ᖃᐃᖁᔨᓂᐅᔪᒥ ᖃᓄᐃᓕᐅᕐᓂᕐᒧᑦ ᓄᓇᕘᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᔭᕆᐊᓕᖏᓐᓂ, ᒐᕙᒪᑐᖃᒃᑯᑦ ᑭᐅᕗᑦ. ᐊᒃᓱᓪᓘᓐᓃᑦ ᐃᓚᖓᒍᑦ.
ᒐᕙᒪᑐᖃᒃᑯᑦ ᓇᓗᓇᐃᖅᓯᕆᓯᒪᕗᑦ ᐃᑲᔪᕐᓂᐊᕐᓂᖏᓐᓂ ᑮᓇᐅᔭᖃᖅᑎᑦᑎᓂᕐᒧᑦ $1.6 ᐱᓕᐊᓐᓂ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒧᑦ ᑲᓱᕈᑎᒃᓴᖓᓂ ᐊᖏᒡᓕᒋᐊᕐᓂᐅᔪᒥ ᒫᓂᑑᐸᒥ, ᑎᑭᐅᑎᔪᒧᑦ ᐊᕐᕕᐊᓄᑦ ᐊᒻᒪᓗ ᐅᖓᓯᒃᑎᒋᔪᒧᑦ ᖃᒪᓂᑦᑐᐊᕐᒧᑦ.
ᐅᓇ ᐊᖏᒡᓕᒋᐊᕐᓂᐅᔪᖅ ᖃᔅᓯᒐᓚᖕᓂ ᐊᕐᕌᒍᓄᑦ ᐱᓕᕆᐊᖑᓇᔭᖅᐳᖅ ᐱᔭᕇᕐᓂᕐᒧᑦ ᐊᒻᒪ ᐊᑐᓕᖅᑎᑕᐅᓂᖓᓂ. ᓯᕗᓂᐊᓂ ᐅᓂᒃᑳᓕᐊᑦ ᐅᖃᖅᑑᔮᖅᐳᑦ ᑐᓂᓯᔪᓐᓇᕐᓂᐊᕐᓂᖏᓐᓂ ᐆᒻᒪᖅᑯᑎᒥ 2026–ᒥ, ᑭᓯᐊᓂ ᐅᓇ ᐊᑕᐅᓯᐅᓪᓗᓂ ᐱᒻᒪᕆᐅᓂᖅᐹᖑᔪᓐᓇᖅᐳᖅ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᖏᒡᓕᒋᐊᖅᑕᐅᓂᖓᓂ ᐃᓗᐊᓂ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ ᐊᕐᕌᒍᒐᓵᓗᖕᓂ.
ᐃᒪᕐᒧᑦ ᐆᒻᒪᖅᑯᑎᖃᕐᓂᖅ ᑲᑎᙵᓂᖃᕐᓂᐊᖅᐳᑦ ᒋᓕᒻ, ᒫᓂᑑᐸᒥ, ᐊᒻᒪ ᑐᓂᓯᓂᐊᖅᐳᑦ ᑲᑎᓪᓗᒍ ᑕᓪᓕᒪᓂ ᑭᕙᓪᓕᕐᒥ ᓄᓇᓕᐅᔪᓂ ᐊᒻᒪ ᐃᓚᖏᓐᓂ ᐅᔭᕋᖕᓂᐊᕐᓂᕐᒧᑦ ᖃᓄᐃᓕᐅᕐᓂᐅᔪᓂ ᐊᕕᒃᑐᖅᓯᒪᓂᐅᔪᓂ. ᐊᖏᒡᓕᒋᐊᕐᓂᐅᔪᖅ ᐃᓚᖃᕐᓂᐊᕆᕗᖅ ᕙᐃᐸ–ᐋᑉᑎᒃᓂ ᐅᐊᔭᓂᑦ ᓱᒃᑲᔪᒥ ᖃᕋᓴᐅᔭᒃᑰᕈᑎᒃᓴᓄᑦ.
