ᓯᕗᓪᓕᖅᐹᖅ ᐃᓄᐃᑦ ᒥᒃᓵᓄᑦ ᑐᕌᖓᔪᓂᒃ ᖃᐅᔨᒋᐊᕐᕕᒃᓴᖅ ᒪᑐᐃᖅᑐᖅ ᑲᓇᑕᐅᑉ ᑲᓇᖕᓇᖓᓂᒃ ᒪᑐᐃᖅᑕᐅᓚᐅᖅᑐᖅ ᐃᓄᐃᑦ ᑐᙵᓱᒃᑎᑕᐅᑉᓗᑎᒃ ᕕᓂᐲᒃᒥ ᒪᐃ 4-ᒥ.
ᑐᙵᓱᒋᑦ ᐃᓄᐃᑦ ᒥᒃᓵᓄᑦ ᑐᑭᓯᒋᐊᕐᕕᒃ Sargeant Avenue-ᒦᑦᑐᖅ ᐊᒻᒪᓗ ᐊᐅᓚᑕᐅᔪᖅ ᑐᙵᓱᒋᑦ ᑎᒥᖁᑎᖓᒍᑦ.
ᑲᑐᔾᔨᖃᑎᒌᒃᑯᑦ ᐊᐅᓚᑦᑎᔨᖏᑦ ᐅᑯᐊᖑᔪᑦ ᑲᑎᒪᔩᑦ ᓯᑏᕝ ᐊᒻᒪᓗ ᔮᑭ ᒪᓯ, ᒋᐅᓪ ᕚᓕᔅ, ᒫᒃᓯᓐ ᐊᖑ ᐊᒻᒪᓗ ᓂᑭ ᑯᒪᒃᓯᐅᑎᒃᓴᖅ.
ᑐᙵᓱᒋᑦ ᐃᓄᐃᑦ ᒥᒃᓵᓄᑦ ᑐᑭᓯᒋᐊᕐᕕᐅᑉ ᖃᐅᔨᒋᐊᖅᑎᖓ ᑲᒪᔨ ᒫᒃᓯᓐ ᐊᖑ ᐅᖃᖅᖢᓂ ᑐᙵᓱᒋᑦ ᑎᒥᖁᑎᖓᒎᖅ ᐱᓕᕆᔪᒪᔪᖅ ᐱᐅᓯᕚᓪᓕᖅᑎᑦᑎᔪᒪᑉᓗᓂ ᐃᓄᐃᑦ ᐃᓅᓯᖏᓐᓂ ᐱᓕᕆᔪᒪᔪᖅ ᐱᐅᓯᕚᓪᓕᖅᑎᑦᑎᔪᒪᑉᓗᓂ ᐃᓄᐃᑦ ᐃᓅᓯᖏᓐᓂᒃ ᐃᓅᔪᓂᒃ ᕕᓂᐲᒃᒥ, ᐊᒻᒪᓗ ᑕᐃᑉᑯᐊ ᐃᓄᐃᑦ ᕕᓂᐲᒃᓕᐊᓲᑦ ᐋᓐᓂᐊᕐᕕᓕᐊᖅᖢᑎᒃ ᐅᑭᐅᑉ ᐃᓗᐊᓂ.
ᐅᖃᖅᖢᓂ ᖁᕕᐊᓇᑦᑎᐊᓚᐅᖅᑐᕉᖅ ᑕᑯᑉᓗᓂ ᐊᒥᓱᓂᒃ ᐃᓄᖕᓂᒃ ᑕᑯᔭᖅᑐᐃᓯᒪᔪᓂᒃ ᐃᓂᑖᒥᓂᒃ ᐊᒻᒪᓗ, ᑕᐃᑯᙵ ᐃᑎᖅᓯᒪᓕᖅᖢᓂ, ᐊᕙᓗᔭᐅᓯᒪᓕᖅᖢᓂ ᐃᓄᐃᑦ ᓴᓇᓯᒪᔭᖏᓐᓂᒃ, ᐃᓄᒃᓯᐅᑎᓂᒃ ᓂᕿᓂᒃ ᐊᒻᒪᓗ ᐃᓅᖃᑎᒥᓂᒃ.
