ᓄᕙᒡᔪᐊᕐᓇᖅ-19 ᐱᑎᑦᑎᓂᖃᓚᐅᖅᐳᖅ ᓄᖅᑲᖅᑎᑕᐅᓂᐅᔪᓂ ᐃᓕᓐᓂᐊᕐᕕᐊᕈᓯᕐᓂ ᒫᔾᔨᐅᑉ–ᕿᑎᖅᐸᓯᐊᓂ ᔫᓂᒧᑦ, ᑭᓯᐊᓂ ᓄᖅᑲᖅᑎᑦᑎᓯᒪᙱᓚᖅ ᐃᓕᓐᓂᐊᕐᕕᖕᓄᑦ ᐱᒋᐊᕐᓂᖓᓂ 2020-21–ᒧᑦ.
ᐅᔾᔨᖅᓱᑦᑎᐊᕐᓂᐅᔪᒥ ᐱᓕᕆᓂᖃᕋᓗᐊᖅᑎᓪᓗᒍ ᒥᒃᖠᒋᐊᖅᑎᑦᑎᓂᕐᒧᑦ ᐱᑕᖃᑐᐃᓐᓇᕆᐊᖃᖅᑐᓂ ᐅᓗᕆᐊᓇᕐᓂᐅᔪᓂ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᐊᖓᔪᖅᑳᑦ ᓲᕐᓗ ᔭᓂᐅᓪ ᑲᒥᒻᒪᓕᒃ ᐅᖅᓱᖅᑑᕐᒥᐅᑕᖅ ᐃᓗᐊᑦᑎᐊᙱᓚᖅ.
"ᖃᐅᔨᒪᔪᖓ ᐃᓱᒫᓗᓪᓗᐊᙱᓐᓂᓐᓂ ᑭᓯᐊᓂ ᓱᕈᓯᐅᕗᑦ, ᒪᒃᑯᒃᑐᑦ ᓱᕈᓰᑦ. ᐃᓚᖏᑦ ᓱᕈᓰᑦ ᐊᑲᐅᙱᓕᐅᕈᑎᖃᖅᐳᑦ ᐋᓐᓂᐊᖃᖅᑕᐃᓕᒪᓂᖏᓐᓄᑦ ᐊᒻᒪ ᖃᐅᔨᒪᙱᓪᓗᓂ ᖃᓄᐃᑦᑐᖃᕐᓂᕈᓂ," ᐅᖃᓚᐅᖅᐳᖅ ᑲᒥᒻᒪᓕᒃ, ᕿᑐᕐᙵᖃᖅᑐᓂ ᐱᒋᐊᓕᓵᖅᑐᓂ ᐊᒻᒪ ᖁᑦᑎᖕᓂᓕᖕᓄᑦ 1–ᒥ ᐊᒻᒪ ᓄᑲᖅᖠᐅᔪᓂ ᐊᔾᔨᒌᙱᑦᑐᓂ ᖁᑦᑎᖕᓂᓕᖕᓄᑦ.
ᐅᖃᓚᐅᖅᐳᖅ ᑕᐃᒪᑐᖅ ᐃᓕᓐᓂᐊᖅᑏᑦ ᐊᒻᒪ ᐃᓕᓴᐃᔩᑦ ᒪᑐᐊᖅᓯᒪᔭᕆᐊᖃᖅᑎᑕᐅᓗᑎᒃ.
