Skip to content

ᐃᒪᐃᓐᓂᐊᕋᓱᒋᔭᐅᔪᑦ ᓇᓚᐅᑦᑖᕈᑕᐅᓯᒪᔪᓂ ᓱᓕᓪᓗᑎᒃ ᒪᓕᓚᐅᖅᑐᑦ 16-ᓂ 22-ᓂᒃ ᓂᕈᐊᕋᓱᐊᖅᑎᓪᓗᒋᑦ

ᑖᓐᓇ ᖃᐅᔨᓴᕈᑕᐅᓚᐅᖅᑐᖅ ᕖᔅᐳᒃᑯᑦ ᐊᐱᖅᑯᑕᐅᓪᓗᓂ ᑕᒪᑐᒪᓂ ᐱᓇᓱᐊᕈᓯᐅᑉ ᐃᓱᓕᕝᕕᐊᓂ ᐅᒃᑑᐸ 31-ᖑᓚᐅᖏᓐᓂᖓᓂ ᓄᓇᕗᒥ ᓂᕈᐊᕐᓇᐅᑎᓪᓗᒍ ᓇᓚᐅᑦᑖᕈᑕᐅᓚᐅᓚᐅᖅᑐᑦ ᓱᓕᓚᐅᖅᕐᒪᑕ 16-ᓂ ᑖᒃᑯᓇᓂ 22-ᓂ ᓂᕈᐊᕐᕕᐅᓇᓱᐊᖅᑐᓂ ᒪᓕᒐᓕᐅᖅᑎᒃᓴᓂᒃ.

ᐃᖃᓗᐃᑦ-ᓯᓈᖓᓂᒥᐅᓄᑦ ᒪᓕᒐᓕᐅᖅᑎᒃᓴᖅᑕᐅᖅ, ᓇᓚᐅᑦᑖᕈᑕᐅᓯᒪᔭᒥᓂᒃ ᖃᓂᒃᓴᓚᐅᕐᒥᔪᖅ ᓂᕈᐊᒃᑕᐅᒐᒥ ᐃᓕᓴᐱ ᓯᐅᑎᐊᐱᒃ ᓵᓚᒃᓴᕐᓂᐊᕐᓂᖓᓂᒃ ᐊᑭᓯᓗᓂ ᐃᓂᖃᖅᐸᒌᑦᑐᒥᒃ ᐹᓪ ᐅᑲᓕᕐᒥᒃ 40-ᐳᓴᓂᑦ ᓵᓚᒃᓴᐅᑎᖃᓂᖓ ᑭᓯᐊᓂ ᐊᖑᒻᒪᑎᖏᐊᕐᔪᓚᐅᖅᑐᖅ 2-ᐳᓴᒥᒃ.

ᖃᐅᔨᓴᕈᑕᐅᓚᐅᖅᑐᑦ, ᐃᒪᐃᓕᖓᓚᐅᕐᒪᑕ ᐱᒋᐊᖓᖅᑎᑦᑎᔪᒧᑦ ᕌᐱᓐ ᐊᓇᕗᐊᒃᒧᑦ ᑕᒪᑐᒥᖓ ᑐᐊᕕᖅᖢᓂ ᐋᕿᒃᓱᐃᓚᐅᕐᒪᑦ. ᓇᓚᐅᑦᑖᕈᑎᖃᓚᐅᕐᒪᑦ ᖃᐅᔨᓵᓪᓚᓚᐅᖅᖢᓂ ᓯᓚᑦᑐᒃᓴᕐᕕᒃᔪᐊᒥᐅᑕᖅ ᐋᑐᕚᒥ ᒪᓕᒐᓐᓂᐊᖅᑎᐅᓂᕐᒥᒃ ᐃᓕᓴᖅᑐᖅ ᑲᖏᖅᖠᓂᕐᒥᐅᖅ, ᒫᓐᓇ ᐃᖃᓗᖕᓂ ᐊᖏᕐᕋᖃᖅᑐᖅ. ᓄᖅᑲᖓᓚᐅᑲᒃᑐᖅ ᐃᖅᑲᓇᐃᔮᒥᓂᑦ ᓄᓇᕗᑦ ᒐᕙᒪᖓᓂ ᐃᖅᑲᖅᑐᐃᕕᓕᕆᔨᒃᑯᓐᓂ.