“ᑐᙵᓱᒋᑦ ᑎᒥᖁᑎᖓ ᑐᕌᖓᔪᖅ ᑎᑭᖃᑦᑕᕈᒪᑉᓗᓂ ᑐᕌᒐᕆᔭᖏᓐᓄᑦ ᐱᓕᕆᕝᕕᖕᒥᒍᑦ ᐊᑐᖃᑦᑕᕐᓗᑎᒃ ᐃᓕᖅᑯᓯᑐᖃᕐᒥᓄᑦ ᑐᕌᖓᔪᓂᒃ ᐃᑲᔫᑎᓂᒃ ᐱᔨᑦᓯᕋᖅᑕᐅᔾᔪᑎᓂᒡᓗ, ᐱᓕᕆᓂᕐᓗ ᐅᖃᐅᓯᒃᑯᑦ ᑐᓗᖅᑕᕈᑕᐅᕙᒃᑐᓂᒃ ᑲᒪᕙᓪᓕᐊᓂᕐᒧᑦ, ᐊᒻᒪᓗ ᐃᓕᓐᓂᐊᖅᑎᑦᑎᓂᖅ ᐃᓄᖕᓂᒃ ᖃᓄᖅ ᖃᑉᓗᓈᑦ ᓄᓇᖓᓂᒃ ᓄᓇᖃᕐᓂᐊᕐᓗᓂ ᐱᓇᓱᒋᐊᖃᕐᓇᕐᒪᖔᑦ ᓄᑖᒥᒃ ᓄᓇᖃᕋᓱᓕᖅᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᐊᖑ.
“ᐊᔪᕐᓇᙱᑦᑐᑯᓘᙱᒻᒪᑦ ᓄᓇᓕᒡᔪᐊᕐᒧᑦ ᓅᖦᖢᓂ ᓄᓇᓕᐊᓛᕐᒦᖅᑳᖅᖢᓂ.
“ᑕᒫᓃᑦᑐᒍᑦ ᐃᓕᖅᑯᓯᑐᖃᑎᒍᑦ ᐊᑐᖅᑕᐅᔭᕆᐊᓕᖕᓂᒃ ᐊᑐᐃᓐᓇᕈᖅᑎᑦᑎᓇᓱᖃᑦᑕᖅᖢᑕ, ᐃᓕᓐᓂᐊᖅᑎᑦᑎᔪᒪᓂᕐᒧᓪᓗ ᐊᒻᒪᓗ ᐃᑲᔫᑎᓂᒃ ᐊᑐᐃᓐᓇᕈᖅᑎᑦᑎᔪᒪᓂᕐᒧᑦ, ᐊᒻᒪᓗᑦᑕᐅᖅ ᑲᔪᓰᓐᓇᖅᑐᒃᑯᑦ ᐋᓐᓂᐊᖅᑐᓕᕆᓂᒃᑯᑦ ᐃᓄᓕᕆᓂᒃᑯᓪᓗ ᐃᑲᔪᕆᐊᖃᑦᑕᕈᒪᓂᕐᒧᑦ, ᐊᒻᒪᓗ ᓴᓇᔭᒃᓴᖅᑖᖅᑐᓕᕆᓂᒃᑯᑦ ᑮᓇᐅᔭᓕᐅᕈᑎᒃᑯᓪᓗ ᐃᑲᔪᕆᐊᖃᑦᑕᕈᒪᓂᕐᒧᑦ.
“ᑕᒫᓃᑦᑐᒍᓪᓗ ᐃᑲᔪᕈᒪᑉᓗᑕ ᐃᓄᖕᓂᒃ ᕕᓂᐲᒃᒥ ᐃᒡᓗᑖᕋᓱᒃᑐᓂᒃ ᐃᒪᓐᓈᖅᑐᕈᒪᑉᓗᒋᑦ, ᐃᑲᔪᕈᒪᑉᓗᑕᓗ ᖃᑕᙳᑎᒌᑦ ᒥᒃᓵᓄᑦ ᓄᑕᖅᑭᕆᓂᕐᒧᓪᓗ ᐃᑲᔪᖅᑕᐅᔭᕆᐊᖃᕌᖓᑕ ᐊᒻᒪᓗ ᑕᐃᒪᒃᑲᓐᓂᐊᓗᐃᑦ ᐃᑲᔪᕆᐊᕈᑎᒋᔪᓐᓇᖅᑕᖅᐳᑦ.”