ᐃᓕᓐᓂᐊᕐᓂᓕᕆᔨᒃᑯᑦ, ᐅᖃᖃᑎᖃᓚᐅᖅᑎᓪᓗᒋᑦ ᓄᓇᕘᑉ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ (CPHO), ᐱᔭᕆᐊᖃᖅᑎᑦᑎᙱᓚᖅ ᓱᕈᓯᕐᓂ 13 ᑐᖔᓂ ᒪᑐᐊᖅᓯᒪᓂᖏᓐᓄᑦ. ᐃᓕᓐᓂᐊᖅᑏᑦ ᐅᑭᐅᓕᖕᓂ 13 ᐅᖓᑖᓄᑦ ᐊᑐᕆᐊᖃᑐᐃᓐᓇᕆᐊᖃᖅᐳᑦ ᐋᓐᓂᐊᕕᖕᒥᙶᖏᑦᑐᓂ ᒪᑐᐊᕐᓂ ᐃᓚᖏᓐᓄᑦ ᖃᓄᐃᓐᓂᐅᔪᓄᑦ, ᓲᕐᓗ ᐃᑭᒪᑎᓪᓗᒋᑦ ᐃᓕᓐᓂᐊᕐᕕᖕᒧᑦ ᐸᓯᐅᔪᒥ, ᐊᒻᒪ ᑕᐃᒃᑯᐊ ᒪᑐᐊᑦ ᑐᓂᔭᐅᓂᐊᖅᐳᑦ ᐃᓕᓐᓂᐊᕐᕕᓂᑦ.
ᓇᐅᔮᓂ, ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔩᑦ (DEA) ᐃᒃᓯᕙᐅᑕᖓ ᐊᓯᓇ ᐊᖑᑎᓯᐊᖅ ᐅᖃᓚᐅᖅᐳᖅ ᐃᓚᖏᑦ ᐊᖓᔪᖅᑳᖑᔪᑦ ᓯᕘᕋᓂᐅᔪᒥ ᓯᕗᓂᐊᓂ ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᕐᕕᖕᒧᑦ–ᐅᑎᕐᓂᐊᕐᓂᖏᓐᓄᑦ ᐸᕐᓇᐅᑎᖓᓂ ᓴᖅᑭᑕᐅᓚᐅᖅᑳᕋᓂ, ᑭᓯᐊᓂ ᑕᐃᒪᙵᓂ ᓴᐃᒻᒪᕐᔫᒥᕗᑦ ᐊᑦᑕᓇᐃᖅᓯᒪᓂᐅᔪᒥ ᐋᖅᑭᐅᒪᑎᑕᐅᓂᐊᕐᓂᖓᓂ.
"ᖁᓱᓚᐅᖅᐳᑦ ᓯᕗᓪᓕᕐᒥ ᐊᒻᒪ (ᒫᓐᓇ) ᐃᓱᒫᓗᓗᐊᕈᓐᓃᖅᐳᑦ ... ᐃᓗᐊᕈᓱᓕᖅᐳᑦ," ᐅᖃᓚᐅᖅᐳᖅ.
ᐋᓕᓐ ᓯᒻ, ᐃᒃᓯᕙᐅᑕᐅᔪᖅ ᐃᖃᓗᒃᑑᑦᑎᐊᕐᒥ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔨᓄᑦ, ᐅᖃᓚᐅᖅᐳᖅ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔨᖁᑎᖏᑦ "ᖁᕕᐊᓱᒃᐳᑦ ᑐᕌᖓᓂᐅᔪᒥ ᑐᓂᔭᐅᔪᒥ ᐱᓕᕆᕝᕕᖓᓐᓂ."
ᐃᓚᒋᐊᖅᓯᓚᐅᖅᐳᖅ ᑭᐅᔾᔪᑎᑐᐊᖑᔪᓂ ᑕᑯᓯᒪᔭᖓᓐᓂ ᐊᖓᔪᖅᑳᖑᔪᓂ ᒫᓐᓇᒧᑦ ᑎᑭᖦᖢᒍ ᐃᓅᖃᑎᒌᓄᑦ ᓯᐊᒻᒪᖅᑎᑦᑎᓂᐅᔪᒥ ᐊᒻᒪ ᐱᐅᔫᓯᒪᕗᑦ, ᑕᑯᒃᓴᐅᑎᑕᐅᔪᒥ ᐅᓄᖅᓯᒋᐊᖅᑐᓂ ᐅᐸᖕᓂᐅᔪᓂ ᓯᕗᓪᓕᐊᔪᒥ ᐃᓕᓐᓂᐊᕐᕕᖕᒥ.
