ᐊᕐᕌᒍᑕᒫᖅᓯᐅᑦ ᖁᕕᐊᓱᒃᑎᑎᓂᖅ ᐊᒻᒪ ᑮᓇᐅᔭᓂᒃ ᐱᕈᖅᓴᐃᓂᖅ ᑲᔪᓯᑦᓯᐊᓚᐅᖅᐳᖅ ᑲᖏᖅᖠᓂᕐᒥ ᑎᓴᐱᕆ 9-ᒥ.
ᕼᐊᒻᓚᒃᑯᑦ ᑲᖏᖅᖠᓂᕐᒥ ᐊᒻᒪ ᐅᔭᕋᒃᑕᕆᐊᑦ Agnico Eagle Mines (AEM) ᐱᓕᕆᖃᑎᒌᓚᐅᖅᐳᑦ ᑐᓂᓯᑉᓗᑎᒃ ᑮᓇᐅᔭᓂᒃ ᓯᑕᒪᓂᒃ $10,000 ᓄᓇᓕᖕᓄᑦ ᑎᒥᐅᔪᓄᑦ ᐃᑲᔪᖅᑕᐅᒋᐊᖃᖅᑐᓄᑦ ᑕᐃᒪᓐᓇ ᖁᕕᐊᓱᒃᑎᑦᓯᑎᓪᓗᒋᑦ.
ᐃᕙᕕᒃ ᐸᐃᕆᕕᒃ ᐊᒻᒪ ᓄᓇᓕᖕᓂ ᖁᕕᐊᓱᖕᓇᒥ ᓂᕿᑖᖅᑎᑎᔨᐅᕙᒃᑐᑦ ᐊᒻᒪ Arctic Wolves ᓵᑯᖅᑎᖏᑦ.
ᕼᐊᒻᓚᒃᑯᑦ ᑎᑎᕋᖅᑎᖓᑦ, ᔭᔅᑕᓐ ᒥᐅᕆᑦ ᐅᖃᓚᐅᖅᐳᖅ ᑕᒪᓐᓇ ᖁᕕᐊᓱᒃᑎᑦᓯᒍᑕᐅᓚᐅᖅᑐᖅ ᐱᒻᒪᕆᐅᓂᖓᓄᑦ ᑲᖏᖅᖠᓂᕐᒥᐅᓄᑦ.
ᐅᖃᓚᐅᖅᖢᓂᓗ ᑕᐃᒪᓐᓇᐃᓕᐅᓚᐅᕐᒪᑕ ᐱᓕᕆᖃᑎᖃᖅᖢᑎᒃ ᐅᔭᕋᒃᑕᕆᐊᓂᒃ AEM ᑮᓇᐅᔭᓂᒃ ᑐᓂᐅᖃᐃᔪᓐᓇᖁᑉᓗᒋᑦ ᑕᒪᒃᑯᓄᖓ ᑎᒥᐅᔪᓄᑦ ᓄᓇᓕᖕᓂ ᐃᑲᔪᖅᑕᐅᒋᐊᖃᖅᑐᓂᒃ ᑕᐃᒪᓐᓇᐃᓕᐅᖅᐸᒃᖢᑎᒃ ᐊᕐᕌᒍᑕᒫᑦ.
“ᑮᓇᐅᔭᓗᒃᑖᑲᓴᐃᑦ ᐱᔭᐅᔪᑦ ᐅᔭᕋᒃᑕᕆᐊᓂᑦ ᐊᑐᖅᑕᐅᖃᑦᑕᖅᐳᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᑦ ᐊᖏᕈᑎᓄᑦ, ᓂᖏᖅᑕᕈᑎᑦ ᐊᑭᓕᐅᑕᐅᓚᐅᔪᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓄᓐᓄᑦ, ᐊᒻᒪ ᑖᒃᓰᔭᐃᔭᕈᑎᓂᑦ ᐊᔾᔨᒌᖏᑦᑐᓂᒃ ᒐᕙᒪᓂᑦ, ᑭᓯᐊᓂ ᑮᓇᐅᔭᑦ ᕼᐊᒻᓚᒃᑯᓐᓄᑦ ᐱᔭᐅᖃᑦᑕᖅᑐᑐᐊᑦ, ᐊᓯᖏᑦ ᐃᑲᔪᖅᑕᐅᑦᓯᐊᖃᑦᑕᖅᖢᑎᒡᓗ ᐱᓕᕆᑎᑕᐅᓂᕐᒧᑦ, $169,000 ᐊᕐᕌᒍᒧᑦ ᐅᔭᕋᒃᑕᕆᐊᑦ ᐃᑲᔪᕈᑎᖏᑦ ᓯᑕᒪᓂᑦ ᐱᓕᕆᐊᒥᖕᓂᑦ, ᑕᒪᓐᓇ ᐊᕐᕌᒍᑕᒫᖅᓯᐅᑦ ᖁᕕᐊᓱᒃᑎᑦᓯᓂᖅ ᐃᓚᒋᔭᐅᑉᓗᓂ,” ᐅᖃᓚᐅᖅᐳᖅ ᒥᐅᕆᑦ.
