ᑕᐃᒪᖓᓂᑦ ᐅᒥᐊᕐᔪᐊᒃᑯᑦ ᓂᐅᕈᑲᑕᒃᑐᓂᒃ ᑎᑭᑦᑐᖃᕌᖓᑦ ᐊᐅᔭᒃᑯᑦ ᐃᒡᓗᓕᖕᒧᑦ ᓄᓇᓕᖕᒥᐅᓄᑦ ᐳᓚᕋᑲᑕᓕᖃᑦᑕᕐᒪᑕ ᑕᑯᕚᒃᓴᖅᓯᐅᖅᖢᑎᒃ ᓴᓇᐅᒐᓂᒃ ᐊᖏᕐᕋᕆᔭᐅᔪᓂᑦ, ᒍᕆᒃ ᒧᕌᔅ ᑕᒪᑐᒥᖓ ᐋᕐᑭᒃᓯᓇᓱᐊᓕᓚᐅᖅᑐᖅ.
ᒧᕌᔅ ᑎᑎᕋᖅᐸᓪᓕᐊᓕᖅᑐᖅ ᑮᓇᐅᔭᓂᒃ ᑐᒃᓯᕋᐅᑎᓂᒃ ᑲᓇᑕᒥᐅᑦ ᐅᑭᐅᖅᑕᖅᑐᖓᓂ ᑮᓇᐅᔭᒃᓴᐅᑎᒃᓴᓂᒃ ᐱᕙᓪᓕᐊᑎᑦᑎᔨᒃᑯᓐᓂᑦ ᑕᒪᓐᓇ ᓴᓇᕕᓕᐊᖑᔪᒪᔪᖅ ᑲᔪᓯᑦᑎᐊᕈᓐᓇᕋᔭᕐᒪᖔᑦ ᖃᐅᔨᓴᖅᑕᐅᖁᓪᓗᒍ, ᑕᒫᓂ ᓄᓇᓕᖓᓂ ᐱᑕᖃᕆᐊᖃᓪᓗᑐᕐᒪᑦ ᑕᐃᒪᐃᑦᑐᒥᒃ ᓴᓇᐅᒐᖅᑎᓄᑦ ᓴᓇᕕᖕᒥᒃ.
“ᑕᐃᒃᑯᐊ ᑲᑎᒪᔨᖏᑦ ᖃᐅᔨᓴᖅᑕᐅᑎᑦᑎᔪᓐᓇᖅᐸᑕ ᑕᒪᑐᒪᓂ ᐅᑭᐅᑦᑎᓐᓂ ᓈᒻᒪᒃᑲᔭᖅᑐᖅ, ᑕᐃᒪᓐᓇ ᑮᓇᐅᔭᓂᒃ ᑐᒃᓯᕋᓕᕈᑦᑕ ᐃᑲᔪᕐᓂᐊᕐᒪᑕ ᑭᖑᓪᓕᕐᒥ ᐅᑭᐅᖑᓂᐊᖅᑐᒥ ᑕᒪᓐᓇ ᑐᒃᓯᕋᐅᑎᒋᓕᕈᑦᑎᒍ,” ᐅᖃᕆᓪᓗᓂ ᒧᕌᔅ.
ᑲᔪᓯᑦᑎᐊᕈᓐᓇᕐᒪᖔᑦ ᖃᐅᔨᓴᖅᑕᐅᓕᖅᐸᑦ ᐃᑲᔪᕈᑕᐅᓂᐊᕐᒪᑦ ᐊᐱᖅᑯᑕᐅᓱᓄᑦ ᑭᐅᓯᔪᑕᐅᓗᓂ ᒪᑯᓄᖓ ᐃᒡᓗᓕᐅᖅᑕᐅᒋᐊᖃᕐᓂᐊᖅᐹ ᓄᑖᒥᒃ ᐅᕝᕙᓘᓐᓃᑦ ᓄᓇᓕᖓᓃᑉᐸᒌᖅᑐᒥᒃ ᐃᓚᓕᐅᑎᓗᑎᒃ ᐊᑐᕋᓗᐊᖅᐸᑕ ᓈᒻᒪᒃᑲᔭᖅᐸ, ᑕᒪᒃᑯᐊ ᑐᑭᓯᔪᓐᓇᕋᔭᕋᑦᑎᒍ, ᐅᖃᕆᓪᓗᓂ.