ᐅᖃᓚᐅᖅᑐᖅ ᑕᒪᓐᓇ ᓇᓚᐅᑦᑖᕈᑎᓕᐊᕆᓯᒪᔭᖓ “ᓯᓚᑦᑐᒃᓴᐅᑎᓂᒃ” ᖃᐅᔨᓴᕈᑕᐅᖃᑦᑕᖅᑐᓂᒃ ᒪᓕᖏᒻᒪᑦ, ᐅᔾᔨᖅᓱᕈᑎᖃᐅᖏᒻᒪᑕ ᐋᕿᒃᓱᑦᑎᐊᖅᓯᒪᖑᑲᓗᐊᖅᑎᓪᓗᒍ  ᐆᒃᑐᕋᐅᑎᒋᓚᐅᖅᑕᖓ.

ᓈᓯᒪᖏᒃᑲᓗᐊᖅᑎᓪᓗᒋᑦ “ᑭᓱᓗᒃᑖᓕᒫᖏᑦ ᐅᔾᔨᖅᓱᕈᑕᐅᖃᑦᑕᖅᑐᑦ ᖃᐅᔨᓴᕈᑕᐅᕙᒃᑐᓂ ᑭᖑᓪᓕᕐᒥ ᐱᑕᖃᕐᓂᐊᖁᔭᒃᑲ,” ᐅᖃᕆᓪᓗᓂ.

ᐊᒻᒪᓗ ᑕᐃᒪᖓᓄᑦ ᑭᖑᓂᖓᓂ ᓂᕈᐊᒃᑲᓐᓂᕐᓂᐊᖅᑐᑦ ᓇᓗᓇᖏᒻᒪᑕ ᐆᒃᑐᖅᑕᐅᒃᑲᓐᓂᕈᓐᓇᕐᒪᑕ ᑕᒪᒃᑯᐊ ᓇᓚᐅᑦᑖᕈᑕᐅᖃᑦᑕᖅᑐᑦ ᒪᓕᒃᓗᒋᑦ ᓂᕈᐊᕈᓯᕐᓄᑦ.

“ᐅᕙᖓ ᓂᕈᐊᖅᑕᐅᓯᒪᔪᓂᒃ ᑲᑎᒪᔨᖃᕆᐊᒃᓴᖅ ᐱᐅᒋᒐᒃᑯ ᐊᒻᒪᓗ ᖃᓄᑎᒋ ᐱᐅᒋᔭᐅᖕᒪᖔᑕ  ᓇᓚᐅᑦᑖᕈᑕᐅᖃᑦᑕᖅᑐᓂᒃ ᐅᖃᓕᒫᕆᐊᒃᓴᖅ ᐆᒃᑐᕋᐅᑎᓂᒃ ᓂᕈᐊᕈᓯᕐᓄᑦ ᑲᑎᒪᔨᒃᓴᓂᒃ ᑕᑎᒌᒃᑐᓂᒃ ᓂᕈᐊᖃᑦᑕᓕᖅᐸᑕ ᑲᓇᑕᒥ ᖃᐅᔨᓴᕈᑕᐅᖃᑦᑕᖅᑐᓂᒃ. ᑕᐃᒪᐃᑦᑐᒥᒃ ᐱᑕᖃᖏᒻᒪᑦ ᓱᓕ ᓄᓇᕗᒥ. ᐃᑲᔪᖅᓴᖅᑎᒃᓴᖃᖏᒻᒪᑕ ᑕᒪᒃᑯᓂᖓ ᖃᐅᔨᓴᕈᑕᐅᓲᓂᒃ ᓇᓕᐊᖕᓂᒃ ᓄᓇᓕᖕᒥᐅᑦ ᐱᒃᑯᒥᒍᓱᒋᐊᖏᓐᓂᒃ ᓂᕈᐊᖅᑕᐅᓇᓱᐊᖅᑐᓂᒃ. ᓴᓇᖅᑯᑎᓂᒃ ᐱᑕᖃᖏᒻᒪᑦ ᓱᓕ ᑕᒫᓂ ᐆᒃᑐᕋᐅᑕᐅᔪᓐᓇᖅᑐᓂᒃ ᐃᒡᓗᐊᓄᖔᖅ ᖃᓄᐃᓐᓂᐊᕆᐊᖏᓐᓂᒃ ᓂᕈᐊᖅᑐᑦ.” ᐅᖃᕆᓪᓗᓂ ᐊᓇᕗᐊᖅ.