ᐅᓇ ᐊᖏᓪᓗᓂ ᓯᕗᒻᒧᑦ ᐱᓕᕆᓂᐅᕗᖅ ᐅᖓᓯᒃᑐᕐᒥᐅᑕᓄᑦ ᓄᓇᓕᐅᔪᓂ ᐲᖅᑕᐅᓂᖏᓐᓄᑦ ᐅᖅᓱᐊᓗᑐᐃᓐᓇᕐᒧᑦ–ᐊᐅᓚᑕᐅᔪᓂ ᐆᒻᒪᖅᑯᑎᓂᑦ ᐊᒻᒪ ᑕᑯᒃᓴᐅᑎᑦᑎᓂᖃᕐᓂᐊᖅᐳᖅ ᖃᓄᐃᑦᑑᓂᖓᓂ ᐊᖏᒡᓕᒋᐊᕐᓂᐅᔪᒥ ᑐᙵᕕᖃᑦᑎᐊᖅᑐᒥ ᓯᕗᒻᒧᑦ ᐃᖏᕐᕋᑎᑦᑎᓂᐊᖅᑐᒥ ᐃᕕᐅᔭᐅᓂᖅᓴᐅᔪᒥ ᓯᕗᓂᒃᓴᐅᔪᒥ.
ᑲᓇᑕᒥ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐊᒻᒪ ᓕᐱᕈᒃᑯᑦ ᐅᑭᐅᖅᑕᖅᑐᒧᐊᖅᑎᓪᓗᒋᑦ ᐅᖃᐅᓯᖃᕆᐊᖅᑐᖅᖢᑎᒃ ᓄᓇᕘᑉ ᓯᕗᓂᒃᓴᖓᓂ, ᐊᓱᐃᓛᒃ ᐱᓕᕆᓂᐅᔪᒥ ᓂᕈᐊᖅᑕᐅᓇᓱᐊᕐᓂᕐᒧᑦ ᓄᓇᕗᒻᒥᐅᓂ, ᐊᖏᔪᐊᓗᖕᓂ ᐱᓕᕆᓂᐊᕐᓂᖃᓚᐅᖅᐳᑦ ᑕᒪᒃᑭᑦ ᓄᓇᓕᐅᔪᑦ ᐅᑭᐅᖅᑕᖅᑐᒥ ᐅᖅᓱᐊᓗᑐᐃᓐᓇᕐᒧᑦ–ᐊᐅᓚᑕᐅᔪᓂ ᐆᒻᒪᖅᑯᑎᓂᑦ ᐲᖅᑕᐅᓇᔭᕐᓂᖏᓐᓂ 2030–ᒥ.
ᐅᓇ ᐱᓕᕆᐊᖑᓇᓱᐊᕐᓂᐅᔪᖅ ᐱᓕᕆᐊᖑᔪᓐᓇᖅᐸᑦ ᓇᓗᓇᕋᔭᙱᑦᑎᐊᖅᐳᖅ ᐃᖏᕐᕋᓂᓕᐅᕐᓂᖏᓐᓂ, ᑭᓯᐊᓂ ᐊᕐᕌᒍᑦ ᖁᓕᓪᓗᐊᓂ ᓱᓕ ᐊᒻᒪ ᐃᖏᕐᕋᓂᖃᑦᑎᐊᕐᓇᓂ ᓱᓕ ᓇᒥᑐᐃᓐᓇᖅ ᐅᑭᐅᖅᑕᖅᑐᒥ, ᓕᐱᕈᒃᑯᑦ ᐱᓕᕆᓂᐊᕐᓂᕋᓚᐅᖅᑕᖓ ᓱᓕᓪᓚᕆᒃᑑᔮᙱᓚᖅ.
ᑕᐃᒪᓐᓇ ᐅᖃᖅᖢᓂ ᐱᓕᕆᓂᖅᑕᖃᕆᐊᖃᖅᐳᖅ ᐅᓇ ᐊᖏᒡᓕᒋᐊᕐᓂᐅᔪᖅ ᐊᖏᔪᒥ ᐊᖏᒡᓕᒋᐊᖅᓯᓂᐊᖅᐳᖅ ᐱᐅᓂᖓᓂ ᐃᓅᓯᐅᔪᒥ ᑕᐃᒃᑯᓄᖓ ᓂᒋᕐᒥ ᓄᓇᕗᒻᒥ ᓄᓇᓕᐅᔪᓄᑦ ᓄᑖᙳᕆᐊᖅᑎᑕᐅᓂᐊᖅᑐᓄᑦ.