ᐅᖃᐅᓯᒃᓴᓕᐊᖑᔪᑦ ᐃᓕᓴᐃᔨᓂᒃ ᐊᔪᕐᓇᕐᓂᖅᓴᐅᕗᖅ ᐱᔭᕆᐊᒃᓴᖅ, ᐊᒃᓱᓪᓘᓐᓃᑦ ᐃᓄᓕᒫᓂᑦ. ᔮᓐ ᕚᓐᔪᐊᐃ, ᐊᖓᔪᖅᑳᖑᔪᖅ ᓄᓇᕗᒻᒥ ᐃᓕᓴᐃᔨᓄᑦ ᑲᑐᔾᔨᖃᑎᒌᖑᔪᓄᑦ, ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᐅᖃᐅᓯᒃᓴᓕᐊᓂ ᓴᖅᑭᑎᑦᑎᔾᔮᙱᓚᑦ ᑭᓯᐊᓂ ᐃᓕᓐᓂᐊᕐᓂᓕᕆᔨᒃᑯᑦ ᑐᓂᓯᒍᓂ ᓇᐃᓈᖅᓯᒪᔪᒥ ᐅᓂᒃᑳᓕᐊᒥ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔩᑦ ᐸᕐᓇᐅᑎᖏᓐᓂ ᓯᑎᐱᕆᒥ.
ᑎᓴᒪᓄᑦ-ᐱᓕᕆᓂᕐᒥ ᐸᕐᓇᐅᑎ
ᐃᓕᓐᓂᐊᕐᓂᓕᕆᔨᒃᑯᑦ ᐋᖅᑭᒃᓱᐃᓯᒪᕗᑦ ᑎᓴᒪᓂ–ᐱᓕᕆᓂᐅᔪᒥ ᐸᕐᓇᐅᑎᒥᒃ. ᓄᓇᕗᑦ ᐱᓕᕆᓂᖅ ᐊᑕᐅᓯᕐᒦᑉᐳᑦ ᐱᑕᖃᙱᒻᒪᑦ ᓄᕙᒡᔪᐊᕐᓇᖅ-19–ᖃᕐᓂᒥ ᓄᓇᕗᒻᒥ. ᑕᐃᒪᐃᒃᑲᓗᐊᖅᑎᓪᓗᒍ, ᐱᓕᕆᐊᖑᕙᓪᓕᐊᔪᓂ ᐱᓕᕆᐊᖑᕙᓪᓕᐊᕗᑦ ᑭᒡᓕᖃᖅᑎᑦᑎᓂᕐᒥ ᓴᖅᑭᔮᕐᕕᐅᓂᕐᒧᑦ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒧᑦ, ᓴᖅᑭᓐᓂᕈᓂ ᓄᓇᕗᒻᒥ. ᐃᓕᓐᓂᐊᕐᕕᖕᒥ ᓴᓗᒻᒪᖅᓴᐃᓂᕐᒥ ᐊᑐᖅᑕᐅᒐᔪᒃᑐᓂ ᐊᖏᒡᓕᒋᐊᖅᑕᐅᓯᒪᕗᑦ, ᑲᑎᙵᓂᖃᖅᑕᐃᓕᒪᓂᐊᖅᐳᑦ, ᐃᖃᐃᓕᓴᕐᕕᖕᒥ ᖃᓄᐃᓕᐅᕐᓂᐅᔪᑦ ᑭᒡᓕᖃᖅᑐᒥ ᐅᕝᕙᓘᓐᓃᑦ ᐊᒃᑐᖅᑕᐃᓕᒪᓂᖃᕐᓂᐅᔪᒥ, ᑕᐃᒃᑯᐊᑦᑕᐃᓐᓇᖅ ᑲᑎᙵᓂᐅᔪᓂ ᐃᓕᓐᓂᐊᖅᑎᓂᑦ ᑲᑎᙵᐃᓐᓇᕐᓂᐊᖅᐳᑦ ᐱᔪᓐᓇᕐᓂᓕᒫᖏᓐᓂ ᐊᒻᒪ ᐅᖓᓯᒌᒋᐊᖃᕐᓂᐅᔪᒥ ᐊᑐᖅᑕᐅᓂᐊᖅᐳᖅ.
