ᓄᓇᓕᖕᓂ ᐊᐅᓚᑦᑎᔨ ᖃᒪᓂᑦᑐᐊᕐᒥ ᐊᑭᕋᖅᑐᖅᖢᓂ ᐅᖃᓪᓚᐅᓯᖃᖅᐳᖅ ᒐᕙᒪᒃᑯᓐᓂ ᐊᒃᑕᑯᖏᓐᓂ ᖃᔅᓯᒐᓚᖕᓂ ᐃᓚᒋᔭᐅᔪᓂ ᓯᓚᒥ ᐱᙳᐊᕐᕕᖓᓄᑦ ᐃᓚᖏᓐᓂ ᐳᐊᕐᕆᔭᖅᑕᐅᑎᓪᓗᒋᑦ ᒐᕙᒪᒃᑯᑦ ᑳᓐᑐᕌᒃᑎᖏᓐᓄᑦ.
“ᓄᓇᓕᖕᓂ ᐃᓚᖏᓐᓂ ᐃᓄᖕᓂ ᐊᐃᑦᑖᕈᓱᕕᒡᔪᐊᖅᑐᑦ,” ᕼᐋᒻᓚᒃᑯᑦ ᓄᓇᓕᖕᓂ ᐊᐅᓚᑦᑎᔨᖓ ᓯᐅᓪᑎᓐ ᑐᐊᕆ ᐅᖃᐅᔾᔨᓚᐅᖅᐳᖅ ᑭᕙᓪᓕᕐᒥ ᓂᐱᖓᓐᓄᑦ.
ᑐᐊᕆ ᐅᖃᓚᐅᖅᐳᖅ ᐅᖃᓗᒡᕕᐅᓚᐅᕐᓂᖓᓂ ᐃᓕᓐᓂᐊᖅᑐᓕᕆᔨᒃᑯᓐᓂ ᖃᔅᓯᒐᓚᖕᓂ ᐱᓇᓱᐊᕈᓯᐅᓕᖅᑐᒥ ᐅᖃᐅᔾᔨᔪᒥ ᓯᓚᒥ ᐱᙳᐊᕐᕕᐅᔪᖅ ᐃᓚᖓᑦ ᓇᑉᐸᖅᑎᑕᐅᓂᑯᒥ ᕼᐋᒻᓚᒃᑯᓐᓄᑦ ᐃᓕᓐᓂᐊᕐᕕᐅᑉ ᓄᓇᖁᑎᖓᓐᓄᑦ ᐊᕐᕌᓂ ᐃᒍᑦᑎᖅᑕᐅᔭᕆᐊᖃᕐᓂᖓᓂ ᑭᐅᒪᓚᐅᙱᒻᒪᑦ ᐱᔭᕆᐊᖃᖅᑐᒥ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒋᐊᓕᖏᓐᓂ.
ᑐᐊᕆ ᐅᖃᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᐅᖃᐅᔾᔨᓚᐅᖅᐳᑦ ᑳᓐᑐᕌᒃᑎᐅᔪᑦ ᐃᓕᓯᓚᐅᖅᑐᓂ “ᐱᔪᓐᓇᕐᓂᖃᙱᑦᑑᓪᓗᑎᒃ ᐃᓅᓚᐅᖅᐳᑦ” ᐊᒻᒪᓗ ᐋᖅᑭᒋᐊᖅᓯᓂᖃᕆᐊᖃᓚᐅᖅᐳᑦ ᓯᕗᓪᓕᕐᓂ ᐸᕐᓇᐅᑎᒧᑦ, ᐃᓱᐊᓂ ᐃᓕᔭᐅᔪᕕᓂᕐᓄᑦ ᐊᑦᑕᓇᕐᓂᕋᖅᑕᐅᓪᓗᓂ.
“ᕼᐋᒻᓚᒃᑯᑦ ᓴᐳᔾᔨᔾᔪᑎᓂᑦ ᐃᓕᓯᔪᒃᓴᐅᓂᕐᒪᑕ ᐃᓚᒋᔭᐅᙱᑦᑐᒥ ᐋᖅᑭᒃᑕᐅᓯᒪᓂᐅᔪᒧᑦ,” ᐅᖃᓚᐅᖅᐳᖅ ᑐᐊᕆ.
