ᐃᓄᐃᑦ ᐃᖅᑲᐅᒪᓂᐅᔪᓂ ᓲᕐ ᔮᓐ ᕗᕌᖕᒃᓕᓐ ᐅᒥᐊᕐᒧᐊᓂ ᑭᕕᓂᑯᓂ ᑎᑎᕋᖅᑕᐅᕙᓪᓕᐊᕗᑦ ᓯᕗᓂᒃᓴᓄᑦ ᐃᓄᖕᓄᑦ ᑎᑭᑉᐸᓪᓕᐊᔪᓄᑦ.
ᑲᓇᑕᒥ ᒥᕐᙳᐃᖅᓯᕐᕕᖕᓄᑦ ᕗᕌᖕᒃᓕᓐᒥ ᐃᓄᐃᑦ ᐅᖃᐅᓯᒃᑯᑦ ᐊᑐᖅᑕᐅᓚᐅᖅᓯᒪᔪᓂ ᐱᓕᕆᐊᒃᓴᐅᔪᒧᑦ ᑲᑎᙵᓂᐅᔪᑦ ᐅᑎᓚᐅᖅᐳᑦ ᐅᖅᓱᖅᑑᕐᒧᑦ ᕕᕈᐊᕆᐅᑉ ᓄᙳᐊᓂ ᕿᒥᕐᕈᓇᖕᓂᕐᒧᑦ ᓄᓇᙳᐊᓂᑦ ᓴᓇᔭᐅᓚᐅᖅᑐᓂ ᑐᙵᕕᖃᖅᑐᓂ ᐊᐱᖅᓱᖅᑕᐅᓂᐅᔪᓄᑦ 15−ᖑᔪᓄᑦ ᐅᖅᓱᖅᑑᕐᒥᐅᑕᓄᑦ, ᐃᓄᑐᖃᐃᓐᓇᒐᓚᐅᔪᓄᑦ. ᖁᕕᐊᑦᑑᔮᓚᐅᖅᐳᑦ ᐊᒻᒪ ᖃᓱᓪᓗᑎᒃ ᐊᔭᐅᕆᔭᐅᓂᖏᓐᓂ ᐅᓂᒃᑳᕐᓂᖏᓐᓄᑦ ᐅᓂᒃᑳᖅᑐᐊᒥᓂᑦ ᐊᒻᒪ ᐅᖃᐅᓯᖃᕐᓂᕐᒧᑦ ᐃᖅᑲᐅᒪᓂᐅᔪᒥ ᓯᕗᕚᖏᓐᓂᑦ, ᐅᖃᐅᓯᐅᓪᓗᓂ ᐃᐊᑦᓇ ᐃᓚᐃᔭᔅᒧᑦ, ᐱᓕᕆᐊᒃᓴᐅᔫᑉ ᐊᖓᔪᖅᑳᕆᔭᐅᓪᓗᓂ ᐊᐱᖅᓱᖅᑎᐅᔪᒧᑦ.
Inuit Guardians chaperoned elders from Gjoa Haven to Terror Bay for a two-night visit last August. At the site, elders shared traditional knowledge about the land and sea around the shipwreck area. Front row, from left, Nelson Ruben, James Qitsualik and Colin Jr Putuguq. Back row, from left, Adam Niaqunnuaq, Leon Komangat, Colin Sr Putuguq, Mark Ullikatak and Trevor Tulirialik. Ryan Shackleton/Know History photo
“ᓱᕈᓯᐅᓪᓗᑕ (ᐊᒻᒪᓗ) ᐃᓐᓇᕈᓕᓵᖅᑐᓄᑦ ᐅᖃᐅᔾᔭᐅᓚᐅᖅᓯᒪᕗᑦ ᐅᖃᓪᓚᐅᓯᕆᖁᔭᐅᓇᑎᒃ ᑲᑉᐱᐊᓱᖕᓂᕐᒧᑦ ᐊᒥᓱᐊᓗᖕᓂ ᖃᓪᓗᓈᓂ (white people) ᑎᑭᓐᓇᔭᕐᓂᖏᓐᓂ ᐊᒻᒪ ᓄᓇᖓᓐᓂ ᐊᖅᓵᖅᓯᓇᔭᕐᓂᖏᓐᓂ,” ᐃᓚᐃᔭᔅ ᐅᖃᓚᐅᖅᐳᖅ. “ᐊᒥᓱᐃᑦ ᖃᐅᔨᒪᓚᐅᖅᐳᑦ (ᕗᕌᖕᒃᓕᓐ ᑭᕕᓂᑯᓂᑦ), ᐊᒻᒪ ᐊᑕᐅᓯᖅ ᐃᓄᒃ ᑕᑯᓚᐅᖅᓯᒪᕗᖅ ᖃᖓᑕᓲᒥᑦ ᐊᑯᓂᐅᑎᒍᔪᒥ ᐊᕐᕌᒍᑦ 40−ᓂ ᖄᖏᖅᓯᒪᓕᖅᑐᓂ. ᖃᖓᑕᓲᖅᑎᐅᔪᖅ ᐅᖃᐅᔾᔨᒃᑲᓐᓂᓚᐅᖅᐳᖅ ᐃᓄᖕᓂ ᓂᓪᓕᖅᑕᐃᓕᒪᓂᕐᒧᑦ.”