“ᑭᓯᐊᓂᓕ ᑕᐃᒪᐃᑦᑐᓂᒃ ᐱᑕᖃᖅᐸᑦ ᓄᓇᓕᖕᓂ ᓂᕈᐊᕋᓱᐊᖅᑐᑦ ᖃᐅᔨᒪᓂᖅᓴᐅᔪᓐᓇᕐᓂᐊᕐᒪᑕ ᖃᓄᑎᒋ ᓄᓇᓕᖕᒥᐅᓄᑦ ᐃᑲᔪᖅᓴᖅᑕᐅᓂᖏᓐᓂᒃ ᓯᕗᓂᖓᓂ ᓂᕈᐊᕐᓇᓚᐅᖏᓐᓂᖓᓂ ᐅᖃᓪᓚᑲᑕᒍᑕᐅᔪᓐᓇᕐᓂᐊᕐᒪᑕ ᓂᕈᐊᖅᑕᐅᓇᓱᐊᖅᑐᑦ ᐃᓱᒫᓗᒍᑕᐅᔪᓪᓗ ᐊᒃᓱᕉᑕᐅᔪᓪᓗ ᓴᖅᑭᑕᐅᓗᑎᒃ.”

ᓱᓕᔪᒥᒃᓕ ᑭᐅᔭᐅᓚᐅᕐᓂᕐᒪᑦ 133-ᓄᑦ ᖃᐅᔨᓴᕈᑎᖓᓄᑦ ᑕᒪᑐᒪᓂ ᕿᓚᒥᕈᓗᒃ ᐱᓇᓱᐊᕈᓯᐅᑉ ᐃᓱᓕᕝᕕᐊᓂ ᐊᐱᖅᖁᑎᖏᑦ ᓇᓗᓇᖏᑦᑐᖅ ᑖᓱᒧᖓ ᐊᓯᖏᓐᓄᓪᓗ ᑕᐃᒪᐃᑦᑐᓂᒃ ᐱᐅᒃᓴᖅᑐᓄᑦ ᐱᒃᑯᒥᒋᔭᐅᓇᔭᕐᓂᖓᓂᒃ

ᐊᓇᕗᐊᒃ ᓇᓗᓚᐅᖅᑐᖅ ᑭᒃᑯᑐᐃᓐᓇᐃᑦ ᑭᐅᓯᔪᑦ ᖃᐅᔨᓴᐅᑎᓂᒃ ᐊᑕᐅᓯᐊᖏᓪᓗᑎᒃ ᑭᐅᓯᑲᑕᒍᓐᓇᕐᒪᑕ ᓇᓚᐅᑦᑖᕈᑏᑦ ᖃᓄᐃᒃᑲᔭᕐᓂᖏᓐᓄᑦ ᐊᓯᐸᐃᔪᓐᓇᕋᔭᕐᒪᖔᑕ, ᑭᓯᐊᓂᓕ ᓇᓗᓇᕐᓂᕋᖅᑕᖓ.

“ᑕᒪᓐᓇ ᒫᓐᓇ ᐆᒃᑐᕆᐅᓕᕋᒃᑯ ᓯᕗᓪᓕᖅᐹᒥᒃ ᖃᐅᔨᓴᕈᑎᒥᒃ ᑕᐃᒪᓐᓇ,” ᐅᖃᕆᓪᓗᓂ.

ᕿᓚᒥᕈᓗᒃ ᕿᒥᕈᓚᐅᖅᖢᒍ Survey Monkey, ᑖᓐᓇ ᐊᓇᕗᐊᑉ ᑐᕌᕐᕕᖓ ᖃᕆᑕᐅᔭᑎᒍᑦ ᖃᐅᔨᓴᕈᑎᐊᓄᑦ, ᑕᑯᑎᑦᑎᓚᐅᖅᑐᖅ ᐃᒪᓐᓇ ᐋᕿᒃᓯᒪᓗᓂ ᐱᐅᓂᖅᓴᐅᓇᔭᕐᒪᑦ ᐋᒃᑳᖅᑕᐅᓗᑎᒃ ᑕᐃᒃᑯᐊ ᖃᕆᑕᐅᔭᑎᒍᑦ ᑐᕌᕐᕕᖃᖅᑐᑦ ᐊᑕᐅᓯᐅᖏᑦᑐᒥᒃ.