“ᐊᓯᖏᑦ ᐱᖓᓱᑦ $50,000 ᐃᓕᓐᓂᐊᖅᑎᓄᑦ ᐊᐅᔭᒃᑯᑦ ᐱᓕᕆᑎᑕᐅᑎᓪᓗᒋᑦ , $25,000 ᐅᒥᐊᕐᔪᐊᒃᑯᑦ ᐊᒡᔭᖅᑐᐃᓂᕐᒧᑦ ᐴᒃᓴᐃᑦ ᐸᑐᕆᓂᒃ ᐃᓗᓕᖅᑐᖅᑕᐅᔪᓐᓇᕐᓂᖏᓐᓄᑦ ᐊᒃᑕᕐᕕᖕᒧᑦ ᐃᔨᑕᐅᖃᑦᑕᖁᖏᓕᖅᖢᒋᑦ, ᐊᒻᒪ $54,000 ᑐᓂᔭᐅᔪᒃᓴᐃᑦ ᐅᔭᕋᒃᑕᕆᐊᑦ ᐃᓚᒌᓂᒃ ᖁᕕᐊᓱᒃᓯᒃᑎᑦᓯᓕᕌᖓᑕ ᐊᐅᔭᒃᑯᑦ.
“ᑕᒪᕐᒥᒃ ᑮᓇᐅᔭᑦ ᑖᒃᑯᓇᖔᖅᑐᑦ $169,000 ᐅᑎᖅᑎᑕᖃᑦᑕᖅᐳᑦ ᓄᓇᓕᖕᓂᒥᐅᓄᑦ.
“ᑮᓇᐅᔭᓂᒃ ᐊᑐᖃᑦᑕᖏᑉᐳᒍᑦ ᐱᓕᕆᔨᑦᓯᓗᑕ ᑕᒪᒃᑯᓂᖓ ᑮᓇᐅᔭᓂᒃ ᑕᒪᒃᑯᐊ ᕼᐊᒻᓚᒃᑯᓐᓄᑦ ᑐᓂᔭᐅᔪᑦ ᐊᑐᖅᑕᐅᖃᑦᑕᖅᖢᑎᒃ ᓄᓇᓕᖕᓂ.”
ᑐᒃᓯᕋᖃᑦᑕᖅᐳᑦ ᓄᓇᓕᖕᓂ ᑎᒥᐅᔪᓂᑦ ᑐᓂᕐᕈᓯᐊᕈᒪᑉᓗᑎᒃ, ᐊᒻᒪ ᑲᑎᒪᔨᐊᓛᖏᑦ ᕿᒥᕐᕈᖃᑦᑕᖅᖢᑎᒃ ᓇᓕᐊᖏᑦ ᑐᓂᔭᐅᒋᐊᖃᕐᒪᖔᑕ ᖃᐅᔨᓴᖅᑎᐅᑉᓗᑎᒃ ᓂᕈᐊᖅᑎᑕᐅᑉᓗᑎᒡᓗ ᓯᑕᒪᓂᒃ ᑲᑐᔾᔨᖃᑎᒌᓂᒃ ᑐᓂᔭᐅᒋᐊᖃᖅᑐᓂᒃ.
ᑐᒃᓯᕋᐅᑎᖃᖅᑐᑦ 7ᐅᓚᐅᖅᐳᑦ ᓯᑕᒪᓂᑦ ᐱᓇᓱᐊᖅᑐᑦ ᑐᓂᔭᐅᖃᑦᑕᖅᑐᓂᒃ ᑕᒡᕙᓂ ᐊᕐᕌᒍᒥ .