ᒥᐊᓂᕆᓪᓗᓂ ᐊᒡᒐᐅᔪᖅ ᖃᐅᔨᒪᔭᐅᕐᔪᐊᖅᑐᒥ ᐅᖅᓱᖅᑑᕐᒥᐅᑕᒥ ᑕᐃᔅᓱᒪᓂᑐᖃᖅ ᐅᓂᒃᑳᖅᑎᐅᔪᒥ ᓗᐃ ᖃᒧᒃᑳᕐᒥ, ᑐᖁᓚᐅᖅᓯᒪᔪᒥ ᒫᔾᔨ 2018−ᒥ, ᓱᓕ ᐃᒃᐱᒋᔭᐅᖃᑦᑕᓚᐅᖅᐳᖅ ᐊᕐᕌᒍᓕᒫᖑᓚᐅᖅᑐᒥ, ᐅᖃᐅᓯᐅᓪᓗᓂ ᔭᐃᒥᓯ ᕿᑦᓯᐅᓕᖕᒧᑦ, ᐱᓕᕆᐊᒃᓴᐅᔫᑉ ᐊᐅᓪᓛᕐᓂᖓᓄᑦ ᐃᖏᕐᕋᓂᐅᔪᒥ ᓯᕗᓕᐅᖅᑎᖓᓄᑦ. ᖃᒧᒃᑳᖅ, ᐱᒻᒪᕆᐅᓪᓗᓂ ᐃᓅᓚᐅᖅᑐᖅ ᓇᓂᓯᓂᐅᔪᒥ ᕗᕌᖕᒃᓕᓐ ᐅᒥᐊᕐᔪᐊᖓᓐᓂ HMS ᐃᕆᐸᔅᒥ 2014−ᒥ, ᑎᑎᕋᖅᑐᐃᓯᒫᓂᒃᓯᒪᓚᐅᖅᐳᖅ ᐊᒥᓱᓂ ᐃᓄᐃᑦ ᐃᓂᖏᑕ ᐊᑎᖏᓐᓂᑦ.
“ᓄᓇᙳᐊᕐᒨᕋᓚᐅᖅᐸᖏᑦ ᐊᒻᒪ ᐊᓱᐃᓛᒃ ᐃᓕᓴᕆᔭᐅᓂᖃᑕᐃᓐᓇᓚᐅᖅᐳᖅ. ᐅᖃᐅᓯᒃᑯᑦ ᐊᑐᖅᑕᐅᕙᓚᐅᖅᓯᒪᔪᓂ ᓈᒻᒪᙱᓗᐊᕌᖓᑦ ᐅᕝᕙᓘᓐᓃᑦ ᐅᖃᐅᓯᕐᒥ ᓈᒻᒪᙱᓗᐊᕌᖓᑦ, ᓯᕗᓪᓕᕐᒥ ᑕᑯᒃᓴᕈᖅᑎᑕᐅᔭᕆᐊᖃᖅᑳᓚᐅᖅᐳᖅ ᓄᓇᙳᐊᒥ ᐊᒻᒪ ᐊᓱᐃᓛᒃ ᐃᓕᓴᕆᔭᐅᓕᑕᐃᓐᓇᕐᓗᓂ,” ᕿᑦᓱᐊᓕᒃ ᐅᖃᓚᐅᖅᐳᖅ. “ᐃᖅᑲᐅᒪᕗᖓ (ᖃᒧᒃᑳᖅ) ᑲᑎᖅᓱᐃᕙᓪᓕᐊᓂᖓᓂ ᐅᑯᓇᓂ ᐃᓂᐅᔪᓂ ᐊᑎᖏᓐᓂᑦ, ᑕᒪᒃᑭᓂ ᐃᓄᒃᑎᑐᑦ ᐊᑎᖏᓐᓂ ᑕᐃᑲᓂᓗᒃᑖᖅ ᐃᓂᐅᔪᒥ.”