“ᓇᓗᓇᕐᒪᑕ ᑭᒃᑯᓐᓄᑦ ᐊᐱᖅᑯᑏᑦ ᑭᐅᔭᐅᓚᐅᕋᓗᐊᕐᒪᖔᑕ ᐊᒻᒪᓗ ᓇᓕᐊᖕᓄᑦ ᓂᕈᐊᕐᕕᐅᔪᓂ ᐱᒐᓗᐊᕐᒪᖓᑕ,” ᐅᖃᕆᓪᓗᓂ, ᐃᓚᓪᓗᓂᐅᒃ ᖃᐅᔨᓴᕈᑕᐅᔪᕉᖅ ᑖᓐᓇ ᑭᒃᑯᓐᓄᑦ ᑭᐅᔭᐅᓚᐅᕆᐊᖓ ᓇᓗᓇᕐᒪᑦ. ᑭᓯᐊᓂᓕ ᐃᓱᒪᓇᖅᑐᖅ 133 ᑭᐅᓯᓚᐅᖅᑐᑦ ᑖᓱᒥᖓ ᐅᓄᕐᓂᖅᓴᑦ ᐃᖃᓗᖕᒥᐅᖑᓚᐅᕐᒪᑕ ᓄᓇᕗᒥᐅᓕᒫᓂᑦ ᐱᒃᑯᒥᓇᕋᓗᐊᖅᑎᓪᓗᒍ ᓂᕈᐊᕐᓇᕐᓂᖓᓂ 2017-ᒥ ᕖᒃᐳᒃᑯᑎᒍᑦ ᐊᐱᖅᑯᑕᐅᔪᓂᒃ ᑭᐅᓯᔪᑦ. ᑕᒪᐃᑕ 1,452 ᐃᓚᐅᔪᑦ ᕖᔅᐳᒃᒥ ᐃᖃᓗᖕᒥᐅᑑᖑᖏᒻᒪᑕ, ᐃᓱᒪᓇᖅᑐᕐᓕ.

ᑖᒃᑯᓇᓂ 22-ᓂ ᑲᑎᒪᔨᒃᓴᓂ, ᐅᖅᑯᒥᐅᑦ ᖃᐅᔨᓴᕈᑎᒃᑯᑦ ᑭᐅᔭᖏᑦ ᑕᒻᒪᕐᓂᖅᐹᖑᓚᐅᕐᒪᑕ, ᓇᓚᐅᑦᑖᓚᐅᕐᒪᑕ ᔨᐅᕆ ᓈᑕᓇᐃᒥᒃ ᐅᓄᕐᓂᖅᐹᓄᑦ ᐱᓂᐊᕐᓂᕋᐃᓪᓗᑎᒃ ᐊᒃᓲᓂᖅᓴᐅᓗᓂ ᑲᑎᒪᔨᐅᔪᒥᑦ ᐅᑎᖅᑎᑦᑎᔪᑦ ᐹᓗᓯ ᕿᔪᑦᑕᕐᒥᒃ - 53.79-ᐳᓴᖏᓐᓄᑦ ᓂᕈᐊᖅᑕᐅᓚᐅᕐᒪᑦ ᓈᑕᓇᐃᒥᒃ ᐊᒻᒪᓗ 12.12-ᐳᓴᖏᑦ ᕿᔪᒃᑕᕐᒥᒃ.

“ᐹᓗᓯ ᕿᔪᒃᑕᖅ ᐊᒃᓱᐊᓗᒃ ᐱᒃᑯᒥᒋᔭᐅᓂᖅᓴᐅᖕᒪᑦ ᓇᓚᐅᑦᑖᕈᑎᓂ ᑭᐅᓯᔪᓂᑦ ᑕᑯᒃᓴᐅᓚᐅᖏᑎᓪᓗᒍ ᖃᐅᔨᓴᕈᑎᓂ. ᐃᒻᒪᖄ ᐅᓄᕐᓂᖅᓴᐃᑦ ᓄᓇᓕᖓᓂᒥᐅᖑᖏᑦᑐᑦ ᖃᐅᔨᓴᕈᑎᓂᒃ ᑭᐅᓯᓐᓂᕐᒪᑕ ᓇᓚᐅᑦᑖᕈᑎᖃᖅᖢᑎᒃ ᔨᐅᕆ ᓈᑕᓇᐃᒥᒃ ᓵᓚᒃᓴᕐᓂᐊᕐᓂᕋᐃᓪᓗᑎᒃ, ᑭᓯᐊᓂᓕ ᓄᓇᓕᖕᒥᐅᑦ ᐱᒃᑯᒥᒍᓱᒃᑐᑦ ᐹᓗᓯᒥᒃ ᓲᖑᓂᖅᓴᐅᓐᓂᕐᒪᑕ ᓂᕈᐊᕆᐊᖅᑐᖅᑐᑦ ᐊᐱᖅᑯᑎᓂᒃ ᑭᐅᓯᔪᓂᑦ,” ᐅᖃᕆᓪᓗᓂ ᐊᓇᕗᐊᖅ.

