᒃᑲᐅᔪᓄᑦ ᐊᒻᒪᓗ ᐱᓕᕆᒃᑲᐅᔪᓄᑦ ᑎᒥᖁᑎᒋᔭᐅᔪᓄᑦ ᓄᓇᖓᓂᒃ.

ᕗᕆᑦᓚᓐ ᐅᖃᖅᖢᓂ ᑕᒪᕐᒥᒃ ᓂᕿᑖᕐᕕᒃ ᐊᒻᒪᓗ ᐊᓐᓄᕌᖅᑖᕐᕕᒃ − ᑮᓇᐅᔾᔭᒃᓴᕋᓱᖃᑦᑕᖅᑐᑦ ᓂᐅᕕᕈᓐᓇᕈᒪᑉᓗᑎᒃ ᓂᕿᓂᒃ ᐃᑯᕐᕋᕐᒧᑦ − ᒪᑐᓯᒪᔪᑦ ᐃᓄᖕᓄᑦ ᒫᓐᓇᐅᔪᖅ.

ᐅᖃᖅᖢᓂ ᐊᐅᓚᑦᑎᔩᑦ ᐊᑭᓕᖅᑐᖅᑕᐅᓇᑎᒃ ᐱᓕᕆᕙᒃᑐᑦ ᐱᔫᒥᒍᓱᓗᐊᙱᒻᒪᑕ ᐃᓄᓕᕆᓇᔭᕐᓂᕐᒧᑦ ᑭᓇᑐᐃᓐᓇᕐᒥᒃ ᒫᓐᓇᐅᔪᖅ, ᐅᓗᕆᐊᓇᕐᒪᑦ ᓄᕙᒡᔪᐊᕐᓂᐅᔪᖅ − 19, ᑕᐃᒪᐃᒻᒪᑦ ᐃᑯᕐᕋᖅ ᐊᓯᐊᒍᑦ ᐱᓕᕆᕙᓪᓕᐊᓕᖅᑐᑦ.

ᓂᐅᕕᕈᑎᓂᒃ ᐊᑐᕐᓂᖅᓴᐅᓕᖅᑐᒍᑦ ᓱᓇᑖᕆᐊᓖᑦ ᐃᓱᒪᒋᓇᓱᒃᖢᒋᑦ 25-ᓂᒃ 30-ᓄᑦ ᐃᓚᒌᖕᓄᑦ ᑕᑯᒐᔪᒃᑕᑉᑎᓐᓄᑦ ᓂᕿᑖᕐᕕᖕᒥ.” ᑕᐃᒪᓐᓇ ᐅᖃᖅᖢᓂ ᕗᕆᑦᓚᓐ. “ᑯᐊᐸᒃᑯᑦ (ᑭᓴᕐᕕᒃ) ᐃᑲᔪᓚᐅᖅᑐᑦ ᓂᐅᕕᕈᑎᓂᒃ ᑐᓂᓯᑉᓗᑎᒃ ᐊᒻᒪᓗ ᑕᐃᒪᓐᓇ ᐱᓕᕆᓂᐊᖅᑑᔭᖅᑐᒍᑦ ᒫᓐᓇᐅᔪᖅ.”

ᕗᕆᑦᓚᓐ ᐅᖃᖅᖢᓂ ᐃᑯᕐᕋᖅ ᐃᒪᓐᓈᖅᑐᖅᑕᐅᓯᒪᙱᒻᒪᑦ ᓇᓕᐊᖕᓂᑐᐃᓐᓇᖅ ᒐᕙᒪᖁᑎᒋᔭᐅᔪᓂᒃ.

ᐅᖃᖅᖢᓂ, ᒪᓕᑐᐃᓐᓇᖅᑐᒡᒎᖅ ᖃᓄᐃᓕᐅᕈᑕᐅᕙᓪᓕᐊᔪᓂᒃ.

ᐊᒃᖢᔪᓐᓃᖅᑎᑦᑎᓇᓱᒃᑎᒃᑯᑦ ᓯᑕᒫᖑᓚᐅᖅᑐᒥ ᐅᕙᒻᓄᑦ ᐅᖃᓗᓚᐅᖅᑐᑦ, ᒫᑦᓯ 26-ᒥ, ᖃᐅᔨᓇᓱᒃᖢᑎᒃ ᖃᓄᐃᓕᖓᓕᕐᒪᖔᑦ ᓂᕿᑖᕐᕕᒃᐳᑦ, ᑕᐃᒪᐃᒻᒪᑦ, ᑕᐃᒪᑐᖅ, ᐋᖅᑭᒃᓯᓇᓱᖕᓂᐊᖅᐳᒍᑦ ᐱᔨᑦᓯᕋᕈᑎᒋᕙᒃᑕᖅᐳᑦ ᐱᒻᒪᕆᐊᓘᖕᒪᑦ ᓄᓇᖁᑎᒋᔭᑉᑎᓐᓄᑦ.

ᐃᓱᒫᓘᑎᖃᖅᑐᒍᑦ ᐃᑲᔪᕆᐊᖃᖅᑕᖅᐳᑦ ᐃᓚᕚᓪᓕᕐᓂᐊᖅᑐᒃᓴᐅᖕᒪᑕ ᓂᕿᑖᕐᕕᖕᒥ ᖃᓄᐃᑦᑐᒃᑰᕐᓂᕆᔭᖅᐳᑦ ᐊᓯᔾᔨᙱᑉᐸᑦ.