ᐃᓚᒋᔭᐅᔪᓂ ᕼᐊᓐᓇᓚᖏᓐᓂ ᐃᓂᐅᔪᓂᑦ ᓇᓗᓇᐃᖅᑕᐅᔪᓂ ᐃᓄᐃᑦ ᐅᖃᐅᓯᖓᓐᓂ ᐅᑯᐊᖑᕗᑦ ᓴᐅᓂᖅᑕᓕᒃ ᕿᑭᖅᑕᖓ, ᑐᑭᖃᖅᑐᒥ ᐃᓂᐅᔪᖅ ᓴᐅᓂᓕᖕᓂᑦ; ᖃᑉᓗᓈᕐᕼᐃᐅᕐᕕᒃ, ᐃᓂᐅᔪᖅ ᑲᑎᕝᕕᒃ/ᖃᓪᓗᓈᓕᕆᓂᕐᒧᑦ; ᐊᒻᒪ ᐅᒥᐊᖅᑕᓕᒃ, ᑐᑭᓕᐊᖑᓪᓗᓂ ᐃᒪᓐᓇ “ᐅᒥᐊᖅᑕᓕᒃ ᑕᐃᑲᓂ.”
ᖃᔅᓯᐊᕐᔪᒐᓚᖕᓂ ᐊᔾᔨᒌᙱᓐᓂᒐᓛᖑᔪᓂᑦ ᓇᓗᓇᐃᖅᓯᓂᕐᒥ ᓇᓃᓪᓚᕆᖕᓂᖏᓐᓂ ᐃᓂᐅᔪᓂᑦ, ᐃᓚᐃᔭᔅ ᐅᖃᓚᐅᖅᐳᖅ ᑲᒪᓇᖅᑐᒥ ᑕᐃᒪᐃᖏᓐᓇᕐᓂᖃᓚᐅᖅᐳᑦ ᐃᖅᑲᐅᒪᔭᐅᓂᐅᔪᓂᑦ ᐊᐱᖅᓱᖅᑕᐅᔪᓄᑦ.
“ᐊᒥᓱᐃᑦ ᐅᓂᒃᑳᖑᔪᓂ ᑲᑎᙵᓂᖃᑎᖃᓚᐅᖅᐳᑦ ᐃᒻᒥᖕᓄᑦ,” ᐅᖃᓚᐅᖅᐳᖅ ᐃᓚᐃᔭᔅ, ᑭᒡᒐᖅᑐᐃᓚᐳᖅᑐᒥ ᖃᐅᔨᓴᐃᓂᐅᔪᒥ ᐱᓕᕆᔨᐅᔪᓄᑦ ᖃᐅᔨᒪᒋᑦ ᑕᐃᔅᓱᒪᓂᐅᓚᐅᖅᑐᒥ.