ᐃᒋᑕᐅᑐᐃᓐᓇᙱᓪᓗᓂ ᐋᖅᑭᒃᑕᐅᓯᒪᓂᐅᔪᒥ ᑐᐊᕆ ᐊᐱᕆᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐃᒍᑦᑎᖅᑕᐅᓗᓂ ᐊᑐᖅᑕᐅᒃᑲᓐᓂᕈᓐᓇᕐᓂᐊᕐᒪᑦ, ᐊᖏᕈᑕᐅᓚᐅᖅᖢᓂ.
ᐱᓇᓱᐊᕈᓯᐅᓚᐅᖅᑐᒥ ᑳᓐᑐᕌᒃᑎᐅᔪᓂ ᓴᖅᑭᑦᑐᖃᓚᐅᖅᐳᖅ ᐲᔭᐃᔭᖅᑐᖅᖢᑎᒃ ᐋᖅᑭᒃᓯᒪᓂᐅᔪᒥ ᑭᓯᐊᓂ ᐱᓕᕆᓂᖏᓐᓂ ᐳᐊᕐᕆᔭᐃᑐᐃᓐᓇᓚᐅᖅᐳᑦ ᒪᕐᕉᒃᑲᓐᓂᕐᓂ ᐃᓚᒋᔭᐅᔪᓂᑦ ᓯᓚᒥ ᐱᙳᐊᕈᑕᐅᔪᓄᑦ, ᐊᕐᕌᒍᒐᓴᓂ ᑕᐃᑲᓃᓯᒪᔪᓂᑦ.
ᑐᐊᕆ ᐅᖃᓚᐅᖅᐳᖅ ᑐᑭᓯᙱᓚᖅ ᖃᓄᐃᒻᒪᑦ ᐃᓕᓐᓂᐊᖅᑐᓕᕆᔨᒃᑯᑦ ᐱᓯᒪᐃᓐᓇᕈᒪᓚᐅᙱᓐᓂᖓᓐᓂ ᐃᓚᖏᓐᓂ ᓄᑕᐅᙱᑦᑐᒥ ᓯᓚᒥ ᐱᙳᐊᕐᕕᐅᔪᒥ ᐊᑐᖅᑕᐅᒃᑲᓐᓂᕈᓐᓇᖅᑎᓪᓗᒋᑦ.
“ᐃᒋᑦᑎᓂᑐᐃᓐᓇᐅᕗᖅ ᑮᓇᐅᔭᓂ,” ᐅᖃᓚᐅᖅᐳᖅ ᑐᐊᕆ, ᐅᖃᓚᐅᖅᑐᒥ ᓯᓚᒥ ᐱᙳᐊᕐᕕᐅᔪᑦ ᐊᑭᖃᕈᓐᓇᖅᐳᑦ ᑕᑉᐸᐅᖓ $10,000-ᒧᑦ. “ᓄᑕᐅᙱᑦᑐᒥ ᓯᑭᑑᖃᕈᕕᑦ '70-ᖏᓐᓂ '80-ᖏᓐᓂᓪᓗ ᑭᐅᒪᔾᔮᙱᓚᖅ ᓄᑖᖑᔪᓂ ᒪᓕᒃᑕᐅᔭᕆᐊᓕᖕᓂ. ᑭᓯᐊᓂ ᐃᖏᕐᕋᔪᓐᓇᖅᐹ? ᐄᑦᑎᐊᒻᒪᕆᒃ.”
ᑐᐊᕆ ᐅᖃᓚᐅᖅᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᓄᑖᒥ ᓯᓚᒧᑦ ᐱᙳᐊᕈᑎᑖᖅᓯᒪᕗᑦ ᐅᒥᐊᕐᔪᐊᒃᑯᑦ ᐊᕐᕌᓂᐅᓚᐅᖅᑐᒥ, ᓂᕆᐅᒋᓚᐅᖅᑕᖓ ᐃᓇᖏᖅᓯᓛᕐᓂᖓᓂ ᓄᑕᐅᙱᑦᑐᓂ ᓱᕋᑦᑎᔭᐅᓚᐅᖅᑐᓄᑦ.
