ᓂᐅᕕᕐᕕᒃᑯᑦ ᐃᖢᐊᖅᓴᐅᑎᑖᕐᕕᖓ ᑐᓂᓯᕐᔪᐊᖅᑐᑦ $5000-ᒥᒃ ᑲᖏᖅᖠᓂᐅᑉ Peewee Hᐊᑭᖅᑎᑯᓗᖏᓐᓄᑦ ᑲᖏᖅᖠᓂᕐᒥ ᒫᑦᓯ 7-ᒥ.
ᑲᖏᖅᖠᓂᕐᒥ Hᐊᑭᖅᑎᑯᓗᐃᑦ ᐃᐊᑦᒪᓐᑕᓐᓕᐊᕐᓂᐊᖅᑐᑦ Hᐊᑭᒋᐊᖅᑐᕐᓗᑎᒃ ᐅᐱᕐᖔᒃᑯᑦ ᐱᙳᐊᖅᑎᑦᑎᓂᐊᖅᑐᓄᑦ Hᐊᑭᕐᓂᒃᑯᑦ ᒫᑦᓯ 25-ᒥ 31-ᒧᑦ.
ᑎᒻ ᓯᒥᑦ, ᐊᖓᔪᖅᑳᖅ ᐃᖢᐊᖅᓴᐅᑎᓕᕆᓂᕐᒧᑦ ᓂᐅᕕᖅᑎᓄᑦ, ᐅᖃᖅᖢᓂ ᐅᔾᔨᕈᓱᓕᓚᐅᖅᑐᕉᖅ Peewee Hᐊᑭᖅᑎᑯᓗᖕᓂᒃ ᑮᓇᐅᔾᔭᒃᓴᕋᓱᒃᑐᓂᒃ ᑐᓴᕐᕕᒋᑉᓗᓂᐅᒃ ᕋᓯᐅᕐ ᕗᕐᐲᒃ, Hᐊᑭᖅᑎᐅᔫᑉ ᔭᐃᑕᓐ ᕗᐲᒃ ᐊᓇᓇᖓ ᐊᒻᒪᓗ ᑕᖃᔪᓐᓇᙱᐊᓗᒃᖢᑎᒃ ᑮᓇᐅᔾᔭᒃᓴᕋᓱᖕᓂᖏᓐᓄᑦ.
ᓇᓗᓇᙱᑲᐅᑎᒋᓚᐅᖅᑐᕉᖅ ᐃᖢᐊᖅᓴᐅᑎᑖᕐᕕᒃᑯᑦ ᐃᑲᔪᕆᐊᖃᕐᓂᖏᓐᓄᑦ ᐊᒻᒪᓗ ᖃᓄᑐᐃᓐᓇᖅ ᐱᓕᕆᔭᕆᐊᖃᕐᓂᖏᓐᓄᑦ ᐱᙳᐊᖅᑎᑯᓗᐃᑦ ᐃᐊᑦᒪᓐᑕᓐᓕᐊᕈᓐᓇᖁᑉᓗᒋᑦ.
“ᓂᐅᕕᕐᕕᖃᖅᑎᐅᑉᓗᑕ ᐃᑲᔪᕋᓱᒃᑎᐅᑉᓗᑕ ᑕᒪᑐᒥᙵ ᐱᒻᒪᕆᐅᑎᑦᑎᖃᑦᑕᕋᑉᑕ, ᐊᒻᒪᓗ ᖃᓄᑐᐃᓐᓇᑦᑎᐊᖅ ᐃᑲᔪᕋᓱᖃᑦᑕᖅᑐᒍᑦ ᐱᐅᓂᖅᓴᒃᑯᑦ ᖃᓄᐃᓕᐅᖅᑎᑦᑎᓇᓱᖕᓂᐊᕐᓂᕐᒧᑦ ᑕᐃᒪᐃᑦᑐᑎᑐᑦ,” ᑕᐃᒪᓐᓇ ᐅᖃᖅᖢᓂ ᓯᒥᑦ.
“ᐃᓄᐃᑦ ᑕᒪᕐᒥᒃ ᖃᐅᔨᒪᖕᒪᑕ Hᐊᑭᕐᓂᖅ ᖁᕕᐊᒋᔭᐅᑦᑎᐊᕐᓂᖓᓄᑦ ᑕᒡᕙᓂ ᓄᓇᓕᖕᒥ, ᐊᒻᒪᓗ ᐊᓕᐊᓇᐃᑦᑐᖅ ᐃᑲᔪᖃᑕᐅᔪᓐᓇᕋᑉᑕ ᐊᒻᒪᓗ ᐃᑲᔪᕈᓐᓇᕋᑉᑕ ᑖᑉᑯᓂᙵ ᒪᒃᑯᒃᑐᑯᓕᖕᓂᒃ ᐱᙳᐊᖅᑎᓂᒃ ᖁᑦᑎᖕᓂᖅᓴᒃᑯᑦ ᐱᒡᒍᓴᐅᔾᔪᐊᑕᐅᔪᓐᓇᖅᓯᓂᖏᓐᓄᑦ ᐃᐊᑦᒪᓐᑕᓐᒥ.”