ᑭᕕᓂᐅᔪᒥ HMS ᑎᐊᕈᕐᒥ ᓇᓂᔭᐅᓚᐳᖅᐳᖅ 2016−ᒥ. ᕗᕌᖕᒃᓕᓐ ᐊᒻᒪ 128−ᖑᔪᓂ ᐅᒥᐊᕐᔪᐊᕐᒥ ᐃᖅᑲᓇᐃᔭᖅᑎᖏᓐᓂ ᐃᑭᒪᔪᓂ ᑕᒪᒃᑭᓂ ᐅᒥᐊᕐᔪᐊᕐᓂ, ᕿᓂᖅᑐᓂ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓂ ᑭᒡᒐᖅᑐᐃᓪᓗᑎᒃ ᐳᕆᑎᓐᒥ, ᑐᖁᕋᓚᐅᖅᐳᑦ ᐊᔪᖅᓯᓚᐅᖅᑎᓪᓗᒋᑦ ᐅᑭᐅᖅᑕᖅᑐᒥ ᓯᑯᖓᓐᓂ 1840−ᕿᑎᖅᐸᓯᐊᓂ.
ᐅᖅᓱᖅᑑᕐᒥ ᒪᐃᔭ ᔪᐊᓂ ᓴᓕᕆᓇ ᐊᔾᔨᒋᙱᑎᑦᑎᓂᖃᓚᐅᖅᐳᖅ ᖃᓄᐃᓐᓂᐅᔪᒥ ᕗᕌᖕᒃᓕᓐ ᐃᖏᕐᕋᓂᐅᔪᒥ ᑕᐃᒃᑯᓄᖓ ᓄᐊᕖᔾᔭᓐ ᕿᓂᖅᑎᐅᔪᒧᑦ ᕋᐅᑦ ᐊᒪᓐᓴᓐᒥ ᐊᒻᒪ ᐃᓄᑭᓐᓂᖅᓴᐅᔪᓄᑦ ᐃᖅᑲᓇᐃᔭᖅᑎᖏᓐᓂ, ᐃᑲᔪᖅᓯᖅᑕᐅᓂᖃᕐᔪᐊᓚᐅᖅᑐᓂ ᐃᓄᖕᓂ ᐊᕐᕌᒍᑦ ᒪᕐᕉᖕᓄᑦ ᐅᖓᑖᓄᑦ ᐱᒋᐊᓕᓵᖅᑐᓂ 1900−ᖏᓐᓂ, ᖃᓄᐃᓐᓂᐅᔪᑦ ᐱᐅᓂᖅᓴᐅᑎᓪᓗᒋᑦ.
ᐃᓚᐅᔭᔅ ᐅᖃᓚᐅᖅᐳᖅ ᑐᓴᓚᐅᖅᓯᒪᓂᖓᓂ ᐊᒃᓱᕈᕐᓇᖅᑑᔪᒥ ᖃᓄᐃᓐᓂᐅᓚᐅᖅᑐᓂ 1840−ᖏᓐᓂᑦ ᐊᐱᖅᓱᕐᓂᕆᔭᖏᓐᓂᑦ.
“ᑕᐃᔅᓱᒪᓂᐅᓚᐅᖅᑐᒥ ᕗᕌᖕᒃᓕᓐᒥ, ᐅᒥᐊᕐᔪᐊᕐᒥ ᐃᖅᑲᓇᐃᔭᖅᑎᖏᑦ ᐅᓄᕐᓂᖅᓴᐅᔪᒃᓴᐅᓐᓂᖅᐳᑦ ᐃᓄᖕᓂ. ᑕᐃᔅᓱᒪᓂᐅᓚᐅᖅᑐᒥ ᐊᒃᓱᕈᕐᓇᓗᐊᓚᐅᖅᓯᒪᕗᖅ, ᖃᐅᑕᒫᒥ ᐆᒪᓂᖅ ᐆᒪᓇᓱᐊᕐᓂᑐᐃᓐᓇᐅᓚᐅᖅᐳᖅ,” ᐃᓚᐅᔭᔅ ᐅᖃᓚᐅᖅᐳᖅ ᐊᒃᓱᕈᕐᓇᕐᓂᐅᓚᐅᖅᑐᒥ ᐃᓄᖕᓂᑦ ᑕᐃᔅᓱᒪᓂᐅᓚᐅᖅᑐᒥ. “ᐃᖏᕐᕋᓂᐅᔪᒧᑦ ᐅᓄᕐᓂᖏᑦ ᐅᓄᓗᐊᓚᐅᖅᐳᑦ ᓂᕆᑎᑦᑏᓐᓇᕐᓂᕐᒧᑦ. ᑕᒪᕐᒥᒐᓚᐃᑦ ᑐᖁᓚᐅᖅᐳᑦ ᐱᕐᓕᕐᓂᕐᒧᑦ, ᐃᓱᒪᒧᑦ ᖃᓂᒪᓂᐅᔪᒧᑦ ᐊᒻᒪ ᓯᓚᒧᑦ ᐱᔾᔪᑕᐅᔪᓄᑦ ᐅᖅᑯᒃᓴᖅᓯᒪᑦᑎᐊᙱᓗᐊᓚᐅᕐᓂᖏᓐᓄᑦ.”