ᒥᐅᕆᑦ ᐅᖃᓚᐅᖅᐳᖅ ᑮᓇᐅᔭᓕᐅᕈᑎᑦ ᐃᒥᐊᓗᒃᑖᖅᐸᓪᓕᐊᔪᓂᑦ ᑕᒡᕙᓂ ᐊᕐᕌᒍᒥ ᖁᕕᐊᓱᒃᑎᑦᓯᓚᐅᖅᑎᓪᓗᒋᑦ ᑐᓂᔭᐅᓚᐅᖅᐳᑦ ᓄᓇᓕᖕᓂ ᖃᑉᑎᕆᔨᓄᑦ ᐊᒃᓱᕈᖅᓯᒪᖕᒪᑕ ᑮᓇᐅᔭᓂᒃ ᐱᕈᖅᓴᐃᓇᓱᐊᖅᖢᑎᒃ ᐱᖁᑎᑖᕈᑎᒃᓴᓄᑦ.
ᐅᖃᓚᐅᖅᐳᖅ ᑲᑎᑦᖢᒋᑦ $47,000−ᓂᒃ ᐱᕈᖅᓯᓚᐅᖅᐳᑦ, ᓄᓇᓕᖕᓂ ᐊᕐᕌᒍᒥ ᖃᓄᐃᓕᐅᕈᑎᓄᑦ ᐊᑐᖅᑕᐅᑲᐅᑎᒋᓚᐅᖅᖢᑎᒃ.
“ᑖᒃᑯᐊ 6 ᑲᑎᒪᔨᐊᓛᑦ ᖃᐅᔨᓴᓚᐅᖅᐳᑦ ᕿᒻᒥᕐᓗᑎᒃ ᑐᒃᓯᕋᐅᑎᖏᓐᓂᒃ 7 ᓯᑕᒪᑦ ᑖᒃᑯᐊ ᐱᒋᐊᖃᕐᓂᖅᓴᐅᔪᑦ ᓂᕈᐊᖅᑕᐅᓕᖅᖢᑎᒃ.
“ᑕᐃᒪ, ᐊᕐᕌᒍᓂ ᒪᕐᕉᓯᒪᓕᖅᑐᓂ, 8−ᖑᓕᖅᐳᑦ ᐃᑲᔪᖅᓯᒪᔭᖅᐳᑦ ᐊᒻᒪ, ᓯᕗᒧᐊᖕᓂᐊᕐᓗᑕ, ᑐᒃᓯᕋᕐᕕᐅᒃᑲᓐᓂᕈᑉᑕ, ᐃᑲᔪᕈᓐᓇᕋᔭᖅᐸᕗᑦ ᑕᒪᒃᑯᐊ ᑮᓇᐅᔭᑦ ᐊᔾᔨᒌᖏᑦᑐᓗᒃᑕᓄᑦ ᐊᑐᖅᑕᐅᔪᓐᓇᖁᑉᓗᒋᑦ.
“ᑕᒪᒃᑯᐊ ᓈᓴᐅᑎᑦ ᑐᒃᓯᕋᖅᑐᓂᒃ ᓂᕈᐊᕋᓱᐊᖅᖢᑕ ᖃᓂᒌᓚᐅᖅᐳᑦ, ᐱᓗᐊᖅᑐᒥᒃ ᑎᒥᐅᔪᓂᑦ ᒪᕐᕉᖕᓂᑦ 6-ᓄᑦ, ᑭᓯᐊᓂ ᐊᔾᔨᒌᒃᑐᖃᖏᓚᐅᖅᐳᑦ ᑕᐃᒪᓐᓇᑦᓯᐊᖅ, ᑕᐃᒪᓐᓇ ᑕᒡᕙ ᐱᓕᕆᐊᕆᓚᐅᖅᐸᕗᑦ.
“ᖁᕕᐊᓱᒃᑎᑦᓯᓂᖅ ᑲᔪᓯᑦᓯᐊᓚᐅᖅᐳᖅ ᓄᓇᓕᖕᓂᒥᐅᓪᓗ ᓄᑖᒥᒃ ᑖᒃᓯᖃᓕᖅᖢᑎᒃ, ᓇᐳ ᑖᒃᓯ, ᑐᓂᓯᓚᐅᖅᐳᑦ ᑮᓇᐅᔭᓂᒃ ᐊᖏᕐᕋᐅᔾᔨᖁᑉᓗᒋᑦ ᐃᓄᖕᓂᒃ ᑖᒃᓯᒃᑯᑦ ᓄᓇᒃᑰᕈᑎᖏᓐᓂᒡᓗ ᐊᖁᓪᓗᑎᒡᓘᓐᓃᑦ ᐃᒥᐊᓗᒃᓯᒪᒃᐸᑕ ᑕᒡᕙᖓᑦ ᐃᓚᐅᑉᓗᑎᒃ.”
