ᐅᓇᑕᖅᑐᒃᓴᖑᐊᓛᑦ ᑐᑭᓯᕚᓪᓕᓚᐅᖅᐳᑦ ᐋᓐᓂᖅᓯᒪᔪᓂᒃ ᐋᓐᓂᐊᖅᑐᓂᒡᓗ ᓇᔭᖑᐊᑦ ᑎᖕᒥᓲᒃᑯᑦ ᖃᓄᐃᓕᐅᖃᑦᑕᕐᓂᖏᓐᓄᑦ ᑖᒃᑯᐊ ᓂᑳ ᐳᕆᐃ ᐊᒻᒪ ᔫᓕ ᕗᕆᒪᓐ ᐅᓂᒃᑳᕆᐊᖅᓯᒪᓚᐅᖅᑎᓪᓗᒋᑦ ᐱᓕᕆᐊᕆᖃᑦᑕᖅᑕᒥᖕᓂᒃ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.
ᐅᓇᑕᖅᑐᒃᓴᖑᐊᓛᓄᑦ ᑲᒪᔨ ᑐᐊᑎ ᑐᑐ ᐅᖃᓚᐅᖅᐳᖅ ᕗᕆᒪᓐ ᑎᖕᒥᓲᒃᑯᑦ ᖃᓄᐃᓕᐅᕐᓂᕐᒧᑦ ᐅᓇᑕᖅᑐᒃᓴᖑᐊᓛᖑᓚᐅᖅᓯᒪᑉᓗᓂ ᒪᒃᑯᒃᖢᓂ ᐊᒻᒪ ᑖᒃᑯᐊ ᒪᕐᕉᒃ ᓇᔭᖑᐊᒃ ᒫᓐᓇᑲᐅᑎᒋ ᑐᑭᓯᑲᐅᑎᒋᖃᑦᑕᐅᑎᓚᐅᖅᐳᑦ 7 ᐅᓇᑕᖅᑐᒃᓴᖑᐊᓛᑦ.
ᐅᖃᓚᐅᖅᖢᓂᓗ ᑖᒃᑯᐊ ᒪᕐᕉᒃ ᓇᔭᖑᐊᒃ ᐸᕐᓇᒃᓯᒪᑉᓗᑎᒃ ᑕᑯᔭᖅᑐᐃᒍᒪᑉᓗᑎᒃ ᑲᖏᖅᖠᓂᕐᒥ ᐅᓇᑕᖅᑐᒃᓴᖑᐊᓛᓄᑦ ᐱᓕᕆᓗᐊᖏᓕᕈᑎᒃ.
“ᐅᖃᓚᐅᖅᐳᒃ ᐃᓚᐅᓇᓱᐊᖃᑦᑕᕋᒥᒃ ᓄᓇᓕᖕᓂ ᐱᓕᕆᖏᓚᐅᐱᓪᓚᒃᑳᖓᒥᒃ, ᑕᐃᒪ ᖃᐅᔨᒍᒪᓚᐅᕐᒪᑕ ᖃᓄᐃᒐᔭᖏᒻᒪᖔᑦ ᑕᑯᔭᖅᑐᐃᒃᐸᑕ ᐅᓇᑕᖅᑐᒃᓴᖑᐊᓛᓂᒃ,” ᑐᑐ ᐅᖃᓚᐅᖅᐳᖅ.
“ᐅᖃᐅᑎᓚᖅᐸᒃᑲ 'ᐄᒻᒪᕆᒃ', ᐊᒻᒪ ᑎᖕᒥᓲᖅᑎᖏᑦ ᐱᖃᑎᒋᓗᒋᑦ ᑕᐃᒪᓐᓇ ᐱᔪᓐᓇᕈᑎᒃ, ᖃᐅᔨᒪᖏᓐᓇᑉᑕ ᐃᒻᒪᖄ ᐅᓇᑕᖅᑐᒃᓴᖑᐊᓛᖑᓯᒪᔪᒃᓴᐅᕗᑦ.
“ᐅᓂᒃᑳᓚᐅᖅᐳᑦ ᐅᓇᑕᖅᑐᒃᓴᖑᐊᓛᓄᑦ ᖃᓄᐃᓕᐅᖃᑦᑕᕐᓂᕐᒥᖕᓂᒃ ᐋᓐᓂᖅᓯᒪᔪᓂᒃ ᐋᓐᓂᐊᔪᓂᒡᓗ ᓇᔭᖑᐊᑦ ᖃᓄᐃᓕᐅᖃᑦᑕᕐᒪᖔᑕ. ᐊᒻᒪ ᐅᓂᒃᑳᓚᐅᕆᑉᓗᑎᒃ ᑎᖕᒥᓲᒥ ᓲᕐᓗ ᐃᓅᓕᓴᐃᓂᖅ ᑕᐃᒪᓐᓇᑎᑐᑦ ᐋᓐᓂᐊᕐᕕᖕᒥ ᐃᓗᓕᒥᐅᑕᖃᖅᖢᓂ ᑎᖕ`ᒥᓲᒥ ᐃᓅᓕᓴᐅᑎᓂᒃ − ᐊᒡᔭᖅᑕᐅᓇᓱᐊᖅᖢᓂᓗ ᖃᓂᓛᒧᑦ ᐋᓐᓂᐊᕐᕕᖕᒧᑦ ᑭᓯᐊᓂ ᑎᖕᒥᓲᖅ ᓴᖑᒋᐊᖃᖅᐸᒃᖢᓂ ᐃᓛᓐᓂᒃᑯᑦ ᐊᓯᐊᓄᑦ ᐃᓂᒃᓴᖃᖏᓐᓂᖏᓐᓄᑦ ᐋᓐᓂᐊᕐᕕᖕᒥ ᐱᓕᕆᐊᕆᔭᐅᔪᓐᓇᖏᓐᓂᖓᓄᓪᓗ ᐊᒻᒪ ᐊᓯᖏᓐᓂᒃ ᐱᔾᔪᑎᖃᖅᖢᑎᒃ.”