ᕗᕌᖕᒃᓕᓐ ᕿᓚᒻᒥᐅᔪᒥ ᐅᖃᐅᔾᔨᔨᐅᓪᓗᑎᒃ ᑲᑎᒪᔨᕋᓛᖑᔪᑦ, ᐃᓗᓕᖃᖅᑐᓂ ᑭᒡᒐᖅᑐᐃᔨᐅᔪᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ, ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᐃᑦᑕᕐᓂᓴᓕᕆᓂᕐᒧᑦ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐱᓕᕆᕐᔪᐊᖑᔪᓄᑦ, ᐊᖏᖅᑕᐅᑎᑦᑎᓇᓱᐊᓚᐅᖅᐳᑦ ᐅᖃᐅᓯᒃᑯᑦ ᐊᑐᖅᑕᐅᓚᐅᖅᓯᒪᔪᓂ ᐱᓕᕆᐊᒃᓴᐅᔪᒥ 2016,−ᒥ ᑭᖑᓂᑦᑎᐊᖓᒍᑦ ᑲᑎᒪᔨᕋᓛᑦ ᐋᖅᑭᒃᑕᐅᓚᐅᖅᑎᓪᓗᒋᑦ, ᐅᖃᓚᐅᖅᐳᖅ ᑕᒫᕋ ᑕᕋᒫᕝ, ᑲᓇᑕᒥ ᒥᕐᙳᐃᖅᓯᕐᕕᖕᓄᑦ ᐱᓕᕆᐊᒃᓴᒧᑦ ᐊᐅᓚᑦᑎᔨᐅᔪᒥ ᑭᕕᓂᖁᓄᑦ ᐃᕆᐸᔅ ᐊᒻᒪ ᑎᐊᕈᕐᒥᑦ. ᖃᒧᒃᑳᖅ ᓴᙱᓪᓗᓂ ᐱᓕᕆᔨᐅᓚᐅᖅᐳᖅ, ᐃᓚᒋᐊᖅᓯᓚᐅᖅᐳᖅ.
Elder Susie Konana makes bannock for fellow campers during a Franklin Inuit Oral History Project trip to Terror Bay, on King William Island, last August. Barbara Okpik/Parks Canada photo
“ᐱᔪᒪᓂᖅᑕᖃᓚᐅᖅᐳᖅ ᑲᑎᖅᓱᐃᓂᕐᒥ ᐆᒥᖓ ᐅᖃᐅᓯᒃᓴᐅᔪᓄᑦ ᐃᓄᑐᖃᑦ ᓱᓕ ᑕᒫᓃᑎᓪᓗᒋᑦ,” ᐅᖃᓚᐅᖅᐳᖅ. “ᑲᑎᒪᔨᕋᓛᖑᔪᑦ ᐃᓄᑐᖃᑦ ᐊᒻᒪ ᒪᒃᑯᒃᑐᑦ ᐱᕕᒃᓴᖃᖅᑎᑕᐅᓛᕐᓂᖏᓐᓂ ᐅᖃᖃᑎᒌᖕᓂᖏᓐᓂ ᐃᓚᒋᔭᐅᓗᓂ ᐆᒧᖓ ᐱᓕᕆᐊᒃᓴᐅᔪᒥ ᒪᒃᑯᒃᑐᑦ ᐃᓕᑦᑎᔪᓐᓇᕐᓂᐊᕐᒪᑕ ᐃᓄᑐᖃᕐᓂ ᐊᒻᒪ ᐅᓂᒃᑳᖅᑐᐊᓂ ᐆᒪᑎᑦᑏᓐᓇᕐᓂᕐᒧᑦ.”