ᑲᖏᖅᖠᓂᕐᒥ Hᐊᑭᖅᑎᑯᓗᐃᑦ ᒥᐊᓂᖅᓯᔨᖓ ᑕᐃᕝ ᕙᐃᔅᒪᓐ ᐅᖃᖅᖢᓂ Hᐊᑭᖅᑎᑯᓗᐃᒡᒎᖅ ᖃᐅᔨᙱᓈᖅᑕᐅᓗᑎᒃ ᐊᓕᐊᓇᐃᒋᔭᖏᑦᑎᒍᑦ ᖃᓄᐃᓕᐅᖅᑎᑕᐅᓂᐊᖅᑐᑦ ᐃᐊᑦᒪᓐᑕᓐᒥ.
ᐅᖃᖅᖢᓂ ᑲᖏᖅᖠᓂᕐᒥᒎᖅ ᐱᙳᐊᖅᑏᑦ ᐅᐱᒍᓱᑦᑎᐊᕐᓂᐊᖅᑐᑦ ᐃᓚᐅᖃᑕᐅᕝᕕᒋᓂᐊᖅᑕᖏᑦᑎᒍᑦ ᐃᐊᑦᒪᓐᑕᓐᒦᑎᓪᓗᒋᑦ, Hᐊᑭᕐᓂᐊᕐᓂᖏᑦᑕ ᓯᓚᑖᒍᑦ.
“ᑐᓴᖅᑎᑕᐅᓵᓚᐅᖅᑐᒍᑦ ᒪᕐᕉᖕᓂᒃ ᖃᓄᐃᓕᐊᕐᓂᕆᓂᐊᖅᑕᑉᑎᓐᓂᒃ Hᐊᑭᖅᑎᓄᑦ ᖁᕕᐊᒋᔭᐅᓂᐊᖅᑐᓂᒃ ᑭᓯᐊᓂ ᑐᓴᖅᑎᑦᑐᒪᙱᑕᖅᐳᑦ ᑭᓯᐊᓂ ᐃᐊᑦᒪᓐᑕᓐᒦᓕᕈᑉᑕ,” ᑕᐃᒪᓐᓇ ᐅᖃᖅᓗᓂ ᕙᐃᔅᒪᓐ.
“ᐱᙳᐊᖅᑎᑯᓗᐃᑦ ᐊᓕᐊᓇᐃᒍᓱᑦᑎᐊᕐᓂᐊᖅᑐᑦ ᐊᒻᒪᓗ ᐅᐊᕋᔮᖅ ᑕᐅᕗᙵᐅᓂᐊᕐᓂᖅᐳᑦ. ᓄᑕᕋᑯᓗᐃᑦ ᐅᐊᕋᔮᕈᓱᒃᑑᒐᓗᐅᑦ ᐅᕙᖓᑦᑕᐅᖅ ᑕᐃᑉᑯᑎᑐᓇᖅ ᐅᐊᕋᔮᕈᓱᒃᑐᖓ; ᐃᒻᒪᖄᓘᓐᓃᑦ ᐅᐊᕋᔮᕈᓱᖕᓂᖅᓴᐅᔪᖓ.”
ᓯᒥᑦ ᐅᖃᖅᖢᓂ ᐃᓱᒪᓕᐅᖅᓯᒪᓕᖅᑎᓪᓗᒍᒎᖅ ᐃᐊᑦᒪᓐᑕᓐᓕᐊᕐᓂᐊᖅᑐᓂᒃ ᐃᑲᔪᕐᓂᐊᕐᓂᕐᒧᑦ, ᐊᖏᖅᑕᐅᑲᐅᑎᒋᔪᓐᓇᓚᐅᖅᑐᑦ ᓂᐅᕕᖅᑎᒃᑯᑦ ᐊᖓᔪᖅᑳᖃᕐᕕᖓᓄᑦ.
ᐅᖃᖅᖢᓂᓗ ᓈᒻᒪᓈᑦᑎᐊᓚᐅᖅᑐᒡᒎᖅ ᑕᒡᕘᓇ ᓂᐅᕕᕐᕕᒃᑯᑦ ᐃᖢᐊᖅᓴᐅᑎᑖᕐᕕᖓ ᓂᐅᕕᓵᖅᑎᓪᓗᒍ ᓴᒃᑯᒃᑯᑦ ᐃᖢᐊᖅᓴᐅᑎᑖᕐᕕᖓᓂᒃ.