ᐊᑐᕈᓐᓇᑦᑎᐊᖅᑐᒥ ᖃᕋᓴᐅᔭᒃᑰᕈᓐᓇᕐᓂᐅᔪᒥ ᐊᒻᒪ ᒥᒃᖠᒋᐊᖅᑐᒥ ᐊᑭᐅᔪᓂ ᐆᒻᒪᖅᑯᑎᓄᑦ, ᓄᓇᓕᐅᔪᑦ ᓲᕐᓗ ᐊᕐᕕᐊᑦ ᐅᕝᕙᓘᓐᓃᑦ ᑲᖏᖅᖠᓂᖅ ᐋᖅᑭᒃᓯᒪᓇᔭᖅᐳᑦ ᓄᑖᙳᕆᐊᖅᑐᒥ ᓇᖕᒥᓂᖃᕐᓂᕐᒧᑦ ᐱᓕᕆᕝᕕᐅᔪᓐᓇᕐᓂᐊᖅᐳᑦ ᐊᕕᒃᑐᖅᓯᒪᓂᐅᔪᒧᑦ.
ᐊᑕᐅᑦᑎᒃᑯᑦ, ᐃᖅᑲᓇᐃᔮᒃᓴᓄᑦ ᐱᕕᒃᓴᖃᕐᓂᐅᔪᓂ ᓴᖅᑭᑦᑐᓐᓇᖅᐳᑦ ᒥᒃᖠᒋᐊᖅᑐᓄᑦ ᐊᑭᐅᔪᒥ ᐆᒪᓇᓱᐊᕐᓂᕐᒧᑦ ᐃᓚᒌᖑᔪᓄᑦ, ᑲᑎᙵᓂᖃᒃᑲᓐᓂᕐᓂᐊᖅᑐᓄᑦ ᓄᓇᕐᔪᐊᒧᑦ ᓱᒃᑲᔪᒃᑯᑦ ᐊᒻᒪ ᐱᓕᕆᑦᑎᐊᓲᒥᒃ ᖃᕋᓴᐅᔭᒃᑰᕈᑕᐅᔪᒥ.
ᐅᖃᐅᓯᐅᓂᐅᔪᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᖏᒡᓕᒋᐊᕐᓂᖓᓂ ᑎᑭᑎᓪᓗᒍ ᖃᐅᔨᒪᔨᕐᔪᐊᖑᔪᓂ ᐱᓕᕆᔨᐅᔪᓄᑦ ᑐᓂᓯᓂᖏᓐᓂ ᐅᓂᒃᑳᓕᐊᖑᔪᒥ ᒐᕙᒪᑐᖃᒃᑯᓐᓂᑦ, ᑕᐃᔭᐅᔪᒥ ᑲᓇᑕᐅᑉ ᐋᔩᖃᑎᒌᖕᓂᕐᒧᑦ ᓯᕗᓂᒃᓴᖓᓂ, ᑕᑯᒃᓴᐅᑎᑦᑎᔪᒥ ᖃᓄᖅ ᐅᖓᓯᒃᑐᓂ ᓄᓇᓕᐅᔪᑦ ᕿᒪᒃᑕᐅᕙᓪᓕᐊᓂᖏᓐᓂ ᐅᖓᓯᒃᓯᕙᓪᓕᐊᔪᒥ ᐅᖃᐅᓯᐅᓂᐅᔪᒥ ᖃᕋᓴᐅᔭᒃᑰᕈᓐᓇᕐᓂᖏᓐᓄᑦ.
ᑖᓐᓇ ᐊᖏᒡᓕᒋᐊᖅᑐᖅ ᑲᑎᙵᓂᖃᕐᓂᐅᔪᒥ ᐊᖏᓂᖅᓴᐅᔪᒧᑦ ᓄᓇᕐᔪᐊᒧᑦ ᑐᑭᖃᖅᐳᖅ ᐱᕕᒃᓴᖃᕐᓂᐅᔪᒥ ᒪᒃᑯᒃᑐᓄᑦ, ᑕᐃᒃᑯᓄᖓ ᕿᓂᖅᑐᓄᑦ ᐃᓕᓐᓂᐊᕐᓂᐅᔪᒥ, ᐱᑕᖃᑐᐃᓐᓇᕆᐊᖃᕐᓂᖓᓂ ᖃᕋᓴᐅᔭᑎᒍᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᐊᒻᒪ ᐊᒥᓱᒃᑲᓐᓂᕐᓂ.