ᐹᐳᕋ ᐅᒃᐱᒃ, ᐅᖅᓱᖅᑑᕐᒥ ᒪᒃᑯᒃᑐᖅ, ᐅᖃᓚᐅᖅᐳᖅ ᐅᐱᓚᐳᕐᓂᖓᓂ ᐃᓚᐅᖃᑕᐅᓂᕐᒥ ᐱᓕᕆᐊᒃᓴᐅᔪᒥ.
“ᑕᑯᓪᓗᓂ ᐃᓄᑐᖃᕐᓂ ᓄᓇᒦᑦᑐᓂ, ᐅᖃᓪᓚᐅᓯᖃᖅᖢᑎᒃ ᐃᓅᓯᖏᓐᓂᑦ, ᐊᑐᖅᐸᓚᐅᖅᓯᒪᔭᖏᓐᓂᑦ, ᐊᒻᒪ ᐅᖃᓪᓚᒃᖢᑎᒃ ᕗᕌᖕᒃᓕᓐᒥ ᐃᓄᑐᖃᑦᑕ ᐃᓱᒪᒋᓯᒪᔭᖏᓐᓂᑦ, ᐱᐅᐸᓗᒃᑐᐊᓗᒃ,” ᐅᖃᓚᐅᖅᐳᖅ ᐅᒃᐱᒃ, ᐃᓚᐅᖃᑕᐅᓚᐅᖅᑐᒥ ᐋᒍᔅᑎ 2018−ᒥ ᓄᓇᓄᑦ ᐊᐅᓪᓛᕐᓂᐅᔪᒥ Terror Bay−ᒧᑦ. “ᐅᕙᓐᓄᑦ ᑲᒪᓇᕐᔪᐊᖅᐳᖅ ᐃᓚᒋᔭᐅᖃᑕᐅᓯᒪᓂᓐᓂᑦ.”
ᑕᕋᓵᕝ ᐅᖃᓚᐅᖅᐳᖅ “ᑲᒪᓇᕐᔪᐊᖅᑐᒥ ᐅᐱᒍᓱᖕᓂᖅᑕᖃᖅᐳᖅ” ᐃᓄᐃᑦ ᐃᓕᖅᑯᓯᖓᓐᓂ ᐅᖅᓱᖅᑑᕐᒥ ᐃᓚᓕᐅᔾᔭᐅᓂᐊᖅᑐᓂ “ᑲᒪᓇᕐᔪᐊᖅᑐᓂ ᑎᒥᐅᔪᓂ ᖃᐅᔨᒪᓂᐅᔪᓂᑦ.”
ᐊᐱᖅᓱᖅᑕᐅᓂᐅᔪᑦ ᐋᖅᑭᒃᓱᖅᑕᐅᓂᐊᖅᐳᑦ ᐅᖃᓕᒫᒐᕐᒧᑦ ᑎᑎᕋᖅᑕᐅᔪᒥ ᐊᑐᐃᓐᓇᐅᓂᐊᖅᑐᒥ ᐃᓄᒃᑎᑐᑦ, ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ. ᐃᓚᖏᑦ ᐃᓗᓕᖏᑦ ᖃᕋᓴᐅᔭᒃᑰᖅᑎᑕᐅᓂᐊᖅᐳᑦ.
ᐊᐱᖅᓱᖅᑕᐅᓚᐅᖅᑐᑦ ᑐᓂᔭᐅᓂᐊᖅᐳᑦ ᐊᔾᔨᖏᓐᓂ ᓂᐱᓕᐅᕆᓯᒪᔪᓂ ᑕᕐᕆᔭᓕᐊᖑᔪᓄᑦ ᐊᐱᖅᓱᖅᑕᐅᓂᖏᓐᓂ ᐊᒻᒪ ᓇᓗᓇᐃᖅᑕᐅᓯᒪᔪᓄᑦ ᓄᓇᙳᐊᓂ ᓴᓇᔭᐅᔪᓂ ᐅᖃᐅᓯᐅᔪᒃᑯᑦ ᖃᐅᔨᒪᔭᐅᓂᐅᔪᓄᑦ ᐃᓂᐅᔪᓂᑦ.