“ᖃᐅᔨᒪᙱᑦᑐᖓ ᖃᓄᑎᒋ ᓄᑖᖑᔪᖅ ᓯᓚᒥ ᐱᙳᐊᕐᕕᖓ ᐊᖏᑎᒋᓂᐊᕐᓂᖓᓂ. ᐊᖏᓂᖅᓴᐅᓂᐊᖅᑐᒃᓴᐅᕗᖅ ᑭᓯᐊᓂ ᐅᕙᓐᓄᑦ ᐃᒋᑦᑎᑐᐃᓐᓇᕐᓂᐅᕗᖅ,” ᐅᖃᓚᐅᖅᐳᖅ.
ᑭᕙᓪᓕᕐᒥ ᓂᐱᖓᑦ ᖃᐅᔨᓇᓱᐊᓚᐅᖅᐳᑦ ᐃᓕᓐᓂᐊᖅᑐᓕᕆᔨᒃᑯᓄᑦ ᐅᓂᒃᑳᖁᔨᓪᓗᑎᒃ ᖃᓄᐃᓚᐅᕐᓂᖏᓐᓂ ᑭᓯᐊᓂ ᑭᐅᔭᐅᓚᐅᙱᑦᑐᖅ ᐅᖃᓕᒫᒐᖅ ᑎᑎᕋᖅᑕᐅᔭᕆᐊᖃᓕᖅᑎᓪᓗᒍ.
ᑐᐊᕆ ᐅᖃᓚᐅᖅᐳᖅ ᓂᕆᐅᒃᐳᖅ ᓴᓇᒃᑲᓐᓂᓛᕈᓐᓇᕐᓂᖏᓐᓂ ᕼᐋᒻᓚᒃᑯᑦ ᓯᓚᒥ ᐱᙳᐊᕐᕕᖓᓂ. ᑭᓯᐊᓂ, ᐅᑕᖅᑭᕗᖅ ᓇᓗᓇᐃᖅᑕᐅᓂᐅᔪᒥ ᕼᐋᒻᓚᒃᑯᑦ ᑭᓱᓂ ᐊᑦᑕᓇᔾᔭᐃᖅᓯᒪᓂᕐᒧᑦ ᐱᔭᕆᐊᖃᕐᓂᐅᔪᓄᑦ ᑭᐅᓂᖓᓄᑦ ᓈᒻᒪᒋᔭᐅᓂᖓᓄᑦ. ᒫᓐᓇᐅᔪᒥ ᐃᓱᒫᓗᒃᐳᖅ ᐃᓕᓐᓂᐊᖅᑐᓕᕆᔨᒃᑯᑦ ᐱᔭᕆᐊᖃᖅᑎᑦᑎᓂᐊᕐᓂᖏᓐᓂ ᓇᓗᓇᐃᖅᑕᐅᓯᒪᔪᓂ ᑭᓯᐊᓂ ᐱᓕᕆᔨᐅᔪᓄᑦ ᐱᓕᕆᓂᖏᓐᓄᑦ.
“(ᐃᓕᓐᓂᐊᖅᑐᓕᕆᔨᒃᑯᑦ) ᐅᖃᓚᐅᖅᐳᖅ ᐸᐃᑉᐹᖃᖅᑐᒥ ᐃᓕᓯᔨᐅᔪᖃᕆᐊᖃᖅᐳᑦ ᐅᕙᓘᓐᓃᑦ ᐃᓕᓗᒍ ᐊᒻᒪ ᐃᓕᔅᓯ ᐱᓗᒍ ᐊᑭᓕᕆᐊᓕᖏᓐᓂᑦ,” ᐅᖃᓚᐅᖅᐳᖅ. “ᐃᑲᔪᕈᑎᒃᓴᖃᙱᓚᒍᑦ ᑕᐃᒪᐃᓐᓂᕐᒧᑦ.”