ᔭᔅᑎᓐ ᕗᐊᑦ, ᐱᓕᕆᐊᕆᔭᐅᔪᒥᒃ ᑐᑭᒧᐊᖅᑎᑦᑎᔨᖓᑦ ᓄᓇᕗᒥ ᓴᓇᐅᒐᖅᑏᑦ ᒥᖅᓱᖅᑏᓪᓗ ᑲᑐᔾᔨᖃᑎᒌᖓᓐᓂ, ᓈᒻᒪᒃᓴᕐᓂᕋᓚᐅᖅᑐᖅ ᐃᒡᓗᓕᖕᒥᐅᑦ ᕼᐊᒪᓚᖓᑕ ᑕᒪᓐᓇ ᐱᓇᓱᐊᕐᓗᓂᔪᒃ ᐊᒃᓱᕉᑎᒋᒃᐸᒍ ᑮᓇᐅᔭᓂᒃ ᐱᑎᑕᐅᔪᓐᓇᕋᓱᒋᓪᓗᓂᒋᑦ ᒥᖅᓱᕐᕕᓕᐅᕈᑎᒃᓴᓂᒃ, ᓄᓇᓕᖓᓄᑦ ᓂᐅᕈᔪᑦ ᓄᓇᓕᖓᓂ ᓴᓇᔭᐅᓯᒪᔪᓂᒃ ᓂᐅᕕᕈᓐᓇᕐᓂᐊᕐᒪᑕ ᐃᒻᒪᖄ ᓄᓇᓕᖓᑕ ᑯᐊᐸᖓᓂ ᐅᕝᕙᓘᓐᓃᑦ ᓄᐊᒫᑦᒥ.
“ᑕᐃᒪᖓᓂᑦ ᑐᓴᕆᐊᒃᓴᖅ ᓴᓇᐅᒐᓕᕆᔪᒪᔪᓂᒃ ᓄᓇᓕᖕᓂ ᐱᐅᒃᓴᖃᑦᑕᕋᑦᑕ ᐱᕙᓪᓕᐊᑎᑦᑎᔪᒪᔪᓂᒃ ᓴᓇᖑᐊᖅᑎᓂᒃ ᒥᖅᓱᖅᑎᓂᒃᓗ ᐅᕝᕙᓘᓐᓃᑦ ᓴᓇᕕᒃᓴᓂᒃ ᐃᒡᓗᓕᐅᖅᑕᐅᖁᔨᔪᓂᒃ,” ᕗᐊᑦ ᐅᖃᕆᓪᓗᓂ. “ᑕᒫᓂ ᐱᑕᖃᕆᐊᖃᓪᓗᑐᕐᒪᑦ ᓴᓇᕕᖕᒥ ᓴᓇᐅᒐᖅᑎᓄᑦ ᒥᖅᓱᖅᑎᓄᓪᓗ, ᐱᑕᖃᕆᐊᓕᒃ ᓄᓇᓕᓕᒫᓂ ᐱᒃᑯᒥᓇᕋᔭᖅᑐᖅ ᓴᓇᐅᒐᖅᑏᑦ ᐅᐸᒃᕕᒃᓴᖃᖅᐸᑕ ᐊᒻᒪᓗ ᓂᐅᕈᓯᒪᔪᑦ ᓂᐅᕕᕐᕕᒃᓴᖃᕐᓗᑎᒃ ᓄᓇᓕᖕᒥᐅᓄᑦ ᓴᓇᐅᒐᕐᓂᒃ.”
“ᑭᒃᑯᑐᐃᓐᓇᐃᑦ ᓴᓇᐅᒐᕐᒥᒃ ᓂᐅᕕᕌᖓᑕ, ᐱᓗᐊᖑᐊᖅᑐᒥᒃ ᐃᓚᖏᑦ ᐱᔭᕆᑐᔪᓂᒃ ᓴᓇᑦᑎᐊᖅᓯᒪᔪᓂᒃ ᓴᓇᓲᖑᖕᒪᑕ, ᖃᓄᑐᐃᓐᓇᖅ ᐅᓂᒃᑳᖃᕌᖓᑕ ᐱᒃᑯᒥᒋᔭᐅᓂᖅᓴᐅᓲᖑᖕᒪᑕ ᓂᐅᕈᓯᒪᔪᓄᑦ. ᐃᒫᖃᐃ ᑕᐃᓱᒪᓂ ᑕᒪᐅᖓ ᐃᒡᓗᓕᖕᒧᑦ ᑎᑭᓯᒪᓪᓗᖓ ᐱᓚᐅᖅᑕᕋ ᑕᐅᑐᓚᐅᖅᑐᖓ ᓴᓇᔭᐅᑎᓪᓗᒍ ᓄᓇᓕᖓᓂ, ᑕᑯᕚᖅᑖᖅᖢᑎᒃ ᐃᓚᖏᓪᓗ ᓴᓇᖑᐊᒐᓂᒃ ᑲᑎᖅᓱᐃᖃᑦᑕᖅᑐᓄᑦ ᓂᐅᕕᖃᑦᑕᖅᑐᓄᓪᓗ. ᐅᓂᒃᑳᖃᖅᑎᓪᓗᒋᑦ ᓇᒥ ᐱᔭᐅᓯᒪᓂᖏᓐᓂᒃ.
