ᑲᑎᙵᓂᐅᔪᓂ 12-ᓂ ᐃᓕᓐᓂᐊᖅᑎᓂᑦ ᖁᑦᑎᖕᓂᓕᖕᓂ 9-ᒥ 11-ᒧᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐊᔾᔨᐅᙱᑦᑐᒥ ᐱᕕᒃᓴᖃᖅᑎᑕᐅᓇᐅᖅᐳᑦ ᑎᑭᑦᑐᓄᑦ ᒪᕐᕉᖕᓂ ᐅᐃᓂᐱᐊᒡᒥ ᖃᐅᔨᓴᖅᑎᐅᔪᓄᑦ ᐃᒡᓗᓕᒑᕐᔪᖕᒧᑦ ᑕᖅᑭᐅᑉ ᐱᒋᐊᕐᓂᖓᓂ.
“ᐊᐱᕆᓚᐅᖅᐳᑦ ᐱᔪᒪᓇᔭᕐᒪᖔᑦᑕ ᓄᓇᓕᐊᕐᓂᕐᒧᑦ ᐊᒻᒪ ᐆᒃᑐᕋᒐᒃᓴᓕᐅᕐᓂᕐᒧᑦ ᑖᒃᑯᓇᙵᑦ...ᐊᒻᒪᓗ ᓇᓗᓇᐃᓚᐅᖅᐳᖓ ᐱᔪᒪᓇᔭᑦᑎᐊᕋᔭᕐᓂᑦᑎᓐᓂ,” ᐅᖃᓚᐅᖅᐳᖅ ᖃᐅᔨᓴᕐᓂᕐᒧᑦ ᐃᓕᓴᐃᔨ ᒋᓕᓐ ᐳᕌᑯᓪᐹᖕᒃ.
Donald Mullins, middle holding skin, is presented with a kangeroo skin sent to him by Australia's (Uncle) Bob Carveth by Jolene Ippiak, front, and back row from left, Josh Bruce, Landon Makpah, Ana Leishman, Jeff Kukkiak, Oliver Angoo, Marjorie Aggark and Adrianna Putulik during a trip on the land near Chesterfield Inlet on May 1, 2018. photo courtesy Glen Brocklebank
ᓯᓚᑦᑐᖅᓴᕐᕕᒡᔪᐊᖅ ᒫᓂᑑᐸᒥ ᖃᐅᔨᓴᖅᑏᑦ ᐊᓖᓯᐊ ᒍᔅᓯ ᐊᒻᒪ ᒥᓯᐅᓪ ᑲᒧᓚ ᐃᒡᓗᓕᒑᕐᔪᖕᒧᐊᖅᓯᒪᕗᑦ ᕿᔅᓯᐊᕐᓱᐊᕐᔪᒃᖢᑎᒃ ᐊᒻᒪ ᒫᓐᓇᓕᓴᐅᓛᖑᔪᒥ ᐳᓚᕋᕐᓂᖓ ᖃᐅᔨᓴᐃᓂᐅᓂᐊᓚᐅᖅᐳᖅ ᑕᕆᐅᑉ ᓯᑯᖓᓐᓂ, ᐊᒻᒪ ᐃᒪᐅᑉ ᑕᕆᐅᖃᕐᓂᖓᓂ ᐊᒻᒪ ᐅᖅᑰᓂᖓᓄᑦ.
ᐃᓕᓐᓂᐊᖅᑎᑦ ᐃᑲᔪᓚᐅᖅᐳᑦ ᓯᑯᒥ-ᐃᓕᒃᑯᐊᒥ ᐆᒃᑑᑎᒃᓴᓕᐊᓂᑦ ᐊᒻᒪ ᕿᓂᖅᖢᑎᒃ ᐊᒫᖃᙱᑦᑐᓂ ᐊᖃᔭᓂᑦ ᓄᓇᒦᑎᓪᓗᒋᑦ ᖃᐅᔨᓴᖅᑎᓂᑦ.
ᐳᕌᑯᓪᐹᖕᒃ ᐅᖃᓚᐅᖅᐳᖅ ᐃᑲᔪᓚᐅᕐᓂᖏᓐᓂ ᓄᓱᒃᓯᓂᖏᓐᓂ ᐃᓕᒃᑯᐊᖑᔪᓂᑦ, ᑲᑕᒃᑎᑦᑎᕆᓂᕐᒧᑦ ᐊᒻᒪ ᐱᓪᓗᓂᔾᔪᒃ ᐱᓕᕆᔾᔪᑕᐅᔪᓂ ᐆᒃᑐᕋᐃᔪᓂ ᐃᒪᐅᑉ ᐆᓇᕐᓂᖓᓂ ᐊᒻᒪ ᑕᕆᐅᖑᓂᖓᓂ, ᕿᒥᕐᕈᐊᖅᖢᓂᔾᔪᒃ ᓯᑰᑉ ᐊᒫᖃᙱᑦᑐᓂ ᐊᖃᔭᓂᑦ ᐊᒻᒪ ᐅᖃᓪᓚᐅᓯᕆᓪᓗᓂᔾᔪᒃ ᐆᒪᔪᐃᑦ ᐃᓕᖅᑯᓯᖏᓐᓂᒃ ᖃᐅᔨᓴᕐᓂᓂᑦ ᐊᒻᒪ ᓇᒦᓕᕐᓂᖏᓐᓂ ᐃᖃᓗᐃᑦ ᐃᒡᓗᓕᒑᕐᔪᖕᒥ ᐊᒻᒪ ᖃᓄᐃᓕᐅᕐᓂᖏᓐᓂ.