ᐊᒻᒪᓗ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᖃᓄᐃᙱᑦᑎᐊᕐᓂᐅᔪᒥ ᓄᓇᖃᖅᑎᐅᔪᓄᑦ ᓈᒻᒪᙱᓗᐊᖅᐸᑦ, ᓈᒻᒪᓪᓗᐊᖅᑎᓪᓗᒍ, ᐅᔾᔨᕐᓇᕐᔪᐊᖅᑐᒥ ᑮᓇᐅᔭᓂᑦ ᐊᑐᙱᓐᓂᖅᓴᐅᔪᒥ ᓴᖅᑭᓐᓂᐊᖅᐳᑦ.
ᐅᓄᕐᓂᖅᓴᐃᑦ ᓄᓇᓕᐅᔪᑦ ᐊᑐᕈᓐᓃᕐᓂᖅᓴᐅᔪᓂ ᐅᖅᓱᐊᓗᑐᐃᓐᓇᕐᒥ, ᐅᖅᓱᐊᓗᑐᐃᓐᓇᕐᓂ ᑎᑭᑎᑦᑎᖏᓐᓂᖅᓴᐅᔭᕆᐊᖃᖅᐳᖅ ᐅᖓᓯᒃᑐᓄᑦ, ᐊᑯᓂᐅᔪᒃᑯᑦ, ᑐᑭᖃᕈᓐᓇᖅᐳᖅ ᐊᖏᔪᓂ ᑮᓇᐅᔭᓂᑦ ᐊᑐᙱᓐᓂᖅᓴᐅᓂᕐᒥ ᓄᓇᖃᖅᑎᐅᔪᓄᑦ, ᓇᖕᒥᓂᕆᔭᐅᔪᓄᑦ ᐊᒻᒪ ᒐᕙᒪᓄᑦ.
ᐅᓇ ᐱᓕᕆᐊᒃᓴᖅ ᐊᑯᓂᐅᔪᒥ ᐅᑕᖅᑭᔭᐅᕗᖅ ᓄᓇᕗᒻᒥᐅᓄᑦ. ᐊᑯᓂᐅᓂᐊᖅᑐᒃᓴᐅᕗᖅ ᐅᑭᐅᖅᑕᖅᑐᒥ ᓄᓇᓕᒃᑲᓐᓂᕐᓂ ᐱᕕᒃᓴᖃᓛᕐᓂᖏᓐᓂ ᐊᑐᐃᓐᓇᖃᕐᓂᕐᒧᑦ ᐱᓕᕆᑦᑎᐊᕈᓐᓇᖅᑐᒥ, ᐊᑭᑭᓐᓂᖅᓴᓂ ᐆᒻᒪᖅᑯᑎᓄᑦ, ᑭᓯᐊᓂ ᑭᓱᓕᒫᑦ ᐱᓕᕆᑦᑎᐊᖅᐸᑕ, ᐅᓇ ᐃᒪᕐᒧᑦ ᐆᒻᒪᖅᑯᑎᖃᕐᓂᖅ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᖅ ᑕᑯᒃᓴᐅᑎᑦᑎᓂᐊᖅᐳᖅ ᐱᕈᖅᓴᐃᕙᓪᓕᐊᓂᕐᒥ ᓄᓇᕗᒻᒥ ᐊᒻᒪ ᐱᕙᓪᓕᐊᑎᑦᑎᓂᕐᒥ ᐃᓅᖃᑎᒌᖑᔪᓄᑦ ᐃᓗᐃᑦᑑᓗᓂ, ᐊᒻᒪᓗᑦᑕᐅᖅ ᐱᕈᖅᓴᐃᓗᓂ ᑲᓇᑕᒥ ᐃᓗᐃᑦᑑᓗᓂ, ᐅᑕᖅᑭᓇᕐᓂᑦᑎᐊᕙᐅᓂᐊᖅᐳᖅ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐊᒻᒪ ᐊᒃᓱᕈᕐᓂᐅᔪᒥ.