ᐅᖅᑯᒥᐅᑦᑕᐅᖅ ᓂᕈᐊᕈᓯᖏᑦ ᐊᕕᒃᓯᒪᓪᓗᑐᖃᑦᑕᕐᒥᖕᒪᑕ ᐃᓚᖏᑦ ᒪᕐᕉᖕᒪᑕ ᓄᓇᓖᑦ ᐊᑕᐅᓯᕐᒥᒃ ᑲᑎᒪᔨᑖᕋᓱᐊᖅᑐᑦ, ᑕᐃᒪᓐᓇᐃᓐᓂᖓᓄᑦ ᐊᕕᒃᓯᒪᓗᐊᖑᐊᖃᑦᑕᖅᐳᑦ ᓂᕈᐊᖅᓯᔪᑦ ᑖᒃᑯᓇᓂ ᓄᓇᖁᑎᖏᓐᓂ.

ᓇᓚᐅᑦᑖᕈᑕᐅᓚᐅᖅᑐᓂᓕ ᔪᐊᔨ ᕼᒃᔅ ᓱᓕᓚᐅᕐᒪᑦ ᐊᑭᓯᓚᐅᕐᒪᑦ ᔨᑯᐴᓯ ᐲᑐᒥᒃ, 77-ᐳᓴᖏᓐᓄᑦ ᓂᕈᐊᖅᑐᓄᑦ ᓂᕈᐊᖅᑕᐅᓪᓗᓂ - ᐳᓴᓪᑎᖏᑦ ᑕᑯᓪᓗᒋᑦ. ᓇᓚᐅᑦᑖᕈᑕᐅᓚᐅᕐᒥᔪᖅ ᐃᓕᓴᐱ ᓯᐅᑎᐊᐱᐅᑉ ᐊᑭᓯᓂᐊᕐᓂᖓ ᑲᑎᒪᔨᑐᖃᕐᒥᒃ ᐹᓪ ᐅᑲᓕᕐᒥᒃ, ᓇᓚᐅᑦᑖᕈᑎᒧᑦ ᖃᓂᒻᒪᑦ 2-ᐳᓴᑐᐃᓐᓇᒥᒃ ᓂᕈᐊᖅᑐᑦ.

ᐃᖃᓗᒃᑑᑦᑎᐊᒥᓕ, ᓇᓚᐅᑦᑖᕈᑕᐅᓚᐅᕐᒥᔪᑦ ᔩᓂ ᐃᕼᐊᓗᒃ ᐊᑭᓯᓂᐊᕐᓂᕋᖅᑕᐅᓪᓗᓂ ᐹᒻ ᒍᕉᔅᒥᒃ, ᐊᑭᓯᓂᖃᓚᐅᖅᑐᑦ 14-ᐳᓴᒥᒃ ᑐᓄᑦᑎᐊᖓᓂᑦ. ᓱᓕᔪᒥᒃᓕ, ᑖᒃᑯᐊ ᓂᕈᐊᖅᑕᐅᔪᑎᖏᑦ ᖃᓂᒌᓗᐊᓚᐅᕐᒪᑕ ᐃᖅᑲᖅᑐᐃᕕᒃᑎᒍᑦ ᓈᓴᖅᑕᐅᒃᑲᓐᓂᕐᓂᐊᓕᖅᑐᑦ ᓄᓇᕗᒥ ᒪᓕᒐᐃᑦ ᐊᑐᐊᕐᓗᒋᑦ.