ᐃᕙᓐ ᒧᐊᕆᓴᓐ ᑖᒃᑯᓇᖓᑦ ᐃᖃᐃᓕᓴᖅᑐᓕᕆᔨᒃᑯᓐᓂᒃ Fitness Centre ᐅᖃᓚᐅᖅᐳᖅ ᐱᓕᕆᔨᑦ ᖁᕕᐊᓱᓚᐅᕐᒪᑕ ᓄᓇᓕᖕᓂᒥᐅᑦ ᐃᑲᔪᕋᓱᐊᕐᓂᖏᓐᓄᑦ ᑖᒃᑯᐊ ᖃᓄᐃᓕᐅᕐᕕᖕᓂᒃ.
ᐅᖃᓚᐅᖅᖢᓂᓗ ᐃᖃᐃᓕᓴᕐᕕᒃ ᑮᓇᐅᔭᖃᖏᒻᒪᑕ ᐃᖃᐃᓕᓴᐅᑎᒃᓴᓂᒃ ᓂᐅᕕᕈᒪᒐᓗᐊᖅᖢᑎᒃ ᐱᔨᑦᓯᕋᑦᓯᐊᕈᒪᑉᓗᑎᒃ ᓄᓇᓕᖕᓂᒥᐅᓂᒃ, ᑐᓂᔭᐅᑉᓗᑎᒃ ᖁᕕᐊᓱᒃᓯᐊᓚᐅᖅᐳᑦ.
“ᑕᒪᓐᓇ ᐱᓕᕆᐊᖅ ᒑᕙᓐ ᔩ, ᕗᐊᑦ ᕕᑐᕆᒃᓗ ᐱᒋᐊᓚᐅᖅᓯᒪᔭᖅᐳᑦ ᑕᐃᑉᓱᒪᓂᑐᖃᖅ 2014ᒥ ᐃᑲᔪᖅᑕᐅᑉᓗᑕ ᓄᓇᓕᖕᓂᒥᐅᓄᑦ, ᐊᒻ, ᐃᖃᐃᓕᓴᕐᕕᒃ ᐱᕚᓪᓕᕈᑎᖃᖅᓯᒪᓕᖅᐳᖅ ᖁᕕᐊᓇᖅᖢᓂᓗ ᐃᓕᑕᕆᔭᐅᖃᑕᐅᑉᓗᓂ.
“ᑕᐃᒪᓐᓇ ᑐᓂᔭᐅᑉᓗᑕ ᑮᓇᐅᔭᓂᒃ ᐃᓕᓯᔪᓐᓇᓕᖅᐳᒍᑦ ᓄᑖᒥᒃ ᐊᑐᖅᑕᐅᒋᐊᖃᓪᓚᕆᒃᑐᒥᒡᓗ ᓇᑎᕐᒥᒃ ᐃᖃᐃᓕᓴᕐᕕᑉᑎᓐᓂ.
“ᓯᕗᓪᓕᕐᒥ, ᑐᓂᔭᐅᔪᑦ ᓈᒻᒪᓚᐅᖏᒃᑲᓗᐊᖅᐳᑦ ᓂᐅᕕᕐᓂᐊᕐᓗᓂ ᓇᑎᕐᒥᒃ ᑕᒪᐅᖓᓗ ᑎᑭᑎᓪᓗᒍ, ᑭᓯᐊᓂ ᑖᒃᑯᐊ Arctic Connections ᐱᓕᕆᖃᑎᒋᓚᐅᖅᐸᕗᑦ ᐊᑭᓗᒃᓯᒋᐊᖅᑎᑦᓯᔪᓐᓇᓚᐅᖅᖢᑎᒡᓗ ᑕᒪᐃᓐᓂᒃ ᐋᖅᑭᒃᑕᐅᑎᑦᓯᓂᐊᖅᖢᑕ ᐊᑐᕐᓗᑕ $10,000ᓂᒃ.
“ᐊᖏᓛᒃ ᐅᕙᒻᓄᑦ, ᐃᖕᒥᓂᒃ, ᐃᓕᑕᕆᔭᐅᓂᖅ ᓄᓇᓕᖕᓂᒥᐅᓄᑦ ᑕᐃᒪᓐᓇ ᑮᓇᐅᔭᓪᓗ ᐃᑲᔪᓚᐅᖅᖢᑎᒃ.”