ᐊᖑ ᐅᖃᖅᖢᓂ ᖁᕕᐊᒋᔭᐅᓂᖅᐹᖑᓚᐅᖅᑐᕉᖅ ᖃᐃᔪᓄᑦ ᐱᓕᕆᕝᕕᒃᑖᓵᖑᔪᖅ ᒪᑐᐃᖅᑕᐅᑎᓪᓗᒍ ᒪᐃ 4-ᒥ ᖁᐊᖃᓚᐅᕐᓂᖓ (ᑐᒃᑐᒥᒃ).
ᐅᖃᖅᖢᓂ ᖁᐊᖁᑎᒋᓚᐅᖅᑕᖏᒡᒎᖅ ᑕᒪᕐᒥᒃ ᓄᖑᓚᐅᖅᑐᑦ ᐃᑲᕐᕋᐅᑉ ᐃᓗᐊᓂ.
“ᐃᓄᒃᑎᑐᑦ ᐃᓄᐃᑦ ᐅᖃᖃᑎᒌᑦᑎᐊᖏᓐᓇᓚᐅᖅᑐᑦ, ᐊᒻᒪᓗ ᖁᖓᔮᑦᑎᐊᓚᐅᑦᑐᒍᑦ ᐃᒡᓚᒪᔭᒃᖢᑕᓗ, ᓄᓇᑦᑎᓐᓃᑦᑑᔭᓕᓚᐅᖅᑐᒍᑦ,” ᑕᐃᒪᓐᓇ ᐅᖃᖅᖢᓂ ᐊᖑ.
“ᐃᓄᐃᑦ ᖃᐅᔨᒪᖁᔭᒃᑲ ᑐᓂᕐᕈᓯᐊᖅᑖᕈᒪᒐᑉᑕ ᐃᓄᒃᓯᐅᑎᓂᒃ ᓂᕿᓂᒃ ᓲᕐᓗ ᑐᒃᑐᓂᒃ, ᒪᒃᑖᕐᓂᒃ, ᐃᖃᓗᖕᓂᒃ, ᓇᑦᑎᕐᓂᒃ ᐊᓯᖏᓐᓂᒡᓗ, ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ ᐊᑭᓖᑎᑦᑎᖃᑦᑕᔾᔮᙱᑦᑐᑦ ᐃᓄᐃᑦ ᓇᒃᓯᐅᔾᔨᔭᕌᖓᑕ ᓂᕿᓂᒃ ᐅᕙᑉᑎᓐᓄᑦ. ᖃᐅᔨᒋᐊᕐᕕᐅᖃᑦᑕᕐᓂᐊᖅᐳᒍᑦ ᓇᒃᓯᐅᔾᔭᐅᔪᒪᔭᕌᖓᑉᑕ ᐋᖅᑭᒃᓱᐃᖃᑦᑕᕐᓂᐊᕋᑉᑕ ᖃᓄᖅ ᓇᒃᓯᐅᔾᔭᐅᓇᔭᕐᓂᑉᑎᓐᓄᑦ.
“ᐊᒻᒪᓗᑦᑕᐅᖅ, ᑕᑯᕋᓐᓈᖅᑎᑦᑎᔪᒫᖅᑐᒍᑦ West End Cultural Centre-ᒥ (ᑐᕌᕈᑎᖓ 586 Ellice Ave.) ᒪᐃ 18-ᖑᓕᖅᐸᑦ ᐱᒋᐊᕈᒫᖅᖢᑕ 7:00-ᒥ ᐅᓐᓄᒃᑯᑦ.
“ᐃᒻᖏᖅᑐᖃᕈᒫᖅᑐᖅ ᐃᓄᖕᓂᒃ ᐊᕐᓇᐅᔪᓂᒃ ᐊᔪᙱᑦᑐᒻᒪᕆᐊᓗᖕᓂᒃ ᓂᑭ ᑯᒪᒃᓯᐅᑎᒃᓴᖅ, ᐊᓃᑕ ᐃᓴᓗᒃ, ᐊᓯᕙᒃ ᐊᒻᒪᓗ ᐋᓐᔨᓚ ᐊᒪᕈᐊᓕᒃ, ᐊᒻᒪᓗ ᖁᕕᐊᒋᔭᐅᓪᓚᕆᖕᓂᐊᖅᑐᖅ ᑭᓕ ᕗᕆᓴ.”