ᐃᓕᓐᓂᐊᖅᑏᑦ ᐃᒃᓯᕚᕆᐊᖃᖅᐳᑦ ᓇᖕᒥᓂᖅ ᑭᐳᖏᓐᓂ, "ᐋᖅᑭᒃᓱᖅᓯᒪᔭᕆᐊᖃᖅᑐᓂ ᓇᓕᒧᑦᑐᒥ ᐃᓂᐅᔪᒥ ᑕᒪᒃᑭᓄᑦ ᑭᐳᓕᒫᖑᔪᓄᑦ ᐃᓕᓐᓂᐊᕐᕕᐊᕈᓯᕐᒥ ᐅᕝᕙᓘᓐᓃᑦ ᑭᐳᑯᑖᖕᓂ ᐊᖏᓛᖓᓂ ᐃᓂᒃᓴᐅᔪᒥ ᐊᑐᕈᓐᓇᖁᓪᓗᒋᑦ ᐃᓕᓐᓂᐊᖅᑎᐅᔪᓄᑦ ᐊᑦᑎᒃᓯᒋᐊᖅᓯᖏᓪᓗᓂ ᐅᓄᕐᓂᐅᔪᓂ ᐃᓕᓐᓂᐊᖅᑎᐅᔪᓂ ᐃᓕᓐᓂᐊᕐᕕᐊᕈᓯᕐᒥ," ᐅᖃᐅᓯᐅᓪᓗᓂ ᐃᓕᓐᓂᐊᕐᓂᓕᕆᔨᒃᑯᓐᓂ.
ᓄᓇᕗᑦ ᐃᓯᕐᓂᕈᓂ ᐱᓕᕆᓂᕐᒥ ᒪᕐᕈᖓᓂ ᐱᖓᓱᓄᓪᓘᓐᓃᑦ, ᐊᔾᔨᒌᙱᓐᓂᐅᔪᓂ ᐅᐸᖕᓂᐅᔪᓄᑦ ᓴᖅᑭᑎᑕᐅᔪᓐᓇᖅᐳᖅ, ᑕᐃᒪᐃᓐᓂᖓᓄᑦ ᐃᓕᓐᓂᐊᖅᑏᑦ ᐃᓕᓐᓂᐊᕆᐊᖅᐸᒡᓗᑎᒃ ᐊᔾᔨᒌᙱᓐᓂᐅᔪᓂ ᖃᖓᐅᓂᖓᓂ ᐅᓪᓗᕐᒥ ᐅᕝᕙᓘᓐᓃᑦ ᐊᓯᔾᔨᖅᑕᖅᑐᓄᑦ ᐅᓪᓗᓄᑦ.
ᐃᓕᓐᓂᐊᕐᕕᐅᔪᑦ ᒪᑐᔭᐅᓇᔭᖅᐳᑦ ᓄᓇᕗᑦ ᑎᑭᐅᑎᓐᓂᕈᓂ ᐱᓕᕆᓂᖅ ᑎᓴᒪᖓᓐᓄᑦ, ᐊᒻᒪ ᐅᖓᓯᒃᑐᒃᑯᑦ ᐃᓕᓴᐃᓂᐅᔪᒥ ᐃᓕᓐᓂᐊᖅᑎᓄᑦ ᐱᒋᐊᕋᔭᖅᐳᑦ.