“ᖃᐅᔨᓴᕈᑎ ᑎᑎᕋᖅᑕᐅᓚᐅᕐᒪᑦ 15-ᒥᓂᓯᑐᐃᓐᓇᒥ. ᑕᒪᐃᓐᓂᓕᒫᖅ ᐃᓱᒪᓇᖅᑐᓂᒃ ᓈᓯᖏᒻᒪᑦ. ᐃᒫᖓᐃ, ᓂᕈᐊᖅᑕᐅᓇᓱᐊᖅᑐᑦ ᐊᑎᖏᓐᓂᒃ ᐱᔪᒪᑐᐃᓐᓇᓚᐅᕋᒪ,” ᐅᖃᕆᓪᓗᓂ ᐊᓇᕗᐊᖅ.

“ᑭᓯᐊᓂᓕ ᐊᒥᓱᓄᑦ ᐱᖑᐊᕈᑕᐅᒋᐊᖅ ᓇᓚᐅᑦᑖᕈᓯᖅ ᐱᒃᑯᒥᒋᔭᐅᓗᐊᓚᐅᕐᒪᑦ, ᑭᖑᓪᓕᕐᒥ ᓂᕈᐊᕐᓇᓕᕐᒥᒃᐸᑦ ᑕᐃᒪ ᓇᓚᐅᑦᑖᕈᑎᓕᐅᒃᑲᓐᓂᕈᒪᔪᖓ ᐊᓯᓐᓂᒃ ᐱᓇᓱᐊᖃᑎᖃᕐᓗᖓ ᑕᒪᐃᓐᓅᖓᓂᖅᓴᓂᒃ ᐊᐱᖅᑯᑎᓂᒃ ᐱᑕᖃᕐᓗᓂ ᖃᐅᔨᓴᕈᑕᐅᓗᓂ ᐃᓂᖁᓇᕐᓂᑐᐃᓐᓇᕆᖏᑕᖏᓐᓂᒃ ᐆᒃᑐᕋᐅᑎᖃᕐᓗᑕ ᐊᑐᓂ ᐃᓱᒫᓗᒋᔭᐅᔪᓂᒃ ᑲᒪᓂᐊᓂᖏᓐᓂᒃ ᐆᒃᑐᕋᐅᑎᖃᕐᒥᓗᑕ. ᖃᓄᐃᑦᑐᓂᒃ ᐃᓱᒫᓗᒋᔭᐅᔪᓂᒃ ᐅᖃᐅᓯᖃᖅᑐᒃᓴᐅᕙᑦ ᐊᐱᖅᑯᑕᐅᔪᓐᓇᕐᒥᖕᒪᑕ ᓂᕈᐊᖅᑕᐅᓇᓱᐊᖅᑐᓄᑦ ᒐᕙᒪᑎᒃᑯᓐᓂ ᐊᐱᖅᓱᖅᑕᐅᖕᒥᖢᑎᒃ ᐊᑐᕐᓂᖃᖅᑐᓂᒃ ᐃᓂᖃᕐᓂᐊᖅᑐᓂ.”

ᐃᓱᒪᓂᕋᓚᐅᖅᑐᖅ ᐃᒻᒪᖄᒎᖅ ᐋᕿᒃᓱᐃᓯᒪᕙᒌᓕᖅᐸᑕ ᐊᐱᖅᑯᑎᓂᒃ ᖃᓄᖅ ᓂᕈᐊᖅᑏᑦ ᐃᓱᒪᖕᒪᖔᑕ ᖃᐅᔨᓴᖅᑕᐅᕙᓪᓕᐊᓕᕐᓗᑎᒃ ᐱᐅᒋᔭᐅᓂᖏᑦ, ᐃᓱᒪᒋᔭᖏᓪᓗ ᓯᓚᑦᑐᒃᓴᐅᑎᓄᑦ, ᓱᓕᔪᕆᔭᐅᓂᖏᓪᓗ ᖃᐅᔨᓴᕈᑏᑦ ᐃᒻᒪᖄ ᐱᒋᐊᖅᑎᑕᐅᓗᓂ ᑕᖅᑮᒃ ᒪᕐᕉᒃ ᓂᕈᐊᕐᓇᕐᓂᐊᓕᕐᓂᖓᓄᑦ ᑎᑎᖅᑲᖅᑖᓚᐅᖏᓐᓂᖓᓂ.

“ᐊᒥᓲᓂᖅᓴᓄᑦ ᑕᒪᒃᑯᐊ ᐅᖃᐅᓯᐅᔪᓐᓇᖅᓯᒃᐸᑕ, ᐱᐅᓂᖅᓴᐅᓇᓱᒋᒐᒃᑯ,” ᐅᖃᕆᓪᓗᓂ.