ᐃᓚᒌᖕᓂᒃ ᑕᐅᑐᖃᑦᑕᖅᑐᒍᑦ ᓲᕐᓗ ᓯᑕᒪᐅᒃᐸᑕ ᐃᒡᓗᒥᐅᖃᑎᒌᒃ − ᒪᕐᕉᒃ ᐃᓐᓈᒃ ᐊᒻᒪᓗ ᒪᕐᕉᒃ ᓄᑕᕌᒃ − ᐊᒻᒪᓗ ᑕᐃᒪᓐᓇ ᐃᑲᔪᕆᐊᖃᕋᔭᖅᑑᔭᖅᖢᑕ 25−ᓂᒃ 30-ᓄᑦ ᑕᖅᑭᑕᒫᒃᑯᑦ

ᐃᓄᐃᑦ ᐅᐸᒍᑎᑎᑦᑕᐃᓕᓕᓚᐅᖅᑕᖅᐳᑦ ᓂᕿᑖᕆᐊᖅᑐᕐᓗᑎᒃ ᒫᑦᓯ 18−ᒥ ᐊᒻᒪᓗ ᐊᑐᖔᓂᖅᖢᑕ $100−ᓂᒃ ᐊᑐᓂ ᐃᓚᒌᖕᓄᑦ ᓂᐅᕕᕈᑎᒥᒃ ᓯᕗᓪᓕᖅᐹᒃᑯᑦ ᒫᑦᓯ 25-ᒥ ᐊᒻᒪᓗ, ᑐᓴᖅᑎᑦᑎᔪᒪᔪᖓᑦᑕᐅᖅ, ᐅᖃᖃᑎᖃᖅᓯᒪᔪᒍᑦ ᐊᓯᐊᓂᒃ ᒐᕙᒪᒃᑯᑦ ᐱᓕᕆᕝᕕᖓᓂᒃ ᐅᕙᑉᑎᓐᓂᒃ ᐃᑲᔪᖅᓯᒪᔪᓂᒃ, ᑕᐃᒪᐃᒻᒪᑦ, ᖃᑉᓯᑲᓪᓚᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᐊᖑᒻᒪᑎᓂᐊᖅᑑᔭᖅᑐᒍᑦ 25-ᓂᒃ 30-ᓄᑦ ᐃᓚᒌᖕᓂᒃ ᐃᑲᔪᕈᓐᓇᕐᓂᕐᒧᑦ.”

ᕗᕆᑦᓚᓐ ᐅᖃᖅᖢᓂ ᐃᓱᒫᓘᑕᐅᓗᐊᖅᑐᕐᓕᒎᖅ ᑖᑉᑯᐊ ᓈᓴᐅᑏᑦ ᐃᓚᕚᓪᓕᖅᐸᑕ ᐅᑉᓗᓂᒃ ᖃᐃᔪᓂᒃ.

ᐃᓚᕚᓪᓕᕐᔪᐊᖅᐸᑕ, ᐅᖃᖅᓯᒪᔪᖅ ᐊᑐᒐᒃᓴᓂᒃ ᐱᑕᖃᙱᑦᑐᑦ ᒫᓐᓇᐅᔪᖅ − ᐃᑲᔪᕋᔭᖅᑐᓪᓗ ᐊᑭᓕᖅᑐᖅᑕᐅᓇᑎᒃ ᐅᕝᕙᓘᓐᓃᑦ ᑮᓇᐅᔭᑎᒍᑦ − ᐅᖓᑖᒍᑦ 30 ᓂᐅᕕᕈᑎᑖᖅᑎᑦᑎᒍᑏᑦ ᑐᓂᐅᖅᑲᐅᑕᐅᓚᐅᖅᑐᑦ ᒫᑦᓯ 25-ᒥ.

ᑮᓇᐅᔭᖅᑖᖅᓯᒪᒐᑉᑕ ᐅᑭᐅᑉ ᓄᙳᐊᓂ ᑮᓇᐅᔭᖃᕐᓇᐅᔪᒃᑯᑦ ᐊᑐᕈᓐᓇᖅᓯᒪᔭᖅᐳᑦ ᑲᒪᒋᔭᐅᔪᓐᓇᖁᑉᓗᒋᑦ ᑲᒪᒋᔭᕆᐊᓖᑦ ᒫᓐᓇᐅᔪᖅ.

ᕿᓚᒻᒥᐅᔪᒃᑯᑦ, ᖃᓄᐃᙱᑦᑐᓐᓇᖅᑐᒍᑦ ᒪᕐᕉᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᐃᓚᓯᒋᐊᕆᐊᖃᕈᑉᑕᓘᓐᓃᑦ ᑕᓪᓕᒪᓂᒃ ᖁᓕᓄᑦ ᐃᓚᒌᖕᓂᒃ ᐊᒻᒪᓗ ᓂᕿᓂᒃ ᐊᔾᔭᖅᓯᕝᕕᒋᓗᒋᑦ, ᑭᓯᐊᓂ ᑕᐃᑯᙵ ᑎᑭᓪᓗᒍ, ᖃᓄᐃᓐᓂᐊᕐᒪᖔᑦ ᓇᓗᓇᖅᑐᖅ.

ᐱᕙᓪᓕᐊᔫᔭᖅᑐᑦ ᓈᒻᒪᒃᑐᒃᑯᑦ ᐅᑭᐅᖅᑕᖅᑐᒥ.

ᑕᒫᓂ ᓄᕙᒡᔪᐊᕐᓂᒃᑯᑦ ᐊᒃᑐᖅᑕᐅᓯᒪᔪᒥᒃ ᑐᓴᓚᐅᙱᓐᓇᑉᑕ ᓱᓕ, ᑕᐃᒪᐃᒻᒪᑦ ᖃᓄᐃᓕᐅᕈᑕᐅᖁᔭᐅᓯᒪᔪᑦ ᐊᑑᑎᖃᖅᑑᔭᖅᑐᑦ.”