ᐊᐅᔭᖅ ᐃᒡᓗᓕᒃᒧᑦ ᑎᑭᓯᒪᔪᖃᓚᐅᕐᒪᑦ ᐅᒥᐊᕐᔪᐊᒥᒃ, ᓄᓈᖅᑐᖃᖅᖢᓂ ᖁᓕᓂᒃ ᑕᑯᒋᐅᕆᐊᖅᑐᖅᑐᓂᒃ ᑕᒫᓂᕐᒥᐅᓂᒃ ᐊᒻᒪᓗᑦᑕᐅᖅ ᑎᑭᑕᐅᓯᒪᓚᐅᕆᓪᓗᑎᒃ ᐊᓯᖏᓐᓂᑦ ᐅᒥᐊᕐᔪᐊᓂᑦ ᐱᔪᓂᒃ ᐊᓯᕙᕈᔾᔭᐅᔪᒪᔪᓂᒃ ᐆᒪᔪᓂᒃ ᑕᑯᔭᖅᑐᖅᑐᓂᒃ/ᐊᔾᔨᓕᐅᕆᔪᒪᔪᓂᒃ ᑎᑭᑕᐅᓯᒪᓚᐅᕆᓪᓗᑎᒃ ᐃᒻᒪᖄ 12-ᓂᒃ ᐊᖅᑯᓵᖅᓯᒪᔪᖃᓚᐅᕆᓪᓗᓂ ᐊᐅᔭᖅ, ᒧᕌᔅ ᐅᓂᒃᑳᕆᓪᓗᓂ.
ᑖᒃᑯᓇᖓᑦ ᓄᓇᓕᖕᒥᐅᑦ ᑮᓇᐅᔭᓂᒃ ᐱᓚᐅᖅᑐᑦ $40,000-ᒧᑦ ᑎᑭᓱᒍ ᐊᑕᐅᓯᕐᒥᒃ ᐅᒥᐊᕐᔪᐊᒥᑦ ᑎᑭᓯᒪᔪᓂᑦ - ᐃᓚᐅᑎᓪᓗᒋᑦ ᓂᐅᕕᖅᑐᑦ ᐃᖃᓗᖕᓂ ᑕᒫᓂᕐᒥᐅᑦ ᐊᖑᓇᓱᒃᑎᖏᓐᓂᑦ 200-ᐸᐅᓐᔅᓗᐊᓂᒃ ᐃᖃᓗᒃᐱᓂᒃ ᓄᓇᓕᖕᒥᐅᓂᑦ ᓂᐅᕕᓚᐅᕐᒥᔪᑦ, ᐅᓂᒃᑳᕆᓪᓗᓂ ᒧᕌᔅ.
“ᑎᑭᑕᐅᓂᐊᕐᓂᑦᑎᓐᓄᑦ ᓂᐅᕕᕈᒪᔪᓂᒃ ᐸᕐᓇᒃᓯᒪᑦᑎᐊᕈᑦᑕ, ᓱᓕᒃᑲᓐᓂᖅ ᑮᓇᐅᔭᒃᓴᐅᑎᒋᒃᑲᓐᓂᕈᓐᓇᖅᑐᒍᑦ,” ᐅᖃᕆᓪᓗᓂ. “ᐃᒻᒪᖄ ᐊᓯᖏᓐᓄᑦ ᐅᒥᐊᕐᔪᐊᓄᑦ ᑎᑭᕝᕕᐅᖃᑦᑕᓕᕐᓂᐊᖅᐳᒍᑦ ᑭᖑᓂᖓᓂ (ᐊᐅᔭᐅᓂᐊᖅᑐᓂ). ᑕᒪᑐᒪᓂ ᐊᐅᔭᖅ ᐃᓕᑉᐹᓪᓕᓚᐅᕋᑦᑕ ᖃᓄᑎᒋ ᐅᒥᐊᕐᔪᐊᒃᑯᑦ ᓂᐅᕈᖃᑦᑕᖅᑐᑦ ᓄᓇᓕᖕᒥᐅᓄᑦ ᑮᓇᐅᔭᒃᓴᐅᑕᐅᔪᓐᓇᕆᐊᖏᓐᓂᒃ ᑭᖑᓪᓕᕐᒥ ᑎᑭᑕᐅᒍᑦᑕ ᖃᐅᔨᒪᓂᖅᓴᐅᓂᐊᓕᖅᑐᒍᒃ ᖃᓄᐃᓕᐅᕆᐊᒃᓴᖅ.”