ᒫᓐᓇᐅᔪᒥ, ᐊᖓᔪᖅᑳᖑᔪᑦ ᒪᓕᒋᐊᖃᖅᐳᑦ ᕿᑐᕐᙵᖏᓐᓂᑦ ᐃᓕᓐᓂᐊᕆᐊᕐᓂᕐᒧᑦ ᑭᓯᐊᓂ ᐊᑎᓕᐅᕆᓯᒪᒍᑎᒃ ᐊᖏᕐᕋᒥ–ᐃᓕᓐᓂᐊᖅᑎᑕᐅᓂᐅᔪᒥ ᐱᓕᕆᐊᖑᔪᒧᑦ ᓇᐅᑦᑎᖅᓱᖅᑕᐅᓗᑎᒃ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᓄᑦ ᑲᑎᒪᔨᓄᑦ.
ᓄᓇᕗᑦ ᐱᓂᐊᖅᐳᑦ $5.75 ᒥᓕᐊᓐᓂ ᒐᕙᒪᑐᖃᒃᑯᑎᒍᑦ ᐊᑦᑕᓇᙱᑦᑐᒥ ᐅᑎᕐᓂᖏᓐᓄᑦ ᐃᓕᓐᓂᐊᕐᕕᐊᕈᓯᕐᒧᑦ ᑮᓇᐅᔭᖃᖅᑎᑕᐅᓂᐅᔪᒥ ᐅᖃᐅᓯᐅᓚᐅᖅᑐᒥ ᐱᖓᔪᐊᓐᓂ. ᑮᓇᐅᔭᑦ ᐊᕕᒃᑐᖅᑕᐅᓚᐅᖅᐳᖅ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐊᒻᒪ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓄᑦ ᑐᙵᕕᖃᖅᑐᒥ ᐅᓄᕐᓂᐅᔪᓂ ᓱᕈᓯᕐᓂ ᐅᑭᐅᓕᖕᓂ 4–ᒥ 18–ᒧᑦ ᐃᓗᐊᓂ ᐊᑐᓂ ᐱᔪᓐᓇᕐᓂᖃᕐᓂᐅᔪᒥ. ᑮᓇᐅᔭᑦ ᐊᑐᖅᑕᐅᓂᐊᖅᐳᑦ ᐃᑲᔪᖅᓱᐃᓂᕐᒥ ᓱᖏᐅᔾᔨᓂᕐᒧᑦ ᐃᓕᑦᑎᓂᐅᔪᒧᑦ ᐃᓂᐅᔪᓄᑦ, ᐱᐅᓯᒋᐊᖅᑐᒥ ᐊᓂᕐᓂᒃᓴᒧᑦ ᐊᓂᐊᑎᑦᑎᕙᓪᓕᐊᓂᐅᔪᒥ, ᐊᖏᒡᓕᒋᐊᖅᑐᒥ ᐊᒡᒐᓄᑦ ᓴᓗᒻᒪᖅᓴᕐᓂᐅᔪᒧᑦ ᐊᒻᒪ ᓴᓗᒪᓂᐅᔪᒥ ᐊᒻᒪ ᓂᐅᕕᕐᓂᐅᔪᒥ ᓇᖕᒥᓂᖅ ᓴᐳᔾᔨᓯᒪᓂᕐᒧᑦ ᐊᓐᓄᕌᓂᑦ ᐊᒻᒪ ᓴᓗᒻᒪᖅᓴᐃᓂᕐᒧᑦ ᓱᓇᒃᑯᑖᓂᑦ, ᑕᒪᒃᑭᑦ ᐱᔭᕆᐊᖃᖅᑎᑕᐅᔪᓄᑦ ᓄᕙᒡᔪᐊᕐᓇᖅ-19–ᒧ ᐊᒥᓱᓄᑦ ᖃᓂᒻᒪᓐᓇᐅᔪᒧᑦ.