“ᐱᐅᓚᐅᖅᐳᖅ ᐱᓕᕆᓪᓚᕆᓚᐅᕋᑦᑕ ᓄᓇᒥ ᐱᓕᕆᓂᐅᔪᒥ,” ᐅᖃᓚᐅᖅᐳᖅ ᐳᕌᑯᓪᐹᖕᒃ. “ᖃᐅᔨᓴᖅᑎᒻᒪᕆᖕᓂ ᐃᓚᐅᖃᑕᐅᓚᐅᖅᐳᒍᑦ ᐊᒻᒪ ᐱᓕᕆᓪᓗᑕ ᐅᖃᓕᒫᖅᐸᒃᑕᑦᑎᓐᓂ ᐃᓕᓐᓂᐊᕈᑕᐅᔪᓄᑦ ᐅᖃᓕᒫᒐᕐᓂᑦ.”
“ᖁᕕᐊᒋᑦᑎᐊᓚᐅᖅᑕᕋ,” ᐃᓚᒋᐊᖅᓯᓚᐅᖅᐳᖅ. “ᑕᒪᓐᓇ ᐱᓕᕆᓕᒪᓂᖅ ᐱᕙᓪᓕᕈᑎᕐᔪᐊᖑᓚᐅᖅᐳᖅ ᐃᓕᓐᓂᐊᖅᑎᓄᑦ.”
ᐳᕌᑯᓪᐹᖕᒃ ᐅᖃᓚᐅᖅᐳᖅ ᖃᐅᔨᓴᖅᑏᑦ ᐱᓕᕆᑎᑦᑎᓚᐅᖅᐳᑦ ᐃᓕᓐᓂᐊᕐᕕᐅᑉ ᑲᑎᙵᓂᕆᔭᖓᓐᓂ ᓯᑯᒥ-ᐆᒃᑐᕋᕐᓂᕐᒧᑦ ᐊᒡᒐᒧᑦ ᐊᒻᒪ ᑕᒪᕐᒥᒃ ᓂᑭᑦᑖᓚᐅᖅᐳᑦ ᐅᐃᔾᔮᖅᑎᑦᑎᓂᕐᒥ ᐊᒡᒐᒧᑦ ᐃᑰᑕᕈᑕᐅᔪᒥ.
ᖃᐅᔨᓴᖅᑏᑦ ᐱᓕᕆᐊᒃᓴᖏᑦ ᓈᒻᒪᑦᑎᐊᓚᐅᖅᐳᖅ ᐃᓕᓐᓂᐊᖅᑏᑦ ᖃᐅᔨᓴᕐᓂᕐᒧᑦ 20 ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ ᑕᕆᐅᑉᒥ ᐱᓕᕆᔾᔪᓯᐅᔪᓄᑦ, ᑕᐅᑐᒃᑕᑐᐊᖃᑲᐃᓐᓇᖅᑐᒥ ᑕᕆᐅᕐᒧᑦ, ᐅᖃᓚᐅᖅᐳᖅ.
“ᐊᒥᓱᐊᓗᖕᓂ ᐱᓕᕆᓂᖃᓚᐅᖅᐳᒍᑦ ᐃᒪᕐᓄᑦ ᓯᕗᓂᐊᓂ, ᐅᖓᕙᕆᐊᖅᑎᑦᑎᕐᔪᐊᓚᐅᖅᑐᒥ ᐃᓱᒪᒋᔭᐅᓂᐅᔪᓄᑦ ᐅᖃᐅᓯᕆᓚᐅᖅᑕᒥᓂᑦ ᑕᑯᒃᓴᐅᑎᑦᑎᓂᐅᔪᒥ ᓴᓇᓚᐅᖅᑕᒥᓂᑦ ᓄᓇᓕᐊᓚᐅᖅᑳᖅᑎᓐᓇᑕ,” ᐅᖃᓚᐅᖅᐳᖅ ᐳᕌᑯᓪᐹᖕᒃ. “ᑕᐃᒫᒃ ᖃᐅᔨᒪᕙᕇᓚᐅᖅᐳᒍᑦ ᖃᐅᔨᓴᕐᓂᖓᓂ ᑐᓄᐊᓃᑦᑐᓂ ᖃᐅᔨᓴᕈᑎᓄᑦ ᐱᓕᕆᔭᐅᓂᐊᖅᑐᓂᑦ ᑕᖅᑳᓂ, ᐊᓱᐃᓛᒃ ᑕᐅᕗᙵᕈᓐᓇᓚᐅᖅᐳᒍᑦ ᐊᒻᒪ ᐱᓕᕆᓪᓚᕆᒡᓗᑎᒍᑦ.”