ᑐᑐ ᐅᖃᓚᐅᖅᐳᖅ ᐅᓇᑕᖅᑐᒃᓴᖑᐊᓛᑦ ᐊᐱᖅᓱᖃᑦᑕᓚᐅᖅᖢᑎᒃ ᓇᐅᔭᖑᐊᖕᓂᒃ ᖃᓄᑐᐃᓐᓇᖅ ᐱᓕᕆᐊᖏᓐᓂᒃ ᐱᔾᔪᑎᖃᖅᖢᑎᒃ ᑕᐃᒪᓐᓇᓗ ᑖᒃᑯᐊ ᓇᔭᖑᐊᒃ ᐅᓇᑕᖅᑐᒃᓴᖑᐊᓛᑦ ᐱᓕᕆᐊᖏᓐᓂᒃ ᐱᒻᒪᕆᐅᑎᑦᓯᓚᐅᕆᑉᓗᑎᒃ, ᐊᐱᖅᓱᖃᑦᑕᖅᖢᑎᒃ ᖃᓄᖅ ᐊᑯᓂᐅᑎᒋᔪᖅ ᐅᓇᑕᖅᑐᒃᓴᖑᐊᖑᓕᕐᒪᖔᑕ, ᖃᓄᕐᓗ ᐃᓚᓕᐅᑎᒍᒪᓚᐅᕐᒪᖔᑕ ᓱᓇᒥᒃ ᐱᔾᔪᑎᖃᖅᖢᑎᒃ, ᓱᓇᓂᒡᓗ ᖁᕕᐊᒋᔭᖃᓛᖑᖕᒪᖔᑕ ᐅᓇᑕᖅᑐᒃᓴᖑᐊᓛᖑᖃᑕᐅᑉᓗᑎᒃ.
ᐅᖃᓚᐅᖅᐳᖅ ᓇᔭᖑᐊᑦ ᑕᑯᔭᖅᑐᖅᑎᑕᐅᓚᐅᖅᐳᑦ ᐅᓇᑕᖅᑐᒃᓴᖃᕐᕕᖕᒧᑦ ᑲᑎᒪᕕᒋᔭᐅᖃᑦᑕᖅᑐᖅ ᐅᓇᑕᖅᑐᒃᓴᖑᐊᓛᓄᑦ ᑲᖏᖅᖠᓂᕐᒥ ᐊᐱᖅᓱᖅᑕᐅᑉᓗᑎᒡᓗ ᑭᐅᑦᓯᐊᖃᑦᑕᓚᐅᖅᐳᑦ, ᓈᓚᑦᓯᐊᖃᑦᑕᖅᖢᑎᒡᓗ ᐅᓂᒃᑳᖅᑐᓂᒃ ᐊᑐᓚᐅᖅᑕᒥᖕᓂᒃ.
“ᑖᒃᑯᐊ 7 ᑐᐃᓐᓇᐅᓚᐅᖅᐳᑦ ᐅᓇᑕᖅᑐᒃᓴᖑᐊᓛᑦ ᓂᕆᕕᒡᔪᐊᖅᑐᖃᖅᖢᓂᓗ ᒧᒥᖅᑐᖃᖅᖢᓂᓗ ᑲᖏᖅᖠᓂᕐᒥ...” ᑐᑐ ᐅᖃᓚᐅᖅᐳᖅ.
“ᑕᐃᒪᑐᖅ ᐅᑎᕈᓐᓇᕐᓂᐊᖅᐳᑦ ᑕᑯᔭᖅᑐᐃᓗᑎᒃ ᐅᓇᑕᖅᑐᒃᓴᖑᐊᓛᓂᒃ ᓂᕆᕕᒡᔪᐊᕐᓇᐅᖏᑎᓪᓗᒍ ᒧᒥᕐᓇᐅᖏᑎᓪᓗᒍᓗ ᑲᖏᖅᖠᓂᕐᒥ ᑲᑎᑦᓯᔪᓐᓇᕐᓂᐊᕐᒪᑕ ᐅᓇᑕᖅᑐᒃᓴᖑᐊᓛᑦ ᐊᓯᖏᓐᓂᒃ.”