ᖃᔅᓯᒐᓚᖕᓂ ᐸᕐᓇᒍᑕᐅᔪᓂ ᒫᓐᓇᒥ ᐱᓕᕆᐊᖑᓂᖃᖅᐳᖅ ᐊᔭᐅᕆᔪᓂ ᐃᓄᖕᓂ ᒪᒃᑯᒃᑐᓂ ᐃᓚᐅᖃᑕᐅᓂᕐᒧᑦ ᖃᐅᔨᓴᕐᓂᐅᔪᓂᑦ, ᐅᖃᓚᐅᖅᐳᖅ ᐳᕌᑯᓪᐹᖕᒃ ᐱᓕᕆᖃᑎᖃᖅᓯᒪᔪᒥ ᑭᕙᓪᓕᕐᒥ ᖃᐅᔨᓴᕐᓂᕐᒧᑦ ᐃᓕᓴᐃᔨᐅᔪᓄᑦ ᓄᓇᓕᖕᓂ ᐊᒻᒪ ᖃᔅᓯᒐᓚᖕᓂ ᒐᕙᒪᑐᖃᒃᑯᓐᓂ ᐱᓕᕆᕝᕕᐅᔪᓂᑦ ᖁᕝᕙᖅᓴᐃᓂᕐᒧᑦ ᐅᖃᐅᓯᐅᔪᒥ.
“ᑭᓯᐊᓂ ᐃᓱᒪᓂᑐᐃᓐᓇᐅᔪᓐᓃᓚᐅᖅᐳᖅ ᑲᑎᙵᓂᕆᔭᑦᑎᓐᓄᑦ-ᒪᕐᕉᖕᓂ ᖃᐅᔨᓴᖅᑎᒻᒪᕆᐅᔪᓂ ᓯᕗᓂᑦᑎᓐᓂ ᐅᖃᐅᓯᖃᖅᑐᓂ ᖃᐅᔨᓴᕐᓂᕆᔭᒥᓂᑦ, ᐊᒻᒪ ᑕᑯᔪᓐᓇᒻᒪᕆᒃᖢᑕ,” ᐅᖃᓚᐅᖅᐳᖅ. “ᑕᒪᓐᓇ ᐱᓪᓚᕆᐅᕗᖅ ᐊᒃᑐᕈᓐᓇᖅᑕᑦᑎᓐᓂ.”
ᖃᐅᔨᓴᖅᑏᑦ ᐅᐃᒪᙱᑦᑎᐊᓚᐅᖅᐳᑦ ᐊᒻᒪ ᑲᒪᒋᔭᖃᑦᑎᐊᖅᖢᑎᒃ ᑭᐅᒑᖓᑕ ᐊᐱᖅᑯᑕᐅᔪᓂ ᐅᓂᒃᑲᕆᓂᕐᒧᑦ ᖃᓄᐃᓕᐅᕋᓱᖕᓂᖏᓐᓂ ᖃᐅᔨᓴᖅᑕᒥᓄᑦ. ᓱᓕᓂᐅᔪᖅ ᐊᕐᓇᐅᓂᖏᓐᓂ ᐱᕙᓪᓕᕈᑕᐅᓚᐅᕆᕗᖅ ᐃᓕᓐᓂᐊᖅᑎᓄᑦ ᑕᑯᒃᓴᐅᑎᑦᑎᓂᕐᒧᑦ ᐊᕐᓇᐅᓂᖓᓂ ᐊᖑᑕᐅᓂᖓᓂ ᐊᒡᕕᐊᕈᑎᖃᙱᓐᓂᖓᓂ ᖃᐅᔨᓴᕐᓂᕐᒧᑦ ᖃᐅᔨᓴᕈᑕᐅᔪᓄᑦ, ᐅᖃᓚᐅᖅᐳᖅ ᐳᕌᑯᓪᐹᖕᒃ.
“ᑕᐃᒪᑐᖅ ᐃᓕᓐᓂᐊᕐᕕᓕᒫᑦ ᐱᕕᒃᓴᖃᕈᓐᓇᓛᖅᐳᑦ ᑕᐃᒪᐃᑦᑐᒥ ᐊᓕᐊᓇᐃᑦᑐᒻᒪᕆᐊᓘᖕᒪᑦ,” ᐅᖃᓚᐅᖅᐳᖅ.